Tšwela Pele o Oketša Lerato la Gago la Borwarre

“Le tšwele pele le sepela leratong, go etša ge Kriste le yena a le ratile.”—BAEF. 5:2.

1. Ke leswao lefe le bohlokwa leo Jesu a itšego le tla hlaola balatedi ba gagwe?

GO BOLELA ditaba tše dibotse tša Mmušo wa Modimo ka ntlo le ntlo ke leswao leo le hlaolago Dihlatse tša Jehofa. Lega go le bjalo, Kriste Jesu o kgethile sebopego seo se fapanego sa Bokriste gore e be leswao leo le hlaolago barutiwa ba gagwe ba kgonthe. O itše: “Ke le nea taelo e mpsha ya gore le ratane; go etša ge ke le ratile, gore le lena le ratane. Bohle ba tla tseba ka se gore le barutiwa ba-ka, ge e ba le ratana.”—Joh. 13:34, 35.

2, 3. Lerato la rena la borwarre le na le mafelelo afe go bao ba tlago dibokeng tša rena tša Bokriste?

² Molokong wa batho, ga go na lerato leo le swanago le la borwarre bja therešo bja Bokriste. Go etša ge magnet o goga tšhipi, lerato le gogela bahlanka ba Jehofa gore ba be le botee e bile le gogela bao ba thabelago borapeding bja therešo. Tšea ka mohlala Marcelino, e lego monna wa kua Cameroon yo a ilego a foufala a le mošomong. Ka morago ga kotsi yeo, go ile gwa tlala mabare-bare a gore o foufetše ka gobane e le moloi. Go e na le go mo homotša, moruti wa kereke ya gabo gotee le ditho tše dingwe tša kereke ba ile ba mo leleka kerekeng. Ge yo mongwe wa Dihlatse tša Jehofa a mo laletša go tla dibokeng, Marcelino o ile a dika-dika. O be a sa nyake go lelekwa gape.

³ Marcelino o ile a makatšwa ke seo se ilego sa direga Holong ya Mmušo. O ile a amogelwa ka borutho gomme a homotšwa ke dithuto tše di theilwego Beibeleng tšeo a ilego a di kwa. O ile a thoma go ba gona dibokeng ka moka tša phuthego, a gatela pele thutong ya gagwe ya Beibele gomme a kolobetšwa ka 2006. Ga bjale o boledišana le ba lapa la gagwe le baagišani ka ditherešo tša Mangwalo gomme o thomile dithuto tše mmalwa tša Beibele. Marcelino o nyaka gore batho bao a ithutago Beibele le bona ba kwe lerato leo a le kwelego bathong ba Modimo.

4. Ke ka baka la’ng re swanetše go latela keletšo ya Paulo ya gore re ‘tšwele pele re sepela leratong’?

⁴ Lerato la rena la borwarre le a kgahliša gomme ka moka ga rena re swanetše go dira seo re ka se kgonago go le boloka. Nagana ka mollo wo o goditšwego bošego woo o gogelago batho malakabeng a wona a ruthetšago. Ka ntle le gore bao ba o oretšego ba o bešeletše, o tla tima. Ka mo go swanago, tlemo e kgahlišago ya lerato yeo e lego gona ka phuthegong e tla fokola ge e ba rena bjalo ka Bakriste re sa e matlafatše. Re ka e matlafatša bjang? Moapostola Paulo o araba ka gore: “Le tšwele pele le sepela leratong, go etša ge Kriste le yena a le ratile gomme a ikgafela lena e le sebego le sehlabelo go Modimo gore e be monkgo o mobose.” (Baef. 5:2) Potšišo yeo re swanetšego go e ahla-ahla ke e rego, Nka tšwela pele ke sepela leratong ka ditsela dife?

“Le Lena Katologang”

5, 6. Ke ka baka la’ng Paulo a ile a kgothaletša Bakriste ba Korinthe gore ba ‘katologe’?

⁵ Ge a ngwalela Bakriste ba Korinthe ya bogologolo, moapostola Paulo o itše: “Molomo wa rena o le ahlametše, pelo ya rena e katologile. Ga se la pitlagana go rena, eupša le pitlagane maikwelong a lena a borutho a bonolo. Ka gona, e le pušeletšo—ke bolela bjalo ka ge go bolelwa le bana—le lena katologang.” (2 Bakor. 6:11-13) Ke ka baka la’ng Paulo a ile a kgothaletša Bakorinthe gore ba katologe leratong la bona?

