Lerato la Kriste le re Tutueletša go Bontša Lerato

“Jesu ka ge a ratile ba gagwe bao ba bego ba le lefaseng, o ba ratile go fihla bofelong.”—JOH. 13:1.

1, 2. (a) Ke’ng seo se lemogegago ka lerato leo Jesu a le bontšhitšego? (b) Ke dibopego dife tša lerato tšeo re tlago go di ahla-ahla sehlogong se?

JESU o beile mohlala o phethagetšego wa lerato. Selo se sengwe le se sengwe ka yena—tsela yeo a bego a bolela le go itshwara ka yona, thuto ya gagwe le lehu la gagwe la sehlabelo—di bontšhitše lerato la gagwe. Go ba go fihla bofelong bja bophelo bja gagwe mo lefaseng, Jesu o bontšhitše lerato go bao a ilego a kopana le bona, kudu-kudu go barutiwa ba gagwe.

² Mohlala wa Jesu o kgahlišago wa lerato o beela balatedi ba gagwe tekanyetšo e phagamego yeo ba swanetšego go e fihlelela. Le gona, o re tutueletša go bontšha lerato le swanago go bana babo rena le dikgaetšedi ba moya gaešita le go batho ba bangwe ka moka. Sehlogong se, re tla ahla-ahla seo bagolo ka phuthegong ba ka ithutago sona go Jesu mabapi le go bontšha lerato go bao ba dirago dibe, gaešita le dibe tše dikgolo. Re tla ahla-ahla gape kamoo lerato la Jesu le tutuetšago Bakriste go thuša ba bangwe dinakong tša mathata, ge ba hlasetšwe ke dikotsi tša tlhago le ge ba babja.

3. Go sa šetšwe mafokodi a Petro a magolo, Jesu o ile a mo swara bjang?

³ Bošegong bja pele ga lehu la Jesu, moapostola wa gagwe e lego Petro o ile a mo latola ka makga a mararo. (Mar. 14:66-72) Lega go le bjalo, gatee-tee ge Petro a boa, go etša ge Jesu a boletše gore o tla boa, Jesu o ile a mo lebalela. Jesu o ile a nea Petro boikarabelo bjo bogolo. (Luka 22:32; Dit. 2:14; 8:14-17; 10:44, 45) Re ithuta’ng tseleng yeo Jesu a ilego a swara bao ba bego ba e-na le mafokodi a magolo?

Swara Badiri ba Bobe Kamoo Kriste a Bego a ba Swara ka Gona

4. Ke boemo bofe bjoo ka mo go kgethegilego bo nyakago gore re bontšhe boemo bja Kriste bja monagano?

⁴ Bjo bongwe bja maemo mantši ao a nyakago gore re bonagatše boemo bja Kriste bja monagano, ke bjo bo gateletšago kudu bja mabapi le dibe tše dikgolo tšeo di dirilwego ke ba bangwe, e ka ba ka lapeng goba ka phuthegong. Ka manyami, ge bofelo bja tshepedišo ya Sathane bo fihla tlhorong ya bjona, moya wa lefase o phuhlamiša boitshwaro bja batho le go feta. Mekgwa ya lefase e mebe goba ya go se šetše ya tša boitshwaro e ka fetela batho ba bagolo le bana ka mo go swanago gomme ya fokodiša boikemišetšo bja bona bja go sepela tseleng e pitlaganego. Lekgolong la pele la nywaga, ba bangwe ba ile ba swanelwa ke go kgaolwa ka phuthegong ya Bokriste gomme ba bangwe ba kgalemelwa. Go a swana le lehono. (1 Bakor. 5:11-13; 1 Tim. 5:20) Lega go le bjalo, ge bagolo bao ba swaraganago le ditaba tše ba bontšha lerato le swanago le la Kriste, seo se ka ba le mafelelo a mabotse go modiri wa bobe.

5. Bagolo ba swanetše go ekiša bjang tsela yeo ka yona Kriste a bego a lebelela badiri ba bobe?

⁵ Go swana le Jesu, bagolo ba swanetše go kgomarela ditekanyetšo tša Jehofa tše lokilego ka dinako tšohle. Ge ba dira bjalo, ba bontšha bonolo, botho le lerato la Jehofa. Ge motho a itshola e le ka kgonthe, a ‘robegile pelo’ gomme a ‘gobetše moyeng’ ka baka la sebe sa gagwe, go ka ba bonolo gore bagolo ba “[bušetše] motho yo bjalo tseleng ka moya wa boleta.” (Ps. 34:18; Bagal. 6:1) Eupša go thwe’ng ge e ba ba swaragane le motho yo a nago le mereba gomme a sa itshole?

