Go Bontšha Mekgwa e Mebotse Bjalo ka Bahlanka ba Modimo

“E-bang baekiši ba Modimo.”—BAEF. 5:1.

1, 2. (a)  Ke ka baka la’ng mekgwa e mebotse e le bohlokwa? (b) Ke’ng seo se tlago go ahla-ahlwa sehlogong se?

GE A ngwala mabapi le boitshwaro bjo bo hlomphegago, mongwadi Sue Fox o re: “Ga go na selo seo go thwego ke go khutša ge go tliwa tabeng ya go bontšha mekgwa e mebotse. Mekgwa e mebotse e šoma gohle, ka dinako tšohle.” Ge batho ba itlwaetša go ba botho, dikgohlano di a fokotšega gomme gantši di a fela. Eupša ge go se bjalo mathata a a oketšega. Go swara ba bangwe gampe go baka dikgakgano, lehloyo le manyami.

² Ka kakaretšo, mekgwa e mebotse e hwetšagala kudu ka phuthegong ya Bokriste bja therešo. Lega go le bjalo, re swanetše go itšhireletša kgahlanong le go hlagolela mekgwa e mebe yeo e tlwaelegilego lefaseng lehono. Anke re bone kamoo go diriša melao ya motheo ya Beibele mabapi  le go bontšha mekgwa e mebotse go ka re šireletšago ka gona gotee le go gogela batho borapeding bja therešo. E le gore re kwešiše gore go bontšha mekgwa e mebotse go akaretša eng, ela hloko mohlala wa Jehofa Modimo le Morwa wa gagwe.

Jehofa le Morwa wa Gagwe—Mehlala ya go Bontšha Mekgwa e Mebotse

3. Ke mohlala ofe wa go bontšha mekgwa e mebotse wo o beilwego ke Jehofa Modimo?

³ Jehofa Modimo o beile mohlala o phethagetšego wa go bontšha mekgwa e mebotse. Go sa šetšwe boemo bja gagwe bjo bo phagamego e le Mmuši wa legohle, o swara batho ka botho bjo bogolo le tlhompho. Ge a be a bolela le Aborahama le Moše, Jehofa o ile a diriša polelwana ya Seheberu yeo gantši e fetolelwago e le “hle.” (Gen. 13:14; Ek. 4:6, NW) Ge bahlanka ba gagwe ba dira diphošo, Jehofa ke “Modimo wa lešoko le kgaugelo, wa pelo e sa felego, wa botho bjo bogolo le potego.” (Ps. 86:15, PK) O fapana kgole le batho bao ba galefago ka pela ge batho ba bangwe ba sa dire dilo tšeo bona ba letetšego gore ba di dire.

4. Re ka ekiša Jehofa bjang ge batho ba bangwe ba bolela le rena?

⁴ Mekgwa e mebotse ya Modimo e bonagala gape tseleng yeo a theetšago batho ka yona. Ge Aborahama a be a mmotšiša dipotšišo mabapi le batho ba Sodoma, Jehofa ka go se fele pelo o ile a di araba ka moka. (Gen. 18:23-32) Ga se a ka a lebelela dilo tšeo Aborahama a bego a tshwenyegile ka tšona e le tšeo di Mo senyetšago nako. Jehofa o theetša dithapelo tša bahlanka ba gagwe le dikgopelo tšeo di dirwago ke badiradibe bao ba itsholago. (Bala Psalm 51:11, 17.) Na ga se ra swanela go ekiša Jehofa ka go theetša ge batho ba bangwe ba bolela le rena?

5. Go ekiša mekgwa e mebotse ya Jesu go ka kaonefatša bjang tswalano ya rena le ba bangwe?

⁵ Gare ga dilo tše dingwe tše dintši tšeo Jesu Kriste a ithutilego tšona go Tatagwe, ke mekgwa e mebotse. Le ge bodiredi bja gagwe ka dinako tše dingwe bo ile bja nyaka nako ya gagwe e ntši gotee le matla, Jesu ka mehla o be a sa fele pelo e bile a le botho. Balephera, difofu tšeo di bego di iphediša ka go kgopela le batho ba bangwe bao ba bego ba nyaka thušo, ba be ba hwetša Jesu a ikemišeditše go ba thuša e bile o be a kgona go ba thuša. O be a sa ba hlokomologe, le ge ba be ba e-tla go yena go se gwa rulaganywa. Gantši o be a tlogela seo a bego a se dira e le gore a thuše motho yo a bego a tshwenyega. Jesu o be a tloga a naganela batho bao ba bego ba dumela go yena. (Mar. 5:30-34; Luka 18:35-41) Bjalo ka Bakriste, re latela mohlala wa Jesu ka go ba ba botho le go thuša ba bangwe. Mokgwa o bjalo o lemogwa ke ba meloko, baagišani le batho ba bangwe. Go feta moo, mokgwa o bjalo o a thabiša e bile o tagafatša Jehofa.