⁶ Ela hloko kamoo phuthego ya Korinthe ya bogologolo e thomilego ka gona. Paulo o ile Korinthe lehlabuleng la 50 C.E. Gaešita le ge a ile a lebeletšana le mathata ge a be a thoma modiro wa gagwe wa boboledi moo, moapostola yo ga se  a ka a langwa. Ka nako e kopana, batho ba bantši motseng woo ba ile ba dumela ditaba tše dibotse. Ka “ngwaga le dikgwedi tše tshela,” Paulo o ile a ikgafela go ruta le go matlafatša phuthego ye e mpsha. Go molaleng gore o be a rata Bakriste ba Korinthe ka mo go tseneletšego. (Dit. 18:5, 6, 9-11) Le bona ba be ba e na le mabaka a mantši a go mo rata le go mo hlompha. Lega go le bjalo, ba bangwe ka phuthegong ba ile ba ikaroganya le yena. Mohlomongwe ba bangwe ba be ba sa rate keletšo ya gagwe e lebanyago. (1 Bakor. 5:1-5; 6:1-10) Ba bangwe ba ka ba ba ile ba theetša ge ‘baapostola ba go loka kudu’ ba be ba mo senya leina. (2 Bakor. 11:5, 6) Paulo o be a nyaka gore bana babo ka moka le dikgaetšedi ba mo rate e le ka kgonthe. Ka gona, o ile a ba kgopela gore ba ‘katologe’ ka go mo rata le go rata badumedi-gotee le bona.

7. Re ka ‘katologa’ bjang ge re bontšha lerato la borwarre?

⁷ Go thwe’ng ka rena? Re ka ‘katologa’ bjang tseleng yeo re bontšhago lerato la borwarre? Batho bao e lego dithaka le bao ba tšwago setšong se tee ba ka hwetša go le bonolo gore ba bontšhane lerato. Le gona, bao ba thabelago boitapološo bjo bo swanago gantši ba fetša nako ba le gotee. Eupša ge e ba rena le Bakriste ba itšego re thabela dilo tšeo di swanago gomme dilo tšeo di re aroganya le Bakriste ba bangwe, re swanetše go ‘katologa.’ E tla ba gabohlale gore re ipotšiše gore: ‘Na ke dira modiro wa boboledi le go ithabiša ka sewelo le bana babo rena le dikgaetšedi bao e sego bagwera ba-ka? Ge ke le Holong ya Mmušo, na ga ke gwerane kudu le bao ba sa tšwago go thoma go kopanela ka gobane ke dumela gore ba swanetše go šoma ka thata gore e be bagwera ba-ka ge nako e dutše e e-ya? Na ke dumediša batho ba bagolo le bafsa ka phuthegong?’

8, 9. Keletšo ya Paulo yeo e lego go Baroma 15:7 e ka re thuša bjang go dumedišana ka tsela yeo e godišago lerato la rena la borwarre?

⁸ Mabapi le taba ya go dumedišana, mantšu a Paulo go Baroma a ka re thuša go hlagolela pono e swanetše ka badumedi-gotee le rena. (Bala Baroma 15:7.) Lentšu la Segerika leo le fetoletšwego e le “amogelanang” le bolela “go amogela motho ka botho goba ka borutho, go mo amogela gore e be karolo ya setšhaba sa gabo rena goba mogwera wa rena.” Mehleng ya Beibele, ge mong wa ntlo yo a nago le moya wa go amogela baeng a be a amogela bagwera ka ntlong ya gagwe, o be a ba tsebiša gore o thabela go ba bona. Ka tsela ya seswantšhetšo, Kriste o re amogetše bjalo gomme re kgothaletšwa gore re mo ekiše ge re amogela badumedi-gotee le rena.

⁹ Ge re dutše re dumediša bana babo rena Holong ya Mmušo le mafelong a mangwe, re ka fetša nako le bao ba bego ba sa bonale dibokeng morago bjale goba bao re sa kago ra hwetša nako ya go bolela le bona morago bjale. Ke ka baka la’ng o sa iphe nako ya go bolela le bona? Sebokeng se se latelago, re ka dira se se swanago le ka ba bangwe. Ka nako e sa fetšego pelo, re tla ba re bile le dipoledišano tše di thabišago le mo e ka bago bana babo rena le dikgaetšedi ka moka. Ga go nyakege gore re tshwenyege ge e ba re sa kgone go boledišana le batho ka moka ka letšatši le tee. Ga go na yo a swanetšego go kgopišega ge e ba re sa kgone go mo dumediša sebokeng se sengwe le se sengwe.

