“Fišegang Moyeng”
“Fišegang Moyeng”
“Le se ke la itšimeletša modirong wa lena. Fišegang moyeng. E-bang makgoba a Jehofa.”—BAROMA 12:11.
1. Ke ka baka la’ng Baisiraele ba be ba dira dihlabelo ka diphoofolo le dibego?
JEHOFA o thabela dihlabelo tša boithatelo tšeo bahlanka ba gagwe ba di dirago bakeng sa go bontšha gore ba a mo rata e bile ba ikokobeletša thato ya gagwe. Mehleng ya bogologolo, o be a amogela dihlabelo tše di fapa-fapanego tšeo di bego di dirwa ka diphoofolo le dibego. Dihlabelo tše di be di dirwa ka go dumelelana le Molao wa Moše ke Baisiraele bao ba bego ba nyaka go lebalelwa dibe le go bontšha tebogo. Ka phuthegong ya Bokriste, Jehofa ga se a letela gore re dire dihlabelo ka dilo tše bjalo tšeo di bonagalago. Lega go le bjalo, go kgaolo 12 ya lengwalo la gagwe leo le yago go Bakriste ba Roma, moapostola Paulo o bontšha gore go sa letetšwe gore re dire dihlabelo. A re boneng gore bjang.
Sehlabelo se se Phelago
2. Bjalo ka Bakriste, re phela bophelo bja mohuta ofe, gona bo akaretša’ng?
2 Bala Baroma 12:1, 2. Karolong ya mathomo ya lengwalo la gagwe, Paulo o ile a bontšha gabotse gore Bakriste ba tloditšwego, go sa šetšwe gore ke Bajuda goba Bantle, ba be ba bolelwa ba lokile pele ga Modimo ka tumelo, e sego ka mediro. (Baroma 1:16; 3:20-24) Go kgaolo 12, Paulo o hlalosa gore Bakriste ba swanetše go bontšha tebogo ya bona ka go phela bophelo bja boikgafo. Gore re dire se, re swanetše go fetola menagano ya rena. Ka baka la go se phethagale mo re go abetšego, re ka tlase ga ‘molao wa sebe le wa lehu.’ (Baroma 8:2) Ka gona, re swanetše go fetoga, ‘re mpshafatšwe matleng a tutuetšago menagano ya rena,’ ka go dira diphetogo tše dikgolo ditshekamelong tša rena. (Baef. 4:23) Phetogo e bjalo e feletšego e ka kgonega feela ka thušo ya Modimo le moya wa gagwe. Le gona, e nyaka gore re dire maiteko a magolo, re diriša ‘matla a rena a tlhaologanyo.’ E nyaka gore re dire sohle seo re ka se kgonago gore re se ke ra “bopega ka sebopego sa tshepedišo ye ya dilo” ka boitshwaro bjo bo gobogilego, boithabišo bjo bo gobogilego, le tsela ya yona e gobogilego ya go nagana.—Baef. 2:1-3.
3. Ke ka baka la’ng re tšea karolo medirong ya Bokriste?
3 Le gona, Paulo o re kgothaletša go diriša ‘matla a rena a go nagana’ gore re itlhatselele seo e lego “thato e botse le e amogelegago le e phethegilego ya Modimo.” Ke ka baka la’ng re bala Beibele letšatši le letšatši, re naganišiša ka seo re se balago, re rapela, re e-ba gona dibokeng tša Bokriste le go tšea karolo modirong wa go bolela ditaba tše dibotse tša Mmušo? Na ke ka gobane bagolo ka phuthegong ba re kgothaletša go dira bjalo? Therešo ke gore re leboga go gopotšwa ke bagolo. Eupša re tšea karolo medirong ya Bokriste ka gobane re tutuetšwa ke moya wa Modimo e le gore re bontšhe gore re rata Jehofa go tšwa pelong. Go feta moo, re kgodišegile gore go dira mediro e bjalo ke thato ya Modimo bakeng sa rena. (Sak. 4:6; Baef. 5:10) Re thaba le go kgotsofala kudu ge re lemoga gore ge re phela bophelo bja Bokriste e le ka kgonthe, re ka amogelega go Modimo.
