GO Abela ba Bangwe Boikarabelo—Ka Baka La’ng, Gona Bjang?

GO ABELA ba bangwe boikarabelo go thomile kgale pele Lefase le ka bopša. Jehofa o ile a hlola Morwa wa gagwe a nnoši gomme ka morago a mo diriša bjalo ka “mošomi yo a nago le bokgoni,” go hlola legohle. (Die. 8:22, 23, 30; Joh. 1:3) Ge Modimo a be a hlola batho ba babedi ba pele, o ile a ba botša gore, “tlalang lefase, Le le fenyê.” (Gen. 1:28) Mmopi o ile a nea batho boikarabelo bja go katološa Paradeise ya Edene e le gore e tlale lefase. Ee, go abela ba bangwe boikarabelo e bile seka sa mokgatlo wa Jehofa go tloga mathomong.

Go abela ba bangwe boikarabelo go akaretša’ng? Ke ka baka la’ng bagolo ba Bakriste ba swanetše go ithuta go abela ba bangwe boikarabelo bjo itšego ka phuthegong, gona ba ka dira seo bjang?

Go Abela ba Bangwe Boikarabelo go Bolela’ng?

“Go abela ba bangwe modiro” go bolela “go gafela ba bangwe boikarabelo; go kgetha motho yo mongwe gore a go emele; go nea motho yo mongwe bolaodi.” Ka gona, go abela ba bangwe modiro ke go akaretša ba bangwe gore ba phethe selo se itšego. Ka tlhago seo se lebiša go abelaneng bolaodi.

 Go letetšwe gore bao ba neilwego mediro ka phuthegong ya Bokriste ba phethe dikabelo tša bona, ba bege gore modiro o tšwela pele bjang le go boledišana ka mehla le yo a ba abetšego modiro. Lega go le bjalo, boikarabelo bjo bogolo ke bja ngwanabo rena yo a abago modiro. O swanetše go kgonthišetša gore modiro o tšwela pele gabotse gomme a nee keletšo ge e ba go nyakega. Lega go le bjalo, ba bangwe ba ka botšiša gore, ‘Ke ka baka la’ng o swanetše go abela ba bangwe modiro ge e ba o ka kgona go itirela wona ka bowena?’

Ke ka Baka La’ng o Swanetše go Abela ba Bangwe Modiro?

Nagana ka go bopa ga Jehofa Morwa wa gagwe a nnoši gomme a mo akaretša modirong o šaletšego wa go bopa. Ee, “dilo tše dingwe ka moka tše di lego magodimong le lefaseng di hlodilwe ka yena, dilo tše di bonagalago le dilo tše di sa bonagalego.” (Bakol. 1:16) Mmopi o be a ka dira dilo ka moka ka boyena, lega go le bjalo, o ile a kgetha go abelana le Morwa wa gagwe lethabo leo le tlišwago ke go fetša modiro o bilego le mafelelo a mabotse. (Die. 8:31) Se se thušitše Morwa go ithuta mo gontši ka dika tša Modimo. Ka tsela e itšego, Tate o dirišitše sebaka seo go tlwaetša Morwa wa gagwe yo a tswetšwego a nnoši.

Ge Jesu a be a le lefaseng, o ile a ekiša Tatagwe ka go abela ba bangwe boikarabelo. Ganyenyane-ganyenyane o ile a tlwaetša barutiwa ba gagwe. O ile a roma baapostola ba gagwe ba 12 gomme ka morago a roma ba bangwe gape ba 70 gore ba etelele pele modirong wa go ruta. (Luka 9:1-6; 10:1-7) Ka morago, ge Jesu a e-ya mafelong ao a bego a rometše baapostola ba gagwe go ona, o ile a hwetša go theilwe motheo o mobotse kudu wa ditaba tše dibotse. Ge a be a tloga lefaseng, Jesu o ile a abela barutiwa ba gagwe ba tlwaeditšwego gabotse boikarabelo bjo bohlokwa le go feta bjo bo akaretšago modiro wa lefase ka bophara wa go ruta.—Mat. 24:45-47; Dit. 1:8.

