Peu ya Therešo e Fihla Metseng e Lego Lekatana

REPABLIKI ya Tuva yeo e lego kua Russia e ka borwa bja Siberia gomme Mongolia e ka borwa le bohlabela bja yona. Batho ba bantši kua Tuva ba dula metseng e lego lekatana yeo go lego thata go e fihlelela ka molaetša wa Mmušo. Lega go le bjalo, nakong e itšego e fetilego, sehlopha sa batho se ile sa tla motseng-mošate wa Tuva e lego Kyzyl se e-tšwa dikarolong tše lego ka ntle ga Tuva go tlo ba gona seminareng. Maria, mmulamadibogo yo a dulago Kyzyl, o ile a kwa gore sehlopha seo se tlile gomme a lemoga gore seo ke sebaka sa go bolela le batho ba bao gantši ba sa kwego ditaba tše dibotse.

Maria o hlalosa seo se diregilego ka gore: “Sekolong seo ke rutago go sona go ile gwa rulaganywa seminari yeo e bego e le mabapi le tšhomišo-mpe ya dihlare-tagi le dino-tagi. Batho ba e ka bago ba 50 ba tšwago metseng e lego lekatana ya Tuva ba be ba tlo ba gona. Sehlopha seo se be se akaretša barutiši, dingaka tša monagano, bahlankedi ba tša tlhokomelo ya bana le ba bangwe.” Seboka se se ile sa nea Maria sebaka se sebotse sa go dira boboledi, eupša go be go ka se be bonolo gore a dire bjalo. O hlalosa gore: “Ka tlhago ke motho yo a nago le dihlong gomme ke thatafalelwa ke go nea bohlatse bjo bo sa rulaganyetšwago. Lega go le bjalo, ke ile ka rapelela sebete go Jehofa gore ke fenye poifo ya-ka le gore ke diriše sebaka se go nea bohlatse.” Na o ile a atlega?

Maria o tšwela pela ka gore: “Ke ile ka hwetša makasine wa Phafoga! woo o bego o bolela ka go boifa dilo ka mo go feteletšego. Ke ile ka nagana gore ‘sehlogo se se ka kgahla ngaka ya monagano,’ gomme ka ya le makasine woo sekolong. Letšatšing leo, yo mongwe wa barutiši bao ba bego ba tlile seminaring o ile a tla ka ofising ya-ka gomme ka mo nea makasine woo. O ile a o amogela ka lethabo. Ge e le gabotse, o ile a bolela gore yena ka nnoši o boifa dilo ka mo go feteletšego. Letšatšing le le latelago, ke ile ka mo tlišetša puku ya Dipotšišo tša Bafsa le Dikarabo tše Šomago, Bolumo 1. Le yona o ile a e amogela ka lethabo. Ka tsela yeo a ilego a e amogela ka yona e ile ya dira gore ke nagane gore barutiši ba bangwe le bona ba ka thabela kgatišo ye. Ka gona, ke ile ka tšea lepokisi leo le tletšego dipuku tša Dipotšišo tša Bafsa le dikgatišo tše dingwe gomme ka ya le tšona sekolong.” Go se go ye kae, ke ge lepokisi le se na selo. Maria o anega seo se diregilego ka gore: “Bašomi-gotee ba mmalwa ba morutiši yoo ke mo neilego puku ya Dipotšišo tša Bafsa ba ile ba tla ka ofising ya-ka gomme ba mpotšiša gore: ‘Dipuku tše di hwetšwa kae?’” Ba be ba tlile lefelong leo le swanetšego!

Letšatši la mafelelo la seminari e be e le Mokibelo. E be e le letšatši leo Maria a bego a sa šome ka lona, ka gona o ile a bea dikgatišo ditafoleng tše mmalwa ka ofising ya gagwe. O be a ngwadile letlapeng gore: “Barutiši ba Rategago! Le ka itopela dikgatišo gotee le go di tšeela bagwera ba lena. Dikgatišo tše tše dibotse di tla le thuša gore le atlege medirong ya lena gomme tša tiiša malapa a lena.” Ba ile ba arabela bjang? Maria o tšwela pele ka gore: “Ke ile ka ya ofising ya-ka letšatšing leo gomme ka hwetša gore dikgatišo tše dintši di be di se gona. Kapejana ke ile ka ya go tšea dipuku tše dingwe gape le dimakasine.” Bofelong bja seminari, Maria o be a sepedišitše dimakasine tše 380, dipuku tše 173 le diporoutšha tše 34. Ge bao ba bego ba tlile seminaring ba boela metseng e lego lekatana moo ba dulago le go šoma gona, ba ile ba sepela le dikgatišo tšeo. Maria o re, “Ke thabile kudu ga bjale gore peu ya therešo e fihlile metseng e lego lekatana ya Tuva!”—Mmo. 11:6.

[Mmapa go letlakala 32]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

RUSSIA

REPABLIKI YA TUVA