Dira Gore Tšwelopele ya Gago e Bonagale

“Eleletša ka dilo tše; nwelela go tšona, gore tšwelopele ya gago e bonagale go batho bohle.”—1 TIM. 4:15.

1, 2. Re tseba’ng ka bophelo bja Timotheo ge e be e sa le mofsa le ka phetogo yeo e diregilego ge a be a e-na le nywaga e ka bago e 20?

MOŠEMANE yo a bitšwago Timotheo o be a dula Galatia, e lego profense ya Roma yeo ga bjale e tsebjago e le Turkey. Diphuthego tše mmalwa tša Bokriste di be di hlomilwe moo nywaga-some ka morago ga lehu la Jesu. Nakwana ka morago, Timotheo yo monyenyane, mmagwe le makgolo’agwe ba ile ba amogela Bokriste gomme ba ba mafolofolo go e nngwe ya diphuthego tša moo. (2 Tim. 1:5; 3:14, 15) Ga go na pelaelo gore Timotheo o ile a thabela bophelo bja gagwe bjalo ka mofsa wa Mokriste tikologong ye yeo a e tlwaetšego. Lega go le bjalo, nakwana ka morago, dilo di ile tša thoma go fetoga.

² Diphetogo tšeo di thomile ka morago ga ketelo ya bobedi ya moapostola Paulo tikologong yeo. Ka nako yeo, Timotheo o be a obelela nywaga e 20 goba a sa tšwa go e feta. Nakong ya ge Paulo a etetše tikologo yeo, mohlomongwe a le Lisitara, o ile a lemoga gore Timotheo o be a “bolelwa gabotse ke bana babo” diphuthegong tša lefelong leo. (Dit. 16:2) Timotheo wa mofsa o swanetše go ba a ile a bontšha gore o gotše kudu tsebong. Ka gona, ba hlahlwa ke moya o mokgethwa, Paulo le bagolo ba tikologong yeo ba ile ba mmea diatla e le go mo lokišeletša modiro o kgethegilego ka phuthegong.—1 Tim. 4:14; 2 Tim. 1:6.

3. Ke tokelo efe e sa tlwaelegago ya tirelo yeo Timotheo a ilego a e amogela?

³ Timotheo o ile a amogela taletšo e sa tlwaelegago—go sepela le Paulo maetong a gagwe. (Dit. 16:3) Akanya kamoo Timotheo a ilego a makala le go thaba ka gona! Nywageng e mentši yeo e bego e tla latela, Timotheo o be a tla sepela le Paulo gotee le ba bangwe, a phetha dikabelo tše di fapa-fapanego tšeo baapostola la banna ba bagolo ba mo abetšego tšona. Paulo le Timotheo ba ile ba dira modiro wa bosepedi woo o ilego wa aga bana babo bona kudu moyeng. (Bala Ditiro 16:4, 5.) Ka gona, Timotheo o ile a tsebja kudu ke Bakriste ba bantši ka baka la kgolo ya gagwe ya moya. Ka morago ga nywaga e ka bago e lesome a šoma le Timotheo, Paulo o ile a ngwalela Bafilipi gore: “Ga ke na yo mongwe yo a nago le kgopolo e swanago le ya [Timotheo] yo a tlago go hlokomela e le ka kgonthe dilo tše di lego mabapi le lena. . . . Le tseba bohlatse bjo a itlhatsetšego ka bjona, gore o ile a hlankela le nna go tšwetšeng pele ditaba tše dibotse.”—Bafil. 2:20-22.

4. (a) Ke boikarabelo bofe bjo bogolo bjoo Timotheo a ilego a bo newa? (b) Ke dipotšišo dife tšeo di ka botšišwago mabapi le mantšu a Paulo a hwetšago go 1 Timotheo 4:15?

⁴ Nakong ya ge Paulo a ngwalela Bafilipi, o be a neile Timotheo boikarabelo bjo bogolo—go kgetha bagolo le bahlanka ba bodiredi. (1 Tim. 3:1; 5:22) Go molaleng gore Timotheo o ile a ba molebeledi wa Mokriste yo a ka botwago. Ka gona, lengwalong lona leo, Paulo o ile a kgothaletša Timotheo go ‘dira gore tšwelopele ya gagwe e bonagale go batho bohle.’ (1 Tim. 4:15)  Na go fihla ga bjale Timotheo o be a se a dira gore tšwelopele ya gagwe e bonagale go batho bohle ka tsela e sa tlwaelegago? Ka gona, Paulo o be a e-ra go re’ng ka mantšu a, gona re ka ithuta’ng keletšong ya gagwe?

Go Bonagatša Dika tša Moya

5, 6. Bohlweki bja moya bja phuthego ya Efeso bo be bo le kotsing ka tsela efe, gona Timotheo o be a ka šireletša phuthego bjang?

⁵ A re hlahlobeng taba e lego go 1 Timotheo 4:15. (Bala 1 Timotheo 4:11-16.) Pele a ka ngwala mantšu ao, Paulo o be a šetše a tšere leeto la go ya Matsedonia eupša a kgopetše Timotheo gore a šale Efeso. Ka baka la’ng? Ba bangwe motseng woo ba be ba baka dikarogano ka phuthegong ka go ruta dithuto tša maaka. Timotheo o be a swanetše go šireletša bohlweki bja moya bja phuthego. O be a tla dira seo bjang? Ka boripana, o be a tla dira seo ka go beela ba bangwe mohlala woo ba ka o latelago.

