Na o ‘Tsemile Medu le go Thewa Motheong’?

NA O kile wa bogela sehlare se segolo se tšubutlwa ke diphefo tše matla? Sehlare seo se ba ka tlase ga kgateletšo e kgolo, eupša se a kgotlelela. Ka baka la’ng? Ka gobane se na le medu e matla yeo e tsemilwego mmung. Le rena re ka swana le sehlare seo. Ge re lebeletšane le diteko tše dikgolo maphelong a rena, re ka kgotlelela ge e ba re ‘tsemile medu e bile re theilwe motheong.’ (Baef. 3:14-17) Motheo woo ke’ng?

Lentšu la Modimo le re “Kriste Jesu yena [ke] lefsika la motheo la sekhutlo” la phuthego ya Bokriste. (Baef. 2:20; 1 Bakor. 3:11) Rena bjalo ka Bakriste re kgothaletšwa go ‘tšwela pele re sepela boteeng le yena, re tsemile medu gomme re agwa go yena e bile re tsepamišwa tumelong.’ Ge e ba re dira bjalo, re tla kgona go kgotlelela ditlhaselo ka moka tšeo tumelo ya rena e hlaselwago ka tšona—go akaretša le tšeo di tlago e le “dipolelo tše di kgodišago” tšeo di theilwego ‘boforeng bja lefeela’ bja batho.—Bakol. 2:4-8.

“Bophara le Botelele le Bophagamo le go Iša”

Lega go le bjalo, re ka ‘tsema medu’ le go “tsepamišwa tumelong” bjang? Tsela e nngwe e bohlokwa ya go tsema medu ya rena tlase-tlase mmung ke ka go ithuta ka phišego Lentšu la Modimo leo le buduletšwego. Jehofa o nyaka gore re “kgone ka botlalo go hlaologanya gotee le bakgethwa bohle seo e lego bophara le botelele le bophagamo le go iša” ga therešo. (Baef. 3:18) Ka gona, ga go na Mokriste yo a swanetšego go kgotsofalela tsebo yeo a e hwetšago ka go ithuta ka go fo kga ka godimo, a kgotsofalela feela go tseba “dilo tša motheo” tšeo di hwetšwago ka Lentšung la Modimo. (Baheb. 5:12; 6:1) Go fapana le moo, yo mongwe le yo mongwe wa rena o swanetše go fišegela go ba le tsebo e tseneletšego ya ditherešo tša Beibele.—Die. 2:1-5.

Ke therešo gore seo ga se bolele gore re swanetše go ba le tsebo e ntši e le gore re ‘tseme medu le go thewa’ therešong. Go ba gona, Sathane le yena o tseba seo Beibele e se huperego. Go nyakega selo se se fetago seo. Re swanetše “go tseba lerato la Kriste le le fetago tsebo.” (Baef. 3:19) Lega go le bjalo, ge re ithuta ka gobane re rata Jehofa e bile re rata therešo, go oketša tsebo ya rena e nepagetšego ya Lentšu la Modimo go tla matlafatša tumelo ya rena.—Bakol. 2:2.

 Leka Kwešišo ya Gago

Ke ka baka la’ng ga bjale o sa leke kwešišo ya gago ya ditherešo tše sego kae tša bohlokwa tšeo di lego ka Beibeleng? Go dira bjalo go ka go kgothaletša gore o ithute ka phišego e oketšegilego thutong ya gago ya motho ka noši ya Beibele. Ka mohlala, bala ditemana tša mathomo tša lengwalo la moapostola Paulo leo le yago go Baefeso. (Bona lepokisi leo le nago le sehlogo se rego  “Go Baefeso.”) Ka morago ga go bala ditemana tše ipotšiše gore, ‘Na ke kwešiša seo se bolelwago ke dipolelwana tšeo di lego ditemaneng tša Beibele tše di lego ka lepokising le, tšeo di ngwadilwego ka mongwalo o sekamego? Anke re di ahla-ahle ka e tee ka e tee.

