Malapa a Bakriste​—Latelang Mohlala wa Jesu!

“Kriste o ile . . . a le tlogelela mohlala gore le latele dikgato tša gagwe kgaufsi.”—1 PET. 2:21.

1. (a) Morwa wa Modimo o tšere karolo bjang tlholong? (b) Jesu o ikwa bjang ka batho?

GE MODIMO a be a bopa legodimo le lefase, Morwa wa gagwe wa leitšibulo o be a e-na le yena e le “mohlankana [‘mošomi yo a nago le bokgoni,’ NW].” Le gona Morwa wa Modimo o ile a dirišana le Tatagwe ge Jehofa a be a hlola diphoofolo le dihlare tša mehuta e mentši e fapa-fapanego mo lefaseng le ge a be a beakanya Paradeise gore e tle e be legae la dibopiwa tšeo di bopilwego ka seswantšho sa Jehofa. Morwa wa Modimo, yo re mo tsebago e le Jesu, o be a rata bana ba batho.—Die. 8:27-31; Gen. 1:26, 27.

2. (a) Jehofa o neile batho ba sa phethagalago eng? (b) Beibele e hlahla batho mabapi le karolo efe ya bophelo?

² Ka morago ga ge batho ba pele ba babedi ba dirile sebe, go lopollwa ga batho sebeng go ile gwa fetoga karolo e bohlokwa ya morero wa Jehofa. Jehofa o ile a dira gore topollo yeo e kgonege ka go nea Kriste e le sehlabelo. (Baroma 5:8) Go feta moo, Jehofa o re neile Lentšu la gagwe e lego Beibele, leo le hlahlago batho gore ba kgone go lebeletšana gakaone le go se phethagale ga leabela. (Ps. 119:105) Ka Lentšung la gagwe, Jehofa o nea tlhahlo go thuša batho go boloka malapa a bona a thabile e bile a tiile. Mabapi le lenyalo, puku ya Genesi e bolela gore monna o swanetše go ‘gomarela mosadi wa gagwe gomme ba be nama e tee.’—Gen. 2:24.

3. (a) Ke’ng seo Jesu a ilego a se ruta mabapi le lenyalo? (b) Ke’ng seo re tlago go se ahla-ahla sehlogong se?

³ Nakong ya bodiredi bja gagwe bja lefaseng, Jesu o ile a gatelela gore lenyalo le be le reretšwe go ba la ka mo go sa felego. O ile a ruta ka melao  ya motheo yeo ge e ba e dirišwa, e bego e ka thuša malapa a mantši go efoga boemo bja kgopolo le boitshwaro tšeo di bego di ka bea lenyalo goba lethabo la lapa la bona kotsing. (Mat. 5:27-37; 7:12) Sehlogo se se tla ahla-ahla tše dingwe tša dithuto tša Jesu le mohlala wo a o beilego ge a be a le mo lefaseng tšeo di ka thušago banna, basadi, batswadi le bana go phela maphelo a thabišago le ao a kgotsofatšago.

Kamoo Monna wa Mokriste a Godišago Mosadi wa Gagwe

4. Ke go swana gofe mo go lego gona magareng ga Jesu le banna ba Bakriste?

⁴ Modimo o kgethile monna gore e be hlogo ya lapa, bjalo ka ge Jesu e le Hlogo ya phuthego. Moapostola Paulo o boletše gore: “Monna ke hlogo ya mosadi wa gagwe go etša ge Kriste le yena e le hlogo ya phuthego, e le yena mophološi wa mmele wo. Banna, tšwelang pele le rata basadi ba lena go etša ge Kriste le yena a ratile phuthego gomme a ikgafela yona.” (Baef. 5:23, 25) Ee, tsela yeo Jesu a bego a hlokomela balatedi ba gagwe ka yona e bea mohlala woo o bontšhago banna ba Bakriste tsela yeo ba swanetšego go swara basadi ba bona ka yona. A re hlahlobeng ditsela tše dingwe tšeo ka tšona Jesu a dirišago matla ao a a neilwego ke Modimo.

