Dipotšišo tše Tšwago go Babadi

Na ke mo swanetšego gore kgaetšedi a rwale hlogong ge a fetolela ka polelo ya diatla dipolelo tšeo di theilwego Beibeleng dibokeng tša Bokriste, dikopanong tše dinyenyane goba tše dikgolo?

Ge e le gabotse, mosadi wa Mokriste o swanetše go rwala hlogong ge a phetha kabelo yeo ka tlwaelo e lego boikarabelo bja monna wa gagwe goba bja ngwanabo rena ka phuthegong. Se se dumelelana le molao wa motheo o boletšwego ke moapostola Paulo o rego, “mosadi yo mongwe le yo mongwe yo a rapelago goba a porofetago a sa rwala hlogong ya gagwe o nyatšiša hlogo ya gagwe” ka gobane “hlogo ya mosadi . . . ke monna.” (1 Bakor. 11:3-10) Ge kgaetšedi a rwala hlogong ka tsela e hlomphegago le e swanetšego maemong a, seo ke leswao la go ikokobeletša thulaganyo ya pušo ya Modimo ka phuthegong ya Bokriste.—1 Tim. 2:11, 12. *

Ka gona, go thwe’ng ge e-ba kgaetšedi a fetolela ka polelo ya diatla bakeng sa ngwanabo rena yo a neago polelo ya phatlalatša? Ke therešo gore kgaetšedi yo o fo ba a fetišetša tsebišo go batheetši. Seo se bolela gore ga go rute yena eupša go ruta ngwanabo rena yo a neago polelo. Lega go le bjalo, go fetolela polelo ya diatla go fapana le go fetolela maleme ao a bolelwago. Malemeng ao a bolelwago, batheetši ba ka kgona go lebiša tlhokomelo go seboledi ba dutše ba theeditše mofetoledi. Le gona, go fapana le ge go fetolelwa polelo ya diatla, dikgaetšedi tšeo di fetolelago maleme ao a bolelwago ga di eme mafelong ao a tlago go gogela tlhokomelo go tšona. Ka dinako tše dingwe, di ka kgetha gore di fetolele di dutše fase goba ge e ba di emeletše, di eme di lebeletše seboledi go e na le go lebelela batheetši. Ka gona, go ka se nyakege gore kgaetšedi a rwale hlogong ge a fetolela lelemeng leo le bolelwago.

Go oketša moo, ka lebaka la go kaonefatšwa ga thekinolotši yeo e dirišwago ge dipolelo di fetolelwa ka polelo ya diatla, tlhokomelo e kgolo  ya batheetši e lebišwa go mofetoledi. Gantši mofetoledi o bontšhwa sekirining se segolo, mola seboledi ka bosona se ka fo se bonwe ke batheetši. Re naganne ka se, e ka ba mo go swanetšego gore kgaetšedi yo a fetolelago polelong ya diatla a hlomphe karolo ya gagwe bjalo ka mofetoledi ka go rwala hlogong.

Ka gona, tlhahlo ye yeo e boeleditšwego e kgoma bjang go fetolelwa ga dipolelo tša Sekolo sa Bodiredi sa Pušo ya Modimo, dipontšho, dikarabo tša Thuto ya Beibele ya Phuthego, Seboka sa Tirelo le Thuto ya Morokami ka polelo ya diatla? Na kgaetšedi yo a fetolelago ka polelo ya diatla o swanetše go rwala hlogong le maemong a bjalo? Maemong a mangwe go bonala go sa nyakege gore kgaetšedi yo a rwale hlogong ka gobane bohle ba lego gona ba ka kgona go kwešiša gore ge e le gabotse ga se a swara seboka. Ka mohlala, ga go nyakege gore a rwale ge a fetolela dikarabo tša batheetši, ge polelo e newa ke dikgaetšedi goba ge go dirwa dipontšho. Lega go le bjalo, ge a fetolela polelo ya bana babo rena nakong ya diboka tše le bakeng sa moswari wa Thuto ya Morokami goba moswari wa Thuto ya Beibele ya Phuthego goba ge a etelela pele nakong ya kopelo a ka rwala hlogong. Nakong ya diboka kgaetšedi a ka swanelwa ke go fetolela bakeng sa bana babo rena, dikgaetšedi, bana le batho ba bagolo. Maemong a, go ka ba kaone gore a rwale hlogong nakong ya diboka ka moka.

[Mongwalo wa tlase]