6. Jesu o beile mohlala ofe mabapi le go bontšha borutho le bogwera?

⁶ Le gona, Jesu o be a bontšha batho tlhompho ka go diriša maina a bona. Na baetapele ba bodumedi ba Bajuda ba be ba dira bjalo? Aowa. Ba be ba lebelela bao ba sa tsebego Molao e le “batho ba rogakilwego,” e bile ba be ba ba swara bjalo. (Joh. 7:49) Morwa wa Modimo o be a se bjalo. Mareta, Maria, Sakeo le ba bangwe ba bantši ba ile ba mo kwa a ba bitša ka maina a bona. (Luka 10:41, 42; 19:5) Le ge ditšo le maemo di ka laola mokgwa woo re bitšago batho ka wona lehono, bahlanka ba Jehofa ba katanela go bontšha batho ba bangwe segwera. * Ga ba dumelele go fapana ka maemo go dira gore ba se hlomphe bao ba swanelwago ke tlhompho.—Bala Jakobo 2:1-4.

7. Melao ya motheo ya Beibele e re thuša bjang tabeng ya go swara batho ba bangwe ka botho kae le kae moo re lego gona?

⁷ Tsela ya kgaugelo yeo Modimo le Morwa wa gagwe ba swarago batho ba ditšhaba le ditšo ka moka ka yona e godiša batho bao e bile e gogela bao ba sekametšego go lokeng. Ee, mekgwa e mebotse e fapana go ya ka mafelo. Ke ka baka leo re sa latelego melao e thata e le gore re be le mekgwa e mebotse. Go e na le moo, re dumelela melao ya motheo ya Beibele e re nea teka-tekano tabeng ya go godiša batho ba bangwe gohle moo re  lego gona. A re hlahlobeng kamoo go swara batho ba bangwe ka botho go ka dirago gore bodireding bja Bokriste e be bjo bo atlegago.

Go Dumediša Batho le go Bolela le Bona

8, 9. (a) Ke mokgwa ofe woo o ka lebelelwago e le o mobe? (b) Ke ka baka la’ng re swanetše go dumelela mantšu a Jesu ao a begilwego go Mateo 5:47 a kgoma tsela yeo re swarago batho ba bangwe ka yona?

⁸ Bophelong bja leema-ema bjo bo tlwaelegilego mafelong a mantši lehono, batho ba babedi ba fetana ka ntle le gore “thobela” goba gore “le tsoga bjang?” Goba gona, ga go a letelwa gore re boledišane le motho yo mongwe le yo mongwe yo re kopanago le yena tsejaneng ya se mphete ke go fete. Lega go le bjalo, maemong a mangwe go dumediša batho ba bangwe go swanetše e bile go a kgahliša. Na o tlwaetše go dumediša batho ba bangwe? Goba na gantši o feta batho ntle le go myemyela goba go ba dumediša? Motho a ka thoma go hlagolela mokgwa woo ge e le gabotse o lebelelwago o sa kgahliše, le ge e se ka maikemišetšo.

⁹ Jesu o ile a re gopotša se ge a be a re: “Ge e ba le dumediša bana babo lena feela, ke selo sefe se se sa tlwaelegago se le se dirago? Na batho ba ditšhaba le bona ga ba dire se se swanago?” (Mat. 5:47) Mabapi le taba ye, Donald Weiss yo e lego moeletši, o ngwadile gore: “Batho ga ba rate ge batho ba bangwe ba ba lebelela feela goba ba fo ba feta. Ruri ga go na lebaka la gore re fo feta batho. Tharollo e bonolo: Dumediša batho. Boledišana le bona.” Ge e ba re sa dumelele go dula ga rena lekatana goba go hlokomologa batho go senya tsela yeo re swarago batho bao re kopanago le bona, re tla ba le dipoelo tše dibotse.

10. Mekgwa e mebotse e ka re thuša bjang gore re atlege kudu bodireding? (Bona lepokisi le le nago le sehlogo se se rego  “Thoma ka go Myemyela.”)

