“Itoteng Leratong la Modimo”

“Itoteng leratong la Modimo ge le dutše le letetše kgaugelo ya Morena wa rena Jesu Kriste ka tebelelo ya bophelo bjo bo sa felego.”—JUDA 21.

1, 2. Jehofa o bontšhitše bjang gore o a re rata, le gona re tseba bjang gore ga a fo re lota leratong la gagwe?

JEHOFA MODIMO o bontšhitše ka ditsela tše dintši gore o a re rata. Lega go le bjalo, ka ntle le pelaelo bohlatse bjo bogolo bja gore Jehofa o a re rata ke tokišetšo ya sehlabelo sa topollo. O ratile batho kudu-kudu mo a ilego a romela Morwa wa gagwe yo a ratwago mo lefaseng gore a hwe legatong la rena. (Joh. 3:16) Jehofa o dirile se ka gobane a nyaka gore re phele ka mo go sa felego, le gona o nyaka gore re holwe ke lerato la gagwe ka mo go sa felego!

² Lega go le bjalo, na re ka phetha ka gore Jehofa o tla re lota leratong la gagwe go sa šetšwe seo re kgethago go se dira? Aowa. Ka gobane go Juda temana 21, re hwetša kgothatšo ye: “Itoteng leratong la Modimo ge le dutše le letetše kgaugelo ya Morena wa rena Jesu Kriste ka tebelelo ya bophelo bjo bo sa felego.” Polelwana “Itoteng leratong la Modimo” e bontšha gore go na le selo seo re swanetšego go se dira. Ka gona, ke’ng seo re swanetšego go se dira gore re dule leratong la Modimo?

Re ka Dula Leratong la Modimo Bjang?

3. Jesu o itše ke’ng seo se bego se nyakega e le gore a dule leratong la Tatagwe?

³ Re hwetša karabo ya potšišo ye mantšung a Jesu, ao a a boletšego bošegong bja gagwe bja mafelelo mo lefaseng. O itše: “Ge e ba le boloka ditaelo tša-ka, le tla dula leratong la-ka go etša ge ke bolokile ditaelo tša Tate, gomme ke dula leratong la gagwe.” (Joh. 15:10) Ge e le gabotse, Jesu o be a tseba gore go boloka melao ya Jehofa go bohlokwa e le gore a dule a amogelwa  ke Tatagwe. Ka gona, ge e ba go bile bjalo ka Morwa yo a phethagetšego wa Modimo, na go ka se be bjalo le ka rena?

4, 5. (a) Ke tsela efe e bohlokwa yeo ka yona re ka bontšhago gore re rata Jehofa? (b) Ke ka baka la’ng re se na lebaka la go gana go kwa ditaelo tša Jehofa?

⁴ Tsela ya bohlokwa yeo ka yona re bontšhago gore re rata Jehofa ke ka go mo kwa. Moapostola Johane o hlalositše taba ye ka gore: “Se ke seo lerato la Modimo le se bolelago, gore re boloke ditaelo tša gagwe; gomme ditaelo tša gagwe ga di boima.” (1 Joh. 5:3) Ge e le gabotse, kgopolo ya go ikokobeletša ba bangwe ga e ratege lefaseng la lehono. Lega go le bjalo, ela hloko polelwana e rego: “Gomme ditaelo tša gagwe ga di boima.” Jehofa ga a re kgopele gore re dire selo se boima.

⁵ Ka mohlala: Na o ka kgopela mogwera yo a rategago go rwala selo seo o tsebago gore a ka se kgone go se rwala? Ga go bjalo le gatee! Jehofa ke yo botho kudu go re feta le gona o tseba mafokodi a rena gabotse. Beibele e re kgonthišetša gore Jehofa “xa a lebale xe re le lerole.” (Ps. 103:14) A ka se ke a re kgopela selo seo a tsebago gore re ka se kgone go se dira. Ka gona, ga re na lebaka la go gana go kwa ditaelo tša Jehofa. Go fapana le moo, re lemoga gore go kwa Jehofa go re nea sebaka se sebotse sa go bontšha Tatago rena wa legodimong gore re mo rata e le ka kgonthe le gore re nyaka go dula leratong la gagwe.

Mpho e Kgethegilego e Tšwago go Jehofa

6, 7. (a) Letswalo ke’ng? (b) Bontšha kamoo letswalo le ka re thušago ka gona go dula leratong la Modimo.

