Go Boloka Segwera Lefaseng Leo le se Nago Lerato

“Ke le laela dilo tše gore le ratane.”—JOH. 15:17.

1. Ke ka baka la’ng Bakriste ba lekgolong la pele la nywaga ba be ba swanetše go dula e le bagwera ba paale?

BOŠEGONG bja gagwe bja mafelelo a le mo lefaseng, Jesu o ile a kgothaletša barutiwa ba gagwe bao ba botegago gore ba dule ba gwerane. Pejana mantšiboeng ao, o ile a bolela gore lerato leo ba le bontšhanago le tla ba hlaola e le balatedi ba gagwe. (Joh. 13:35) Baapostola ba be ba swanetše go dula e le bagwera ba paale e le gore ba kgotlelele diteko tšeo di bego di letše ka pele le go phetha modiro woo Jesu a bego a tla ba nea wona kgaufsinyane. Ka kgonthe, Bakriste ba lekgolong la pele la nywaga ba ile ba tsebja ka boineelo bja bona bjo bo feletšego go Modimo le go kgomarelana ka pelo ka moka.

2. (a) Ke’ng seo re ikemišeditšego go se dira, gona ka baka la’ng? (b) Ke dipotšišo dife tšeo re tlago go di ahla-ahla?

² Lehono, go thabiša gakaakang go ba setho sa mokgatlo wa lefase ka bophara woo ditho tša wona di latelago mohlala wo o beilwego ke Bakriste ba lekgolong la pele la nywaga! Re ikemišeditše go kwa taelo ya Jesu ya gore re ratane e le ka kgonthe. Lega go le bjalo, mehleng ye ya bofelo batho ka kakaretšo ga ba botege gomme ba palelwa ke go bontšha maikwelo a borutho a tlhago. (2 Tim. 3:1-3) Gantši segwera seo ba se  thomago ga se sa kgonthe e bile ke sa go ikhola. E le gore re boloke leswao la rena bjalo ka Bakriste ba therešo, ga se ra swanela go ba le dika tše bjalo. Ka gona, a re ahla-ahleng dipotšišo tše di latelago: Motheo wa segwera se sebotse ke ofe? Re ka hwetša bagwera ba paale bjang? Ke neng moo go ka nyakegago gore re fediše segwera? Le gona, re ka boloka segwera se se agago bjang?

Motheo wa Segwera se Sebotse ke Ofe?

3, 4. Motheo wa segwera se se tiilego ke ofe, gona ka baka la’ng?

³ Segwera se se tiilego se theilwe leratong leo re ratago Jehofa ka lona. Kgoši Solomone o ngwadile gore: “Ó tee a ka fenywa; ba babedi ba tlo êmêlana; lenti la meloxô e meraro xa le fo kxaoxa.” (Mmo. 4:12) Ge Jehofa e le mologo wa boraro segwereng, segwera seo se tla swarelela.

⁴ Ke therešo gore bao ba sa ratego Jehofa ba ka hlagolela segwera se se kgotsofatšago seng sa bona. Eupša ge batho ba kopanywa ke lerato leo ba ratago Modimo ka lona, segwera sa bona se tla tia. Ge go tsoga diphapano, bagwera ba paale ba tla swarana ka tsela yeo e thabišago Jehofa. Ge manaba ao e lego baganetši ba Modimo a leka go baka dikarogano, a hwetša segwera sa Bakriste ba therešo se sa šišinyege. Go theoga le histori, bahlanka ba Jehofa ba ile ba ipontšha ba ikemišeditše go hwa go e na le go ekana.—Bala 1 Johane 3:16.

