“Lena le Bagwera Ba-ka”

“Lena le bagwera ba-ka ge e ba le dira seo ke le laelago sona.”—JOH. 15:14.

1, 2. (a) Bagwera ba Jesu ba be ba e-tšwa ditlogong dife tše di sa swanego? (b) Ke ka baka la’ng go le bohlokwa gore re be bagwera ba Jesu?

BANNA bao ba bego ba e na le Jesu ka phapošing ya ka godimo ba be ba e-tšwa ditlogong tše di sa swanego. Petro le Andrea ngwanabo e be e kile ya ba barei ba dihlapi. Mateo e be e kile ya ba molekgetho—setho sa sehlopha seo se bego se sa ratwe ke Bajuda. Mohlomongwe ba bangwe ba bjalo ka Jakobo le Johane, ba tsebile Jesu go tloga ge e be e sa le ba banyenyane. Ba bangwe ba bjalo ka Nathaniele ba ka be ba be ba e-na le nywaga e mmalwa feela ba mo tseba. (Joh. 1:43-50) Lega go le bjalo, bao ba bego ba le gona bošegong bjoo bjo bohlokwa bja Paseka kua Jerusalema ba be ba kgodišegile gore Jesu ke Mesia yo a holofeditšwego, Morwa wa Modimo yo a phelago. (Joh. 6:68, 69) Ruri ba swanetše go ba ba ile ba ikwa ba ratwa ge ba mo kwa a ba botša gore: “Ke le biditše bagwera gobane dilo ka moka tšeo ke di kwelego go Tate ke le tsebišitše tšona.”—Joh. 15:15.

² Mantšu ao Jesu a a boditšego baapostola ba gagwe ba botegago a šoma kudu go Bakriste ka moka ba tloditšwego lehono, gape le go bagwera ba bona ba “dinku tše dingwe.” (Joh. 10:16) Go sa šetšwe setlogo sa rena, re ka ba le tokelo ya go ba bagwera ba Jesu. Segwera sa rena le yena se bohlokwa kudu ka gobane go ba bagwera ba gagwe go dira gore re be bagwera ba Jehofa. Ge e le gabotse, ga go kgonege gore re batamele kgaufsi le Jehofa ka ntle le gore pele re batamele kgaufsi le Kriste. (Bala Johane 14:6, 21.) Eupša, ke’ng seo re swanetšego go se dira gore re be bagwera ba Jesu le gore re dule re le bona? Pele re ahla-ahla taba yeo ya bohlokwa, a re hlahlobeng mohlala wo o beilwego ke Jesu ka boyena wa go ba mogwera wa paale gomme re bone seo re ka ithutago sona tseleng yeo barutiwa ba gagwe ba ilego ba arabela ka yona.

Mohlala wa Jesu wa go ba Mogwera wa Paale

3. Jesu o be a tsebja ka’ng?

³ Kgoši e bohlale Solomone o ngwadile gore: “Mohumi ó ratwa ke ba bantši.” (Die. 14:20) Mantšu a a hlalosa tshekamelo ya batho ba sa phethagalago—go dira segwera ba lebeletše seo ba ka se hwetšago go e na le seo ba ka se neago. Jesu o be a se na bofokodi bjo bjalo. O be a sa tutuetšwe ke boemo bja motho bja tša ditšhelete goba maemo a gagwe setšhabeng. Ke therešo gore Jesu o ile a rata lesogana la mohumi la mmuši gomme a le laletša gore le be molatedi wa gagwe. Lega go le bjalo, Jesu o ile a laela lesogana leo go rekiša dilo tšeo le bego le e-na le tšona gomme le nee bahloki. (Mar. 10:17-22; Luka 18:18, 23) Jesu o be a sa tsebje ka go tlwaelana le bahumi le batho ba tumilego, eupša o be a tsebja ka go gwerana le batho ba tlasana le ba go nyatšega.—Mat. 11:19.