⁶ Lefaseng le le raraganego leo re phelago go lona, go na le diphetho tše dintši tšeo re swanetšego go di dira tšeo di sepedišanago le go kwa Modimo. Re ka kgodišega bjang gore diphetho tše di dumelelana le thato ya Modimo? Jehofa o re neile mpho yeo e tla re thušago kudu tabeng ya go kwa. Ke letswalo. Letswalo ke’ng? Ke bokgoni bjo bo kgethegilego bja go itlhahloba. Le šoma bjalo ka moahlodi wa ka gare, le re kgontšha go lebelela dikgetho tšeo re di dirago bophelong goba go naganišiša ka dilo tšeo re šetšego re di dirile le go hlahloba ge e ba di lokile goba e le tše mpe, di nepagetše goba di fošagetše.—Bala Baroma 2:14, 15.

⁷ Ke bjang re ka dirišago letswalo la rena gabotse? Ela hloko papišo e latelago. Malapa a mantši a šireleditšwe ke mpša. Ge e ba e dula e phafogile, e ka phološa maphelo. Bjang? E ka lemoša beng ba yona ge e ba go e-na le motho yo a tsenago ka jarateng bošego. E a goba gare ga bošego go lemoša ka kotsi yeo e ka diregago gomme seo se dira gore beng ba yona ba e bote. Ka ntle le gore e lemoše, lapa ka moka le ka ba kotsing ya go hlaselwa ke motho yo a tsenago ka jarateng le sa lemoge. Ka mo go swanago, motho yo a se nago letswalo leo le ka mo lemošago gantši o tla ba kotsing ya go dira diphošo tše dikgolo ge a dira diphetho mabapi le boitshwaro gotee le ge a kgetha se se nepagetšego le se se fošagetšego bophelong.

8, 9. (a) Ke mafokodi afe a matswalo a rena ao re swanetšego go dula re a gopola? (b) Re ka dira’ng go kgonthišetša gore matswalo a rena a re tšwela mohola?

⁸ Lega go le bjalo, go swana le mpša yeo e hlapetšago lapa, letswalo le na le mafokodi. Ge e ba mpša yeo e ka robala bošego gomme ya se sa hlapetša, ga e na mohola. Goba ge e ba beng ba yona ka baka la go šitišwa ke dilo tše dingwe ka ntlong ba palelwa ke go kwa temošo ya yona ge e goba, seo se ka ba kotsi. Ka mo go swanago, ke’ng seo se bego se ka direga ge e ba re be re ka dumelela dikganyogo tša dipelo tša rena di laola diphetho tšeo re di dirago? Ditshekamelo tša rena tša boithati di ka kgopamiša matswalo a rena. Beibele e re lemoša gore “pelo ké yôna mmata-mâno-mabe, ké yôna lešaedi.” (Jer. 17:9; Die. 4:23) Go feta moo, ge e ba re sa ithekge ka tlhahlo e kgonthišeditšwego le e sa fetogego ya Lentšu la Modimo, Beibele, matswalo a rena a ka hloka mohola. (Ps. 119:105) Ka manyami, batho ba bantši lefaseng ba šetša dikganyogo tša dipelo tša bona mola ba hlokomologa ditekanyetšo tšeo di hwetšwago ka Lentšung la Modimo. (Bala Baefeso 4:17-19.) Ke ka baka leo batho ba bantši ba dirago dilo tše dintši tše tšhošago, gaešita le ge ba e-na le matswalo.—1 Tim. 4:2.

 ⁹ Ruri re swanetše go ikemišetša gore re se ke ra ba bjalo! Go e na le moo, a re tšweleng pele go dumelela Lentšu la Modimo le ruta le go tlwaetša matswalo a rena gore a re hole. Re swanetše go theetša matswalo a rena a tlwaeditšwego ka Beibele go e na le go dumelela ditshekamelo tša rena tša boithati di re laola. Ka mo go swanago, re swanetše go katanela go hlompha matswalo a bana babo rena le dikgaetšedi ba rategago ba moya. Re dira maiteko ka moka a go efoga go ba kgopiša, re gopola gore matswalo a bana babo rena a ka ba thibela go dira dilo tšeo matswalo a rena a re dumelelago go di dira.—1 Bakor. 8:12; 2 Bakor. 4:2; 1 Pet. 3:16.

10. Ke dikarolo dife tše tharo tša bophelo tšeo re tlago go di ahla-ahla ga bjale?

¹⁰ Anke ga bjale re hlahlobeng dikarolo tše tharo tša bophelo tšeo go tšona re ka bontšhago gore re rata Jehofa ka go mo kwa. Go e nngwe le e nngwe ya tšona, letswalo le tla tšea karolo, eupša sa pele le swanetše go hlahlwa ke ditekanyetšo tša Beibele tšeo di buduletšwego tša boitshwaro. Ditsela tše tharo tšeo re ka bontšhago gore re kwa Jehofa ka lerato ke tše: (1) Re rata bao Jehofa a ba ratago, (2) re hlompha bao ba etelelago pele, le gona (3) re katanela go dula re hlwekile mahlong a Modimo.

