Ekiša Jesu​—Bolela ka Sebete

‘Re ile ra rapa sebete gore re bolele le lena ditaba tše dibotse.’—1 BATHES. 2:2.

1. Ke ka baka la’ng ditaba tše dibotse tša Mmušo di kgahliša gakaaka?

KE MO go thabišago gakaakaang go kwa ditaba tše dibotse! Le gona, ditaba tše di kgahlišago go feta ditaba ka moka ke ditaba tše dibotse tša Mmušo wa Modimo. Ditaba tše tše dibotse di re kgonthišetša gore tlaišego, malwetši, bohloko, manyami le lehu di tla fela. Di re nea kholofelo ya go phela ka mo go sa felego, di re utollela morero wa Modimo e bile di re bontšha kamoo re ka bago le tswalano ya lerato ka gona le yena. O ka nagana gore yo mongwe le yo mongwe a ka thabela go kwa ditaba tše tšeo Jesu a bego a di botša batho. Ka manyami, ga go bjalo.

2. Hlalosa polelo ya Jesu e rego: “Ke tletše go baka karogano.”

² Jesu o boditše barutiwa ba gagwe gore: “Le se ke la nagana gore ke tletše go tliša khutšo lefaseng; ke tletše go tliša tšhoša, e sego khutšo. Gobane ke tletše go baka karogano, go motho kgahlanong le tatagwe, le go morwedi kgahlanong le mmagwe, le go ngwetši kgahlanong le mmatswale. Ka kgonthe manaba a motho e tla ba batho ba ntlo ya gagwe.” (Mat. 10:34-36) Go e na le go amogela ditaba tše dibotse, batho ba bantši ba a di gana. Ba bangwe ba itira manaba a bao ba di bolelago, gaešita le ge e le ditho tša malapa a bona.

3. Ke’ng seo re swanetšego go ba le sona e le gore re phethe kabelo ya rena ya boboledi?

³ Re bolela ditherešo tše swanago le tšeo Jesu a bego a di bolela gomme ge batho ba di kwa, ba arabela ka tsela e swanago le yeo ba bantši ba ilego ba arabela ka yona mehleng ya Jesu. Se ke seo  re swanetšego go se letela. Jesu o itše go barutiwa ba gagwe: “Mohlanka ga a fete mong wa gagwe. Ge e ba ba ntlhomere, le lena ba tla le hlomara.” (Joh. 15:20) Dinageng tše dintši ga re tlaišwe ka go lebanywa, eupša re lebeletšana le batho ba nago le lenyatšo le ba hlokago kgahlego. Ka baka leo, re swanetše go ba le tumelo le sebete e le gore re kgotlelele modirong wa rena wa boboledi.—Bala 2 Petro 1:5-8.

4. Ke ka baka la’ng Paulo a ile a swanela ke go “rapa sebete” gore a dire boboledi?

⁴ Mohlomongwe ka dinako tše dingwe o hwetša go le thata go tšea karolo bodireding, goba dibopego tše dingwe tša bjona di ka bonagala di boifiša. Ge e ba go le bjalo, ga o noši. Moapostola Paulo e be e le mmoledi yo a nago le sebete le yo a bego a kwešiša ditherešo gabotse, lega go le bjalo le yena ka dinako tše dingwe o be a thatafalelwa ke go dira boboledi. Paulo o ile a ngwalela Bakriste ba Thesalonika gore: ‘Eitše ge re tlaišegile gomme re tlontlolotšwe (bjalo ka ge le tseba) re le Filipi, re ile ra rapa sebete ka Modimo wa rena gore re bolele le lena ditaba tše dibotse tša Modimo ka go katana mo gogolo.’ (1 Bathes. 2:2) Kua Filipi balaodi ba be ba bethile Paulo le modirišani ka yena Silase ka dikgati le go ba lahlela kgolegong gaešita le go ba tlemelela setokising. (Dit. 16:16-24) Lega go le bjalo, Paulo le Silase ba ile ba “rapa sebete” sa go tšwela pele ba bolela. Re ka ba ekiša bjang? Gore re kgone go araba, anke re ahla-ahleng seo se thušitšego bahlanka ba Modimo ba mehleng ya Beibele go bolela therešo ya mabapi le Jehofa ka sebete gomme re be re ithute kamoo re ka ekišago mohlala wa bona.