5. Jesu o ile a diriša matla a gagwe bjang go barutiwa ba gagwe?

⁵ Jesu o be e-na le ‘moya o boleta le pelo e ikokobeditšego.’ (Mat. 11:29) E bile e be e le monna wa go gata mogato ge go nyakega. Ga se a ka a tshediša boikarabelo bja gagwe mahlo. (Mareka 6:34; Johane 2:14-17) Ka botho o ile a nea barutiwa ba gagwe keletšo leboelela ge go be go nyakega. (Mat. 20:21-28; Mar. 9:33-37; Luka 22:24-27) Lega go le bjalo, Jesu o be a sa ba kgadimole goba go ba nyenyefatša, le gona o be a sa dire gore ba ikwe ba sa ratwe goba ba palelwa ke go phetha seo a bego a ba ruta sona. Go e na le moo, o be a ba reta le go ba kgothatša. (Luka 10:17-21) Ka baka la lerato le botho bjoo a bego a ba swara ka bjona, ruri ga go makatše ge barutiwa ba gagwe ba be ba mo hlompha!

6. (a) Monna a ka ithuta’ng tseleng yeo Jesu a bego a swara barutiwa ba gagwe ka yona? (b) Petro o nea banna kgothatšo efe?

⁶ Mohlala wa Jesu o ruta banna gore bohlogo bja Bokriste ga se maemo a go laola ka thata. Go e na le moo, bo bontšhwa ka tlhompho le lerato la boikgafo. Moapostola Petro o kgothaleditše banna go ekiša ditsela tša Jesu tše lerato ka go ‘dula le basadi ba bona ka mokgwa o swanago,’ ba “ba nea kgodišo.” (Bala 1 Petro 3:7.) Ka gona, monna a ka diriša bjang matla a gagwe a taolo gomme ka nako e swanago a swara mosadi wa gagwe bjalo ka motho yo a swanelwago ke kgodišo?

7. Monna a ka godiša mosadi wa gagwe ka tsela efe? Bontšha.

⁷ Tsela e nngwe yeo monna a ka godišago mosadi wa gagwe ka yona ke ka go theetša ka kelohloko pono ya gagwe le go naganela maikwelo a gagwe pele a dira diphetho tšeo di kgomago lapa. Mohlomongwe go swanetše go dirwa phetho mabapi le go huduga goba go fetoša mošomo goba mabapi le ditaba tša letšatši le letšatši tše bjalo ka lefelo leo go ka iwago go lona bakeng sa maikhutšo goba go fokotša ditshenyagalelo  tša lapa e le gore lapa le kgone go lebeletšana le maemo a thata a tša ditšhelete. Ka ge lapa le tla kgomega, e tla ba mo go holago le go bontšha botho ge monna a ka theetša pono ya mosadi wa gagwe, ka ge e ka mo thuša go dira phetho e leka-lekanego le e naganelago le gona go tla ba bonolo gore a mo thekge. (Die. 15:22) Banna ba Bakriste bao ba godišago basadi ba bona ga se feela gore basadi ba bona ba a ba rata le go ba hlompha, eupša sa bohlokwa le go feta, ba amogelwa ke Jehofa.—Baef. 5:28, 29.

