Borapedi bja Lapa​—Bo Bohlokwa Bakeng sa go Phologa!

AKANYA kamoo “[ntwa] ya letšatši le legolo la Modimo Ra-matla-ohle” e tlago go boifiša ka gona. (Kut. 16:14) A diriša dika-polelo tše di hlalosago taba ka mo go kwagalago, moporofeta Mika o ngwadile gore: “Dithaba di tlo toloxa, meedi e tlo fatoxa, xwa tlo etša mola moti ò le mollong, meetse xe a thšoloxêla leribeng.” (Mika 1:4) Ke mafelelo afe a kotsi ao a tla tlelago bao ba sa hlankelego Jehofa? Lentšu la Modimo le re: “Mehleng yeo babolawa ba Morêna ba tlo tlala naxa mo xo fêla thokô tšohle xo ya kwa dipheletšong tša yôna.”—Jer. 25:33.

Ka baka la ditemošo tše bjalo, dihlogo tša malapa—tšeo bontši bja tšona e lego batswadi ba se nago balekane—di tla dira gabotse go ipotšiša mabapi le bana ba bona bao ba kgonago go ikemela gore, ‘Na ba tla phologa Haramagedone?’ Beibele e re nea kgonthišetšo ya gore ba tla phologa ge e ba ba tiile moyeng ka mo go lekanego go ya ka nywaga ya bona.—Mat. 24:21.

Bohlokwa bja go ba le Nako ya Borapedi bja Lapa

Bjalo ka motswadi, kgonthišetša gore o dira sohle seo o ka se kgonago go godiša bana ba gago “ka tayo le tlhahlo ya monagano ya Jehofa.” (Baef. 6:4) Ke gabohlokwa kudu gore o ithute Beibele le bana ba gago. Re nyaka gore bana ba rena ba swane le Bakriste ba Filipi bao Paulo a ilego a ba reta ka baka la go kwa ga bona Jehofa ka go rata. O ngwadile gore: “Baratiwa ba-ka, ka tsela yeo le ilego la ba ba kwago ka mehla, e sego nakong ya ge ke be ke le gona feela, eupša bjale kudu-kudu ka go ithatela nakong ya ge ke se gona, dulang le šomela phološo ya lena ka go boifa le go thothomela.”—Bafil. 2:12.

Na bana ba gago ba kgomarela melao ya Jehofa ge o se gona? Go thwe’ng ge ba le sekolong? O ka thuša bana ba gago bjang gore ba bone bohlale bja melao ya Jehofa e le gore e ba hlahle gaešita le ge o se gona?

Tabeng ye, borapedi bja lapa bo ka kgatha tema ya bohlokwa go ageng tumelo ya ngwana wa gago. Ka gona, anke re ahla-ahle dilo tše tharo tša bohlokwa tšeo o ka di dirago go kgonthišetša gore thuto ya lena ya lapa ya Beibele e a atlega.

E Sware ka Mehla

Beibele e bontšha gore barwa ba Modimo ba barongwa ba laletšwa gore ba tle pele ga gagwe ka dinako tše itšego. (Jobo 1:6) Dira se se swanago ka bana ba gago. Beela letšatši le itšego ka thoko le nako bakeng sa mantšiboa a Borapedi bja lapa gomme o kgomarele thulaganyo yeo. Go oketša moo, e-ba le nako yeo o e beetšego ka thoko bakeng sa ge go ka tšwelela maemo a sa letelwago.

Ge dikgwedi di dutše di feta, o se ke wa hlagolela mokgwa wa swara thuto ya Beibele ya lapa ka sewelo. Gopola gore ba bana ba gago ke barutwana ba gago ba bohlokwa ba Beibele. Lega go le bjalo, Sathane o nyaka go ba dira bahlaselwa ba gagwe. (1 Pet. 5:8) Ge e ba le sa diriše mantšiboa a Borapedi bja Lapa bakeng sa go ithuta eupša le a dirišetša go bogela thelebišene goba mediro e mengwe yeo e sego ya bohlokwa, Sathane o tla ba a le fentše.—Baef. 5:15, 16; 6:12; Bafil. 1:10.