4. Ke ka baka la’ng go ka thwe bagwera ba Jesu ba be ba dira diphošo?

⁴ Ka kgonthe, bagwera ba Jesu e be e le batho bao ba dirago diphošo. Ka nako e nngwe Petro o ile a palelwa ke go bona dilo ka pono ya moya. (Mat. 16:21-23) Jakobo le Johane ba ile ba bontšha moya wa go rata go ba le maemo ge ba be ba kgopela Jesu gore a ba nee maemo a phagamego Mmušong. Tiro ya bona e ile ya galefiša baapostola ba bangwe gomme taba ya go nyaka go phagamela ba bangwe e be e dula e baka dingangišano. Lega go le bjalo, Jesu ka go se fele pelo o ile a leka go lokiša tsela ya bagwera ba gagwe ya go nagana gomme o be a sa ba galefele gabonolo.—Mat. 20:20-28.

5, 6. (a) Ke ka baka la’ng Jesu a ile a dula e le mogwera wa bontši bja baapostola ba gagwe? (b) Ke ka baka la’ng Jesu a ile a fediša segwera sa gagwe le Judase?

⁵ Jesu ga se a ka a gwerana le banna ba ba sa phethagalago feela ka gobane a tlogelela dilo  goba ka gobane a iphoufaletša diphošo tša bona. Go e na le moo, o ile a kgetha go šetša maikemišetšo le dika tša bona tše dibotse. Ka mohlala, Petro, Jakobo le Johane ba ile ba robala go e na le go thekga Jesu nakong ya ge a be a lebeletšane le boemo bjo thata. Jesu o ile a nyama ka mabaka a kwagalago. Lega go le bjalo, o ile a lemoga gore maikemišetšo a bona e be e le a mabotse, a re: “Go ba gona, moya o mafolofolo, eupša nama e a fokola.”—Mat. 26:41.

⁶ Ka mo go fapanego, Jesu o ile a fediša segwera sa gagwe le Judase Isikariothe. Le ge Judase a ile a dula a itira eka ke mogwera, Jesu o ile a lemoga gore motho yo yoo e kilego ya ba mogwera wa gagwe wa paale o ile a dumelela pelo ya gagwe e senyega. Ka ge Judase a be a gwerane le lefase, o ile a fetoga lenaba la Modimo. (Jak. 4:4) Ka gona, Jesu o be a šetše a rakile Judase ge A be a bolela gore baapostola ba botegago ba 11 bao ba šetšego ke bagwera ba Gagwe.—Joh. 13:21-35.

7, 8. Jesu o bontšhitše bjang gore o rata bagwera ba gagwe?

⁷ Jesu o be a sa šetše mafokodi a bagwera ba gagwe ba botegago gomme o be a dira sohle seo a ka se kgonago go ba hola. Ka mohlala, o ile a rapela Tatagwe gore a ba šireletše nakong ya diteko. (Bala Johane 17:11.) Jesu o be a naganela mafokodi a bona. (Mar. 6:30-32) Le gona, o be a sa rate go ba botša feela seo yena a bego a se nagana, eupša o be a rata gape le go kwa gotee le go kwešiša seo ba bego ba se nagana le kamoo ba bego ba ikwa ka gona.—Mat. 16:13-16; 17:24-26.

⁸ Jesu o ile a phelela le go hwela bagwera ba gagwe. Ke therešo gore o be a tseba gore o swanetše go gafa bophelo bja gagwe ka ge go be go nyakega go ya ka molao e le gore a fihlelele tekanyetšo ya Tatagwe ya toka. (Mat. 26:27, 28; Baheb. 9:22, 28) Eupša Jesu o ile a gafa bophelo bja gagwe e le pontšho ya lerato. Jesu o itše: “Ga go yo a nago le lerato le le fetago le, gore motho a gafe moya wa gagwe ka baka la bagwera ba gagwe.”—Joh. 15:13.

Barutiwa ba Ile ba Arabela Bjang Segwereng sa Jesu?

9, 10. Batho ba be ba arabela bjang go beng ga Jesu le seatla se bulegilego?