Rata Bao Jehofa a ba Ratago

11. Ke ka baka la’ng re swanetše go rata bao Jehofa a ba ratago?

¹¹ Sa pele, re swanetše go rata bao Jehofa a ba ratago. Ge go tliwa tabeng ya segwera, batho ba swana le sepontšhe. Gantši re monya selo se sengwe le se sengwe seo se re dikologilego. Mmopi wa rena o tseba gabotse kamoo segwera se ka bago kotsi le kamoo se ka holago batho ba sa phethagalago ka gona. Ka gona, o re nea keletšo e bohlale e rego: “Šika le bahlale O hlalefê; mokxônana-le-mašilo ó tlo thsereana.” (Die. 13:20; 1 Bakor. 15:33) Ga go le o tee wa rena yo a nyakago go “thsereana.” Yo mongwe le yo  mongwe wa rena o nyaka go ‘hlalefa.’ Jehofa a ka se ke a hlalefišwa go feta ka moo a lego ka gona, goba a tutuetšwa gampe ke motho le ge e le ofe. Lega go le bjalo, o re beela mohlala o mobotse ge go tliwa tabeng ya segwera. Nagana ka se—Jehofa o kgetha batho ba mohuta ofe gore e be bagwera ba gagwe?

12. Ke bagwera ba mohuta mang bao Jehofa a ba kgethago?

¹² Jehofa o ile a bitša mopatriareka Aborahama gore ke “mogwera wa-ka.” (Jes. 41:8, NW) Monna yo o be a tloga a botega, a lokile e bile a e-kwa—e le monna wa tumelo. (Jak. 2:21-23) Wo ke mohuta wa bagwera bao Jehofa a ba kgethago. O gwerana le batho ba bjalo le lehono. Ge e ba Jehofa a kgetha bagwera ba bjalo, na ga go bohlokwa gore le rena re dire bjalo, re sepele le batho ba bohlale gore le rena re be bohlale?

13. Ge go tliwa tabeng ya go kgetha bagwera, re ka thušwa ke’ng go dira dikgetho tše bohlale?

¹³ O ka thušwa ke’ng gore o dire phetho e bohlale tabeng ye? Go ithuta ka mehlala ya ka Beibeleng go ka itlhatsela e le mo go tutuetšago. Ela hloko segwera sa Ruthe le mmatswalagwe Naomi, segwera sa Dafida le Jonathane, goba sa Timotheo le Paulo. (Ruthe 1:16, 17; 1 Sam. 23:16-18; Bafil. 2:19-22) Go na lebaka letee le bohlokwa leo le ilego la dira gore ba gwerane: Ba be ba rata Jehofa e le ka kgonthe. Na o ka hwetša bagwera bao ba ratago Jehofa go swana le wena? Kgodišega gore ka phuthegong ya Bokriste go tletše batho ba bjalo. Bagwera ba bjalo ba ka se dire gore o tshereane moyeng. Go e na le moo, ba tla go thuša go kwa Jehofa, go gola moyeng, le go bjalela moya. (Bala Bagalatia 6:7, 8.) Ba tla go thuša go dula leratong la Modimo.

Hlompha Bao ba Etelelago Pele

14. Ke dilo dife tšeo di dirago gore gantši go be thata go hlompha bao ba etelelago pele?

¹⁴ Tsela ya bobedi yeo re ka bontšhago ka yona gore re kwa Jehofa e akaretša bolaodi. Re swanetše go hlompha bao ba etelelago pele. Ke ka baka la’ng ka dinako tše dingwe go le thata go dira se? Lebaka ke gore batho bao ba etelelago pele ga se ba phethagala. Go tlaleletša moo, le rena ga se ra phethagala. Re lwantšhana le tshekamelo ya rena ya tlhago ya go rabela.

15, 16. (a) Ke ka baka la’ng go le bohlokwa gore re hlomphe bao Jehofa a ba neilego boikarabelo bja go hlokomela batho ba gagwe? (b) Ke thuto efe e bohlokwa yeo re e ithutago yona mabapi le kamoo Jehofa a ilego a lebelela borabele bja Baisiraele kgahlanong le Moše?

