Bophelo bjo bo sa Felego mo Lefaseng—Kholofelo e Neilwego ke Modimo

“Tlholo e ile ya dirwa gore e ikokobeletše lefeela . . . motheong wa kholofelo.”—BAROMA 8:20.

1, 2. (a) Ke ka baka la’ng kholofelo ya go phela ka mo go sa felego mo lefaseng e le bohlokwa go rena? (b) Ke ka baka la’ng batho ba bantši ba sa dumele gore batho ba tla phela ka mo go sa felego mo lefaseng?

MOHLOMONGWE o sa gopola lethabo leo o bilego le lona ge o be o ithuta la mathomo gore kgaufsinyane batho ba ka se sa tšofala le go hwa, eupša ba tla phela ka mo go sa felego mo lefaseng. (Joh. 17:3; Kut. 21:3, 4) Ga go pelaelo gore o ile wa thabela go boledišana le batho ba bangwe ka kholofelo yeo ya Mangwalo. Go ba gona, kholofelo ya bophelo bjo bo sa felego ke karolo e bohlokwa ya ditaba tše dibotse tšeo re di bolelago. E kgoma tsela yeo re lebelelago bophelo ka yona.

² Gantši madumedi a Bojakane a hlokomologa kholofelo ya go phela bophelo bjo bo sa felego mo lefaseng. Le ge Beibele e ruta gore moya o a hwa, dikereke tše dintši di ruta thuto yeo e sego ka mangwalong ya gore motho o na le moya o sa hwego woo o phologago lehu gomme wa tšwela pele o phela lefelong la moya. (Hesek. 18:20) Ke ka baka leo batho ba bantši ba sa dumelego gore go ka kgonega gore batho ba phele bophelo bjo bo sa felego mo lefaseng. Ka gona re ka botšiša gore: Na Beibele e thekga kholofelo ya go phela ka mo go sa felego? Ge e ba go le bjalo, Modimo o e utolletše batho la mathomo neng?

‘Go Ikokobeletša Lefeela Motheong wa Kholofelo’

3. Morero wa Modimo ka batho o bonagetše bjang go tloga mathomong a histori ya batho?

³ Morero wa Jehofa ka batho o ile wa tsebatšwa go tloga mathomong a histori ya batho. Modimo o bontšhitše gabotse gore ge Adama a be a ka kwa, o be a tla phela ka mo go sa felego. (Gen. 2:9, 17; 3:22) Ditlogolwana tša Adama tša mathomong di ile tša botšwa ka moo a paletšwego ke go dula a phethagetše, gomme seo se be se hlatselwa ke seo ba bego ba se bona. Ba ile ba se sa kgona go tsena tšhemong ya Edene, gomme ba tšofala le go hwa. (Gen. 3:23, 24) Ge nako e dutše e e-ya, nywaga yeo batho ba bego ba e phela e ile ya fokotšega. Adama o phetše nywaga e 930. Seme yo a phologilego Meetse-fula o phetše feela nywaga e 600, gomme morwa wa gagwe Arapagasadi o phetše e 438. Tatago Aborahama, Thera, o phetše nywaga e 205. Aborahama o phetše nywaga e 175, morwa wa gagwe Isaka o phetše nywaga e 180 gomme Jakobo o phetše e 147. (Gen. 5:5; 11:10-13, 32; 25:7; 35:28; 47:28) Batho ba bantši ba swanetše go ba ba ile ba lemoga seo se bego se bolelwa ke go fokotšega moo ga nywaga ya bophelo—tebelelo ya go phela ka mo go sa felego e be e lahlegile! Na ba be ba e-na le lebaka la go holofela gore e tla tsošološwa?

4. Ke lebaka lefe leo banna ba botegago ba bogologolo ba bego ba e-na le lona la go dumela gore Modimo o tla tsošološa ditšhegofatšo tšeo Adama a di lahlilego?

