Kamoo o ka Thabelago Mpho ya go se be Lenyalong

“BA ILE ba nyalana gomme ba phela ka lethabo go ya go ile.” Dikanegelo tše dintši tša bana di fela ka mantšu a swanago le ao. Difilimi le dipuku tšeo di bolelago ka lerato gantši di na le molaetša o swanago le woo—gore ge o nyetše goba o nyetšwe o tlo thaba e le ka kgonthe! Go feta moo, ditšo tše dintši di gatelela bafsa bao ba tšwilego mahlalagading gore ba tsene lenyalong. Ge Debby a be a le bogareng bja nywaga ya bo-20, o boletše gore: “Batho ba dira gore o nagane gore pakane feela ya ngwanenyana ke go tsena lenyalong. Ba dira gore o nagane gore bophelo bo thoma ka morago ga ge o tsene lenyalong.”

Motho wa moya ga a bone dilo ka tsela yeo ya bofofu. Le ge lenyalo e be e le selo se se tlwaelegilego go Baisiraele, Beibele e bolela ka banna le basadi bao ba ilego ba phela maphelo a atlegilego ba se lenyalong. Lehono, Bakriste ba kgetha bophelo bja go se tsene lenyalong, mola e le gore ba bangwe ba dula ba se lenyalong ka baka la maemo. Go sa šetšwe lebaka la bona la go se be lenyalong, go na le potšišo e bohlokwa e sa fetogego: Mokriste a ka dira bjang gore a thabele go se be lenyalong?

Jesu ka boyena o be a se a nyala, e lego seo se kwagalago ka baka la kabelo yeo a bego a e neilwe. O ile a botša barutiwa ba gagwe gore ba bangwe ba balatedi ba gagwe le bona ba be ba tla ‘amogela’ go se tsene lenyalong. (Mat. 19:10-20) Ka gona, Jesu o ile a bontšha gore ge e ba re nyaka go dira gore go se be ga rena lenyalong go atlege, re swanetše go amogela tsela ye ya bophelo ka menaganong le dipelong tša rena.

Na keletšo ya Jesu e šoma feela go motho yo a kgethilego go se be lenyalong bophelo bja gagwe ka moka e le gore a ka lebiša tlhokomelo tirelong ya Modimo? (1 Bakor. 7:34, 35) E sego bjalo. Ela hloko boemo bja Mokriste yo a ka ratago go tsena lenyalong eupša ga bjale a sa hwetše molekane yo a swanelegago. Kgaetšedi Ana, yo a lego nywageng ya bo-30 e bile a se lenyalong, o boletše gore: “Morago bjale, mošomi-gotee le nna yo e sego Hlatse o ile a nkgopela ke sa letela gore ke nyalane le yena. Ka tsela e itšego ke ile ka ikwa ke thabela seo, eupša ke ile ka gatelela maikwelo ao ka baka la gore ke nyaka go nyalana feela le motho yo a tla mpatametšago kgaufsi le Jehofa.”

Kganyogo ya go nyalwa “Moreneng” e thuša dikgaetšedi tše dintši tše bjalo ka Ana gore di pheme go nyalana le bao ba sa dumelego. * (1 Bakor. 7:39; 2 Bakor. 6:14) Ka go hlompha keletšo ya Modimo, ba amogela go se be lenyalong, bonyenyane go fihlela ba hwetša balekane. Ba ka dira se bjang ka katlego?

Ithute go Thabela Dilo Tšeo di Kgahlišago ka Boemo bja Gago

Bokgoni bja go amogela boemo bjoo bo ka bonagalago bo le thata bo ithekgile kudu ka boemo bja rena bja kgopolo. Carmen, e lego kgaetšedi yo a sego lenyalong yo a lego nywageng ya bo-40 o re: “Ke thabela seo ke nago le sona, gomme ga ke lore ka seo ke se nago sona.” Lega go le bjalo, go ka ba le dinako tšeo ka tšona re lewago ke bodutu goba re ikwago re gakanegile. Eupša go tseba gore dilo tše di swanago di diragalela mokgatlo wa bana babo rena ka moka lefaseng go ka re kgothaletša go tšwela pele ka kgodišego. Jehofa o thušitše ba bantši gore ba  thabele go se be lenyalong le go fenya ditlhohlo tše dingwe.—1 Pet. 5:9, 10.