Go be go Nyakega Sebete Gore ba Lebeletšane le Lehloyo

5. Ke ka baka la’ng ka mehla go be go nyakega gore bao ba botegelago Jehofa ba be le sebete?

⁵ Mohlala o phagamego kudu wa go ba le sebete ke wa Jesu Kriste. Lega go le bjalo, ga e sa le go tloga mathomong a histori ya batho, ka mehla go ile gwa nyakega gore batho ka moka bao ba botegelago Jehofa ba be le sebete. Ka baka la’ng? Ka morago ga borabele bja Edene, Jehofa o ile a bolela e sa le pele gore go tla ba le lehloyo magareng ga bao ba hlankelago Modimo le bao ba hlankelago Sathane. (Gen. 3:15) Lehloyo le le ile la bonagala ka pela ge Abele, monna wa go loka, a bolawa ke ngwanabo. Ka morago, le ile la bontšhwa go Henoge, monna yo mongwe yo a botegago yo a ilego a phela pele ga Meetse-fula. O ile a porofeta gore Modimo o be a tlo tla le dimiriate tša Gagwe tše kgethwa go tlo phetha kahlolo go bao ba sa mmoifego. (Juda 14, 15) Ga go pelaelo gore molaetša wo o be o sa ratege. Batho ba be ba hloile Henoge gomme go molaleng gore ba be ba tlo mmolaya ge nkabe Jehofa a sa ka a mo tloša. A sebete se sekaakaang seo Henoge a se bontšhitšego!—Gen. 5:21-24.

6. Ke ka baka la’ng go be go nyakega gore Moše a be le sebete ge a be a bolela le Farao?

⁶ Le gona, nagana ka sebete seo se ilego sa bontšhwa ke Moše ge a be a bolela le Farao, mmuši yo a bego a sa lebelelwe feela e le moemedi wa medimo eupša e le modimo ka boyena, morwa wa modimo wa letšatši e lego Ra. Mohlomongwe le yena, go swana le bo-Farao ba bangwe, o be a rapela seswantšho sa gagwe. Lentšu la Farao e be e le molao; o be a buša ka go nea ditaelo. Farao e be e le mmuši yo a phagamego, a ikgogomoša e bile a e-na le hlogo e thata gomme o be a se a tlwaela go botšwa ke batho ba bangwe gore a dire eng. Moše, modiši yo a ikokobeditšego, o ile a tšwelela pele ga monna yo leboelela—a sa laletšwa e bile a sa amogelege. Le gona, ke’ng seo Moše a ilego a se bolela e sa le pele? Dikotlo tše bakago tshenyo. Eupša ke’ng seo a bego a se nyaka? Tumelelo ya gore makgoba a Farao a dimilione a lokollwe Egipita! Na go be go nyakega gore Moše a be le sebete? Ee, e le ka kgonthe!—Num. 12:3; Baheb. 11:27.

7, 8. (a) Ke diteko dife tšeo di ilego tša wela babotegi ba bogologolo? (b) Ke’ng seo se thušitšego bao ba phetšego mehleng ya pele ga Bokriste go bontšha sebete ge ba thekga borapedi bjo bo sekilego le go bo tšwetša pele?

⁷ Nywaga-kgolong e latetšego baporofeta le bahlanka ba bangwe ba Modimo bao ba botegago ba ile ba tšwela pele ba rapa sebete e le gore ba kgone go emela borapedi bjo bo sekilego. Lefase la Sathane le be le sa ba bontšhe botho. Paulo o re: “Ba ile ba kgatlwa ka mafsika, ba lekwa,  ba segakanywa ka disaga, ba hwa ka go bolawa ka tšhoša, ba sepela ba apere matlalo a dinku le a dipudi, mola ba be ba le bohloking, ba le masetlapelong, ba swerwe gampe.” (Baheb. 11:37) Ke’ng seo se ilego sa thuša bahlanka bao ba Modimo gore ba eme ba tiile? Ditemaneng tše sego kae pejana, moapostola o bontšhitše seo se ilego sa nea Abele, Aborahama, Sara le ba bangwe matla a go kgotlelela. O boletše gore: ‘Ga se ba hwetša phethagatšo ya dikholofetšo, eupša ka tumelo ba di bone di le kgole ba di amogela.’ (Baheb. 11:13) Ga go pelaelo gore baporofeta ba bjalo ka Eliya, Jeremia le ba bangwe bao ba botegago ba mehleng ya pele ga Bokriste, bao ba ilego ba emela borapedi bja therešo ka sebete, le bona ba ile ba thušwa go kgotlelela ka go dula ba tsepeletše dikholofetšo tša Jehofa.—Tito 1:2.