6. Bagolo ba swanetše go phema’ng ge ba swaragana le badiri ba bobe, gona ka baka la’ng?

 ⁶ Ge modiri wa bobe a gana keletšo ya Mangwalo goba a leka go phara ba bangwe molato ka baka la sebe sa gagwe, bagolo gotee le ba bangwe ba ka galefa. Ka ge ba tseba tshenyo yeo motho yoo a šetšego a e bakile, ba ka lekega gore ba bontšhe kamoo ba ikwago ka gona ka ditiro tša motho yoo le boemo bja gagwe bja kgopolo. Lega go le bjalo, kgalefo e baka tshenyo gomme ga e bontšhe “monagano wa Kriste.” (1 Bakor. 2:16; bala Jakobo 1:19, 20.) Jesu o ile a lemoša ba bangwe mehleng ya gagwe ka go se pepetletše, eupša le ka mohla ga se a ka a bolela selo seo se bego se bontšha lehloyo goba seo morero wa sona e bego e le go baka bohloko. (1 Pet. 2:23) Go e na le moo, o ile a nea badiri ba bobe sebaka sa gore ba itshole gomme ba boele go Jehofa. Ka kgonthe, le lengwe la mabaka a magolo a go tla ga Jesu lefaseng e be e le “go tlo phološa badiradibe.”—1 Tim. 1:15.

7, 8. Bagolo ba swanetše go hlahlwa ke’ng ge ba swaragana le ditaba tša boahlodi?

⁷ Mohlala wa Jesu tabeng ye o swanetše go kgoma bjang pono ya rena ka bao ba swanelwago ke go laiwa ke phuthego? Gopola gore thulaganyo ya Mangwalo ya mogato wa boahlodi ka phuthegong e šireletša mohlape gomme e ka tutueletša modiri wa bobe yo a neilwego tayo gore a itshole. (2 Bakor. 2:6-8) Go kweša bohloko go bona gore ba bangwe ga ba itshole gomme ba swanelwa ke gore ba kgaolwe, eupša go a kgothatša go tseba gore palo e kgolo ya bona ka morago e boela go Jehofa le phuthego ya gagwe. Ge bagolo ba bontšha boemo bja Kriste bja monagano, ba dira gore go be bonolo gore motho a itshole gomme mafelelong a boe. Nakong e tlago, go ka direga gore ba bangwe ba badiri bao ba bobe ba se ke ba gopola dikeletšo ka moka tša Mangwalo tšeo bagolo ba ba neilego tšona, eupša ka kgonthe ba tla gopola gore bagolo ba ile ba ba hlompha gomme ba ba swara ka lerato.

⁸ Ka gona, bagolo ba swanetše go bonagatša “dienywa tša moya,” kudu-kudu lerato le swanago le la Kriste, gaešita le ge badiri ba bobe ba gana keletšo ya Mangwalo. (Bagal. 5:22, 23) Ga se ba swanela go akgofela go lelekela motho ka ntle ga phuthego. Ba swanetše go bontšha gore ba nyaka gore badiri ba bobe ba boele go Jehofa. Ka go rialo, ge ka morago modiri wa bobe a itshola, bjalo ka ge ba bantši ba dira bjalo, a ka leboga Jehofa kudu  gotee le “dimpho tšeo e lego batho” bao ba dirilego gore go be bonolo gore a boele ka phuthegong.—Baef. 4:8, 11, 12.