Kamoo Mosadi a Bontšhago Monna wa Gagwe Tlhompho e Tseneletšego

8. Ke ka baka la’ng mohlala wa Efa o swanetše go efogwa?

⁸ Jesu ke mohlala o phethagetšego woo basadi ba Bakriste ba ka o ekišago tabeng ya go ikokobeletša bolaodi. A phapano e kgolo gakaakang e lego gona magareng ga pono ya gagwe ka bolaodi le boemo bja kgopolo bjo bo ilego bja bontšhwa ke mosadi wa pele! Efa o paletšwe ke go bea mohlala o mobotse woo basadi ba nyetšwego ba ka o latelago. O be a e-na le hlogo yeo e kgethilwego ke Modimo yeo Jehofa a bego a e diriša go nea ditaelo. Lega go le bjalo, Efa ga se a ka a hlompha thulaganyo ye. O paletšwe ke go amogela ditaelo tšeo Adama a mmoditšego tšona. (Gen. 2:16, 17; 3:3; 1 Bakor. 11:3) Ke therešo gore Efa o ile a forwa; lega go le bjalo, o be a swanetše go botšiša monna wa gagwe ge e ba a swanetše go kgolwa lentšu leo le bego le bolela gore le mmotša dilo tšeo ‘Modimo a di tsebago.’ Go e na le moo, o ile a iphagamiša gomme a laola monna wa gagwe.—Gen. 3:5, 6; 1 Tim. 2:14.

9. Jesu o bea mohlala ofe mabapi le boikokobetšo?

⁹ Go fapana le Efa, Jesu o beile mohlala o mobotse wa go ikokobeletša Hlogo ya gagwe. Boemo bja gagwe bja kgopolo le tsela ya gagwe ya bophelo di bontšha gore ga se a ka “a nagana ka go thopa, e lego, gore o swanetše go lekana le Modimo.” Go e na le moo, “o ile a itlhohlora a ba ka sebopego sa mohlanka.” (Bafil. 2:5-7) Lehono, e le Kgoši e bušago, Jesu o sa na le boemo bjoo bja kgopolo. O ikokobeletša Tatagwe dilong ka moka gomme o thekga bohlogo bja Gagwe.—Mat. 20:23; Joh. 5:30; 1 Bakor. 15:28.

10. Mosadi a ka thekga bohlogo bja monna wa gagwe bjang?

¹⁰ Mosadi wa Mokriste o dira gabotse ge a ekiša Jesu ka go thekga bohlogo bja monna wa gagwe. (Bala 1 Petro 2:21; 3:1, 2.) Ela hloko boemo bjoo go bjona a nago le sebaka sa go dira bjalo. Morwa wa gagwe o kgopela tumelelo ya go dira selo se sengwe seo se nyakago tumelelo ya batswadi. Ka ge batswadi ba sa ka ba boledišana ka taba ye pele, e ka ba mo gobotse gore mma a botšiše gore, “Na o kgopetše tatago?” Ge morwa a se a kgopela tatagwe, mosadi o swanetše go boledišana le monna wa gagwe pele go dirwa phetho. Go feta moo, mosadi wa Mokriste ga se a swanela go thulana le monna wa gagwe goba go hlasela pono ya gagwe pele ga bana. Ge e ba a sa dumelelane le monna wa gagwe ka selo se itšego, o tla boledišana le yena ka thoko.—Baef. 6:4.

 Mohlala Woo Jesu a o Beetšego Batswadi

11. Jesu o beetše batswadi mohlala ofe?

¹¹ Gaešita le ge Jesu a se a ka a nyala goba go ba le bana, o beetše batswadi ba Bakriste mohlala o mobotse. Bjang? Ka lerato le go se fele pelo o ile a ruta barutiwa ba gagwe ka mantšu le ka mohlala. O ile a ba bontšha kamoo ba ka phethago taelo yeo a ba neilego yona. (Luka 8:1) Tsela yeo Jesu a bego a swara barutiwa ba gagwe ka yona e bontšhitše barutiwa ba gagwe kamoo ba swanetšego go swarana ka gona.—Bala Johane 13:14-17.

12, 13. Ke’ng seo se nyakegago ge e ba batswadi ba nyaka go godiša bana bao ba boifago Modimo?

¹² Bana ba na le mokgwa wa go ekiša batswadi ba bona, e ka ba dilong tše botse goba tše mpe. Ka gona, batswadi ipotšišeng gore: ‘Ke mohlala ofe woo re o beelago bana ba rena ge go tliwa nakong yeo re e fetšago re bogetše thelebišene le go ithabiša gotee le yeo re e fetšago re ithuta Beibele le go tšea karolo tirelong ya tšhemo? Ge e le gabotse, ke dilo dife tšeo di tlago pele ka lapeng la rena? Na re bea mohlala o mobotse ka go thea maphelo le diphetho tša rena borapeding bja therešo?’ Molao wa Modimo o swanetše go ba ka dipelong tša batswadi pele ge e ba ba nyaka go godiša bana bao ba boifago Modimo.—Doit. 6:6.