⁹ Jesu o be a e-na le seatla se se bulegilego, a diriša nako ya gagwe go thuša batho, a ba bontšha lerato gomme a ba nea dilo tšeo di bonagalago. Ka baka leo, batho ba be ba gogelega go yena gomme ba thabela go abelana dilo le yena. (Luka 8:1-3) Jesu o be a ka bolela go tšwa phihlelong ya gagwe gore: “Tlwaelang go fa, gomme batho ba tla le fa. Ba tla le tšhelela memenong ya diaparo tša lena kelo e botse, yeo e katetšwego, yeo e hlokgoseditšwego le ya go falala. Gobane kelo yeo le elago ka yona, ke yeo le lena ba tla le elelago ka yona.”—Luka 6:38.

¹⁰ Go ba gona, ba bangwe ba ile ba leka go gwerana le Jesu e le gore feela ba hwetše dilo go  yena. Bagwera ba ba maaka ba ile ba hlanogela Jesu ge ba be ba sa kwešiše seo a bego a se bolela. Go e na le gore ba bote Jesu, ba ile ba dira phetho e fošagetšego gomme ba mo hlanogela. Ka mo go fapanego, baapostola ba be ba botega. Gantši segwera sa bona le Kriste se be se lekwa, eupša ba ile ba dira sohle seo ba ka se kgonago go mo thekga dinakong tša lethabo le tša manyami. (Bala Johane 6:26, 56, 60, 66-68.) Bošegong bja gagwe bja mafelelo e le motho mo lefaseng, Jesu o ile a bontšha kamoo a lebogago bagwera ba gagwe ka go bolela gore: “Ke lena bao le swareletšego le nna melekong ya-ka.”—Luka 22:28.

11, 12. Jesu o ile a kgonthišetša barutiwa bjang, gona ba ile ba arabela bjang?

¹¹ Kapejana ka morago ga ge Jesu a retile barutiwa ba gagwe ka baka la potego ya bona, ba ile ba mo furalela. Ka nakwana, ba ile ba dumelela go boifa batho go bipa lerato leo ba ratago Kriste ka lona. Le mo nakong ye, Jesu o ile a ba lebalela. Ka morago ga lehu la gagwe le tsogo, o ile a bonagala go bona gomme a ba kgonthišetša gore ke mogwera wa bona. Go feta moo, o ile a ba nea kabelo e kgethwa—go dira “batho ba ditšhaba ka moka” barutiwa le go ba dihlatse tša gagwe “go fihla karolong ya kgole ya lefase.” (Mat. 28:19; Dit. 1:8) Barutiwa ba ile ba arabela bjang?

¹² Barutiwa ba ile ba dira sohle seo ba ka se kgonago go phatlalatša molaetša wa Mmušo. Ka thekgo ya moya wa Jehofa o mokgethwa, kapejana ba ile ba tlatša Jerusalema ka thuto ya bona. (Dit. 5:27-29) Gaešita le go tšhošetšwa ka lehu ga se gwa ka gwa ba thibela go kwa taelo ya Jesu ya gore ba dire barutiwa. Ka nywaga-some e mmalwa feela ka morago ga ge Jesu a ba neile taelo, moapostola Paulo o be a ka ngwala gore ditaba tše dibotse di boletšwe “tlholong yohle yeo e lego tlase ga legodimo.” (Bakol. 1:23) Ka kgonthe, barutiwa ba ba ile ba hlatsela gore ba tšeela godimo segwera sa bona le Jesu!

13. Barutiwa ba Jesu ba ile ba dumelela dithuto tša gagwe di ba kgoma ka ditsela dife?

¹³ Le gona, bao ba ilego ba fetoga barutiwa ba ile ba dumelela dithuto tša Jesu di kgoma maphelo a bona. Go ba bantši, se se be se bolela go fetoša boitshwaro bja bona le semelo sa bona. Barutiwa ba bangwe ba bafsa pele e be e le basodoma, dihlotlolo, matagwa goba mahodu. (1 Bakor. 6:9-11) Ba bangwe ba ile ba swanela ke go fetoša pono ya mabapi le batho ba morafo o mongwe. (Dit. 10:25-28) Lega go le bjalo, ba ile ba kwa Jesu. Ba ile ba lahla motho wa bona wa kgale gomme ba apara yo mofsa. (Baef. 4:20-24) Ba ile ba tlwaelana le “monagano wa Kriste,” ba kwešiša le go ekiša tsela ya gagwe ya go nagana le ya go dira dilo.—1 Bakor. 2:16.