Go abela ba bangwe modiro le go ba tlwaetša e ile ya ba seka sa phuthego ya Bokriste. Moapostola Paulo o ile a botša Timotheo gore: “Dilo tšeo o di gafele banna ba botegago, bao le bona ba tlago go swanelega ka mo go lekanego go ruta ba bangwe.” (2 Tim. 2:2) Ee, bao ba nago le phihlelo ba swanetše go tlwaetša ba bangwe bao le bona ba tlago go tlwaetša ba bangwe.

Ka go abela ba bangwe karolo ya modiro wo a o neilwego, mogolo a ka hwetša lethabo leo le hwetšwago ke ba bangwe la go ruta le go diša. Ka ge bagolo ba lemoga gore bokgoni bja batho bo lekanyeditšwe, ba na le mabaka a oketšegilego a go kgopela ba bangwe go thuša ka go rwala boikarabelo bjo itšego ka phuthegong. Beibele e re: “Bohlale bo na le moipoetši.” (Die. 11:2) Go ipoetša go akaretša go lemoga mafokodi a rena. Ge o ka leka go dira dilo ka moka o nnoši, o ka lapa gomme wa tima lapa la gago nako yeo o bego o ka e fetša le lona. Ka gona, ke gabohlale go abelana le ba bangwe boikarabelo. Tšea ka mohlala ngwanabo rena yo a hlankelago bjalo ka molomaganyi wa sehlopha sa bagolo. A ka kgopela bagolo ba bangwe gore ba lekole ditšhelete tša phuthego. Ka go lekola direkhoto tša ditšhelete tša phuthego, bagolo ba ka itlwaelanya le maemo a tša ditšhelete a phuthego.

Gaešita le ge go abela ba bangwe modiro go ba thuša go ba le phihlelo le bokgoni bjo itšego bjo bohlokwa, go thuša gape le yo a abelago ba bangwe boikarabelo go lemoga bokgoni bja bao ba neilwego modiro. Ka gona, ka go abela ba bangwe modiro o swanetšego ka phuthegong, bagolo ba ka lekola bahlanka ba bodiredi “mabapi le ge e ba ba swanelega.”—1 Tim. 3:10.

Sa mafelelo, ka go abela ba bangwe modiro, bagolo ba ka bontšha gore ba bota ba bangwe. Paulo o ile a nea Timotheo tlwaetšo a dutše a šoma le  yena modirong wa boromiwa. Ba ile ba ba le tswalano ya kgaufsi. Paulo o ile a bitša Timotheo gore ke “ngwana wa kgonthe tumelong.” (1 Tim. 1:2) Ka mo go swanago, go ile gwa ba le tswalano e tiilego gare ga Jehofa le Jesu ge ba dutše ba šoma gotee go bopeng lefase le dilo tše dingwe ka moka. Ka go abela ba bangwe modiro, bagolo ba ka kgona go ba le tswalano ya kgaufsi le bona.

Lebaka Leo ka Lona ba Bangwe ba Dika-dikago go Aba Modiro

Gaešita le ge ba tseba mehola ya gona, bagolo ba bangwe ba hwetša go le thata go abela ba bangwe modiro, mohlomongwe ba dika-dika ka gobane go abela ba bangwe modiro go dira gore ba ikwe eka ba lahlegelwa ke taolo. Mohlomongwe ba nagana gore ka mehla ba swanetše go dula ba laola dilo. Lega go le bjalo, gopola gore pele Jesu a rotogela legodimong, o ile a laela baapostola ba gagwe go abela ba bangwe boikarabelo bjo bohlokwa a dutše a tseba gore ba tla dira modiro o fetago wa gagwe.—Mat. 28:19, 20; Joh. 14:12.