⁸ Babotegi bao ba mehleng ya pele ga Bokriste ba be ba lebeletše pele bokamosong bjo bo kgahlišago. Ka morago ga gore ba tsošwe, mafelelong ba tla phethagala gomme ba “[lokollwa] bokgobeng bja tshenyego” ka ditirelo tša boperisita tša Kriste Jesu le baperisita ba gagwe ba tlasana ba 144 000. (Baroma. 8:21) Go oketša moo, Jeremia le bahlanka ba bangwe ba nago le sebete ba Modimo ba mehleng ya bogologolo ba ile ba rapa sebete ka baka la kholofetšo yeo Jehofa a ilego a e holofetša Jeremia, e rego: “Le xe ba tlo lwa naxô’, ba ka se Xo kxônê, xobane e a lexo le wene ké Nna, xore ke Xo hlakodišê. Ó r’yalo Morêna.” (Jer. 1:19) Lehono, ge re nagana ka dikholofetšo tša Jehofa tša bokamoso bja rena le kgonthišetšo ya gagwe ya gore o tla re šireletša moyeng, le rena ka mo go swanago re a matlafatšwa.—Die. 2:7; bala 2 Bakorinthe. 4:17, 18.

Lerato le Tutueditše Jesu go Bolela ka Sebete

9, 10. Jesu o bontšhitše sebete ka ditsela dife ge a be a le pele ga (a) baetapele ba bodumedi, (b) sehlopha sa bahlabani, (c) moperisita yo a phagamego, (d) Pilato?

⁹ Jesu, Mohlala wa rena, o bontšhitše sebete ka ditsela tše di fapa-fapanego. Ka mohlala, le ge a be a hloilwe ke bao ba nago le matla le tutuetšo, Jesu ga se a ka a bebofatša molaetša wo Modimo a bego a nyaka batho ba o tseba. Ka sebete o ile a pepentšha baetapele ba matla ba bodumedi ka baka la go itokafatša ga bona le ka baka la dithuto tša bona tša maaka. Jesu o ile a nyatša banna bao ka go lebanya le ka go se pepetletše. Lebakeng le lengwe o ile a re: “Go madimabe lena bamangwalo le Bafarisei, baikaketši! gobane le swana le mabitla a takilwego, ao ka ntle a bonagalago a le botse eupša ka gare a tletše marapo a bahu le mehuta ka moka ya go se hlweke. Ka tsela e bjalo le lena, ruri ka ntle le bonagala le le baloki go batho, eupša ka gare le tletše boikaketši le go hloka molao.”—Mat. 23:27, 28.

¹⁰ Ge a be a latilwe ke sehlopha sa bahlabani serapeng sa Getsemane, Jesu ka sebete o ile a itsebiša go sona. (Joh. 18:3-8) Ka morago o ile a tlišwa pele ga lekgotla la Sanhedrine gomme a sekišwa ke moperisita yo a phagamego. Gaešita le ge a be a tseba gore moperisita yo a phagamego o be a nyaka lebaka la go mmolaya, Jesu ka sebete o ile a bolela gore ke Yena Kriste le Morwa wa Modimo. O ile a oketša ka gore ba tla mmona “a dutše ka letsogong le letona la matla a e-tla ka maru a legodimo.” (Mar. 14:53, 57-65) Nakwana ka morago ga moo, Jesu o ile a išwa a tlemilwe pele ga Pilato yoo a ka bego a ile a mo lokolla. Eupša Jesu o ile a fo ikhomolela gomme a se arabe ditatofatšo tšeo ba bego ba mo phara ka tšona. (Mar. 15:1-5) Dilo tše ka moka di be di nyaka sebete kudu.

11. Sebete se tswalana bjang le lerato?

 ¹¹ Go Pilato, Jesu o itše: “Ke tswaletšwe sona se gomme ke sona se ke se tletšego lefaseng, gore ke hlatsele therešo.” (Joh. 18:37) Jehofa o be a laetše Jesu gore a bolele ditaba tše dibotse gomme Jesu o ile a thabela go dira sona seo ka gobane o be a rata Tatagwe wa legodimong. (Luka 4:18, 19) Le gona, Jesu o be a rata batho. O be a tseba gore ba phela boima. Ka mo go swanago, ka baka la lerato la rena leo le tseneletšego la go rata Jehofa le moagišani, re kgona go bolela ka sebete.—Mat. 22:36-40.

