Ke Hweditše Morero wa Bophelo

Ka ge go anega Gaspar Martinez

Ka ditsela tše itšego, kanegelo ya-ka ke ya mošemanyana wa modiitšana wa magaeng yo a ilego a huma ge a fihla toropong. Eupša o tla bona gore mahumo ao ke ilego ka ikgobelela ona e be e se ao ke bego ke tloga ke a letetše.

KE GOLETŠE motseng wa magaeng wo o sego wa hlabologa kua tikologong ya Rioja ka borwa bja Sepania, nywageng ya bo-1930. Ge ke be ke e-na le nywaga e lesome, ke ile ka swanelwa ke go tlogela sekolo, eupša ka nako yeo ke be ke šetše ke kgona go bala le go ngwala. Nna le bana bešo ba tshelelago re be re fetša nako e ntši re le mašemong re hlokometše dinku goba re lema ka dirapeng tša gešo tše nyenyane.

Go diila go ile gwa dira gore re nagane gore tšhelete le go rua ke dilo tše bohlokwa. Re be re hufegela bao ba bego ba e-na le dilo tše dintši kudu go feta rena. Lega go le bjalo, mopišopo wa moo o ile a bolela gore motse wa gešo o be o e-na le “batho ba ratago bodumedi kudu go feta metse e mengwe tikologong yeo a bego a e laola.” Eupša o be a sa lemoge gore kgaufsinyane ba bantši ba be ba tla hlanogela tumelo ya Bokatholika.

Go Tsoma Selo se Sekaone

Ke ile ka nyala Mercerdes, ngwanenyana yoo a bego a dula motseng wa gešo. Nakwana ka morago ga moo, re ile ra ba le ngwana wa mošemane yoo re ilego ra swanelwa ke go mo hlokomela. Ka 1957 re ile ra hudugela toropong ya kgaufsi ya Logroño, gomme mafelelong lapa lešo ka moka le ile la dira bjalo. Kapejana ke ile ka lemoga gore bjalo ka mošomi yo a se nago bokgoni, ke be ke e-na le dibaka tše dinyenyane tša go hwetša tšhelete e lekanego bakeng sa go fepa lapa la-ka. Ke ile ka ipotšiša gore ke kae moo nka hwetšago tlhahlo. Ke ile ka thoma go tsoma tlhahlo bokgobapukung bja kgaufsi, le ge ke be ke sa tsebe seo ke bego ke tloga ke se nyaka.

Ka morago, ke ile ka kwa gore go na le lenaneo la radio leo le bego le ruta batho thuto ya Beibele ka go ngwalelana le bona mangwalo. Kapejana ka morago ga ge ke phethile thuto yeo, Maprotestanta a mangwe a Baebangedi a ile a ikgokaganya le nna. Mabakeng a mmalwa ge ke be ke etetše lefelo la bona la borapedi, ke ile ka bona phenkgišano magareng ga baetapele ba bona. Ke ile ka se sa boela moo, ka phetha ka gore madumedi ka moka a swanetše go ba a swana.

Mahlong A-ka go wa Makgapetla

Ka 1964 lesogana leo le bitšwago Eugenio le ile la etela lapa la rena. E be e le yo mongwe wa Dihlatse tša Jehofa, bodumedi bjo ke sa kago ka kwa ka bjona le ka mohla. Eupša ke be ke tloga ke ikemišeditše go bolela ka Beibele. Ke be ke nagana gore ke na le kwešišo e botse ya Mangwalo. Ke ile ka boledišana le yena ke diriša Mangwalo ao ke ithutilego ona lenaneong la go ithuta Beibele ka go ngwalelana. Le ge ke ile ka leka go emela dithuto tše dingwe tša Protestanta, ka pelong ke be ke sa di dumele.

 Ka morago ga dipoledišano tše pedi tše ditelele, ke ile ka swanelwa ke go dumela gore Eugenio o dirišitše Lentšu la Modimo bjalo ka sekgwari. Ke be ke makatšwa ke tsela yeo a bego a kgona go hwetša ditemana le go di hlalosa ka yona, le ge a be a se a rutega go mpheta. Eugenio o ile a mpontšha go tšwa Beibeleng gore re phela mehleng ya bofelo le gore Mmušo wa Modimo kgaufsinyana o tla tliša lefase la paradeise. Se se ile sa nkgahla kudu.—Ps. 37:11, 29; Jes. 9:6, 7; Mat. 6:9, 10.