Bagolo ba bangwe ba ka ba ba ile ba abela ba bangwe modiro nakong e fetilego, eupša ba hwetša mošomo o se wa dirwa ka tsela e kgotsofatšago. Ba ka ikwa eka ba ka dira modiro woo ka tsela e kaone le ka go akgofa. Lega go le bjalo, ela hloko mohlala wa Paulo. O be a tseba bohlokwa bja go abela ba bangwe modiro, eupša o ile a lemoga gape gore bao ba tlwaetšwago ga se ka mehla ba tla dirago modiro ka tsela yeo a bego a e letetše. Leetong la gagwe la pele la boromiwa, Paulo o ile a tlwaetša Mareka yo monyenyane yo a bego a sepela le yena. Paulo o ile a nyamišwa kudu ke gore Mareka o ile tlogela modiro wo a bego a o abetšwe e le gore a boele gae. (Dit. 13:13; 15:37, 38) Lega go le bjalo, seo ga se sa ka sa thibela Paulo go tlwaetša ba bangwe. Bjalo ka ge go boletšwe, o ile a kgopela Mokriste yo monyenyane Timotheo gore a sepele le yena. Ge Timotheo a be a loketše go rwala boikarabelo bjo bogolwanyane, Paulo o ile a mo tlogela Efeso gomme a mo nea boikarabelo bja go kgetha bagolo ba phuthego le bahlanka ba bodiredi.—1 Tim. 1:3; 3:1-10, 12, 13; 5:22.

Ka mo go swanago, bagolo ba mehleng yeno ga se ba swanela go lahlela toulo ge ba tlwaetša bana babo rena feela ka gobane yo mongwe wa bona a sa arabele gabotse. Ke gabohlale e bile go bohlokwa go bota ba bangwe le go ba tlwaetša. Lega go le bjalo, ke dilo dife tšeo bagolo ba swanetšego go di gopola ge ba abela ba bangwe modiro?

Kamoo o ka Abago Modiro

Ge o aba boikarabelo, nagana ka bokgoni bja ngwanabo rena yo o nyakago go mo abela boikarabelo bjoo. Ge go be go hlokagala gore go hlokomelwe go abja ga dijo tša ka mehla, baapostola ba ile ba kgetha ‘banna ba šupago, ba tletšego moya o mokgethwa le bohlale.’ (Dit. 6:3) Ge e ba o ka kgopela motho yo a ka se botwego gore a dire modiro o itšego, a ka no palelwa ke go o dira. Ka gona mo abele mediro e menyenyane pele. Ge motho yo a bontšha gore a ka botwa, a ka kgona go swaragana le boikarabelo bjo oketšegilego.

Lega go le bjalo, go na le mo gontši go feta moo. Dika tša ba bangwe le bokgoni ga di swane. Le phihlelo e fapane go ya ka batho. Ngwanabo rena yo a nago le bogwera a ka šoma gabotse bjalo ka mohlokomedi, mola yo a kgonago go rulaganya dilo a ka hlankela gabotse ka go ba mothuši wa mongwaledi wa phuthego. Kgaetšedi yo a nago le bokgoni bja go kgabiša a ka dirišwa bakeng sa go kgabiša ka matšoba nakong ya segopotšo.

Ge o aba boikarabelo, hlalosa gobotse seo se letetšwego. Pele Johane Mokolobetši a romela baromiwa go Jesu, o ile a ba hlalosetša seo a bego a nyaka go se tseba le gore ba swanetše go botšiša ka tsela efe. (Luka 7:18-20) Ka lehlakoreng le lengwe, ge Jesu a laela barutiwa ba gagwe gore ba topele  marathana a dijo tšeo a ba neilego tšona ka mohlolo, o ile a ba tlogelela go dira phetho ya gore ba ka dira seo bjang. (Joh. 6:12, 13) Mo gontši go ithekgile ka mohuta wa modiro wo o dirwago le ditshwanelego tša mothuši. Bobedi yo a abago modiro le yo a abelwago modiro ba swanetše go kwešiša seo se letetšwego go bona le gore yo a abetšwego modiro o swanetše go bega tšwelopele ya modiro woo gakae. Bobedi bja bona ba swanetše go tseba gore ke dilo dife tšeo motho yo a abetšwego modiro a ka itirelago diphetho go tšona. Ge e ba modiro o swanetše go phethwa ka letšatši-kgwedi le itšego, motho yo a abetšwego modiro a ka tutueletšega gore a o phethe ge e ba go boledišanwa ka letšatši-kgwedi leo gomme go dumelelanwa ka lona, go e na le gore le fo bewa.