Moya o Mokgethwa o re Matlafaletša go Bolela ka Sebete

12. Ke’ng seo se ilego sa thabiša barutiwa ba pele?

¹² Dibeke tše di latetšego ka morago ga lehu la Jesu, barutiwa ba ile ba thaba ge Jehofa a ba oketša ka barutiwa ba bafsa. Ka gona, ka letšatši le tee feela, Bajuda ba 3 000 le basokologi bao ba tšwago dinageng tše dintši bao ba bego ba tlile go keteka Pentekoste Jerusalema ba ile ba kolobetšwa! Ruri batho ba swanetše go ba ba ile ba bolela kudu ka seo se bego se direga! Beibele e re: “Poifo ya thoma go wela moya o mongwe le o mongwe gomme gwa thoma go direga mehlolo e mentši le dipontšho ka baapostola.”—Dit. 2:41, 43.

13. Ke ka baka la’ng bana babo rena ba ile ba rapelela gore ba be le sebete, gona mafelelo e bile afe?

¹³ Ba galefile, baetapele ba bodumedi ba ile ba golega Petro le Johane, ba ba bea kgolegong bošego ka moka gomme ba ba laela gore ba se ke ba bolela ka Jesu. Ka morago ga gore ba lokollwe, bobedi bja bona ba ile ba botša bana babo bona seo se diregilego gomme ka moka ga bona ba ile ba rapela mabapi le kganetšo yeo ba bego ba lebeletšane le yona, ba re: “Jehofa, . . . [dumelela] bahlanka ba gago go tšwela pele ba bolela lentšu la gago ka sebete ka moka.” Mafelelo e bile afe? “Ka moka ba tlala moya o mokgethwa ba bolela lentšu la Modimo ka sebete.”—Dit. 4:24-31.

14. Moya o mokgethwa o re thuša bjang ge re dira boboledi?

¹⁴ Ela hloko gore ke matla a moya o mokgethwa wa Modimo ao a ilego a thuša barutiwa go bolela Lentšu la Modimo ka sebete. Go botša batho ba bangwe therešo ka sebete, gaešita le bao ba ganetšago molaetša wa rena, ga se gwa ithekga ka matla a rena eupša go ithekgile ka matla a Modimo. Jehofa a ka re nea moya wa gagwe o mokgethwa ge e ba re mo kgopela gore a dire bjalo. Ka thušo ya Jehofa, le rena ka mo go swanago re ka bontšha sebete seo se nyakegago gore re fenye kganetšo le ge e le efe.—Bala Psalme 138:3.

Bakriste Lehono ba Bolela ka Sebete

15. Therešo e aroganya batho bjang lehono?

¹⁵ Mehleng ya rena, go swana le mehleng e fetilego, therešo e tšwela pele go aroganya batho. Ba bangwe ba arabela gabotse, mola ba bangwe ba sa kwešiše goba go hlompha tsela ya rena ya borapedi. Ba bangwe ba re swaya diphošo, ba a re kwera goba gaešita le go re hloya, go fo etša ge Jesu a boletše e sa le pele. (Mat. 10:22) Ka dinako tše dingwe, re ka hlaselwa ka tsebišo e fošagetšego le maaka a mašoro ao a gašwago ka mekero ya ditaba. (Ps. 109:1-3) Lega go le bjalo, go dikologa lefase batho ba Jehofa ba bolela ditaba tše dibotse ka sebete.