Go Gwerana le Kriste Lehono

14. Jesu o holofeditše gore o tla dira’ng nakong ya “bofelo bja tshepedišo ya dilo”?

¹⁴ Bontši bja Bakriste bao ba lekgolong la pele la nywaga ba tsebile Jesu pele ga lehu la gagwe goba ba mmone ka morago ga tsogo ya gagwe. Go molaleng gore rena ga se ra ka ra ba le tokelo yeo. Ka gona, re ka ba bagwera ba Kriste bjang? Tsela e nngwe ke ka go latela tlhahlo yeo e newago ke sehlopha sa mohlanka yo a botegago le wa temogo, seo se bopjago ke bana babo Jesu ba tloditšwego ka moya bao ba sa dutšego ba le mo lefaseng. Jesu o ile a holofetša gore nakong ya “bofelo bja tshepedišo ya dilo,” o tla bea mohlanka yo gore a “hlokomele dilo tša gagwe ka moka.” (Mat. 24:3, 45-47) Lehono, palo e kgolo ya bao ba nyakago go ba bagwera ba Kriste ga se ditho tša sehlopha se sa mohlanka. Tsela yeo ba arabelago ka yona tlhahlong yeo ba e newago ke sehlopha sa mohlanka yo a botegago e kgoma segwera sa bona le Kriste bjang?

15. Ke’ng seo se bontšhago ge e ba motho a tla ahlolwa e le nku goba pudi?

 ¹⁵ Bala Mateo 25:31-40. Jesu o biditše bao ba tlago go bopa sehlopha sa mohlanka gore ke bana babo. Seswantšhong sa mabapi le go kgetholla dinku go dipudi, Jesu o boletše ka mo go kwagalago gore o tšea tsela yeo re swarago bana babo ka yona e le tsela yeo re mo swarago ka yona. Ge e le gabotse, o itše selo se tlago go kgethologanya nku go pudi e tla ba tsela yeo ka yona motho a swarago “bana [babo] ba ba banyenyane-nyenyane.” Ka gona, tsela e bohlokwa yeo ka yona bao ba nago le kholofelo ya go phela lefaseng ba bontšhago kganyogo ya go gwerana le Kriste ke ka go thekga sehlopha sa mohlanka yo a botegago.

16, 17. Re ka bontšha bjang gore re bagwera ba bana babo Kriste?

¹⁶ Ge e ba o e-na le kholofelo ya go phela mo lefaseng ka tlase ga Mmušo wa Modimo, o ka bontšha bjang segwera sa gago le bana babo Kriste? A re ahla-ahleng ditsela tše tharo feela. Ya pele, ke ka go tšea karolo ka pelo ka moka modirong wa boboledi. Kriste o laetše bana babo go bolela ditaba tše dibotse lefaseng ka bophara. (Mat. 24:14) Lega go le bjalo, bana babo Kriste bao ba šetšego lefaseng lehono ba be ba tla hwetša go le thata go rwala boikarabelo bjoo ka ntle le thušo ya bagwera ba bona ba dinku tše dingwe. Ge e le gabotse, nako le nako ge ditho tša sehlopha sa dinku tše dingwe di tšea karolo modirong wa boboledi, di thuša bana babo Kriste go phetha thomo ya bona e kgethwa. Sehlopha sa mohlanka yo a botegago le wa temogo se leboga kudu pontšho ye ya segwera, go etša ge Kriste le yena a e leboga.

¹⁷ Tsela ya bobedi yeo sehlopha sa dinku tše dingwe se ka thušago bana babo Kriste ka yona ke ka go thekga modiro wa boboledi ka ditšhelete. Jesu o kgothaleditše balatedi ba gagwe go itirela bagwera ka “mahumo a sa lokago.” (Luka 16:9) E sego gore re ka reka segwera sa Jesu goba sa Jehofa. Eupša, ka go diriša dilo tša rena tše di bonagalago go tšwetša pele dikgahlego tša Mmušo, re hlatsela segwera sa rena le lerato, e sego ka lentšu feela, eupša “ka tiro le ka therešo.” (1 Joh. 3:16-18) Re nea thekgo e bjalo ya ditšhelete ge re tšea karolo modirong wa boboledi, ge re ntšha meneelo ya go thekga mediro ya kago le go hlokomela mafelo a rena a borapedi le ge re ntšha meneelo bakeng sa modiro wa boboledi wa lefase ka bophara. Go sa šetšwe gore meneelo ya rena ke e menyenyane goba ke e mentši, Jehofa le Jesu ba tloga ba leboga go nea ga rena ka go hlalala.—2 Bakor. 9:7.