10. Ke sebaka sefe sa bohlokwa kudu seo se ka hwetšwago ke bohle ka phuthegong, gona re ka se diriša bjang ka botlalo?

 ¹⁰ Go dumediša ba bangwe ke mogato wa pele wa go ba amogela. Ke mogato woo o ka lebišago dipoledišanong tše di thabišago le segwereng seo se swarelelago. Ka mohlala, ge bao ba tlilego dikopanong tše dikgolo le tše dinyenyane ba itsebiša go ba bangwe gomme ba thoma go boledišana le bona, ba fagahlela go bonana gape. Baithapi ba tša kago ya Diholo tša Mmušo gotee le bao ba tšeago karolo medirong ya tlhakodišo gantši e ba bagwera ba babotse ka gobane ba kgona go tseba dika tša ba bangwe tše dibotse ka baka la diphihlelo tšeo ba bago le tšona. Ka mokgatlong wa Jehofa go na le dibaka tše dintši tša go hlagolela segwera se se swarelelago. Ge e ba re ‘katologa,’ bagwera ba rena ba tla oketšega gomme seo se tla tiiša lerato leo le re kopanyago borapeding bja therešo.

E-ba yo a Batamelegago

11. Bjalo ka ge go bontšhitšwe go Mareka 10:13-16, Jesu o beile mohlala ofe?

¹¹ Bakriste ka moka ba ka katanela go batamelega go etša ge go be go le bjalo ka Jesu. Ela hloko kamoo Jesu a ilego a arabela ka gona ge barutiwa ba gagwe ba be ba leka go thibela batswadi go tliša bana ba bona go yena. O itše: “Lesang bana ba banyenyane ba tle go nna; le se leke go ba thibela, gobane mmušo wa Modimo ke wa ba bjalo ka bona.” Ke moka, o ile “a gokarela bana a thoma go ba šegofatša, a ba bea diatla.” (Mar. 10:13-16) Akanya kamoo bana bao ba swanetšego go ba ba ile ba thaba ka gona ge Morutiši yo Mogolo a ba bontšha lerato ka tsela yeo!

12. Ke’ng seo se ka re šitišago go boledišana le batho ba bangwe?

¹² Mokriste yo mongwe le yo mongwe o swanetše go ipotšiša gore, ‘Na ke ipha nako ya go ba le batho ba bangwe goba na gantši ke bonala ke swaregile kudu? Mekgwa yeo ka boyona e se nago phošo ka dinako tše dingwe e ka thibela poledišano. Ka mohlala, ge e ba re diriša mogalathekeng gantši goba re diriša di-earphone go theetša mmino goba mananeo a mangwe ge re le gare ga batho, re ka fetiša molaetša wa gore ga re nyake gore ba re tshwenye. Ge e ba ba bangwe ba re bona gantši re swaregile ka dilo tšeo re di dirago khomphutheng ya go šikarwa, ba ka phetha ka gore ga re nyake go bolela le bona. Ke therešo gore “xo homola xo na le mohla wa xôna.” Eupša ge re le gare ga batho, gantši ‘ke nako ya go bolela.’ (Mmo. 3:7) Ba bangwe ba ka re, “Ke bona go le kaone gore ke be noši” goba ba re “Mesong ga ke rate go bolela.” Lega go le bjalo, go ba le poledišano ya segwera gaešita le ge re sa rate go dira bjalo ke bohlatse bja lerato leo le ‘sa nyakego tša go ikhola.’—1 Bakor. 13:5.

13. Paulo o ile a kgothaletša Timotheo gore a lebelele bana babo le dikgaetšedi ba Bakriste bjang?

¹³ Paulo o kgothaleditše Timotheo yo mofsa gore a hlomphe ditho ka moka tša phuthego. (Bala 1 Timotheo 5:1, 2.) Le rena re swanetše go swara Bakriste ba godilego bjalo ka ge eka ke bo-mmago rena le bo-tatago rena gomme ba banyenyane re ba sware bjalo ka baratho ba rena, ke gore, bana babo rena ba madi. Ge re e-na le boemo bjoo bja kgopolo, ga go na bana babo rena le dikgaetšedi bao ba tlago go ikwa eka ke batho bašele ge ba e-na le rena.