⁴ Lentšu la Modimo le re: “Tlholo [yeo e lego batho] e ile ya dirwa gore e ikokobeletše lefeela . . . motheong wa kholofelo.” (Baroma 8:20) Ke kholofelo efe? Boporofeta bja pele bja Beibele bo boletše ka “peu” yeo e bego e tla ‘pšhatla hlogo ya noga.’ (Bala Genesi 3:1-5, 15.) Go batho ba botegago, go holofetšwa ga Peu yeo go  theile motheo wa gore Modimo a ka se lahle morero wa gagwe ka batho. Go neile batho ba bjalo ka Abele le Noa lebaka la go dumela gore Modimo o tla tsošološa ditšhegofatšo tšeo Adama a di lahlilego. Banna ba ba ka be ba ile ba lemoga gore ‘go longwa serethe ga peu’ go tla akaretša go tšhollwa ga madi.—Gen. 4:4; 8:20; Baheb. 11:4.

5. Ke’ng seo se bontšhago gore Aborahama o be a dumela tsogong?

⁵ Ela hloko Aborahama. Ge Aborahama a be a lekwa, “go bile bjalo ka ge eka o gafile Isaka, . . . morwa wa gagwe yo a tswetšwego a nnoši.” (Baheb. 11:17) Ke ka baka la’ng a be a ikemišeditše go dira bjalo? (Bala Baheberu 11:19.) O be a dumela gore go tla ba le tsogo ya bahu! Tsogo e be e le motheo wa tumelo ya Aborahama. Go ba gona, Jehofa o be a tsošitše matla a Aborahama a go ba le bana gomme a dira gore yena le mosadi wa gagwe Sara, ba be le morwa botšofading. (Gen. 18:10-14; 21:1-3; Baroma 4:19-21) Aborahama o be a kgonthišeditšwe ke Jehofa. Modimo o be a mmoditše gore: “Peu ya xaxo e tlo bitšwa ka Isaka.” (Gen. 21:12) Ka baka leo, Aborahama o be a e-na le mabaka a kwagalago a go letela gore Modimo o tla tsoša Isaka.

6, 7. (a) Jehofa o dirile kgwerano efe le Aborahama? (b) Kholofetšo yeo Jehofa a e holofeditšego Aborahama e neile batho kholofelo bjang?

⁶ Ka ge Aborahama a be a e-na le tumelo e kgahlišago, Jehofa o ile a dira kgwerano le yena ya mabapi le bana ba gagwe goba “peu.” (Bala Genesi 22:18.) Karolo ya motheo ya “peu” e bile Jesu Kriste. (Bagal. 3:16) Jehofa o be a boditše Aborahama gore “peu” ya gagwe e tla atišwa kudu bjalo ka “dinaledi tša lexodimong, le byalo ka lešabašaba la lebotong la lewatlê”—e lego palo yeo Aborahama a bego a sa e tsebe. (Gen. 22:17) Lega go le bjalo, palo yeo e ile ya utollwa ka morago. “Peu” e bopilwe ka Jesu Kriste le ba 144 000 bao ba tlago go buša le yena Mmušong wa gagwe. (Bagal. 3:29; Kut. 7:4; 14:1) “Dithšaba ka moka tša lefase di tlo šexofala” ka Mmušo wa Mesia.

⁷ Aborahama o be a ka se kwešiše ka mo feletšego seo se bolelwago ke kgwerano yeo Jehofa a e dirilego le yena. Lega go le bjalo, Beibele e re: “O be a letetše motse wo o nago le metheo ya kgonthe.” (Baheb. 11:10) Motse woo ke Mmušo wa Modimo. Gore a tle a hwetše ditšhegofatšo tša Mmušo woo, Aborahama o swanetše go phela gape. O tla kgona go phela lefaseng ka mo go sa felego ka morago ga tsogo. Le gona, bao ba phologago Haramagedone goba bao ba tlago go tsošwa bahung ba tla kgona go phela ka mo go sa felego.—Kut. 7:9, 14; 20:12-14.