Dimpho Tšeo di Fapa-fapanego
4, 5. Bagolo ba Bakriste ba swanetše go diriša dimpho tša bona bjang?
4 Bala Baroma 12:6-8, 11. Paulo o hlalosa gore ‘re na le dimpho tše di fapanego go ya ka botho bjo bo sa swanelago bjo re bo neilwego.’ Tše dingwe tša dimpho tšeo Paulo a boletšego ka tšona—go kgothatša le go okamela—ke boikarabelo bja bagolo ba Bakriste, bao ba kgothaletšwago go okamela ka “go ikemišetša ga kgonthe.”
5 Paulo o re boikemišetšo bjoo bo swanetše go bonala tseleng yeo ka yona balebeledi ba hlankelago e le barutiši le kamoo ba phethago “bodiredi.” Go bonala Paulo tabeng ye a šupa go “bodiredi” bjo bo phethwago ka phuthegong, goba “mmeleng o tee.” (Baroma 12:4, 5) Bodiredi bjo bo swana le bjo go boletšwego ka bjona go Ditiro 6:4, moo baapostola ba boletšego gore: “Rena re tla ikgafela thapelong le bodireding bja lentšu.” Bodiredi bjo bjalo bo akaretša’ng? Bagolo ba Bakriste ba diriša dimpho tša bona go kgothatša ditho tša phuthego. Ba ipontšha ba le “bodireding bjo,” ge ba eletša le go hlahla phuthego ka phišego ba diriša tsebo ya Lentšu la Modimo yeo ba e hwetšago ge ba ithuta, ba dira nyakišišo, ba ruta le ge ba dira maeto a bodiši. Balebeledi ba swanetše go diriša dimpho tša bona ka letswalo le lebotse gomme ba hlokomele dinku “ka go hlalala.”—Baroma 12:7, 8; 1 Pet. 5:1-3.
6. Re ka latela bjang keletšo e hwetšwago go Baroma 12:11, e lego lengwalo leo sehlogo se se theilwego go lona?
6 Paulo ge a tšwela pele o re: “Le se ke la itšimeletša modirong wa lena. Fišegang moyeng. E-bang makgoba a Jehofa.” Ge re lemoga gore re a itšimeletša bodireding, re ka swanela ke go hlahloba mokgwa wa rena wa go ithuta gomme re rapele go tšwa pelong leboelela re kgopele moya wa Jehofa, woo o ka re thušago go lwantšha go ba bololo gomme re tsošološe mafolofolo a rena. (Luka 11:9, 13; Kut. 2:4; 3:14, 15, 19) Moya o mokgethwa o ile wa nea Bakriste ba pele mafolofolo a go bolela ka “matete a Modimo.” (Dit. 2:4, 11) Ka mo go swanago, o ka re tutueletša go ba mafolofolo bodireding le go ba ba ‘fišegago moyeng.’
Boikokobetšo le Boipoetšo
7. Ke ka baka la’ng re swanetše go hlankela ka boikokobetšo le boipoetšo?
7 Bala Baroma 12:3, 16. Dimpho tšeo re ka bago re e-na le tšona re di hweditše ka baka la “botho bjo bo sa swanelago” bja Jehofa. Paulo o bolela gantši gore: “Go swanelega ga rena ka mo go lekanego go tšwa go Modimo.” (2 Bakor. 3:5) Ka gona, ga se ra swanela go iphagamiša. Ka boikokobetšo re swanetše go lemoga gore katlego yeo re ka bago re e-na le yona bodireding re e hweditše ka baka la tšhegofatšo e tšwago go Modimo, e sego ka baka la bokgoni bja rena. (1 Bakor. 3:6, 7) Ka go dumelelana le se, Paulo o ngwadile gore: “Ke botša yo mongwe le yo mongwe gare ga lena gore a se ke a ikgopola kudu go feta kamoo go nyakegago gore a nagane ka gona.” Go bohlokwa gore re itlhomphe gomme re thabele le go kgotsofalela tirelo ya rena ya Mmušo. Lega go le bjalo, go ba yo a ipoeditšego goba go lemoga mafokodi a rena, go tla re thibela go ikgopola kudu. Go e na le moo, re nyaka gore re ‘nagane e le gore re be le monagano o hlaphogetšwego.’