Motho yo a neilwego modiro o swanetše go newa tšhelete, ditlabakelo le thušo ge e ba go nyakega. E ka ba mo go holago go tsebiša ba bangwe ka thulaganyo yeo. Ge Jesu a be a nea Petro “dinotlelo tša mmušo wa magodimo,” o dirile bjalo barutiwa ba bangwe ba le gona. (Mat. 16:13-19) Ka mo go swanago, maemong a mangwe e ka ba mo gobotse go tsebiša phuthego gore ke mang yo a ikarabelago ka modiro o itšego.

Le gona, ke gabohlokwa gore o be šedi. Ge e ba o sa dutše o leka go laola modiro wo o o abetšego motho yo mongwe, go tla ba bjalo ka ge eka o mmotša gore, “Ge e le gabotse ga ke go bote.” Ke therešo gore ka dinako tše dingwe go ka direga gore dilo di se ke tša ba kamoo o bego o letetše gore di be ka gona. Lega go le bjalo, ge e ba ngwanabo rena yo a abetšwego modiro a newa tokologo e itšego, mohlomongwe o tla ba le boikholofelo gomme a hwetša phihlelo. Ke therešo gore seo ga se bolele gore o se ke wa tshwenyega ka gore motho yoo o phetha modiro woo bjang. Gaešita le ge a ile a nea Morwa wa gagwe boikarabelo bjo itšego modirong wa tlholo, Jehofa le yena o ile a swarega modirong woo. O ile a botša Mošomi yo a Nago le Bokgoni gore: “A re direng motho ka xo swanthša ka rena.” (Gen. 1:26) Ka gona, ka mantšu a gago le ditiro, thekga modiro woo o dirwago gomme o rete motho yo a abetšwego modiro woo bakeng sa maiteko a gagwe. Ge e ba le hlahloba mafelelo a modiro le le gotee, seo se ka mo thuša. Ge e ba modiro o sa phethwe gabotse, o se ke wa dika-dika go mo nea keletšo e oketšegilego goba go mo thuša. Gopola gore boikarabelo bjo bogolo ke bja gago ka ge e le wena o mo neilego modiro.—Luka 12:48.

Ba bantši ba ile ba holwa ke gore bagolo bao ba ba kgahlegelago e le ka kgonthe ba ba abele mediro ya ka phuthegong. Ka kgonthe, bagolo ka moka ba swanetše go ithuta lebaka leo ka lona ba swanetšego go abela ba bangwe mediro le gore ba ka dira seo bjang, e le gore ba ekiše Jehofa.

[Lepokisi go letlakala 29]

GO ABELA BA BANGWE MODIRO KE

• tsela ya go abelana le ba bangwe lethabo leo le tlišwago ke go phetha modiro o itšego

• tsela ya go phetha mediro e mentši

• pontšho ya bohlale le boipoetšo

• tsela ya go tlwaetša ba bangwe

• tsela ya go bontšha gore re bota batho ba bangwe

[Lepokisi go letlakala 30]

KAMOO O KA ABAGO MODIRO

• Kgetha batho ba swanelegelago modiro woo

• Hlalosa dilo gabotse goba o boledišane le bona gabotse

• Hlalosa gore ke eng seo se swanetšego go dirwa

• Ba nee ditlabakelo tše nyakegago

• Tshwenyega ka modiro woo gomme o bontšhe gore o a ba bota

• Ikemišetše gore boikarabelo bjo bogolo bo rwalwe ke wena

[Diswantšho go letlakala 31]

Go abela ba bangwe modiro go akaretša go ba nea modiro le go bona gore o tšwela pele bjang