18. Ke ka baka la’ng re swanetše go kwa tlhahlo yeo e theilwego Beibeleng yeo e newago ke bagolo ka phuthegong?

¹⁸ Tsela ya boraro yeo re ka bontšhago ka yona gore re bagwera ba Kriste ke ka go latela tlhahlo yeo re e newago ke bagolo ka phuthegong. Banna ba ba kgethwa ka moya o mokgethwa ka tlase ga tlhahlo Kriste. (Baef. 5:23) Moapostola Paulo o ngwadile gore: “Kwang bao ba etelelago pele gare ga lena gomme le ikokobetše.” (Baheb. 13:17) Ka dinako tše dingwe re ka hwetša go le thata go latela tlhahlo e theilwego  Beibeleng yeo re e newago ke bagolo ba phuthego ya gabo rena. Mohlomongwe re tseba mafokodi a bona, gomme se se ka dira gore re be le pono e fošagetšego ka keletšo ya bona. Lega go le bjalo, Kriste, Hlogo ya phuthego, o thabela go diriša banna ba ba sa phethagalago. Ka gona, tsela yeo re arabelago ka yona tlhahlong ya bona e kgoma ka go lebanya segwera sa rena le Kriste. Ge re tshediša mafokodi a bagolo mahlo gomme ka lethabo re latela tlhahlo ya bona, re hlatsela gore re rata Kriste.

Moo re ka Hwetšago Bagwera ba Paale

19, 20. Ke’ng seo re ka se hwetšago ka phuthegong, gona re tla ahla-ahla’ng sehlogong se se latelago?

¹⁹ Jesu o tšwela pele go re hlokomela e sego feela ka badiši ba lerato, eupša le ka go re nea bo-mma, bana babo rena le dikgaetšedi ka phuthegong. (Bala Mareka 10:29, 30.) Ge o be o thoma go kopanela le mokgatlo wa Jehofa, ba leloko la geno ba ile ba arabela bjang? Re holofela gore ba ile ba thekga maiteko a gago a go batamela kgaufsi le Modimo le Kriste. Eupša Jesu o lemošitše gore ka dinako tše dingwe “manaba a motho e tla ba batho ba ntlo ya gagwe.” (Mat. 10:36) Go kgothatša gakaakang go tseba gore ka phuthegong re ka hwetša bao ba tlago go re rata go feta bana babo rena ba madi!—Die. 18:24.

²⁰ Ka ge Paulo a bontšhitše ditumedišong tša gagwe ge a be a phetha lengwalo la gagwe leo le yago phuthegong ya Roma, o bile le bagwera ba bantši ba paale. (Baroma 16:8-16) Moapostola Johane o phethile lengwalo la gagwe la boraro ka mantšu a rego: “Ntumedišetše bagwera ka maina.” (3 Joh. 14) Go molaleng gore le yena o bile le bagwera ba bantši ba paale. Re ka ekiša bjang mohlala wa Jesu le wa barutiwa ba pele ka go aga le go boloka segwera se sebotse le bana babo rena le dikgaetšedi ba moya? Sehlogo sa rena se se latelago se tla araba potšišo ye.

O be o tla Araba Bjang?

• Jesu o beile mohlala ofe mabapi le go ba mogwera wa paale?

• Barutiwa ba ile ba arabela bjang segwereng sa Jesu?

• Re ka bontšha bjang gore re bagwera ba Kriste?

[Dipotšišo tša Thuto]

[Seswantšho go letlakala 14]

Jesu o be a rata go kwa seo bagwera ba gagwe ba bego ba se nagana le kamoo ba bego ba ikwa ka gona

[Seswantšho go letlakala 16]

Re ka bontšha bjang gore re kganyoga go ba bagwera ba Kriste?