8. Re ka efoga bjang go ba le ‘temogo mahlong a rena’?
8 E tla ba bošilo go itheta ka baka la dilo tšeo re di fihleletšego. Ke “Modimo yo a godišago.” (1 Bakor. 3:7) Paulo o re Modimo o neile setho se sengwe le se sengwe sa phuthego “tekanyo ya tumelo.” Go e na le go ikwa re phagametše ba bangwe, re swanetše go lemoga gore ba bangwe ba dira dilo tšohle go ya ka tekanyo ya tumelo yeo ba e neilwego. Paulo ge a tšwela pele o re: “Naganang ka ba bangwe ka tsela e swanago le yeo le naganago ka lena ka yona.” Go le lengwe la mangwalo a gagwe, moapostola o re botša gore re se ke ra dira “selo ka tshele goba ka go ikgopola, eupša e be ka monagano o ikokobeditšego [re] tšea gore ba bangwe ba [re] feta ka bogolo.” (Bafil. 2:3) Go nyakega boikokobetšo bja kgonthe le boiteko bjo bo dirwago ka kelohloko e le gore re lemoge gore yo mongwe le yo mongwe wa bana babo rena le dikgaetšedi o re phagametše ka tsela e itšego. Boikokobetšo bo tla re thibela go ba le ‘temogo mahlong a rena.’ Le ge ditokelo tša tirelo e kgethegilego di ka dira gore ba bangwe ba bonale ba e-na le maemo, ba bangwe ka moka ba tla thabišwa ke go phetha “dilo tše ikokobeditšego,” mediro ya tlasana yeo gantši e sa bonwego ke batho.—1 Pet. 5:5.
Botee bja Rena bja Bokriste
9. Ke ka baka la’ng Paulo a bapiša Bakriste ba tswetšwego ka moya le ditho tša mmele?
9 Bala Baroma 12:4, 5, 9, 10. Paulo o bapišitše Bakriste ba tloditšwego le ditho tša mmele tšeo di hlankelago ka botee ka tlase ga Hlogo ya tšona, e lego Kriste. (Bakol. 1:18) O gopotša Bakriste ba tswetšwego ka moya gore mmele o na le ditho tše dintši tšeo di nago le mediro e sa swanego le gore ‘gaešita le ge e le ba bantši, ke mmele o tee boteeng le Kriste.’ Ka mo go swanago, Paulo o ile a kgothaletša Bakriste ba tloditšwego ba Efeso gore: “Ka lerato re goleng dilong tšohle go yena yo e lego hlogo, Kriste. Go yena mmele ka moka, ka go ba o kopantšwego gotee ka kwano le go dirwa gore o be le tirišano ka lelokololo le lengwe le le lengwe leo le neago se se nyakegago, go ya ka modiro wa setho se sengwe le se sengwe ka tekanyo e swanetšego, go dira gore mmele o gole bakeng sa gore o ikage ka lerato.”—Baef. 4:15, 16.
10. “Dinku tše dingwe” di swanetše go ikokobeletša bolaodi bja mang?
10 Le ge “dinku tše dingwe” e se karolo ya mmele o tee wa Kriste, di ka ithuta mo gontši papišong ye. (Joh. 10:16) Paulo o re Jehofa “o beile dilo tšohle ka tlase ga dinao tša [Kriste], gomme a mo dira hlogo ya dilo tšohle phuthegong.” (Baef. 1:22) Lehono, dinku tše dingwe ke karolo ya “dilo tšohle” tšeo Jehofa a di beilego ka tlase ga bolaodi bja Morwa wa gagwe. Le gona, di gare ga “dilo” tšeo Kriste a di beilego tlhokomelong ya “mohlanka yo a botegago le wa temogo.” (Mat. 24:45-47) Ka gona, bao ba nago le kholofelo ya go phela mo lefaseng ba swanetše go lemoga gore Kriste ke Hlogo ya bona gomme ba ikokobeletše mohlanka yo a botegago le wa temogo le Sehlopha sa gagwe se Bušago gotee le balebeledi bao ba kgethilwego ka phuthegong. (Baheb. 13:7, 17) Se se tlaleletša boteeng bja Bokriste.