¹³ Ge e ba batswadi ba katanela go diriša melao ya motheo ya Beibele ditabeng tša letšatši le letšatši, bana ba tla bona seo. Mantšu a batswadi le thuto ya bona di tla tutuetša bana. Lega go le bjalo, ge bana ba bona batswadi ba sa latele ditekanyetšo tšeo ba ba beetšego tšona, ba ka fihlelela phetho ya gore melao ya motheo ya Beibele ga e bohlokwa goba gore e šiilwe ke nako. Ka baka leo, bana ba ka ineela kgateletšong ya lefase.

14, 15. Ke dilo dife tše bohlokwa tšeo batswadi ba swanetšego go di hlagolela baneng ba bona gomme tsela e nngwe yeo ba ka dirago se ka yona ke efe?

¹⁴ Batswadi ba Bakriste ba lemoga gore go godiša ngwana ga go akaretše feela go mo nea dilo tše di bonagalago. Ka gona, e ka se be gabohlale go ruta ngwana go phegelela dipakane tšeo di ka mo thušago go fihlelela dilo tše di bonagalago feela. (Mmo. 7:12) Jesu o rutile barutiwa ba gagwe go tsoma mmušo pele le toko ya gagwe. (Mat. 6:33) Ka gona, batswadi ba Bakriste le bona ba swanetše go ekiša Jesu gomme ba katanele go hlagolela kganyogo ya go phegelela dilo tša moya baneng ba bona.

¹⁵ Tsela e nngwe yeo batswadi ba ka dirago se ka yona ke ka go hweletša bana ba bona dibaka tša go gwerana le bao ba lego tirelong ya nako e tletšego. Naganang gore e tla ba mo go kgothatšago bjang ge bafsa ba lego mahlalagading ba tlwaelana le babulamadibogo goba molebeledi wa tikologo le mosadi wa gagwe. Baromiwa, bana babo rena le dikgaetšedi bao ba hlankelago Bethele le bao ba tšeago karolo medirong ya kago ya ditšhaba-tšhaba bao ba le etelago ba ka bolela ka phišego ka lethabo leo le tlišwago ke go hlankela Jehofa. Ga go pelaelo gore baeti ba bjalo ba tla ba botša diphihlelo tše kgahlišago. Mohlala wa bona wa tirelo ya boikgafo o ka thuša bana ba lena gore ba dire diphetho tše bohlale, ba ipeele dipakane tšeo di retegago gomme  ba hwetše thuto e swanetšego bakeng sa gore ba kgone go itlhokomela ge ba le tirelong ya nako e tletšego.

Bana—Le tla Thušwa Ke’ng go Latela Mohlala wa Jesu?

16. Jesu o ile a hlompha batswadi ba gagwe ba lefaseng le Tatagwe wa legodimong bjang?

¹⁶ Bana, le lena Jesu o le beetše mohlala o mobotse. Jesu o ile a hlokomelwa ke Josefa le Maria gomme o be a ba theetša. (Bala Luka 2:51.) O ile a lemoga gore go sa šetšwe go se phethagale ga bona, Modimo o be a ba neile boikarabelo bja go mo hlokomela. Ka baka leo, o be a swanetše go ba hlompha. (Doit. 5:16; Mat. 15:4) Ge a gotše, ka mehla Jesu o be a dira dilo tšeo di kgahlago Tatagwe wa legodimong. Seo se be se bolela go ganetša diteko. (Mat. 4:1-10) Lena bana ka dinako tše dingwe le ka lekega gore le se theetše batswadi ba lena. Ka gona, ke’ng seo se ka le thušago go latela mohlala wa Jesu?

17, 18. (a) Ke dikgateletšo dife tšeo bafsa ba lebeletšanago le tšona sekolong? (b) Bafsa ba ka kgona go fenya diteko ge e ba ba gopola’ng?