5. Ke ka baka la’ng segwera sa Ruthe le Naomi se ile sa swarelela?

⁵ Ka ntle le pelaelo, bagwera ba ba kgahlišago kudu bao re ka bago le bona ke batho bao ba ratago Jehofa. Ela hloko mohlala wa Ruthe le Naomi. Basadi ba ba gare ga batho bao ba ilego ba hlagolela segwera se se kgahlišago kudu seo se begilwego ka Beibeleng. Ke ka baka la’ng segwera sa bona se ile sa swarelela? Ruthe o ile a utolla lebaka ge a be a botša Naomi gore: “Sethšaba sa xeno ke tlo re ké sa xešo; Modimo wa xaxo e tlo ba Modimo wa-ka . . . Morêna a a ntirê ka mo a rataxo; se se tl’o xo nkaroxanya le wêna ké lehu fêla.” (Ruthe 1:16, 17) Go molaleng gore Ruthe le Naomi ba be ba rata Modimo kudu gomme ba ile ba dumelela lerato le le tutuetša tsela yeo ba swaranago ka yona. Ka baka leo, basadi ba ka bobedi ba ile ba šegofatšwa ke Jehofa.

Kamoo o ka Bago le Bagwera ba Paale

6-8. (a) Segwera se se swarelelago se bopša ke’ng? (b) O ka gata bjang mogato wa pele wa go ba le bagwera?

⁶ Mohlala wa Ruthe le Naomi o bontšha gore segwera sa paale ga se fo itlela ka mohlolo. Motheo ke gore batho ka bobedi ba rate Jehofa. Segwera se se swarelelago se tlišwa ke go šoma ka thata le boikgafo. Gaešita le bana ba motho bao e lego barapedi ba Jehofa ba tšwago malapeng a Bokriste ba swanetše go ba bagwera ba go ntšhana sa inong. Ka gona, o ka hlagolela segwera sa paale bjang?

⁷ Gata mogato wa pele. Moapostola Paulo o ile a kgothaletša bagwera ba gagwe ba phuthegong ya Roma gore ba “[latele] tsela ya go amogela baeng ka borutho.” (Baroma 12:13) Go latela tsela e itšego ya go dira dilo go akaretša go gata megato e itšego ka go latelana, kgato ka kgato. Ka mo go swanago, go amogela baeng ka borutho go akaretša go dira dilo tše dinyenyane  ka go latelana ka mehla. Ga go na motho yo a ka latelago tsela ya go amogela baeng legatong la gago. (Bala Diema 3:27.) Tsela e nngwe yeo ka yona o ka amogelago baeng ke ka go laletša batho bao ba fapa-fapanego ka phuthegong go tlo thabela dijo le wena lapeng la gago. Na o ka go dira mokgwa wa gago go amogela ditho tša phuthego ka borutho?

⁸ Tsela e nngwe yeo ka yona o ka gatago mogato wa pele wa gore o be le bagwera ke ka go laletša batho bao ba fapa-fapanego go dira modiro wa boboledi le wena. Ge o ema mojakong wa motho yo o sa mo tsebego gomme o e-kwa motho yo o sepelago le yena a bolela go tšwa pelong ka lerato la gagwe go Jehofa, o ikwa o rata motho yoo.

9, 10. Paulo o beile mohlala ofe, gona re ka mo ekiša bjang?

⁹ Katološa maikwelo a gago a borutho. (Bala 2 Bakorinthe 6:12, 13.) Na o kile wa ikwa eka ka phuthegong ya gabo lena ga go na motho yo o ka gweranago le yena? Ge e ba go le bjalo, na e ka ba e le gore o lekanyetša pono ya gago mabapi le bao e ka bago bagwera ba gago? Moapostola Paulo o beile mohlala o mobotse mabapi le go katološa maikwelo a gagwe a borutho. Ka nako e nngwe, o be a sa nagane gore a ka hlagolela segwera sa kgaufsi le batho bao e sego Bajuda. Lega go le bjalo, o ile a ba “moapostola go ditšhaba.”—Baroma 11:13.