16. Ke phihlelo efe yeo e bontšhago gore go ba ga rena le sebete go ka fetoša pono ya bao re dirago boboledi go bona?

¹⁶ Go ba ga rena le sebete go ka dira gore batho ba fetoše pono ya bona ka molaetša wa Mmušo. Kgaetšedi yo mongwe kua Kyrgyzstan o bega gore: “Ge ke be ke le modirong wa boboledi, monna yo mongwe o ile a mpotša gore: ‘Ke dumela go Modimo, eupša e sego Modimo wa Bakriste. Ge o ka boa ka mo gape, ke tlo go lomiša ka mpša!’ Ka morago ga gagwe go be go e na le mpša e kgolo e tlemilwe ka ketane. Eupša nakong ya lesolo la go phatlalatša pampišana ya Kingdom News No. 37 e nago le sehlogo seo se rego ‘Bodumedi bja Maaka bo Kgaufsi le go Fela!,’ ke ile ka dira phetho ya go boela gape ntlong yona yela ka kholofelo ya gore ke tla kopana le setho se sengwe sa lapa la monna yoo. Lega go le bjalo, monna yoo ke yena a ilego a bula mojako. Kapejana ke ile ka rapela Jehofa, ke moka ka re go monna yoo: ‘Thobela, ke gopola poledišano yeo re bilego le yona matšatšing  a mararo a fetilego, le gona ke sa dutše ke gopola mpša ya gago. Eupša ke be ke nyaka go go nea pampišana ye ka gobane go swana le wena, ke dumela go Modimo o tee wa therešo. Kgaufsinyane Modimo o tla fediša madumedi ao a sa mo hlomphego. O ka ithuta mo gontši ka taba ye ka go bala pampišana ye.’ Ke ile ka makatšwa ke gore monna yoo o ile a amogela pampišana yeo ya Kingdom News. Ke moka, ke ile ka fetela ntlong e latelago. Metsotso e sego kae ka morago, monna yo o ile a tla go nna a kitima gomme a swere pampišana ya Kingdom News. O ile a re, ‘Ke e badile. Ke swanetše go dira’ng e le gore ke se ke ka welwa ke bogale bja Modimo?’” Thuto e ile ya thongwa le monna yoo gomme a thoma go ba gona dibokeng tša Bokriste.

17. Go ba le sebete ga kgaetšedi yo mongwe go ile gwa matlafatša bjang morutwana wa Beibele yoo a bego a e-na le poifo?

¹⁷ Le gona, go ba ga rena le sebete go ka tutuetša ba bangwe gore ba be le sebete. Kua Russia, kgaetšedi yo a bego a sepela ka pese o ile a nea monamedi yo mongwe makasine. Ge a sa re o a mo nea, monna yo mongwe o ile a emelela ka lebelo setulong sa gagwe gomme a tšea makasine ka letsogong la kgaetšedi, a o šošobanya gomme a o lahlela fase. O ile a roga kgaetšedi yoo a hlabile mašata gomme a mo gapeletša gore a mo nee aterese ya gagwe le go mo tšhošetša gore a se ke a dira boboledi motseng woo. Kgaetšedi yoo o ile a rapela Jehofa gomme a ikgopotša mantšu a Jesu a rego: “Le se ke la boifa bao ba bolayago mmele.” (Mat. 10:28) A theošitše maswafo, o ile a emelela gomme a re go monna yoo, “Nka se go nee aterese ya-ka gomme ke tlo tšwela pele ke dira boboledi mo motseng.” Ke moka o ile a fologa pese. Kgaetšedi yoo o be a sa tsebe gore morutwana wa gagwe wa Beibele o gona ka peseng yeo. Morutwana yoo o be a sa be gona dibokeng tša Bokriste ka baka la go boifa batho. Lega go le bjalo, ka morago ga go bona sebete sa kgaetšedi ya rena, morutwana yoo wa Beibele o ile a dira phetho ya gore o tla thoma go ya dibokeng.

18. Ke’ng seo se tlago go go thuša go bolela ka sebete go swana le Jesu?

¹⁸ Lefaseng le leo le aroganego le Modimo, go nyakega sebete gore re dire boboledi go swana le Jesu. Ke’ng seo se tlago go go thuša go dira bjalo? Lebelela pele nakong e tlago. Matlafatša lerato la gago la go rata Modimo le moagišani. Rapela Jehofa gore a go nee sebete. Ka mehla gopola gore ga o noši ka gobane Jesu o na le wena. (Mat. 28:20) Moya o mokgethwa o tla go matlafatša. Le gona, Jehofa o tla go šegofatša le go go thekga. Ka gona, eka re ka ba le sebete gomme ra re: “Jehofa ke mothuši wa-ka; nka se boife. Motho a ka ntira’ng?”—Baheb. 13:6.

O be o tla Araba Bjang?

• Ke ka baka la’ng bahlanka ba Modimo ba swanetše go ba le sebete?

• Mabapi le go ba le sebete, re ithuta’ng go . . .

Babotegi bao ba phetšego pele ga Kriste?

Jesu Kriste?

Bakriste ba lekgolong la pele la nywaga?

Bakriste-gotee le rena lehono?

[Dipotšišo tša Thuto]

[Seswantšho go letlakala 21]

Jesu ka sebete o ile a pepentšha baetapele ba bodumedi

[Seswantšho go letlakala 23]

Jehofa o re nea sebete sa gore re dire boboledi