“Môya ò Ntutuwetša ka Teng Xa-ka”

8, 9. Ke ka baka la’ng puku ya Jobo e se feela pego yeo e hlalosago diteko tša motho o tee?

⁸ Nakong ya magareng ga mehla ya Josefa setlogolwana sa Aborahama le ya moporofeta Moše, go ile gwa phela monna yo a bitšwago Jobo. Puku ya Beibele ya Jobo, yeo e ka bego e ngwadilwe ke Moše, e hlalosa lebaka leo ka lona Jehofa a ilego a dumelela Jobo go tlaišega le seo se ilego sa mo diragalela ka morago. Lega go le bjalo, puku ya Jobo ga e fo ba pego e lego mabapi le diteko tša motho o tee; e ahla-ahla kgang yeo e kgomago sebopiwa se sengwe le se sengwe se bohlale legohleng. Puku ye e hlalosa gore Jehofa o buša lefase ka toka, le gona e utolla gore potego le ditebelelo tša bophelo tša bahlanka ba Modimo ka moka ba lefaseng di kgongwa ke kgang yeo e tsošitšwego Edene. Le ge Jobo a be a sa kwešiše kgang ye, ga se a ka a dumelela bagwera ba gagwe ba bararo ba dira gore a nagane gore o paletšwe ke go dula a botega. (Jobo 27:5) Se se swanetše go matlafatša tumelo ya rena le go re thuša go lemoga gore re ka boloka potego ya rena le go godiša bogoši bja Jehofa.

⁹ Ka morago ga ge banna ba bararo bao ba ipitšago bahomotši ba feditše go bolela, go ile “xwa fetola yêna Elihu morwa wa Barakiele wa Busi.” Ke’ng seo se ilego sa mo tutueletša go bolela? O itše: “Ditaba mo xo nna ké tše di ngata, ke kwa môya ò ntutuwetša ka teng xa-ka.” (Jobo 32:5, 6, 18) Gaešita le ge seo Elihu a ilego a budulelwa go se bolela se ile sa phethagala ka morago ga diteko tša Jobo, mantšu a gagwe a  bohlokwa le go batho ba bangwe. A nea bao ba dulago ba botegela Jehofa kholofelo.

10. Ke’ng seo se bontšhago gore ka dinako tše dingwe molaetša wa Jehofa go motho o tee o šoma go batho ka kakaretšo?

¹⁰ Jehofa ka dinako tše dingwe o nea motho molaetša woo phethagalo ya wona e kgolwanyane e akaretšago batho ka kakaretšo. Se se ka bonala boporofeteng bja Daniele bjo bo akaretšago toro ya Kgoši ya Babilona Nebukadinetsara, ya mabapi le go rengwa ga sehlare se segolo. (Dan. 4:10-27) Le ge toro yeo e ile ya phethagatšwa go Nebukadinetsara, e be e šupa go selo se sengwe se segolo. E be e bontšha gore pušo ya Modimo lefaseng ka lešika la Kgoši Dafida e be e tla tsošološwa gape ka 607 B.C.E, ka morago ga nywaga e 2 520. * Go buša ga Modimo lefase la rena go hlomilwe lefsa ka 1914, ge Jesu Kriste a bewa gore e be Kgoši legodimong. E fo nagana kamoo pušo ya Mmušo e tlago go phethagatša dikholofelo tša batho ba kwago!

“A a Lapoloxê, a se Foloxêlê Moleteng”

11. Mantšu a Elihu a be a bontšha’ng ka Modimo?

¹¹ Ge a fetola Jobo, Elihu o bolela ka “Morongwamohumedi [‘mmoelanyi,’ PK], o tee xo ba sekete, wa xo bola tše di swanetšexo motho eo.” Go thwe’ng ge e ba mmoelanyi a “rapêla a kxahla Modimo”? Elihu o re Modimo o tlo mo gaugela a re: “A a lopoloxê, a se foloxêlê moleteng, ke bone sa xo mo hunolla! Ya ba xôna nama y’axwe e tl’o xo boêla, ya mphsafala, a tlo etša mola à sa le yo mofsa.” (Jobo 33:23-26) Mantšu ao a bontšha go ikemišetša ga Modimo go amogela ‘sa go hunolla’ goba topollo, legatong la batho ba itsholago.—Jobo 33:24.