14. Ke mehola efe e tlišwago ke go ba le dipoledišano tše di agago le ba bangwe?

¹⁴ Ge re e-ba le dipoledišano tše agago le ba bangwe, re ba aga moyeng le maikwelong. Ngwanabo rena yo mongwe yo a šomago ofising ya lekala ka lerato o gopola ditho tše mmalwa tša lapa la Bethele tšeo e lego batho ba bagolo, tšeo ka mehla di bego di ipha nako ya go bolela le yena nywageng ya gagwe ya mathomo Bethele. Mantšu a tšona a kgothatšago a dirile gore a ikwe gore ka kgonthe ke setho sa lapa la Bethele. Ga bjale o leka go di ekiša ka go boledišana le bana babo rena ba bangwe le dikgaetšedi bao ba hlankelago Bethele.

Boikokobetšo bo re Thuša go Dira Khutšo

15. Ke’ng seo se bontšhago gore ka dinako tše dingwe re ka ba le dingangišano?

¹⁵ Go bonala Ebodia le Sintike, e lego dikgaetšedi tše pedi tša ba Bakriste tša Filipi ya bogologolo, di be di thatafalelwa ke go rarolla bothata bjo bo bilego gona magareng ga tšona. (Bafil. 4:2, 3) Ngangišano e bogale yeo e ilego ya tsoga  magareng ga Paulo le Baranaba e ile ya tsebja ke bohle gomme seo se ile sa dira gore ba arogane ka nakwana. (Dit. 15:37-39) Dipego tše di bontšha gore ka dinako tše dingwe go ba le dingangišano magareng ga barapedi ba therešo. Jehofa o re nea thušo ya go rarolla mathata le go tsošološa segwera. Eupša go na le selo seo a se nyakago go rena.

16, 17. (a) Boikokobetšo bo bohlokwa gakaaka’ng ge go rarollwa diphapano? (b) Tsela yeo Jakobo a ilego a swara Esau ka yona e bontšha bjang bohlokwa bja boikokobetšo?

¹⁶ Akanya wena le mogwera wa gago le tlo tšea leeto ka koloi. Pele le thoma leeto la lena, o swanetše go diriša senotlelo sa koloi e le gore entšene e dume. Mogato wa go rarolla mathata le ona o thongwa ka senotlelo. Senotlelo seo ke boikokobetšo. (Bala Jakobo 4:10.) Bjalo ka ge mehlala e latelago ya Mangwalo e bontšha, senotlelo seo se dumelela bao ba nago le bothata gore ba thome go diriša melao ya motheo ya Beibele.

¹⁷ Nywaga e 20 e be e šetše e fetile Esau a galefile ka baka la go amogwa ga gagwe tokelo ya go ba leitšibulo ke lefahla la gagwe Jakobo, gomme o be a nyaka go mmolaya. Mafahla a a be a tla tloga a kopana ka morago ga nako yeo e telele, gomme “Jakobo [o ile] a boifa xa-xolo, a tlalêlwa.” O be a lemoga gore go na le kgonagalo e kgolo ya gore Esau a mo gobatše. Eupša ge ba be ba kopana, Jakobo o ile a dira selo seo Esau a bego a sa se letela. O ile a “inamela fase” ge a be a batamela ngwanabo. Go ile gwa direga’ng ka morago ga moo? “Esau a akgofa a ya go mo gahlanetša, gomme a mo gokarela, a wela molaleng wa gagwe a mo atla, gomme ba lla.” Jakobo o ile a phema kotsi ya ntwa. Boikokobetšo bja Jakobo bo ile bja thuša go fenya lehloyo le ge e le lefe leo Esau a ka bego a be a e-na le lona.—Gen. 27:41; 32:3-8; 33:3, 4, PK.

18, 19. (a) Ke ka baka la’ng go le bohlokwa gore re gate mogato wa pele wa go diriša keletšo ya Mangwalo ge re e-na le diphapano le batho ba bangwe? (b) Ke ka baka la’ng re sa swanela go lahlela toulo ge motho yo re nago le bothata le yena a sa arabele gabotse mathomong?