Ba Kgethilwe “Pele ga go Thewa ga Lefase”

Paulo o ngwaletše badumedi-gotee le yena gore: “[Modimo] o re kgethile e sa le pele gore a re amogele ka Jesu Kriste gore re be barwa ba gagwe.” Ee, Jehofa o ile a rera go kgetha batho ba itšego gore e be ditho tša lapa la gagwe le le phethagetšego la legodimong. Barwa ba ba Modimo bao ba kgethilwego ba tla buša e le dikgoši le baperisita gotee le Kriste. (Baroma 8:19-23; Kut. 5:9, 10) Tlhohlong ya gagwe ya mathomo ya bogoši bja Jehofa, Sathane o ile a šišinya gore batho bao ba bopilwego ke Modimo ba na le diphošo. Ka gona, ke mo go swanetšego gakaakang ge Jehofa a kgethile bona batho bao gore mafelelong ba be le karolo go tlošeng bobe ka moka lefaseng, go akaretša le mothopo wa bokgopo, Sathane Diabolo! Lega go le bjalo, Jehofa ga se a ka a kgetha e sa le pele gore ke batho bafe bao a bego a tla ba amogela e le barwa. Go e na le moo, Modimo o ile a rera gore go be le sehlopha sa batho seo se tlago go buša le Kriste legodimong.—Kut. 14:3, 4.

Ke “lefase” lefe leo Paulo a bego a bolela ka lona ge a be a ngwalela Bakriste-gotee le yena  gore bona e le sehlopha, ba be ba kgethilwe “pele ga go thewa ga lefase”? O be a sa bolele ka nako ya pele ga ge Modimo a bopa lefase goba batho. Seo se be se ka se dumelelane le molao wa motheo wa toka. Ke bjang Adama le Efa ba bego ba ka lebelelwa ba ikarabela ditirong tša bona ge e ba Modimo a be a rerile e sa le pele gore ba tla palelwa le pele ba bopša? Ka gona, Modimo o rerile neng kamoo a tlago go lokiša boemo bjo bo ilego bja tšwelela ge Adama le Efa ba tlatša Sathane borabeleng bja gagwe kgahlanong le bogoši bja Modimo? Jehofa o dirile bjalo feela ka morago ga gore batswadi ba rena ba pele ba rabele le pele go e-ba le batho ba sa phethagalago bao ba ka lopollwago.

“Go ya ka Mahumo a Botho bja Gagwe bjo bo sa Swanelago”

Ke ka baka la’ng Paulo a boletše gore ditokišetšo tšeo go boletšwego ka tšona ditemaneng tša mathomo tša Baefeso di bile gona “go ya ka mahumo a botho bja [Modimo] bjo bo sa swanelago”? O boletše bjalo e le go gatelela gore Jehofa o be a sa gapeletšege go rekolla batho bao ba dirilego sebe.

Ka tlhago, ga go na le o tee wa rena yo a swanelegago ka tsela le ge e le efe gore a rekollwe. Lega go le bjalo, a tutueditšwe ke lerato le tseneletšego bakeng sa batho, Jehofa o ile a dira ditokišetšo tše di kgethegilego tša go re hlakodiša. Ge re nagana ka go se phethagale le go dira ga rena dibe, thekollo ya rena ke botho bjo bo sa swanelago, go etša ge Paulo a boletše.

Sephiri se Sekgethwa sa Morero wa Modimo

Mathomong Modimo ga se a ka a utolla kamoo a tlago go lokiša tshenyo yeo e bakilwego ke Sathane. E be e le ‘sephiri se sekgethwa.’ (Baef. 3:4, 5) Ka morago ga ge phuthego ya Bokriste e theilwe, Jehofa o ile a utolla kamoo a bego a tla phethagatša morero wa gagwe wa mathomong wa mabapi le batho le lefase. Paulo o hlalositše gore “tekanyong e tletšego ya dinako tše di beilwego” Modimo o ile a thoma go diriša “taolo,” tshepedišo ya go laola ditaba yeo e bego e tla feleletša ka gore go kopanywe dibopiwa tša gagwe ka moka tše bohlale.