Go Bontšha Lerato le Swanago le la Kriste Mehleng ya Bofelo

9. Nea mohlala wa kamoo Jesu a ilego a bontšha lerato go barutiwa ba gagwe ka tsela ya kgonthe.

⁹ Luka o ngwadile ka tiragalo e nngwe e kgahlišago yeo go yona Jesu a bontšhitšego lerato la gagwe ka mediro. Ka ge a be a tseba gore ge nako e dutše e e-ya, madira a Roma a tla dikanetša motse wa Jerusalema woo o bego o tlo fedišwa gomme a dira gore go be thata gore batho ba tšhabe, ka lerato Jesu o ile a lemoša barutiwa ba gagwe ka gore: “Ge le bona Jerusalema e dikologilwe ke madira a hlomilego ditente, gona le tsebe gore go dirwa lešope ga yona go batametše.” Ba be ba swanetše go dira’ng? Jesu o ile a ba nea ditaelo tše kwagalago le tše lebanyago e sa le pele. O itše: “Ke moka bao ba lego Judea ba thome go tšhabela dithabeng, bao ba lego gare ga yona ba tšwe go yona, gomme bao ba lego dinakaneng ba se ke ba tsena go yona; gobane a ke matšatši a go diragatša toka, gore dilo ka moka tše di ngwadilwego di phethagale.” (Luka 21:20-22) Ka morago ga gore madira a Roma a dikanetše Jerusalema ka 66 C.E., batho ba kwago ba ile ba latela ditaelo tše.

10, 11. Go naganišiša ka go tšhaba Jerusalema ga Bakriste ba lekgolong la pele la nywaga go ka re thuša bjang go itokišeletša “masetlapelo a magolo”?

¹⁰ Nakong ya ge ba be ba tšhaba Jerusalema, go be go nyakega gore Bakriste ba bontšhane lerato le swanago le la Kriste go etša ge Kriste le yena a ba bontšhitše lerato. Ruri ba be ba swanetše go abelana selo le ge e le sefe seo ba bego ba e-na le sona. Eupša boporofeta bja Jesu bo be bo ka se phethagale feela ge go be go fedišwa motse woo wa bogologolo. O boletše e sa le pele gore: “Go tla ba le masetlapelo a magolo a sa kago a ba gona ga e sa le go tloga mathomong a lefase go ba go fihla gona bjale, aowa, le go ba gona a ka se sa ba gona gape.” (Mat. 24:17, 18, 21) Pele ga ‘masetlapelo ao a magolo’ ao a lego kgaufsi le nakong ya ge a tšwela pele, le rena re ka lebeletšana le mathata gomme ra hlaela dilo tše itšego tše bonagalago. Go ba le boemo bja Kriste bja monagano go tla re thuša go kgotlelela.

¹¹ Ka nako yeo, go tla nyakega gore re latele mohlala wa Jesu gomme re bontšhe lerato le se nago boithati. Mabapi le taba ye, Paulo o eleditše gore: “Anke yo mongwe le yo mongwe wa rena a kgahliše moagišani wa gagwe ka se e lego se sebotse bakeng sa go mo aga. Gobane gaešita le Kriste ga se a ka a ikgahliša . . . Bjale eka Modimo yo a fago kgotlelelo le khomotšo a ka le nea gore gare ga lena le be le boemo bja monagano bjo bo swanago le bjo Kriste Jesu a bego a e-na le bjona.”—Baroma 15:2, 3, 5.

12. Re swanetše go hlagolela lerato la mohuta ofe gona bjale, gona ka baka la’ng?

 ¹² Petro, yoo Jesu a ilego a mmontšha lerato, o ile a kgothaletša Bakriste ka mo go swanago gore ba hlagolele “maikwelo a borutho a borwarre a hlokago boikaketši” le gore ba ‘kwe therešo.’ Ba swanetše go ‘ratana ka mo go tseneletšego go tšwa pelong.’ (1 Pet. 1:22) Lehono, go feta le ge e le neng pele, re swanetše go hlagolela dika tše bjalo tšeo di swanago le tša Kriste. Batho ba Modimo ba šetše ba thomile go lebeletšana le dikgateletšo tše di šiišago. Ga go motho yo a swanetšego go bota karolo le ge e le efe ya lefase le, bjalo ka ge mathata a morago bjale a tshepedišo ya tša ditšhelete ya lefase le a bontšha gabotse. (Bala 1 Johane 2:15-17.) Go e na le moo, ge bofelo bja tshepedišo ye ya dilo bo batamela ka lebelo, re swanetše go batamela kgaufsi le Jehofa gomme re hlagolele segwera sa kgonthe le bana babo rena ka phuthegong. Paulo o eleditše ka gore: “Leratong la borwarre e-bang le maikwelo a borutho a bonolo go yo mongwe le yo mongwe. Go bontšhaneng kgodišo, etelelang pele.” (Baroma 12:10) Petro yena o gateletše ntlha yeo ka gore: “Godimo ga tšohle, ratanang ka lerato le tseneletšego, gobane lerato le bipa dibe tše dintši.”—1 Pet. 4:8.

13-15. Bakriste ba bangwe ba bontšhitše bjang lerato le swanago le la Kriste ka morago ga ge ledimo le hlasetše?