Dira Gore e Šome

Mantšiboa a Borapedi bja Lapa ga se a swanela go fo ba modiro wa go ithuta. Katanela go dira gore thuto e be e šomago. Bjang? Ka dinako tše dingwe, kgetha dihlogo tšeo di sepedišanago le maemo ao ngwana wa gago a tlago go lebeletšana le ona matšatšing goba dibekeng tše tlago. Ka  mohlala, ke ka baka la’ng le sa itlwaetše dithero tšeo le tlago go di diriša bodireding? Bafsa ba thabela go dira dilo tšeo ba di kgonago. Go itlwaetša dithero le go nagana ka ditsela tša go swaragana le bao ba ganetšago go ka thuša bafsa gore ba be le boikholofelo ge ba tšea karolo mehuteng e fapa-fapanego ya modiro wa go bolela ka Mmušo.—2 Tim. 2:15.

Le gona, le ka ba le dinako tša go itlwaetša tšeo di tlago go thuša bana ba gago go lebeletšana le kgatelelo ya dithaka. Leka go ba le dipoledišano tšeo di tlago go nea ngwana wa gago sebaka sa go hlama tsela ya go arabela yeo a ka kgonago go e diriša. Se se ka akaretša gore o botšiše ngwana wa gago gore o lebeletšana le ditlhohlo dife, o lebeletšana le tšona kae le gore go tla direga eng ge a ka ineela go tšona goba ge a ka di ganetša. Ke ka baka la’ng nako le nako le sa itlwaetše tsela yeo a ka arabelago ka yona ditlhohlong tšeo nakong ya mantšiboa a lena a Borapedi bja Lapa?

Borapedi bja lapa bo nea batswadi sebaka sa go gatelela bohlokwa bja go ba le dipakane tša moya. Mabapi le taba ye, diphihlelo tša bahlanka ba Modimo bao ba botegago ke motheo o mobotse wa go thuša ngwana wa gago go kwešiša gore go thea bophelo bja gagwe go hlankeleng Jehofa ke tsela e kaone kudu yeo a ka e latelago. Hlagolela ka pelong ya ngwana wa gago kganyogo ya go bula madibogo, go hlankela Bethele, go ya Sekolong sa Tlwaetšo ya Bodiredi goba go phegelela mohuta o mongwe wa tirelo ya nako e tletšego.

Temošo ke ye: Batswadi ba bangwe bao ba nago le maikemišetšo a mabotse ba lebiša tlhokomelo kudu go seo ba nyakago gore bana ba bona ba se fihlelele moo ba hlokomologago seo bana ba bona ba se dirago gona bjale. Ke therešo gore ke mo gobotse go kgothaletša bana ba gago go ipeela dipakane tše dibotse tše bjalo ka go hlankela Bethele le modiro wa boromiwa. Lega go le bjalo, ge o dira bjalo, e-ba šedi gore o se ke wa befediša ngwana wa gago ka go mmotša ka dilo tšeo o nyakago a di fihlelela gomme wa dira gore a ikwe a nyamile. (Bakol. 3:21) Ka mehla o gopole gore morwa goba morwedi wa gago o swanetše go rata Jehofa ka pelo ya gagwe—e sego ka gobane o nyaka gore a mo rate. (Mat. 22:37) Ka gona, tsoma ditsela tša go reta ngwana wa gago bakeng sa dilo tšeo a di dirago gabotse gomme o ganetše tutuetšo ya go lebiša tlhokomelo go seo a sa se dirego. Thuša ngwana wa gago go ba le tebogo bakeng sa seo Jehofa a se dirilego. Ke moka, dumelela pelo ya ngwana wa gago go arabela bothong bja Jehofa.

Dira Gore e Thabiše

Karolo ya boraro ya bohlokwa go direng gore mantšiboa a Borapedi bja Lapa e be a atlegago ke go dira gore thuto ya lapa e thabiše. O ka dira seo bjang? Mohlomongwe ka dinako tše dingwe le ka theetša diterama tše di gatišitšwego goba la bogela le go ahla-ahla e nngwe ya dibidio tšeo di gatišitšwego ke Dihlatse tša Jehofa. Goba le ka bala karolo ya Beibele le le gotee gomme setho se sengwe le se sengwe sa lapa sa abelwa karolo yeo se tlago go e bala.