¹⁵ Ka gona, o ka ipotšiša gore: ‘Ge e ba go le thata gakaalo go hlompha bao ba etelelago pele, ke ka baka la’ng re swanetše go ba hlompha?’ Karabo e akaretša taba ya bogoši. O tla kgetha go bušwa ke mang? Ge e ba re kgetha Jehofa bjalo ka Mmuši wa rena, re swanetše go hlompha bolaodi bja gagwe. Ge e ba re sa dire bjalo, na re ka mmitša gore ke Mmuši wa rena e le ka kgonthe? Go feta moo, Jehofa gantši o diriša bolaodi bja gagwe ka go nea batho ba sa phethagalago boikarabelo bja go hlokomela batho ba gagwe. Ge e ba re ka rabela kgahlanong le batho bao, Jehofa o tla lebelela tiro yeo ya rena bjang?—Bala 1 Bathesalonika 5:12, 13.

¹⁶ Ka mohlala, ge Baisiraele ba be ba ngunanguna ka Moše gomme ba rabela kgahlanong le yena, Jehofa o ile a tšea borabele bja bona e le bjo bo lebišitšwego go Yena. (Num. 14:26, 27) Modimo ga se a fetoga. Ge re ka rabela kgahlanong le bao a ba neilego matla a taolo, re tla be re rabela kgahlanong le yena!

17. Re swanetše go katanela go hlagolela boemo bofe bja kgopolo mabapi le bao ba nago le boikarabelo ka phuthegong?

¹⁷ Moapostola Paulo o utolla boemo bjo bo nepagetšego bja kgopolo bjoo re swanetšego go bo hlagolela mabapi le bao ba nago le boikarabelo ka phuthegong ya Bokriste. O ngwadile gore: “Kwang bao ba etelelago pele gare ga lena gomme le ikokobetše, gobane ba hlokomela meoya ya lena e le bao ba tlago go ikarabela; e le gore ba dire se ka lethabo e sego ka go fegelwa, gobane se se tla le gobatša.” (Baheb. 13:17) Ke therešo gore re swanetše go katana ka thata gore re hlagolele moya wa go kwa le go ikokobetša. Lega go le bjalo, gopola gore re katanela go dula re le leratong la Modimo. Na ye ga se  pakane yeo re swanetšego go leka ka gohle gore re e fihlelele?

Dula o Hlwekile Mahlong a Jehofa

18. Ke ka baka la’ng Jehofa a nyaka gore re dule re hlwekile?

¹⁸ Tsela ya boraro yeo re ka bontšhago ka yona gore re rata Jehofa ke gore re katanele go dula re hlwekile mahlong a gagwe. Gantši batswadi ba šoma ka thata go kgonthišetša gore bana ba bona ba dula ba hlwekile. Ka baka la’ng? Ge e le gabotse, go hlweka go bohlokwa bakeng sa gore ngwana a phele gabotse. Go feta moo, ngwana yo a hlwekilego o emela lapa labo gabotse gomme o utolla lerato le tlhokomelo ya batswadi ba gagwe. Jehofa le yena o nyaka gore re hlweke ka mabaka a swanago. O a tseba gore bohlweki bo bohlokwa bakeng sa gore re phele gabotse. Le gona, o a tseba gore go hlweka ga rena go bonagatša seo a lego sona, e lego Tatago rena wa legodimong. Seo ke sa bohlokwa kudu, ka ge batho ba ka nyaka go hlankela Modimo ka gobane ba lemoga gore ga re swane le batho ba bangwe lefaseng le leo le šilafetšego.

19. Re tseba bjang gore go hlweka mmeleng go bohlokwa?

¹⁹ Ke ka ditsela dife re swanetšego go dula re hlwekile? Ge e le gabotse, re swanetše go dula re hlwekile dikarolong tšohle tša bophelo. Isiraeleng ya bogologolo, Jehofa o ile a botša batho ba gagwe ka mo go kwagalago gore bohlweki bja mmele bo bohlokwa. (Lef. 15:31) Molao wa Moše o be o akaretša dilo tše bjalo ka go lahlwa ga ditšhila, go hlwekišwa ga dibjana, go hlapa diatla, maoto le go hlatswa diaparo. (Ek. 30:17-21; Lef. 11:32; Num. 19:17-20; Doit. 23:13, 14) Baisiraele ba ile ba gopotšwa gore Modimo wa bona, Jehofa, ke yo mokgethwa—e lego seo se bolelago gore “o hlwekile,” “o sekile” e bile “o kgethegile.” Bahlanka ba Modimo yo mokgethwa ba swanetše gore le bona e be ba bakgethwa.—Bala Lefitiko 11:44, 45.