11. Botee bja rena bo theilwe go eng, gona Paulo o neile keletšo efe e nngwe?
11 Botee bjo bjalo bo theilwe leratong, e lego “setlemo se se phethagetšego sa botee.” (Bakol. 3:14) Go Baroma kgaolo 12, Paulo o gatelela se ge a re lerato la rena e swanetše go ba “le le se nago boikaketši” le gore “leratong la borwarre” re swanetše go ba le “maikwelo a borutho a bonolo go yo mongwe le yo mongwe.” Se se dira gore re hlomphane. Moapostola o re: “Go bontšhaneng kgodišo, etelelang pele.” Goba gona, ga se ra swanela go fapanya lerato le go tšeega maikwelo. Re swanetše go dira sohle seo re ka se kgonago go boloka phuthego e hlwekile. Ge a nea keletšo ya gagwe ya mabapi le lerato, Paulo o tlaleletša ka gore: “Hlaswang se kgopo, le kgomarele go se bolo.”
Tsela ya go Amogela Baeng
12. Ge e le mabapi le go amogela baeng, re ka ithuta’ng go Bakriste ba Matsedonia ya bogologolo?
12 Bala Baroma 12:13. Lerato leo re ratago bana babo rena ka lona le tla re tutueletša go ‘abelana le bakgethwa go ya ka dinyakwa tša bona’ le go ya ka bokgoni bja rena. Gaešita le ge re diila, re ka abelana le ba bangwe. Ge a ngwala ka Bakriste ba Matsedonia, Paulo o itše: “Nakong ya teko e kgolo ge ba be ba hlakišwa, lethabo la bona le legolo le bodiidi bja bona bjo bogolo di dirile gore mahumo a go fa kudu ga bona a ate. Gobane ba dirile go ya kamoo ba kgonago ka gona, ee, ke hlatsela gore e bile go feta kamoo ba kgonago ka gona, ge bona ka go rata ga bona ba ile ba dula ba re kgopela ka go lopa mo gogolo bakeng sa tokelo ya go nea ka botho le bakeng sa go ba le kabelo bodireding bjo bo reretšwego bakgethwa [kua Judea].” (2 Bakor. 8:2-4) Gaešita le ge ba be ba diila, Bakriste ba Matsedonia ba be ba e-na le seatla se se bulegilego. Ba be ba bona e le tokelo go abelana le bana babo bona ba Judea bao ba bego ba hloka.
13. Go ‘latela tsela ya go amogela baeng’ go bolela’ng?
13 Polelwana e rego “latelang tsela ya go amogela baeng” ke phetolelo ya polelwana ya Segerika yeo e bolelago go gata mogato wa pele. The New Jerusalem Bible e fetolela polelwana ye e le “tsomang dibaka tša go amogela baeng.” Go amogela baeng ka dinako tše dingwe go bontšhwa ka go laletša motho gore a tle go ja le wena, gomme ge se se dirwa ka lerato, se a lebogwa. Eupša ge re gata mogato wa pele, re ka lemoga ditsela tše dingwe tše dintši tša go amogela baeng. Ge e ba boemo bja rena bja tša ditšhelete goba matla a sa re dumelele go laletša ba bangwe go tla go ja le rena, re ka bontšha go amogela baeng ka go ba laletša go tla go nwa le rena kofi, teye goba seno se sengwe.
14. (a) Lentšu la Segerika leo le fetoletšwego e le “go amogela baeng” le bopilwe ka mantšu afe? (b) Re ka bontšha bjang ge re le bodireding gore re tshwenyega ka batho bao ba tšwago dinageng dišele?