¹⁷ Mohlomongwe bontši bja bana bao o tsenago le bona sekolo ga ba hlomphe ditekanyetšo tša Beibele. Ba ka leka go go tutueletša go tšea karolo medirong e belaetšago le go go kwera ge o gana. Na barutwana-gotee le wena ba go reile maina a go go kwera ka gobane o gana go tšea karolo medirong e itšego? Ge e ba go le bjalo, o itshwara bjang? O a tseba gore ge e ba o ba dumelela gore ba go tšhošetše gomme o dira dilo tšeo ba di dirago, o tla nyamiša batswadi ba gago le Jehofa. Go tla direga’ng ka wena ge o latela barutwana-gotee le wena? Mohlomongwe o ipeetše dipakane tše itšego, tše bjalo ka go ba mmulamadibogo goba mohlanka wa bodiredi, go hlankela moo go nyakegago bagoeledi ba oketšegilego ba Mmušo goba go hlankela Bethele. Na go gwerana le barutwana-gotee le wena go tla go thuša go fihlelela dipakane tša gago?

¹⁸ Na ka dinako tše dingwe lena bafsa ba lego ka phuthegong ya Bokriste le ikhwetša le le maemong ao a lekago tumelo ya lena? Le arabela bjang go ona? Naganang ka Jesu, mohlala wa lena. O ile a gana go ineela ditekong gomme a swarelela ka go tia go seo a bego a tseba gore se lokile. Go gopola se go tla le nea matla a go botša barutwana-gotee le lena ka mo go kwagalago gore ga le nyake go dira le bona selo seo le tsebago gore se fošagetše. Go swana le Jesu, dulang le tsepeletše tebelelo ya go hlankela Jehofa le go mo kwa ka mo go sa felego.—Baheb. 12:2.

Tsela ya go Hwetša Lethabo la Lapa

19. Ke tsela efe ya bophelo yeo e tlišago lethabo la kgonthe?

¹⁹ Jehofa Modimo le Jesu Kriste ba kganyogela batho dilo tše kaone. Gaešita le ge re sa phethagala, go a kgonega gore re hwetše tekanyo e itšego ya lethabo. (Jes. 48:17, 18; Mat. 5:3) Jesu o rutile ditherešo tša bodumedi tšeo di bopago motheo wa lethabo la batho, eupša ga se a ruta barutiwa ba gagwe seo feela. Jesu o ile a ba ruta gape ka tsela e kaone ya go phela. Go feta moo, o beile mohlala o mobotse wa go phela bophelo bjo bo leka-lekanego le go ba le tshekamelo e leka-lekanego ya monagano. Ka moka ga rena, go sa šetšwe gore karolo ya rena ke efe ka lapeng, re ka holwa ke go latela mohlala wa gagwe. Ka gona, banna, basadi, batswadi le bana, latelang mohlala wa Jesu! Go diriša dithuto tša Jesu le go ekiša mohlala wa gagwe ke tsela ya go hwetša bophelo bjo bo thabišago le bjo bo kgotsofatšago bja lapa.

O be o tla Araba Bjang?

• Banna ba swanetše go diriša bohlogo bja bona bjoo ba bo neilwego ke Modimo bjang?

• Mosadi a ka ekiša mohlala wa Jesu bjang?

• Batswadi ba ka ithuta’ng tseleng yeo Jesu a bego a swara barutiwa ba gagwe ka yona?

• Bafsa ba ka ithuta’ng mohlaleng wa Jesu?

[Dipotšišo tša Thuto]

[Seswantšho go letlakala 8]

Pele a dira phetho yeo e kgomago lapa, monna yo lerato o tla dira’ng?

[Seswantšho go letlakala 9]

Ke boemo bofe bjoo bo neago mosadi sebaka sa go thekga bohlogo bja monna wa gagwe?

[Seswantšho go letlakala 10]

Bana ba ekiša mekgwa e mebotse ya batswadi ba bona