20. Re swanetše go dula re hlwekile ka ditsela dife?

²⁰ Ka gona, re swanetše go hlweka ka ntle le ka gare. Re katanela go boloka menagano ya rena e hlwekile. Re kgomarela ditekanyetšo tša Jehofa tša bohlweki, go sa šetšwe go goboga ka tša botona le botshadi ga lefase leo le re dikologilego. Sa bohlokwa kudu, re phegelela go boloka borapedi bja rena bo hlwekile, re efoga go šilafatšwa ke bodumedi bja maaka. Re dula re gopola temošo e buduletšwego e lego go Jesaya 52:11, e rego: “Tloxang! Tloxang! Tšwang moo! Le se swarê thšila! Le tšwê mo xo bao! Hlapang.” Lehono, re dula re hlwekile moyeng ka go gana go swara seo Tatago rena wa legodimong a se lebelelago se šilafetše tabeng ya borapedi. Ka mohlala, ke ka baka leo ka bohlale re efogago go tšea karolo meketeng ya bodumedi bja maaka le matšatšing a maikhutšo ao a ratwago kudu lefaseng lehono. Ke therešo gore go thata gore re dule re hlwekile. Eupša batho ba Jehofa ba dira bjalo ka gobane se se ba thuša go dula leratong la Modimo.

21. Re ka kgonthišega bjang gore re tla dula leratong la Modimo?

²¹ Jehofa o nyaka gore re dule leratong la gagwe ka mo go sa felego. Eupša ka moka ga rena re le motho ka o tee ka o tee re swanetše go kgonthišetša gore re dira sohle seo re ka se kgonago go dula leratong la Modimo. Re ka dira se ka go latela mohlala wa Jesu le go bontšha gore re rata Jehofa ka go kwa ditaelo tša Gagwe. Ge e ba re dira bjalo, re ka kgonthišetša gore ga go na seo se ‘ka kgonago go re aroganya le lerato la Modimo leo le lego go Kriste Jesu Morena wa rena.’—Baroma 8:38, 39.

Na o a Gopola?

• Matswalo a rena a ka re thuša bjang go dula leratong la Modimo?

• Ke ka baka la’ng re swanetše go rata bao Jehofa a ba ratago?

• Ke ka baka la’ng go le bohlokwa go hlompha bao ba etelelago pele?

• Bohlweki bo bohlokwa gakaaka’ng bathong ba Modimo?

[Dipotšišo tša Thuto]

[Lepokisi/​Seswantšho go letlakala 20]

KGATIŠO YEO E KGOTHALETŠAGO BOITSHWARO BJO BOBOTSE

Kopanong ya selete ya 2008/2009, go lokolotšwe puku ya matlakala a 224 e nago le sehlogo se se rego, “Keep Yourselves in God’s Love.” Morero wa puku ye e mpsha ke ofe? E hlametšwe go thuša Bakriste go tseba le go rata ditekanyetšo tša Jehofa, e lebiša tlhokomelo kudu boitshwarong bja Bokriste. Go ithuta puku ya “Keep Yourselves in God’s Love” ka kelohloko go tla matlafatša kgodišego ya rena ya gore go phela ka go dumelelana le ditekanyetšo tša Jehofa ke tsela e kaone ya go phela gona bjale gomme go lebiša bophelong bjo bo sa felego nakong e tlago.

Go feta moo, puku ye e hlametšwe go re thuša go bona gore go kwa Jehofa ga se morwalo. Go fapana le moo, ke tsela ya go bontšha Jehofa kamoo re mo ratago ka gona. Ka gona, puku ye e tla dira gore re ipotšiše gore, ‘Ke ka baka la’ng ke e-kwa Jehofa?’

Ge ba bangwe ba dira phošo e nyamišago ya go tloga leratong la Jehofa, gantši bothata e ba e le boitshwaro, e sego thuto. Ka gona, ruri go bohlokwa gore re matlafatše lerato la rena go Jehofa le tebogo ya rena bakeng sa melao ya gagwe ya motheo yeo e re hlahlago bophelong bja letšatši le letšatši. Re kgodišegile gore kgatišo ye e mpsha e tla thuša dinku tša Jehofa lefaseng ka bophara go emela ka go tia seo se lokilego, go bontšha gore Sathane ke moaketši, gomme go feta tšohle, go ipoloka leratong la Modimo!—Juda 21.

[Seswantšho go letlakala 18]

“Ge e ba le boloka ditaelo tša-ka, le tla dula leratong la-ka go etša ge ke bolokile ditaelo tša Tate, gomme ke dula leratong la gagwe”