Ke ile ka amogela thuto ya Beibele ka ntle le tika-tiko. Ka kgonthe tšohle tšeo ke bego ke ithuta tšona e be e le dilo tše difsa, gomme di ile tša nkgoma kudu. Ke ile ka bulegelwa ke sebaka se sefsa seo se ilego sa nnea morero bophelong. Ke be ke hweditše seo ke bego ke se tsoma. Bjale ke ile ka hwetša mabaka a go kaonefatša maemo a ka setšhabeng, gomme ntwa ya-ka ya go hwetša mošomo o lefago gabotse e ile ya fetoga selo seo se sego bohlokwa. Bolwetši gaešita le lehu di tlo fedišwa.—Jes. 33:24; 35:5, 6; Kut. 21:4.

Kapejana ke ile ka thoma go botša ba leloko lešo seo ke bego ke ithuta sona. Ke ile ka ba hlalosetša ka mafolofolo gore Modimo o holofetša go tliša lefase la paradeise moo batho ba phethagetšego ba tlago go phela ka mo go sa felego.

Lapa Lešo le Amogela Ditherešo tša Beibele

Kapejana, re le ba ka bago 12 re ile ra dira phetho ya go kopana ka lapeng la rangwane Sontaga thapama, bakeng sa go ahla-ahla dikholofetšo tša Beibele. Re be re fetša diiri tše pedi goba tše tharo, beke e nngwe le e nngwe re dira bjalo. Ge Eugenio a bona gore sehlopha seo se segolo sa ba leloko lešo se be se kgahlegela Beibele, o ile a dira thulaganyo ya go lebiša tlhokomelo lapeng le lengwe le lengwe.

Go be go e-na le ditho tše dingwe tša ba leloko lešo tšeo di bego di dula motseng woo go se nago Dihlatse wa Durango, toropo e nyenyane e ka bago dikhilomithara tše 120 go tloga mo ke dulago gona. Dikgwedi tše tharo ka morago, ke ile ka tšea maikhutšo a matšatši a sego makae gore ke ba etele e le gore ke ba hlalosetše ka tumelo yeo ke sa tšwago go e hwetša. Nakong yeo, re le ba e ka bago ba lesome re be re kopana mantšiboeng a mangwe le a mangwe, gomme ke bolele le bona go fihla nakong ya matla-go-sa. Bohle ba be ba thabela go theetša. Ge ketelo ya-ka e fihlile mafelelong, ke ile ka ba tlogelela Dibeibele le dikgatišo tše theilwego Beibeleng. Ka morago ga moo, re ile ra ngwalelana mangwalo.

Ge Dihlatse di fihla Durango—moo go sa ka go gwa newa bohlatse pele—ba ile ba hwetša batho ba 18 ba letile ka phišego go swarelwa thuto ya Beibele. Dihlatse di ile tša thabela go dira thulaganyo ya gore lapa le lengwe le lengwe le swarelwe thuto ya Beibele.

Go fihla ka nako yeo, Mercedes o be a sa bonale a nyaka go ithuta therešo, kudu-kudu o be a boifa batho go e na le go fo dika-dika go amogela dithuto tša Beibele. Ka nako yeo modiro wa Dihlatse tša Jehofa o be o thibetšwe kua Sepania, ka gona o be a nagana gore baemedi ba mmušo ba tla raka bana ba rena ba babedi sekolong le gore ka moka re be re ka se amogelwe setšhabeng. Eupša ge a lemoga gore lapa ka moka le be le amogetše therešo ya Beibele, le yena o ile a nyaka go ithuta.

Pele nywaga e mebedi feela, batho ba 40 ba lapa lešo ba ile ba fetoga Dihlatse gomme ba kolobetšwa e le sešupo sa go ineela ga bona go hlankeleng Jehofa. Ee, lapa lešo le be le e-na le pakane le morero wa bophelo o swanago le wa-ka. Ke ile ka ikwa ke fihleletše selo se sengwe se bohlokwa. Re be re šegofaditšwe ka mahumo a mantši a moya.

Bophelo bo ile bja Kgotsofatša Kudu ge ke Dutše ke Gola

Nywaga e 20 e latetšego, ke ile ka lebiša tlhokomelo ya-ka go godišeng barwa ba rena ba babedi le go thušeng phuthego ya gešo. Ge nna le Mercedes re be re hudugela Logroño, go be go e-na le Dihlatse tše 20 toropong yeo e bego e e-na le badudi ba 100 000. Go se go ye kae, ke ile ka amogela boikarabelo bjo bontši ka phuthegong.