¹⁰ Ela hloko taba ya banyalani ba Bakriste e lego Tom le Carol, bao ba dulago motseng o mogolo kua Amerika Leboa. Ba dirile gore go boledišana gabotse le baagišani ba bona e be karolo ya bodiredi bja bona. Ba dira seo bjang? A šupa go Jakobo 3:18, Tom o re: “Re katanela go ba le segwera le khutšo le bona. Re batamela bao re ba bonago ba le ka ntle ga dintlo tša bona le bao ba šomago tikologong yeo. Re a myemyela gomme ra ba dumediša. Re boledišana ka dilo tšeo di ba kgahlago—bana ba bona, dimpša tša bona, dintlo tša bona le mešomo ya bona. Ge nako e dutše e e-ya ba re bona re le bagwera ba bona.” Carol o tlaleletša ka gore: “Ka morago ge re ba etela, re ba botša maina a rena gomme ra ba botšiša a  bona. Re ba tsebiša seo re se dirago motseng wa bona eupša re dira gore poledišano e be e kopana. Mafelelong, re ba nea bohlatse.” Tom le Carol ba botwa ke bja baagišani ba bona ba bantši. Bontši bja bona bo amogetše dikgatišo tšeo di theilwego Beibeleng, le gona ba sego kae ba bontšhitše gore ba kgahlegela go ithuta therešo.

Go Bontšha Mekgwa e Mebotse Maemong a Thata

11, 12. Ke ka baka la’ng re swanetše go letela go swarwa gampe ge re le bolela ditaba tše dibotse, gona re swanetše go arabela bjang?

¹¹ Ka dinako tše dingwe, ge re bolela ditaba tše dibotse re swarwa ka tsela e sa kgahlišego. Se ke seo re se letetšego, ka ge Kriste Jesu a lemošitše barutiwa ba gagwe e sa le pele gore: “Ge e ba ba ntlhomere, le lena ba tla le hlomara.” (Joh. 15:20) Eupša go ithogela ge ba bangwe ba re roga ga go be le mafelelo a mabotse. Re swanetše go arabela bjang? Moapostola Petro o ngwadile gore: “Kgethagatšang Kriste e le Morena dipelong tša lena, ka mehla le loketše go itwela pele ga yo mongwe le yo mongwe yo a nyakago lebaka la kholofelo e lego go lena, eupša le dira bjalo ka moya o boleta le ka tlhompho e tseneletšego.” (1 Pet. 3:15) Go bontšha ga rena botho—go arabela ka lethabo le tlhompho—go ka nolofatša boemo bja kgopolo bja bao ba re rogago.—Tito 2:7, 8.

¹² Na re ka itokišetša go lebeletšana le dipolelo tše di gobošago ka tsela yeo Modimo a e amogelago? Ee. Paulo o kgothaleditše gore: “Anke polelo ya lena ka mehla e be e kgahlišago, e nokilwego ka letswai, e le gore le tsebe kamoo le swanetšego go araba yo mongwe le yo mongwe ka gona.” (Bakol. 4:6) Ge e ba re tlwaela go ba botho go ditho tša lapa, barutwana-gotee le rena, bašomi-gotee le rena, go ditho tša phuthego le go batho ba motseng wa gabo rena, ke gona ge re itokišeletša go lebeletšana le dikwero le maroga ka tsela yeo e swanetšego Mokriste.—Bala Baroma 12:17-21.

13. Nea mohlala wa kamoo go bontšha botho go ka nolofatšago boemo bja kgopolo bja baganetši.

¹³ Go bontšha mekgwa e mebotse maemong a thata go tliša dipoelo tše dibotse. Ka mohlala, Hlatse e nngwe kua Japane e be e kwerwa ke mong wa ntlo le moeng wa gagwe. Ka botho ngwanabo rena o ile a tloga mojakong wa ntlo yeo. Ge a tšwela pele go dira boboledi tšhemong, o ile a lemoga gore moeng yoo o be a mo lebeletše a le kgole. Ge ngwanabo rena a boela morago go yena, monna yoo wa moeng o ile a re: “Ke maswabi ka seo se diregilego. Le ge re go boditše  mantšu a sa kgahlišego, ke ile ka lemoga gore o ile wa tšwela pele o myemyela. Ke swanetše go dira’ng gore ke swane le wena?” Ka ge monna yo a lahlegetšwe ke mošomo e bile mmagwe a sa tšwa go hwa, o be a se na mabaka a go thaba. Hlatse yeo e ile ya šišinya gore ba ithute Beibele gomme monna yoo o ile a dumela. Kapejana, o be a ithuta gabedi ka beke.