¹⁸ Beibele e-na le keletšo e botse kudu ya kamoo go ka rarollwago diphapano. (Mat. 5:23, 24; 18:15-17; Baef. 4:26, 27) * Lega go le bjalo, ka ntle le gore re diriše keletšo yeo ka boikokobetšo, go tla ba thata gore re dire khutšo. Go letela gore motho yo re nago le bothata le yena a bontšhe boikokobetšo ga se tharollo mola e le gore le rena re ka bo bontšha.

¹⁹ Ge e ba ka mabaka a itšego go bonala maiteko a rena a pele a go dira khutšo a sa atlege, ga se ra swanela go lahlela toulo. Go ka nyakega gore  motho yo re nago le bothata le yena a be le nako ya go phohliša pelo. Josefa o ile a radiiwa ke bana babo. Go ile gwa feta nako e telele pele ba kopana le yena e le tona-kgolo ya Egipita. Lega go le bjalo, mafelelong ba ile ba itshola gomme ba kgopela tshwarelo. Josefa o ile a ba lebalela gomme barwa ba Jakobo ba fetoga setšhaba seo se ilego sa ba le tokelo ya go rwala leina la Jehofa. (Gen. 50:15-21) Ka go boloka khutšo magareng ga rena le bana babo rena le dikgaetšedi, re tlaleletša boteeng le lethabong la phuthego.—Bala Bakolose 3:12-14.

A re Rateng “ka Tiro le ka Therešo”

20, 21. Re ka ithuta’ng tirong ya Jesu ya go hlapiša baapostola ba gagwe maoto?

²⁰ Nakwana pele ga lehu la gagwe, Jesu o boditše baapostola ba gagwe gore: “Ke le beetše mohlala gore go etša ge ke dirile go lena, le lena le dire bjalo.” (Joh. 13:15) O be a sa tšwa go hlapiša baapostola ba gagwe ba 12 maoto. Seo Jesu a se dirilego e be e se feela moetlo goba tiro ya go bontšha botho. Pele a anega pego ya go hlapišwa ga bona maoto, Johane o ngwadile gore: “Jesu ka ge a ratile ba gagwe bao ba bego ba le lefaseng, o ba ratile go fihla bofelong.” (Joh. 13:1) Lerato leo Jesu a bego a rata barutiwa ka lona ke lona le mo tutueditšego gore a dire modiro woo ka tlwaelo o dirwago ke lekgoba. Ga bjale ba be ba swanetše gore ka boikokobetšo ba direlane dilo ka lerato. Ee, lerato la kgonthe la borwarre le swanetše go re tutueletša go rata bana babo rena le dikgaetšedi ba Bakriste ka moka gaešita le go tshwenyega ka bona.

²¹ Moapostola Petro, yoo a ilego a hlapišwa maoto ke Morwa wa Modimo, o ile a kwešiša seo se bego se bolelwa ke tiro yeo ya Jesu. O ngwadile gore: “Ka ge bjale le sekišitše meoya ya lena ka go kwa ga lena therešo mo go feleleditšego ka maikwelo a borutho a borwarre a hlokago boikaketši, ratanang ka mo go tseneletšego go tšwa pelong.” (1 Pet. 1:22) Moapostola Johane, yoo le yena a ilego a hlapišwa maoto ke Morena, o ngwadile gore: “Bana ba banyenyane, a re se rateng ka lentšu goba ka leleme, eupša ka tiro le ka therešo.” (1 Joh. 3:18) Eka dipelo tša rena di ka re tutueletša go bontšha lerato la rena la borwarre ka ditiro.

[Mongwalo wa tlase]

Na o sa Gopola?

• Re ka ‘katologa’ bjang tseleng yeo re bontšhago lerato ka yona?

• Re tla thušwa ke’ng gore re iphe nako ya go ba le ba bangwe?

• Boikokobetšo bo kgatha tema efe go direng khutšo?

• Ke’ng yeo e swanetšego go re tutueletša go rata bana babo rena?

[Dipotšišo tša Thuto]

[Seswantšho go letlakala 21]

Amogela badumedi-gotee le wena ka borutho

[Seswantšho go letlakala 23]

O se ke wa fetwa ke dibaka tša go fetša nako le ba bangwe