Mogato wa pele wa go kopanywa moo ga dibopiwa ka moka tše bohlale o thomile ka Pentekoste ya 33 C.E. ge Jehofa a be a thoma go kgoboketša bao ba tlago go buša le Kriste legodimong. (Dit. 1:13-15; 2:1-4) Mogato wa bobedi e be e tla ba wa go kgoboketšwa ga bao ba tlago go phela lefaseng la paradeise ka tlase ga Mmušo wa Kriste wa Mesia. (Kut. 7:14-17; 21:1-5) Lentšu “taolo” ga le bolele Mmušo wa Mesia, ka ge Mmušo woo o be o se gona pele ga 1914. Go e na le moo, lentšu le le bolela tsela ya Modimo ya go swaragana le ditaba goba go di laola e le gore a fihlelele morero wa gagwe wa go tsošološa botee legohleng.

‘Gola ka mo go Feletšego Matleng a go Kwešiša’

Ga go pelaelo gore go ba le mekgwa e mebotse ya go ithuta go tla go thuša go kwešiša ka botlalo seo e lego “bophara le botelele le bophagamo le go iša” ga therešo. Lega go le bjalo, ga go pelaelo gore bophelo bja gona bjale bja leema-ema bo dira gore go be bonolo go Sathane go fokodiša mekgwa e bjalo, goba go e bolaya. O se ke wa mo dumelela a go dira bjalo. Diriša “matla a go hlaologanya” ao Modimo a go neilego ona gore o ‘gole ka mo go feletšego matleng a go kwešiša.’ (1 Joh. 5:20; 1 Bakor. 14:20) Kgonthišetša gore o kwešiša lebaka leo ka lona o dumelago seo o se dumelago le gore ka mehla o ka nea “lebaka la kholofelo yeo e lego go [wena].”—1 Pet. 3:15.

Akanya o be o le gona kua Efeso ge lengwalo la Paulo le balwa ka lekga la mathomo. Na mantšu a gagwe a be a ka se go tutueletše gore o nyake go gola “tsebong e nepagetšego ya Morwa wa Modimo”? (Baef. 4:13, 14) Ruri a be a tla dira bjalo! Ka gona, anke mantšu a Paulo ao a buduletšwego a go tutuetše ka mo go swanago le lehono. Go rata Jehofa ka mo go tseneletšego le go ba le tsebo e nepagetšego ya Lentšu la gagwe go tla go thuša go dula o ‘tsemile medu e bile o theilwe motheong’ wa Kriste ka mo go tiilego. Ka tsela yeo, o tla kgona go kgotlelela nakong ya phefo le ge e le efe e matla yeo Sathane a ka go hlaselago ka yona ga bjale pele lefase le le kgopo le fedišwa ka mo go feletšego.—Ps. 1:1-3; Jer. 17:7, 8.

[Lepokisi/​Seswantšho go letlakala 27]

 “Go Baefeso”

“A go tumišwe Modimo le Tatago Morena wa rena Jesu Kriste, gobane o re šegofaditše ka tšhegofatšo e nngwe le e nngwe ya moya mafelong a legodimong boteeng le Kriste, go etša ge a re kgethile re le batee le yena pele ga go thewa ga lefase, gore re be ba bakgethwa gomme re hloke bosodi pele ga gagwe ka lerato. Gobane o re kgethile e sa le pele gore a re amogele ka Jesu Kriste gore re be barwa ba gagwe, go ya ka se se mo kgahlišago le thato ya gagwe, e le gore a tumiše botho bja gagwe bjo bo sa swanelago bja letago bjo a re neilego bjona ka lerato ka moratiwa wa gagwe. Ka yena re lokolotšwe ka topollo ka madi a yena yoo, ee, re lebaletšwe dikarogo tša rena, go ya ka mahumo a botho bja gagwe bjo bo sa swanelago. Bjona o dirile gore bo re atele ka bohlale bjohle le tlhaologanyo e botse, ka gore o re tsebišitše sephiri se sekgethwa sa thato ya gagwe. Ke go ya ka kgahlego ya gagwe yeo a ilego a e rera bakeng sa taolo tekanyong e tletšego ya dinako tše di beilwego, e lego go kgobokanya gotee gape dilo tšohle go Kriste, dilo tše di lego magodimong le dilo tše di lego lefaseng.”—Baef. 1:3-10.