¹³ Lefaseng ka bophara, Dihlatse tša Jehofa di tsebja ka go bonagatša lerato le swanago le la Kriste. Nagana ka Dihlatse tšeo di ilego tša ithapela go yo thuša ka morago ga gore madimo a matla a hlasele dikarolo tše dikgolo tša ka borwa bja United States ka 2005. Ba tutueditšwe ke mohlala wa Jesu, batho ba fetago 20 000 ba ile ba ithapa gomme bontši bja bona ba tlogela magae a mabotse le mešomo e šireletšegilego e le gore ba thuše bana babo bona bao ba lego tlalelong.

¹⁴ Lefelong le lengwe, meetse a lewatle a ile a tsena ka nageng go fihla mafelong ao a bego a le bokgole bja dikhilomithara tše 80 go tloga lebopong gomme a phagama ka dimithara tše 30. Ge meetse ao a be a fokotšegile, karolo e kgolo ya dintlo tšeo a bego a di khupeditše e be e senyegile ka mo go feletšego. Baithapi ba Dihlatse ba nago le bokgoni bao ba tšwago dinageng tše dingwe ba ile ba tla tikologong yeo ba swere didirišwa gotee le ditlabakelo tša go aga gomme ba ikemišeditše go dira mošomo le ge e le ofe o nyakegago. Dikgaetšedi tše pedi tšeo e lego bana ba motho e bile e le bahlologadi di ile tša tsenya dithoto tša tšona ka loring e nyenyane gomme tša sepela leeto la dikhilomithara tše 3 000 go yo thuša. Yo monyenyane dikgaetšeding tšeo o šetše lefelong leo gomme o sa dutše a thuša komiting ya tlhakodišo e bile o hlankela bjalo ka mmulamadibogo wa ka mehla.

¹⁵ Dintlo tše fetago 5 600 tša Dihlatse gotee le batho ba bangwe tikologong yeo di ile tša agwa lefsa goba tša lokišwa. Dihlatse tša lefelong leo di ile tša ikwa bjang ge di be di bontšhwa lerato ka tsela ye e makatšago? Kgaetšedi yo mongwe yoo ntlo ya gagwe e bego e sentšwe ke ledimo o be a dula ka kharabaneng e nyenyane yeo e bego e nela gomme e e-na le setofo se senyegilego. Bana babo rena ba ile ba mo agela ntlo e itekanetšego eupša e le boemong bjo bobotse. A eme ka pele ga ntlo ya gagwe e mpsha e botse, kgaetšedi yo o ile a lla ka baka la tebogo yeo a bego a e-na le yona bakeng sa Jehofa le bana babo. Mabakeng a mangwe a mantši, Dihlatse tša lefelong leo tšeo di bego di se na bodulo di  ile tša tšwela pele di dula mafelong a motšwa-o-swere ka ngwaga goba go feta moo ka morago ga gore dintlo tša tšona di agwe lefsa. Ka baka la’ng? E le gore bašomi ba tša tlhakodišo ba ka dula go tšona. A mohlala o mobotse gakaakang wa go bontšha boemo bja Kriste bja monagano!

Go Swara Balwetši Kamoo Kriste a Bego a ba Swara ka Gona

16, 17. Re ka bontšha ka ditsela dife kamoo Kriste a bego a ikwa ka gona ka balwetši?

¹⁶ Ke ba sego kae go rena bao ba ilego ba lebeletšana le kotsi e šoro ya tlhago. Eupša mo e ka bago yo mongwe le yo mongwe o lebeletšana le mathata a tša maphelo, e ka ba a gagwe goba a ditho tša lapa. Tsela yeo Kriste a bego a swara balwetši ka yona e re beela mohlala. Lerato le be le mo tutueletša gore a ba šokele. Ge mašaba a be a tliša balwetši go yena, o ile “a fodiša bohle bao ba bego ba sa ipshine.”—Mat. 8:16; 14:14.

¹⁷ Lehono, Bakriste ga ba na matla a Jesu a go fodiša ka mohlolo, eupša ba na le kwelobohloko e swanago le yeo Jesu a bego a e bontšha balwetši. Kwelobohloko yeo e ka bontšhwa bjang? Ka mohlala, bagolo ba ka bontšha gore ba na le boemo bja Kriste bja monagano ka go dira dithulaganyo tša go thuša batšofadi ka phuthegong le go kgonthišetša gore ba newa thušo yeo, go latela tsela yeo e hlalositšwego go Mateo 25:39, 40. * (E bale.)