12. Mantšu a Elihu a nea batho ka kakaretšo kholofelo efe?

¹² Mohlomongwe Elihu le yena o be a sa kwešiše ka botlalo seo se bolelwago ke topollo go swana le ge baporofeta ba be ba sa kwešiši ka botlalo dilo ka moka tšeo ba bego ba di ngwala. (Dan. 12:8; 1 Pet. 1:10-12) Lega go le bjalo, mantšu a Elihu a bontšha kholofelo ya gore ka letšatši le lengwe Modimo o tla amogela topollo gomme a hunolla batho ditla-moragong tše mpe tša botšofadi gotee le go ba hunolla lehung. Mantšu a Elihu a tšweleditše tebelelo e kgahlišago ya bophelo bjo bo sa felego. Le gona, puku ya Jobo e bontšha gore go tla ba le tsogo ya bahu.—Jobo 14:14, 15.

13. Mantšu a Elihu ke a bohlokwa bjang go Bakriste?

¹³ Lehono, mantšu a Elihu a tšwela pele e le a  bohlokwa go Bakriste ba dimilione bao ba holofelago go phologa phedišo ya tshepedišo ya gona bjale ya dilo. Batšofadi ba lego gare ga baphologi ba tla boela matšatšing a bofsa bja bona. (Kut. 7:9, 10, 14-17) Go feta moo, tebelelo ya go bona batho ba tsošitšwego ba boela matšatšing a bofsa bja bona e tšwela pele e thabiša batho ba botegago. Go ba gona, bobedi bophelo bjo bo sa felego legodimong bakeng sa Bakriste ba tloditšwego le bophelo bjo bo sa felego bakeng sa “dinku tše dingwe” tša Jesu bo ithekgile ka go ba le tumelo sehlabelong sa Kriste sa topollo.—Joh. 10:16; Baroma 6:23.

Lehu le tla Fedišwa Lefaseng

14. Ke’ng seo se bontšhago gore go be go nyakega seo se fetago Molao wa Moše e le gore Baisiraele ba be le kholofelo ya go phela ka mo go sa felego?

¹⁴ Ditlogolo tša Aborahama di ile tša ba setšhaba se ikemetšego ge di be di tsena kgweranong le Modimo. Ge Jehofa a be a di nea Molao, o itše: “Hlôkômêlang melaô ya-ka le ditaêlô tša-ka, tše e rexo xe motho a dira ka mo di bolêlaxo, a phela ka tšôna.” (Lef. 18:5) Lega go le bjalo, ka ge ba be ba ka se kgone go phela ka ditekanyetšo tša Molao ka mo go feletšego, Baisiraele ba be ba ahlolwa ke Molao gomme ba nyaka go lokollwa kahlolong yeo.—Bagal. 3:13.

15. Ke tšhegofatšo efe ya nakong e tlago yeo Dafida a ilego a budulelwa go ngwala ka yona?

¹⁵ Ka morago ga Moše, Modimo o ile a budulela bangwadi ba bangwe ba Beibele go bolela ka kholofelo ya bophelo bjo bo sa felego. (Ps. 21:4; 37:29) Ka mohlala, mopsalme Dafida o ile a phetha psalme yeo e bolelago ka botee bja barapedi ba kua Tsione ba therešo ka mantšu a rego: “Xôna-mó Morêna ó laetše thšexofatšô, bophelô neng le neng.”—Ps. 133:3.