Bontši bja bana babo rena le dikgaetšedi ba Bakriste ba lemogile mehola ya go se be lenyalong. Ester, e lego kgaetšedi yo a sego a nyalwa yo a lego bogareng bja nywaga ya bo-30 o re: “Ke dumela gore sephiri sa lethabo ke gore o kgone go thabela dilo tšeo di kgahlišago tša boemo le ge e le bofe bjoo o ikhwetšago o le go bjona.” Carmen o tlaleletša ka gore: “Ke dumela gore go sa šetšwe gore ke nyetšwe goba go se bjalo, ge e ba ke tsoma Mmušo pele, Jehofa a ka se ntime dilo tše dibotse.” (Ps. 84:11) O tšwetše pele ka gore: “Bophelo bja-ka bo ka no ba bo se ka tsela yeo ke bego ke rerile ka yona, eupša ke thabile gomme ke tla tšwela pele ke thabile.”

Mehlala ya ka Beibeleng ya Bao ba sa Kago ba Tsena Lenyalong

Morwedi wa Jafeta o be a se a ikemišetša go se nyalwe. Eupša keno ya tatagwe e ile ya mo gapeletša go hlankela sekgethweng go tloga bofseng bja gagwe. Ga go pelaelo gore kabelo ye yeo e bego e sa letelwa e ile ya fetoša merero ya gagwe gomme ya thulana le maikwelo a gagwe a tlhago. Ge a be a lemoga gore a ka se ke a nyalwa le go ba le lapa o ile a fetša dikgwedi tše pedi a lla. Lega go le bjalo, o ile a amogela boemo bja gagwe gomme ka go rata a hlankela moo bophelo bja gagwe ka moka. Basadi ba bangwe ba Baisiraele ba be ba mo reta ngwaga o mongwe le o mongwe bakeng sa boikgafo bja gagwe.—Baa. 11:36-40.

Ba bangwe bao ba bego ba opafetše ka tlhago mehleng ya Jesaya ba ka ba ba ile ba ikwa ba nyamišitšwe ke maemo a bona. Beibele ga e bolele gore ke eng seo se ba opafaditšego. Ka baka leo, ba be ba ka se be ditho tše feletšego tša phuthego ya Isiraele, goba ba tsena lenyalong gaešita le go ba le bana. (Doit. 23:1) Lega go le bjalo, Jehofa o be a kwešiša maikwelo a bona, gomme o ile a ba reta ka baka la go ikokobeletša ga bona kgwerano ya gagwe ka pelo tše feletšego. O ile a ba botša gore ba tla ba le “bodulô” le ‘leina le sa hwego’ ka ngwakong wa gagwe. Ka mantšu a mangwe, batho ba ba opafetšego bao ba botegago ba be ba tla ba le kholofelo e kgonthišeditšwego ya go thabela bophelo bjo bo sa felego nakong ya pušo ya Mesia. Jehofa o be a ka se ke a ba lebala.—Jes. 56:3-5.

Maemo a Jeremia a be a fapane kudu. Ka morago ga go nea Jeremia kabelo ya go ba moporofeta, Modimo o ile a mo laela gore a se ke a nyala ka baka la mehla e thata yeo a bego a phela go yona le ka baka la mohuta wa kabelo yeo a bego a e neilwe. Jehofa o ile a re: “O se kê wa tšea mosadi; O se kê wa tswala barwa le barwedi felô fá.” (Jer. 16:1-4) Beibele ga e bolele gore Jeremia o be a ikwa bjang ka ditaelo tšeo, eupša e re kgonthišetša gore o be a thabela lentšu la Jehofa. (Jer. 15:16) Nywageng e latetšego ka morago ga ge Jeremia a kgotleletše go rakelelwa mo go šoro ga Jerusalema mo go tšerego dikgwedi tše 18, ga go pelaelo gore o ile a bona bohlale bja go kwa taelo ya Jehofa ya gore a se nyale.—Dillo 4:4, 10.