18. Dikgaetšedi tše pedi di bontšhitše lerato la kgonthe bjang go kgaetšedi yo mongwe, gona ka mafelelo afe?

¹⁸ Ke therešo gore ga go nyakege gore motho e be mogolo gore a direle ba bangwe botse. Ela hloko phihlelo ya Charlene yo a nago le nywaga e 44 yoo a bego a e-na le kankere gomme a boditšwe gore o šaletšwe ke matšatši a lesome gore a hwe. Ge dikgaetšedi tše pedi e lego Sharon le Nicolette di bona thušo yeo a e nyakago le kgateletšego yeo monna wa gagwe a bego a e-na le yona ka baka la go mo hlokomela, di ile tša ithapela go mo thuša ka mehla matšatšing a gagwe a mafelelo. Matšatši ao a ile a fetoga dibeke tše tshela, eupša dikgaetšedi tšeo di ile tša mmontšha lerato go fihla bofelong bja bophelo bja gagwe. Sharon o re: “Go thata ge o tseba gore motho a ka se ke a fola. Lega go le bjalo, Jehofa o ile a re matlafatša. Phihlelo ye e dirile gore re batamele kgaufsi kudu le Jehofa gotee le go tlwaelana gakaone seng sa rena.” Monna wa Charlene o re: “Ka mehla ke tla dula ke gopola botho le thušo ya kgonthe ya dikgaetšedi tše tše pedi. Boikemišetšo bja tšona bjo bobotse le pono ya tšona e botse ka dilo di dirile gore teko ye ya mafelelo e be bonolo kudu go Charlene wa-ka yo a botegago gomme e nneile kimollo yeo ke bego ke tloga ke e nyaka mmeleng le maikwelong. Ke tla dula ke di leboga ka mo go sa felego. Boikgafo bja tšona bo matlafaditše tumelo ya-ka go Jehofa le lerato leo ke ratago mokgatlo ka moka wa bana babo rena.”

19, 20. (a) Re ahla-ahlile dibopego dife tše hlano tša boemo bja Kriste bja monagano? (b) Ke’ng seo o ikemišeditšego go se dira?

¹⁹ Lelokelelong le la dihlogo tše tharo, re ahla-ahlile dibopego tše hlano tša boemo bja monagano bja Jesu le kamoo re ka hlagolelago tsela ya gagwe ya go nagana le ya go dira dilo. Anke re beng le ‘moya o boleta gomme re be le pelo e ikokobeditšego’ go etša Jesu. (Mat. 11:29) Eka le rena re ka katanela go swara ba bangwe ka botho, gaešita le ge re bona go se phethagale ga bona le mafokodi a bona. Anke re lateleng ditaelo tša Jehofa ka sebete gaešita le ge re lebeletšane le diteko.

²⁰ Mafelelong, anke re bontšheng lerato le swanago le la Kriste go bana babo rena ka moka “go fihla bofelong,” go etša ge Kriste ka boyena a dirile. Lerato le bjalo le re hlaola re le balatedi ba kgonthe ba Jesu. (Joh. 13:1, 34, 35) Ee, “lerato la lena la borwarre a le tšwele pele.” (Baheb. 13:1) O se ke wa dika-dika! Diriša bophelo bja gago go tumiša Jehofa le go thuša ba bangwe! Jehofa o tla šegofatša boiteko bjo o bo dirago ka pelo ka moka.

[Mongwalo wa tlase]

Na o ka Hlalosa?

• Bagolo ba ka bontšha bjang boemo bja monagano bja Kriste mabapi le badiri ba bobe?

• Ke ka baka la’ng go le bohlokwa ka mo go kgethegilego gore re bontšhe lerato leo le swanago le la Kriste mehleng ye ya bofelo?

• Re ka bontšha bjang boemo bja monagano bja Kriste mabapi le balwetši?

[Dipotšišo tša Thuto]

[Seswantšho go letlakala 17]

Bagolo ba nyaka gore badiri ba bobe ba boele go Jehofa

[Seswantšho go letlakala 18]

Bakriste bao ba bego ba tšhaba Jerusalema ba bonagaditše boemo bja Kriste bja monagano bjang?

[Seswantšho go letlakala 19]

Dihlatse tša Jehofa di tsebja ka go bontšha lerato le swanago le la Kriste