16. Ka moporofeta Jesaya, Jehofa o ile a holofetša’ng mabapi le bokamoso bja ‘dinaga ka moka’?

¹⁶ Jehofa o ile a budulela Jesaya go porofeta mabapi le bophelo bjo bo sa felego mo lefaseng. (Bala Jesaya 25:7, 8.) Bjalo ka selo seo se ‘bipago’—kobo—sebe le lehu di imetše batho kudu. Jehofa o holofetša batho ba gagwe gore sebe le lehu di tla metšwa, goba go tlošwa “dinaxeng ka moka.”

17. Ke tema efe ya boporofeta yeo e kgathwago ke Mesia yeo e bulago tsela ya bophelo bjo bo sa felego?

¹⁷ Ela hloko gape thulaganyo yeo e hlaloswago Molaong wa Moše mabapi le pudi ya Asasele. Gatee ka ngwaga, ka Letšatši la Poelanyo, moperisita yo mogolo o be ‘a bea diatla tša gagwe hlogong ya phoko yeo e phelago, mo go  yona a bobolela melato ka moka ya Baisiraele gomme phoko yeo e be e rwala makgopo a bona ka moka e a iša nageng ya leganata.’ (Lef. 16:7-10, 21, 22) Jesaya o boletše e sa le pele gore go tla tla Mesia yo a tla phethago karolo e swanago ya go rwala “malwetši,” “mahloko” le “dibe tša ba bantši” gomme ka rialo a bula tsela e išago bophelong bjo bo sa felego.—Bala Jesaya 53:4-6, 12.

18, 19. Ke kholofelo efe yeo e hlaloswago go Jesaya 26:19 le go Daniele 12:13?

¹⁸ Ka Jesaya, Jehofa o ile a botša batho ba gagwe ba Isiraele gore: “Bahu ba xaxo ba tlo phela, le wa-ka mmele. Ba tlo tsoxa. Phafoxang! Hlalalang! Ba Le robetšexo leroleng; xobane phoka ya xaxo ké phoka ya seetša; ’me lefase le tlo nthša ba hwilexo.” (Jes. 26:19) Mangwalo a Seheberu a bontšha gabotse gore go na le kholofelo ya tsogo le ya go phela mo lefaseng. Ka mohlala, ge Daniele a be a le kgaufsi le go ba le nywaga e 100, Jehofa o ile a mo kgonthišetša gore: “O tlo khutša, wa tlo ba wa tsoxa xo tlo amoxêla kabêlô ya xaxo bofelong bya matšatši.”—Dan. 12:13.

¹⁹ Ka baka la kholofelo ya tsogo, Mareta o be a ka botša Jesu mabapi le kgaetšedi ya gagwe yeo e hwilego gore: “Ke tseba gore o tla tsoga tsogong letšatšing la mafelelo.” (Joh. 11:24) Na dithuto tša Jesu le dipuku tše di buduletšwego tša barutiwa ba gagwe di ile tša fetoša kholofelo ye? Na Jehofa o sa dutše a nea batho kholofelo ya bophelo bjo bo sa felego mo lefaseng? Re tla ahla-ahla dikarabo tša dipotšišo tše sehlogong se se latelago.

[Mongwalo wa tlase]

Na o ka Hlalosa?

• Tlholo yeo e lego batho e ile ya “dirwa gore e ikokobeletše lefeela” motheong wa kholofelo efe?

• Ke’ng seo se bontšhago gore Aborahama o be a e-na le tumelo tsogong?

• Mantšu ao Elihu a a boditšego Jobo a nea batho kholofelo efe?

• Mangwalo a Seheberu a gatelela bjang kholofelo ya tsogo le bophelo bjo bo sa felego lefaseng?

[Dipotšišo tša Thuto]

[Seswantšho go letlakala 5]

Mantšu a Elihu go Jobo a nea kholofelo ya gore batho ba tla lokollwa ditla-moragong tša botšofadi gotee le lehung

[Seswantšho go letlakala 6]

Daniele o ile a kgonthišetšwa gore ‘o tla tsoga go tlo amogela kabelo ya gagwe bofelong bja matšatši’