Ditsela tša go Dira Gore Bophelo bja Gago bo Thabiše

Baanegwa ba ka Beibeleng bao go boletšwego ka bona ka mo godimo ba be ba se lenyalong, eupša ba ile ba thabela thekgo ya Jehofa gomme ba nwelela tirelong ya gagwe. Ka mo go swanago lehono, mediro e holago e ka re thuša go thabela bophelo. Beibele e boletše e sa le pele gore basadi ba bolelago ditaba tše dibotse e be e tla ba lekoko le legolo. (Ps. 68:11, bapiša le NW.) Gare ga lekoko le go na le dikgaetšedi tše dikete tšeo di sego lenyalong. Ka ge bodiredi bja tšona bo atlega, bontši bja tšona bo šegofaditšwe ka barwa le barwedi ba moya.—Mareka 10:29, 30; 1 Bathes. 2:7, 8.

 Ka morago ga go fetša nywaga e 14 a le tirelong ya bobulamadibogo, Loli o boletše gore: “Bobulamadibogo bo dira gore bophelo bja-ka bo be le morero. Ka ge ke le kgaetšedi yo a sego lenyalong, ke dula ke swaregile e bile ke le mafolofolo, e lego seo se nthušago go efoga go lewa ke bodutu. Mafelelong a letšatši le lengwe le le lengwe ke ikwa ke kgotsofetše ka gobane ke a bona gore bodiredi bja-ka bo thuša batho e le ruri. Seo se nthabiša kudu.”

Dikgaetšedi tše dintši di kgonne go ithuta leleme le lefsa gomme di kgonne go oketša bodiredi bja tšona ka go dira boboledi go batho bao ba bolelago leleme le šele. Ana yo go boletšwego ka yena pejana, o re: “Motseng wa gešo go na le batho ba bantši ba tšwago dinageng di šele.” O thabela go dira boboledi go batho ba bolelago Sefora. O tšwela pele gore: “Go ithuta leleme leo nka le dirišago go boledišana le bontši bja batho ba, go butše mojako o mofsa wa bodiredi gomme go dirile gore modiro wa-ka wa boboledi o kgahliše.”

Ka ge go se be lenyalong gantši go fokoletša motho boikarabelo, ba bangwe ba diriša boemo bja bona ka mo go holago ka go hlankela moo go nyakegago bagoeledi ba oketšegilego. Lidiana, e lego kgaetšedi yo a sego a nyalwa yo a lego bogareng bja nywaga ya bo-30 yo a hlanketšego dinageng di šele mo go nyakegago bagoeledi ba oketšegilego, o re: “Ke dumela ka go tia gore ge e ba o dula o swaregile tirelong ya Jehofa, go ba bonolo kudu gore o be le bagwera gomme o ikwe o ratwa. Ke na le bagwera ba paale ba bantši bao ba tšwago ditlogong le dinageng tše sa swanego, gomme segwera seo se dirile gore bophelo bja-ka bo thabiše.”

Beibele e bolela ka Filipi wa moebangedi yo a bego a na le barwedi ba bane ba bego ba se lenyalong bao e bego e le baporofeta. (Dit. 21:8, 9) Ba swanetše go ba ba be ba fišega go swana le tatago bona. Na ba ka be ba ile ba diriša mpho ya bona ya go porofeta bakeng sa go hola Bakriste-gotee le bona ba Kesarea? (1 Bakor. 14:1, 3) Le lehono, dikgaetšedi tše dintši tšeo di sego lenyalong di kgothatša ba bangwe ka go ba gona ka mehla dibokeng le ka go tšea karolo go tšona.

Ka lehlakoreng le lengwe, Lydia e be e le Mokriste wa lekgolong la pele la nywaga wa kua Filipi yoo Beibele e mo retago ka baka la go amogela ga gagwe baeng. (Dit. 16:14, 15, 40) Lydia—yo go ka diregago gore o be a se a nyalwa goba e le mohlologadi—o be a e-na le moya wa go nea woo o ilego wa dira gore a thabele segwera se putsago le balebeledi ba basepedi, ba bjalo ka Paulo, Silase le Luka. Go ba le moya o bjalo go tliša ditšhegofatšo tše swanago lehono.