Tsela e Kaone ya go Hlagolela Mekgwa e Mebotse

14, 15. Bahlanka ba Jehofa ba mehleng ya Beibele ba ile ba hlahla bjang bana ba bona?

¹⁴ Batswadi bao ba bego ba rata Modimo mehleng ya Beibele ba be ba kgonthišetša gore bana ba bona ba ithuta dintlha tša motheo mabapi le mekgwa e mebotse ka gae. Ela hloko tsela e botho yeo Aborahama le morwa wa gagwe Isaka ba bego ba bitšana ka yona go Genesi 22:7. Tlhahlo e botse ya batswadi e ile ya bonagala gabotse le tabeng ya Josefa. Ge a be a golegilwe, o be a le botho le go bagolegwa ba bangwe. (Gen. 40:8, 14) Mantšu a gagwe go Farao a bontšha gore o be a ithutile tsela e swanetšego ya go boledišana le motho yo a lego maemong a phagamego.—Gen. 41:16, 33, 34.

¹⁵ Melao e Lesome yeo e neilwego barwa ba Isiraele e be e akaretša taelo e rego: “Xodiša tat’axo le mm’axo, xore O phelê xa-lelele naxeng ye Morêna Modimo wa xaxo a Xo faxo yôna.” (Ek. 20:12) Tsela e nngwe yeo ka yona bana ba ka godišago batswadi ba bona ke ka go ba le mekgwa e mebotse ka gae. Morwedi wa Jefeta o bontšhitše go hlompha tatagwe ka mo go tseneletšego ka go dumelelana le keno ya gagwe le ge boemo bjoo bo be bo se bonolo.—Baa. 11:35-40.

16-18. (a) Go ka dirwa’ng go ruta bana mekgwa e mebotse? (b) Ke mehola efe yeo e tlišwago ke go ruta bana mekgwa e mebotse?

¹⁶ Bohlokwa bja go hlahla bana ba rena gore ba be le mekgwa e mebotse bo swanetše go tšeelwa godimo. Gore ba kgone go dirišana le ba bangwe ge ba godile, bana ba swanetše go ithuta mokgwa o swanetšego wa go dumediša baeng, go araba mogala le go ja le ba bangwe. Ba swanetše go rutwa go kwešiša lebaka leo ka lona ba swanetšego go bulela batho ba bangwe lebati, go swara batšofadi le balwetši ka botho le go ithapela go thuša bao ba rwelego merwalo e boima. Ba swanetše go kwešiša bohlokwa bja go bolela go tšwa pelong gore, “hle,” “ke a leboga,” “na nka le thuša?” le “ke kgopela tshwarelo.”

¹⁷ Go tlwaetša bana gore ba be botho ga se gwa swanela go ba thata. Tsela e kaone ke ka go ba beela mohlala. Ge Kurt yo a nago le nywaga e 25 a bolela kamoo yena le barwarragwe ba bararo ba ithutilego go ba botho ka gona, o re: “Re be re lebelela le go theetša ge Mma le Tate ba be ba boledišana ka botho le go naganela batho ba bangwe  le go se ba felele pelo. Holong ya Mmušo, Tate o be a e-ya le nna go yo dumediša bana babo rena le dikgaetšedi ba godilego, pele le ka morago ga diboka. Ke be ke e-kwa ditumedišo tša gagwe le go bona kamoo a bego a ba hlompha ka gona.” Kurt o tšwela pele ka gore: “Ge nako e dutše e e-ya, ke ile ka tlwaela go ekiša mekgwa ya gagwe. Go swara ba bangwe ka botho go itlela feela. Ga se selo seo o gapeletšago go se dira, eupša ke selo seo o nyakago go se dira.”

¹⁸ Ke’ng seo gantši se ka diregago ge batswadi ba ruta bana ba bona mekgwa e mebotse? Bana ba tla kgona go dira bagwera le go boloka khutšo le batho ba bangwe. Ba tla kgona go šomišana le beng-mešomo le bašomi-gotee le bona. Go feta moo, bana bao ba lego botho, ba nago le mekgwa le boitshwaro bjo bobotse ba tla thabiša batswadi ba bona le go ba kgotsofatša.—Bala Diema 23:24, 25.