¹⁰ Go tlaleletša moo, Paulo ga se a ka a lekanyetša segwera sa gagwe go dithaka tša gagwe feela. Ka mohlala, yena le Timotheo ba ile ba ba bagwera ba paale le ge ba be ba sa lekane e bile ba e-tšwa ditlogong tše sa swanego. Lehono, bafsa ba bantši ba thabela segwera seo ba nago le sona le batho ba bagolo ka phuthegong. Vanessa yo a lego mathomong a nywaga ya bo-20 o re: “Ke na le mogwera yo a rategago kudu yo a lego nywageng ya bo-50. Ke kgona go mmotša selo se sengwe le se sengwe seo nka se botšago dithaka tša-ka. Le gona o nthata kudu.” Segwera se sebjalo se ka thongwa bjang? Vanessa o re: “Ke ile ka swanelwa ke go hlagolela segwera se, ga se ka fo letela gore se itlele.” Na o ikemišeditše go hlagolela segwera le batho bao ba sa lekanego le wena? Ka ntle le pelaelo, Jehofa o tla putsa maiteko a gago.

11. Re ka ithuta’ng mohlaleng wa Jonathane le Dafida?

¹¹ Botega. Solomone o ngwadile gore: “Moxwêra ké moratwa wa ka mehla; ké ngwan’ešo e a ntswáletšwexo wa mohla wa tlalêlô.” (Die. 17:17) Ge Solomone a be a ngwala mantšu ao, a ka ba a be a naganne ka segwera seo tatagwe Dafida a bego a e-na le sona le Jonathane. (1 Sam. 18:1) Kgoši Saulo o be a nyaka gore morwa wa gagwe Jonathane a mo hlatlame bjalo ka kgoši ya Isiraele. Eupša Jonathane o ile a amogela taba ya gore Jehofa o kgethile Dafida go ba kgoši. Go fapana le Saulo, Jonathane ga se a ka a  hufegela Dafida. Ga se a ka a kgopišwa ke theto yeo e bego e newa Dafida, goba go kgolwa lesebo leo Saulo a bego a le phatlalatša mabapi le Dafida. (1 Sam. 20:24-34) Na re swana le Jonathane? Ge bagwera ba rena ba hwetša ditokelo, na re thaba le bona? Ge ba tlaišega, na re a ba homotša le go ba thekga? Ge re e-kwa lesebo le le gobatšago ka mogwera wa rena, na re kitimela go kgolwa seo re se kwago? Goba bjalo ka Jonathane, na re šireletša mogwera wa rena?

Ge Segwera se Swanetše go Fedišwa

12-14. Ke tlhohlo efe yeo barutwana ba bangwe ba Beibele ba lebeletšanago le yona, gona re ka ba thuša bjang?

¹² Ge morutwana wa Beibele a thoma go dira diphetogo bophelong bja gagwe, a ka lebeletšana le tlhohlo e kgolo mabapi le bagwera. A ka ba le bagwera bao a thabelago go ba le bona eupša ba sa phele ka ditekanyetšo tša Beibele tša boitshwaro. Nakong e fetilego, a ka ba a be a fetša nako e ntši le bona. Lega go le bjalo, mo nakong ye o a bona gore mediro ya bona e ka ba le tutuetšo e mpe go yena gomme o bona go swanetše gore a fokotše nako yeo a e fetšago a e-na le bagwera ba bjalo. (1 Bakor. 15:33) Lega go le bjalo, a ka be a nagana gore ge e ba a sa fetše nako le bona ga a ba botegele.

¹³ Ge e ba o le morutwana wa Beibele yo a lebanego le tlhohlo ye, gopola gore mogwera wa kgonthe o tla thabela gore o leka go kaonefatša bophelo bja gago. Mohlomongwe a ka nyaka go ithuta ka Jehofa gotee le wena. Ka lehlakoreng le lengwe, bagwera ba maaka ba tla ‘bolela ka go go goboša’ ka gobane ga o kitimele le bona “bodibeng bjo bo swanago bja kgobogo.” (1 Pet. 4:3, 4) Ge e le gabotse, ga se gore ke wena o sa ba botegelego, ke bona ba sa go botegelego.

¹⁴ Ge barutwana ba Beibele ba lahlwa ke bagwera ba bona bao ba sa ratego Modimo, ditho tša phuthego di ka tswalela sekgoba seo. (Bagal. 6:10) Na o tlwaelane le barutwana ba Beibele bao ba bago gona dibokeng? Na ka dinako tše dingwe o ba le dipoledišano tše di agago le bona?