Go na le dihlogo tše itšego ka go Morokami le Phafoga! tšeo e ka bago motheo o mobotse wa poledišano ya lapa. Ka mohlala, le ka diriša sehlogo seo se tšwelelago ka tokollong e nngwe le e nngwe ya Phafoga! se se rego, “O be o tla Araba  Bjang?” Tokollo e nngwe le e nngwe ya bobedi ya Morokami wa batho bohle e na le sehlogo seo se nago le mošomo wa go ithuta se se rego “Bakeng sa Bafsa ba Rena.” Sehlogo se se šiedišana le lelokelelo la dihlogo tša bana ba bašemane le banenyana tše rego “Ruta Bana ba Gago.”

Batswadi bao bana ba bona ba lego mahlalagading ka mo go kgethegilego ba tla thabela lelokelelo la dihlogo tše rego “Bafsa ba a Botšiša” leo le lego ka go Phafoga! Go oketša moo, le se ke la hlokomologa lepokisi le rego “Seo go ka Naganwago ka Sona.” Lepokisi le le ka dirišetšwa go tšwetša pele poledišano ya lapa.

Lega go le bjalo, e-ba šedi gore o se ke wa dira gore thuto ya lapa e fetoge nako ya go botšološiša bana. Ka mohlala, go šišinywa gore batswadi ba kgothaletše bana ba bona go ba le dipuku tšeo ba ngwalago dikgopolo tša bona le kamoo ba ikwago ka gona ka taba yeo go boledišanwego ka yona bjalo ka lapa le kamoo ba ka e dirišago bophelong bja bona. Lega go le bjalo, ka nako e swanago le se ke la gapeletša bana ba lena go bala ka go hlaboša seo ba se ngwadilego ka dipukung tša bona. Ka go dira bjalo, le tla ba le kgothaletša bana ba lena go ngwala ka bolokologi ka dipukung tša bona ba tseba gore ga go na yo a tlago go tseba seo ba se ngwadilego.

Ge e ba le e-ba le borapedi ba lapa ka mehla gomme thuto e e-ba e šomago e bile e thabiša, Jehofa o tla šegofatša maiteko a lena kudu. Nako ye e kgethegilego ya lapa e tla tlaleletša go direng gore bana ba lena ba dule ba phela moyeng e bile ba tiile.

[Lepokisi go letlakala 31]

Diriša Mekgwa e Fapa-fapanego

“Ge re be re ithuta le barwedi ba rena ba banyenyane, nna le monna wa-ka re be re ahla-ahla karolo yeo re swanetšego go e lokišetša bakeng sa seboka sa phuthego gomme re kgopela barwedi ba rena gore ba thale seswantšho seo se hlalosago kakaretšo ya karolo yeo. Ka dinako tše dingwe re be re diragatša ditiragalo tša ka Beibeleng goba re e-ba le dinako tša go itlwaetša dithero tšeo re ka di dirišago tirelong ya tšhemo. Re be re boloka thuto e dumelelana le nywaga ya bona, e kgahliša, e aga e bile e thabiša.”—J.M., United States.

“E le gore re thuše morwa wa morutwana wa rena wa Beibele go kwešiša gore go be go le bjang go diriša mangwalo a go phuthwa mehleng ya Beibele, re ile ra phumola dinomoro tša dikgaolo le ditemana tša puku ya Jesaya gomme ra e gatiša. Re ile ra kopanya matlakala ao gomme ra kgomaretša dikarolo tša ona tša ka mathomong phaepheng. Ke moka, morwa wa morutwana wa rena o ile a leka go dira seo Jesu a se dirilego ge a be a le ka sinagogeng kua Natsaretha. Pego e lego go Luka 4:16-21 e re Jesu o ile a ‘bula lengwalo la go phuthwa la Jesaya gomme a hwetša’ karolo yeo a bego a e nyaka. (Jes. 61:1, 2) Lega go le bjalo, ge mošemanyana yoo a leka go dira se se swanago, o ile a hwetša go le thata go hwetša Jesaya 61 a diriša lengwalo leo le letelele la go phuthwa leo le se nago dinomoro tša dikgaolo le ditemana. A kgahlilwe ke bokgoni bja Jesu bja go diriša mangwalo a go phuthwa, mošemanyana yoo o ile a goeletša ka gore: ‘Ruri Jesu o be a kgahliša!’”—Y.T., Japane.

[Seswantšho go letlakala 30]

Dinako tša go itlwaetša di ka thuša bana ba lena go lebeletšana le kgatelelo ya dithaka

[Seswantšho go letlakala 31]

Katanela go dira gore mantšiboa a Borapedi bja Lapa e be a thabišago