Mekgwa e Mebotse e Dira Gore re be ba Fapanego

19, 20. Ke ka baka la’ng re swanetše go ikemišetša go ekiša kgaugelo ya Modimo wa rena le Morwa wa gagwe?

¹⁹ Paulo o ngwadile gore: “E-bang baekiši ba Modimo, le le bana ba ratwago.” (Baef. 5:1) Go ekiša Jehofa Modimo le Morwa wa gagwe go akaretša go diriša melao ya motheo ya Beibele, e bjalo ka yeo e ahla-ahlilwego sehlogong se. Ka go dira bjalo, re tla efoga mokgwa wa boikaketši wa go bontšha botho feela bathong bao ba lego maemong a phagamego goba go bontšha botho e le feela gore re hwetše dilo tše itšego.—Juda 16.

²⁰ Mehleng ye ya bofelo ya pušo ya gagwe e mpe, Sathane o ikemišeditše go senya ditekanyetšo tša boitshwaro tšeo di hlomilwego ke Jehofa. Eupša Diabolo a ka se kgone go fediša mekgwa e mebotse ya Bakriste ba therešo. Eka yo mongwe le yo mongwe wa rena a ka ikemišetša go latela mohlala wa kgaugelo wa Modimo wa rena le Morwa wa gagwe. Ke moka polelo le boitshwaro bja rena ka mehla di tla fapana le ditiro tša bao ka mehla ba kgethago go itshwara gampe. Re tla godiša leina la Jehofa Modimo wa rena yo a nago le mekgwa e mebotse, gomme re tla gogela batho ba botegago borapeding bja gagwe bja therešo.

[Mongwalo wa tlase]

Na o a Gopola?

• Re ithuta’ng go Jehofa le Morwa wa gagwe mabapi le go bontšha mekgwa e mebotse?

• Ke ka baka la’ng go dumediša batho ka borutho go re bolelela gabotse bjalo ka Bakriste?

• Ke ka baka la’ng go ba botho go dira gore bodiredi bja rena bo atlege?

• Ke karolo efe yeo e kgathwago ke batswadi tabeng ya go ruta bana ba bona mekgwa e mebotse?

[Dipotšišo tša Thuto]

[Lepokisi go letlakala 27]

 Thoma ka go Myemyela

Batho ba bantši ba dika-dika go thoma poledišano le motho yoo ba sa mo tsebego. Lega go le bjalo, ka baka la go rata Modimo le moagišani, Dihlatse tša Jehofa di dira boiteko bjo bo tseneletšego bja go ithuta kamoo di ka thomago poledišano ka gona le batho bao ba sa ba tsebego e le gore di kgone go ba botša ditherešo tša Beibele. Ke’ng seo se ka go thušago gore o atlege mo tabeng ye?

Molao wa motheo o bohlokwa o hwetšwa go Bafilipi 2:4, yeo e balegago ka gore: “[Le bee] leihlo, e sego ka kgahlego ya motho ka noši ditabeng tša lena feela, eupša le ka kgahlego ya motho ka noši go tša ba bangwe.” Nagana ka mantšu a ka tsela ye: Ge e ba o sa ka wa kopana le motho yo a itšego pele, ga a go tsebe. O ka dira’ng gore a ikwe a lokologile? Go myemyela le tumedišo e botho di ka thuša. Lega go le bjalo, go na le mo gontši moo go swanetšego go elwa hloko.

Ge o leka go thoma poledišano le motho yo mongwe, go ra gore o šitiša dilo tšeo a bego a di nagana. Ge e ba o leka go dira gore le ahla-ahle seo o se naganago o sa naganele seo se lego monaganong wa gagwe, a ka no se arabele gabotse. Ka gona, ge o ka kgona go lemoga gore ke eng seo a ka bego a se nagana, ke ka baka la’ng o sa diriše seo go thoma poledišano le yena? Se ke seo Jesu a ilego a se dira ge a be a kopana le mosadi yo mongwe sedibeng kua Samaria. (Joh. 4:7-26) Monagano wa mosadi yoo o be o le tabeng ya go ga meetse. Jesu o ile a thoma poledišano ya gagwe motheong woo, gomme kapejana o ile a e fetoša poledišano e kgahlišago ya dilo tša moya.

[Seswantšho go letlakala 26]

Go bontšha segwera go batho go ka lebiša tabeng ya go nea bohlatse bjo bobotse

[Seswantšho go letlakala 28]

Ke mo go swanetšego go bontšha mekgwa e mebotse ka mehla