15, 16. (a) Re swanetše go arabela bjang ge mogwera a kgaotša go hlankela Jehofa? (b) Re ka bontšha bjang gore re rata Modimo?

¹⁵ Lega go le bjalo, go thwe’ng ge e ba mogwera wa gago ka phuthegong a kgetha go furalela Jehofa, mohlomongwe go nyakega gore a kgaolwe? Boemo bjo bjalo e ka ba bjo bo gateletšago kudu. Ge a hlalosa kamoo a ilego a ikwa ka gona ge mogwera wa gagwe wa paale a kgaotša go hlankela Jehofa, kgaetšedi yo mongwe o itše: “Ke ile ka ikwa eka go na le selo se sengwe ka gare ga-ka seo se hwilego. Ke be ke nagana gore mogwera wa-ka o tsemile medu ditherešong, eupša go be go se bjalo. Ke ile ka ipotšiša ge e ba a be a hlankela Jehofa go fo thabiša ba lapa labo. Ke moka ke ile ka thoma go hlahloba maikemišetšo a-ka. Na ke be ke hlankela Jehofa ka mabaka a swanetšego?” Kgaetšedi yo o ile a lebeletšana bjang le boemo? O re: “Ke ile ka lahlela morwalo wa-ka go Jehofa. Ke ikemišeditše go bontšha Jehofa gore ke mo ratela seo a lego sona, e sego ka gobane a nnea bagwera ka mokgatlong wa gagwe.”

¹⁶ Re ka se ke ra letela go dula re le bagwera ba Modimo ge e ba re thekga bao ba kgethago go gwerana le lefase. Morutiwa Jakobo o ngwadile gore: “Na ga le tsebe gore go gwerana le lefase ke bonaba go Modimo? Ka gona, mang le mang yo a nyakago go ba mogwera wa lefase o itira lenaba la Modimo.” (Jak. 4:4) Re ka bontšha gore re rata Modimo ka go holofela gore O tla re thuša go lebeletšana ka katlego le maikwelo a go lahlegelwa ke mogwera ge e ba re Mmotegela. (Bala Baheberu 13:5b.) Kgaetšedi yo a tsopotšwego pejana o akaretša taba ka  gore: “Ke ithutile gore re ka se ke ra dira gore motho yo mongwe a rate Jehofa goba a re rate. Mafelelong, ke kgetho ya motho ka noši.” Lega go le bjalo, re ka dira’ng gore re tšwele pele re hlagolela segwera se se agago le bao ba dulago ba le ka phuthegong?

Go Boloka Segwera se Sebotse

17. Bagwera ba paale ba boledišana bjang?

¹⁷ Poledišano e botse e aga segwera. Ge o bala pego ya Beibele ya mabapi le Ruthe le Naomi, Dafida le Jonathane gotee le Paulo le Timotheo, o tla lemoga gore bagwera ba paale ba boledišana ka bolokologi eupša e le ka tlhompho. Mabapi le tsela yeo re swanetšego go boledišana le ba bangwe ka yona, Paulo o ngwadile gore: “Anke polelo ya lena ka mehla e be e kgahlišago, e nokilwego ka letswai.” Ka mo go kgethegilego Paulo o be a bolela ka tsela yeo ka yona re swanetšego go boledišana le batho “ba lego ka ntle,” ke gore, bao e sego bana babo rena ba Bakriste. (Bakol. 4:5, 6) Ka kgonthe, ge e ba re swanetše go bolela ka tlhompho le batho bao e sego badumedi-gotee le rena, ruri re swanetše go bontšha tlhompho kudu ge re bolela le bagwera ba rena bao ba lego ka phuthegong!

18, 19. Re swanetše go lebelela bjang keletšo le ge e le efe yeo re e newago ke mogwera wa Mokriste, gona bagolo ba Efeso ba re beetše mohlala ofe?