14 Go amogela baeng go akaretša pono ya rena. Lentšu la Segerika leo le fetoletšwego e le “go amogela baeng” le bopilwe ka mantšu a mabedi a motheo ao a bolelago “lerato” le “motho o šele.” Re ikwa bjang ka batho bašele goba batho bao ba tšwago dinageng dišele? Bakriste bao ba katanelago go ithuta leleme le lengwe e le gore ba bolele ditaba tše dibotse bathong ba tšwago dinageng dišele bao ba dulago tšhemong ya phuthego ya gabo bona ba ka balwa e le ka kgonthe gare ga batho bao ba latelago tsela ya go amogela baeng. Ka kgonthe, ba bantši ba rena maemo ga a re dumelele go ithuta leleme le lengwe. Lega go le bjalo, ka moka ga rena re ka tšea karolo go thušeng batho bao ba tšwago dinageng dišele ka go diriša gabotse pukwana ya Good News for People of All Nations, yeo e nago le molaetša wa Beibele ka maleme a mantši. Na o šetše o ile wa atlega bodireding o diriša pukwana ye?
Go Kwela ba Bangwe Bohloko
15. Jesu o bontšhitše bjang kamoo re ka dirišago keletšo yeo e neilwego go Baroma 12:15?
15 Bala Baroma 12:15. Keletšo ya Paulo mo temaneng ye e ka akaretšwa ka mantšu a sego kae: Kwela ba bangwe bohloko. Re swanetše go ithuta go kwešiša maikwelo a batho ba bangwe gaešita le go ikwa ka tsela yeo ba ikwago ka yona, go sa šetšwe gore ba thabile goba ba nyamile. Ge e ba re fišega moyeng, go tla ba molaleng ge e ba re thaba le batho ba bangwe goba re ba kwela bohloko. Ge barutiwa ba Kriste ba 70 ba be ba boa lesolong la boboledi ba thabile gomme ba anega mafelelo a mabotse a modiro wa bona, Jesu o ile “a thaba kudu ka moya o mokgethwa.” (Luka 10:17-21) O ile a thaba le bona. Ka lehlakoreng le lengwe, Jesu o ile a ‘lla le ba llago’ ge mogwera wa gagwe Latsaro a be a hwile.—Johane 11:32-35.
16. Re ka bontšha bjang kwelobohloko, gona ke bomang bao ka mo go kgethegilego ba swanetšego go dira bjalo?
16 Re nyaka go latela mohlala wa Jesu wa go bontšha kwelobohloko. Ge Mokriste-gotee le rena a thabile, re nyaka go thaba le yena. Ka mo go swanago, re swanetše go bontšha kwelobohloko ge bana babo rena le dikgaetšedi ba e-kwa bohloko goba ba nyamile. Gantši, re ka imolla badumedi-gotee le rena bao ba kwelego bohloko maikwelong ge e ba re ipha nako ya go ba theetša ka kwelobohloko. Le gona, ka dinako tše dingwe re ka lemoga gore dipelo tša rena di kgongwa kudu ke seo re se kwago moo e lego gore re bontšha kwelobohloko ya kgonthe ka go lla. (1 Pet. 1:22) Bagolo ka mo go kgethegilego ba swanetše go latela keletšo yeo Paulo a e neago mabapi le go bontšha kwelobohloko.
17. Go fihla ga bjale re ithutile’ng go Baroma kgaolo 12, gona re tla ahla-ahla’ng sehlogong se se latelago?
17 Ditemana tšeo re di ahla-ahlilego go fihla ga bjale go Baroma kgaolo 12, di re neile keletšo yeo re ka e dirišago maphelong a rena bjalo ka Bakriste gotee le tswalanong ya rena le bana babo rena. Sehlogong se se latelago re tla ahla-ahla ditemana tše di šetšego tša kgaolo ye, tšeo di ahla-ahlago kamoo re swanetšego go lebelela le go ikwa ka gona ka batho bao e sego karolo ya phuthego ya Bokriste, go akaretša le baganetši le batlaiši.
E le go Ikgopotša
• Re ka bontšha bjang gore re ‘fišega moyeng’?
• Ke ka baka la’ng re swanetše go hlankela Modimo ka boikokobetšo le boipoetšo?
• Re ka bontšha badumedi-gotee le rena kwelobohloko bjang?
[Dipotšišo tša Thuto]
[Diswantšho go letlakala 4]
Ke ka baka la’ng re tšea karolo medirong ye ya Bokriste?
[Diswantšho go letlakala 6]
Yo mongwe le yo mongwe wa rena a ka tsenya letsogo bjang go thušeng batho bao ba tšwago dinageng dišele go ithuta ka Mmušo?