Go Kgotsofatša Kganyogo ya go Nyaka go Ratwa

Ka ntle le go ba le mediro e nago le mohola yeo re e dirago bophelong, ka moka ga rena re na le kganyogo ya go nyaka go ratwa. Batho ba sego lenyalong ba ka kgotsofatša senyakwa seo bjang? Sa pele, Jehofa o dula a le gona ka mehla bakeng sa go re rata, go re matlafatša le go re theetša. Ka dinako tše dingwe Kgoši Dafida o be a ipona e le ‘sešuana e bile a lewa ke bodutu,’ lega go le bjalo, o be a tseba gore ka mehla a ka retologela go Jehofa bakeng sa thekgo. (Ps. 25:16; 55:22) O ngwadile gore: “Xobane tate le mmê bôná ba ntloxetše; ’me Wêna Morêna O a nkamoxêla.” (Ps. 27:10) Modimo o laletša bahlanka ba gagwe ka moka go batamela kgaufsi le yena, gore e be bagwera ba gagwe ba paale.—Ps. 25:14; Jak. 2:23; 4:8.

Go feta moo, borwarreng bja lefase ka bophara re ka hwetša bo-tate, bo-mma, barwarre le dikgaetšedi ba moya bao lerato la bona le tlago go dira gore re dule re thabile. (Mat. 19:29; 1 Pet.2:17) Bakriste ba bantši ba sego lenyalong ba kgotsofala kudu ge ba latela mohlala wa Doroka, yo a bego a “tletše ditiro tše dibotse le dimpho tša kgaugelo.” (Dit. 9:36, 39) Loli o hlalosa gore: “Kae le kae mo ke yago gona, ke tsoma bagwera ba kgonthe  ka phuthegong bao ba tlago nthata le go nthekga ge ke ikwa ke nyamile. E le gore ke matlafatše segwera se bjalo, ke leka go bontšha ba bangwe lerato le go ba kgahlegela. Ke hlanketše diphuthegong tše seswai tše di sa swanego gomme ka mehla ke kgonne go hwetša bagwera ba kgonthe. Gantši ga se dikgaetšedi tšeo ke lekanago le tšona ka nywaga—ka dinako tše dingwe ke batšofadi goba bafsa ba lego mahlalagading.” Phuthegong e nngwe le e nngwe, go na le bao ba nyakago lerato le segwera. Go kgahlegela ba bjalo e le ka kgonthe go ka ba thuša kudu gomme go ka kgotsofatša kganyogo ya rena ya go nyaka go rata le go ratwa.—Luka 6:38.

Modimo a ka se ke a Lebala

Beibele e bontšha gore Bakriste ka moka ba swanetše go ikgafa ka tsela e itšego ka baka la mehla e thata yeo re phelago go yona. (1 Bakor. 7:29-31) Bao ba sa tsenego lenyalong ka baka la go nyaka go latela taelo ya Modimo ya gore ba nyale goba go nyalwa feela Moreneng, ba swanelwa ke tlhompho e kgethegilego le go tšeelwa godimo. (Mat. 19:12) Lega go le bjalo, boikgafo bjo bjoo bo tšeelwago godimo ga bo bolele gore ba ka se ke ba thabela bophelo ka botlalo.

Lidiana o re: “Ke phela bophelo bjo bo kgotsofatšago bjo bo ithekgilego ka go ba le segwera le Jehofa le go ba tirelong ya gagwe. Ke tseba batho ba lego lenyalong ba thabilego le ba sego ba thaba. Therešo ye e nkgonthišetša gore lethabo la-ka ga se la ithekga ka taba ya ge e ba ke tla nyalwa ka moso goba go se bjalo.” Ka ge Jesu a bontšhitše, lethabo le ithekgile kudu ka go nea le go hlankela ba bangwe, e lego selo seo Bakriste ka moka ba ka se dirago.—Joh. 13:14-17; Dit. 20:35.

Ka ntle le pelaelo, selo se segolo seo se dirago gore re thabe ke go tseba gore Jehofa o tla re šegofatša ka baka la boikgafo bjo bongwe le bjo bongwe bjo re bo dirago bakeng sa leina la gagwe. Beibele e re kgonthišetša gore: “Modimo ga se yo a sa lokago moo a ka lebalago modiro wa lena le lerato leo le le bontšhitšego leineng la gagwe.”—Baheb. 6:10.

[Mongwalo wa tlase]

[Ntlhakgolo go letlakala 25]

“Ke thabela seo ke nago le sona, gomme ga ke lore ka seo ke se nago sona.”—Carmen

[Seswantšho go letlakala 26]

Loli le Lidiana ba thabela go hlankela moo go nyakegago bagoeledi ba oketšegilego

[Seswantšho go letlakala 27]

Modimo o laletša bahlanka ba gagwe ka moka gore ba batamele kgaufsi le yena