¹⁸ Bagwera ba paale ba tšeela dikgopolo tša bagwera ba bona godimo, ka gona poledišano ya bona e swanetše go ba e kgahlišago le e lebanyago. Kgoši Solomone yo bohlale o ngwadile gore: “Ditlôlô le diôrêlô di thabiša pelo; le keletšô e tšwaxo pelong ya moxwêra e bose.” (Die. 27:9) Na ye ke tsela yeo o lebelelago ka yona keletšo le ge e le efe yeo e tšwago go mogwera wa gago? (Bala Psalme 141:5.) Ge e ba mogwera wa gago a bontšha go tshwenyega ka tsela yeo o e tšeago, o arabela bjang? Na o lebelela seo a se bolelago e le pontšho ya botho bjo lerato goba o a kgopišega?

¹⁹ Moapostola Paulo o ile a thabela tswalano ya kgaufsi le bagolo ba phuthego ya Efeso. Mohlomongwe o tsebile ba bangwe ba bona pele e e-ba badumedi. Lega go le bjalo, ge a be a kopana le bona la mafelelo, o ile a ba nea keletšo e lebanyago. Ba ile ba arabela bjang? Bagwera ba Paulo ga se ba ka ba kgopišega. Go e na le moo, ba ile ba leboga gore o tshwenyega ka bona, le gona ba ile ba lla ge ba nagana gore ba ka se sa mmona gape.—Dit. 20:17, 29, 30, 36-38.

20. Mogwera yo lerato o tla dira’ng?

²⁰ Bagwera ba kgonthe ga ba amogele keletšo e bohlale feela, eupša gape ba e nea ba bangwe. Go ba gona, re swanetše go lemoga gore ke neng moo re swanetšego “go šetša ditaba tša [rena].” (1 Bathes. 4:11) Le gona, re swanetše go lemoga gore yo mongwe le yo mongwe wa rena “o tla ikarabela go Modimo.” (Baroma 14:12) Eupša ge go nyakega, mogwera yo lerato ka botho o tla gopotša mogwera wa gagwe ka ditekanyetšo tša Jehofa. (1 Bakor. 7:39) Ka mohlala, o tla dira’ng ge e ba o lemoga gore mogwera wa gago yo a sego a tsena lenyalong o thoma go hlagolela maikwelo a lerato go motho yo e sego modumedi-gotee le yena? Na o tla dika-dika go mmotša gore seo se a go tshwenya ka baka la go boifa go senya segwera sa lena? Goba ge e ba mogwera a hlokomologa keletšo ya gago, o tla dira’ng? Mogwera wa paale o tla tsoma thušo ya badiši ba lerato e le gore a thuše mogwera yo a gatilego kgato e fošagetšego. Go dira bjalo go nyaka sebete. Lega go le bjalo, segwera seo se theilwego leratong la go rata Jehofa se ka se senyegele sa ruri.

21. Ke’ng seo ka moka ga rena re tlago go se dira ka dinako tše dingwe, eupša ke ka baka la’ng go le bohlokwa gore re boloke segwera se se tiilego ka phuthegong?

²¹ Bala Bakolose 3:13, 14. Ka dinako tše dingwe, re ka dira gore bagwera ba be le ‘lebaka la go belaela’ ka rena gomme le bona ba ka dira goba ba bolela dilo tšeo di re kgopišago. Jakobo o ngwadile gore: “Ka moka ga rena re kgopša gantši.” (Jak. 3:2) Lega go le bjalo, segwera ga se agwe ke makga ao ka ona re direlanago diphošo, eupša se agwa ke makga ao ka ona re lebalelanago diphošo tšeo ka mo go feletšego. Ruri go bohlokwa gore re age segwera se se tiilego ka go boledišana le go lebalelana ka bolokologi! Ge e ba re bontšha lerato le bjalo, e tla ba “setlemo se se phethagetšego sa botee.”

O be o tla Araba Bjang?

• Re ka ba le bagwera ba paale bjang?

• Ke neng mo segwera se ka swanelwago ke go fedišwa?

• Re swanetše go dira’ng gore re boloke segwera se se tiilego?

[Dipotšišo tša Thuto]

[Seswantšho go letlakala 18]

Motheo wa segwera se se swarelelago sa Ruthe le Naomi e be e le ofe?

[Seswantšho go letlakala 19]

Na ka mehla o bontšha go amogela baeng?