Ka gona, ge ke be ke e-na le nywaga e 56, khampani yeo ke bego ke e šomela e ile ya tswalela feketori yeo ke bego ke šoma go yona go sa letelwa, gomme ke ile ka ikhwetša ke se na mošomo. Ke be ke dutše ke nyaka go tsenela tirelo ya nako e tletšego, ka gona ke ile ka diriša sebaka seo se sefsa go tsenela tirelo ya bobulamadibogo. Tšhelete ya mphiwa-fela yeo ke bego ke e hwetša e be e le e nyenyane, gomme go phela ka yona go be go se bonolo. Mercedes o ile a thuša ka go dira mešomo ya go hlwekiša. Re be re kgona go hlokomela lapa  la rena gomme ga se ra ka ra hloka dilo tše bohlokwa. Ke sa dutše ke le mmulamadibogo, nako le nako mosadi wa-ka o tšea bobulamadibogo bja go thuša gomme o thabela modiro wa boboledi kudu.

Nywaga e sego kae e fetilego, Mercedes o be a tlogelela ngwanenyana yo a bitšwago Merche dimakasine tša rena, yoo ge e be e sa le ngwana a ilego a ithuta Beibele. Merche o be a bala dikgatišo tša rena ka kgahlego, gomme Mercedes o ile a lemoga gore Merche o sa dutše a rata therešo ya Beibele go tšwa pelong. Mafelelong, Merche o ile a amogela thuto ya Beibele gomme a thoma go dira tšwelopele e botse. Eupša monna wa gagwe Vicente, o be a e-nwa kudu gomme a sa kgone go boloka mošomo. Ka baka leo, o be a sa mo hlokomele ka tša ditšhelete; le gona go diriša ga gagwe dino-tagi gampe go ile gwa bea lenyalo la bona kotsing.

Mosadi wa-ka o ile a eletša Merche gore a botše Vicente gore a tle go boledišana le nna, gomme mafelelong o ile a dira bjalo. Ka morago ga go nketela makga a mmalwa, o ile a amogela thuto ya Beibele. Vicente o ile a thoma go fetoga, a emiša go nwa matšatši a sego makae ka nakwana. Ke moka, o be a kgona go fetša beke ka moka a se a nwa. Mafelelong o ile a tlogela go nwa bjala ka mo go feletšego. Sefahlego sa gagwe se ile sa fetoga, gomme lapa la gagwe le ile la ba le botee. Lapa la gagwe ka moka, go akaretša le mosadi wa gagwe le ngwana wa gagwe wa ngwanenyana, le ile la thekga phuthego e nyenyane ya Dihlakahlakeng tša Canary, moo ba dulago gona ga bjale.

Go Lebelela Morago Bophelong bjo bo Nago le Morero

Gaešita le ge ba bangwe ba leloko la-ka bao ba ilego ba ithuta Beibele nywageng e fetilego ba hwile ga bjale, lapa la rena le ile la tšwelapele le gola, gomme Modimo o re šegofaditše kudu. (Die. 10:22) Ke mo go kgotsofatšago gakaakaang go bona gore bontši bja bao ba ilego ba ithuta Beibele nywaga e 40 e fetilego—gaešita le bana ba bona le ditlogolo tša bona—ba ile ba tšwelapele ba hlankela Jehofa ka potego!

Ga bjale ke na le bana bešo ba nama bao e lego Dihlatse, ba bantši ba hlankela e le bagolo, bahlanka ba bodiredi le babulamadibogo. Morwa wa-ka le mosadi wa gagwe ba hlankela ofising ya lekala ya Dihlatse tša Jehofa kua Madrid, Sepania. Go be go e-na le Dihlatse tše ka bago 3 000 kua Sepania ge ke be ke e-ba Hlatse. Ga bjale go na le tša ka godimo ga 100 000. Ke thabela ka mo go feletšego tirelo ya nako e tletšego, gomme ke leboga Modimo bakeng sa bophelo bjo bo botse tirelong ya gagwe. Le ge ke be ke se na thuto e phagamego, ke kgona go šoma nako le nako ke le mothuši wa molebeledi wa tikologo.

Nywaga e mmalwa e fetilego, ke ile ka lemoga gore motse woo ke goletšego go wona o be o swana le leganata. Bodiidi bo ile bja dira gore ba bantši ba hlokomologe mašemo le malapa a bona e le ge ba tsoma bophelo bjo bokaone. Ka mo go kgahlišago, bontši bja bafaladi bao—go akaretša le nna—bo hweditše mahumo a moya. Re ithutile gore bophelo bo na le morero le gore go hlankela Jehofa go tliša lethabo le legolo kudu.

[Seswantšho go letlakala 32]

Mo e ka bago ditho ka moka tša lapa la Ngwanabo Rena Martínez tše lego therešong