⁶ Paulo o ile a ngwalela Timotheo gore: “E-ba mohlala go ba botegago go boleleng, boitshwarong, leratong, tumelong le thakgafalong.” Paulo o ile a oketša ka gore: “Eleletša ka dilo tše; nwelela go tšona, gore tšwelopele ya gago e bonagale go batho bohle.” (1 Tim. 4:12, 15) Tšwelopele ye e be e sepedišana le dika tša Timotheo tša moya e sego maemo le ge e le afe a bolaodi ao a bego a e-na le ona. Wo ke mohuta wa tšwelopele yeo Mokriste yo mongwe le yo mongwe a ka nyakago gore a e bonagatše.

7. Ke’ng seo se letetšwego go bohle ka phuthegong?

⁷ Go swana le mehleng ya Timotheo, lehono go na le maemo a fapa-fapanego a boikarabelo ka phuthegong. Ba bangwe ba hlankela e le bagolo goba bahlanka ba bodiredi. Ba bangwe ba tsenela tirelo ya bobulamadibogo. Ba bangwe bona ba thabela dikabelo modirong wa bosepedi, ba hlankela legaeng la Bethele goba ke baromiwa. Bagolo ba tšea karolo mananeong a fapa-fapanego a go ruta, bjalo ka dikopanong tše dikgolo le tše dinyenyane. Lega go le bjalo, Bakriste ka moka—banna, basadi le bafsa—ba ka kgona go dira gore tšwelopele ya bona e bonagale. (Mat. 5:16) Ge e le gabotse, go swana le tabeng ya Timotheo, Bakriste bao ba nago le maemo a kgethegilego a boikarabelo ba swanetše go dira gore dika tša bona tša moya di bonagale go batho bohle.

E-ba Mohlala go Boleleng

8. Polelo ya rena e na le mafelelo afe borapeding bja rena?

⁸ Karolo e nngwe ya bophelo yeo Timotheo a bego a swanetše go bea mohlala go yona ke tsela ya gagwe ya go bolela. Re ka dira bjang gore tšwelopele ya rena e bonagale karolong yeo? Polelo ya rena e utolla mo gontši ka rena. Jesu o boletše ka mo go nepagetšego gore: “Molomo o bolela go tšwa go se se tletšego pelong.” (Mat. 12:34) Ngwanabo Jesu ka motswadi o tee e lego Jakobo le yena o ile a lemoga mafelelo ao polelo ya rena e ka bago le ona borapeding bja rena. O ngwadile gore: “Ge e ba motho a ipona e le morapedi wa setlwaedi lega go le bjalo a sa laole leleme la gagwe bjalo ka ge eka ke ka tomo, eupša a tšwela pele a fora pelo ya gagwe, mohuta wa borapedi bja motho yo ke lefeela.”—Jak. 1:26.

9. Polelo ya rena e swanetše go bea mohlala ka ditsela dife?

⁹ Polelo ya rena e ka utollela ba bangwe ka phuthegong gore re dirile tšwelopele go fihla bokgoleng bofe moyeng. Ka gona, go e na le go diriša polelo yeo e sa kgahlišego, yeo e sa agego, ya go swaya diphošo goba yeo e kwešago bohloko, Bakriste ba godilego tsebong ba katanela go aga ba bangwe, go ba homotša le go ba kgothatša. (Die. 12:18; Baef. 4:29; 1 Tim. 6:3-5, 20) Go ikemišetša ga rena go boledišana le ba bangwe ka seo re se dumelago ditabeng tša boitshwaro le go šireletša ditekanyetšo tša Modimo tše phagamego go ka utolla boineelo bja rena go Modimo. (Baroma 1:15, 16) Batho ba dipelo tše di lokilego ba tla bona kamoo re dirišago mpho ya rena ya polelo gomme ba ka latela mohlala wa rena.—Bafil. 4:8, 9.

Go Bea Mohlala ka Boitshwaro le Thakgafalo ya Rena

10. Ke ka baka la’ng tumelo e se nago boikaketši e le bohlokwa bakeng sa tšwelopele ya rena ya moya?

¹⁰ Gore Mokriste a bee mohlala o mobotse, ga se a swanela go fo bolela dipolelo tše di agago. Motho a ka ba moikaketši ge a bolela dilo tše di  nepagetšego eupša yena a sa di dire. Paulo o be a tlwaelane le boikaketši bja Bafarisei e bile a tseba mafelelo a kotsi a boitshwaro bja bona. O ile a lemoša Timotheo ka makga a mantši mabapi le boikaketši le boikgakantšho. (1 Tim. 1:5; 4:1, 2) Eupša Timotheo e be e se moikaketši. Lengwalong la gagwe la bobedi le le yago go Timotheo, Paulo o ngwadile gore: “Ke gopola tumelo yeo e lego go wena e se nago boikaketši.” (2 Tim. 1:5) Lega go le bjalo, Timotheo o be a swanetše go dira gore go ba ga gagwe Mokriste wa kgonthe go bonagale go batho bohle. O be a swanetše go bea mohlala ka tsela ya gagwe ya boitshwaro.

11. Ke’ng seo Paulo a se ngwaletšego Timotheo mabapi le mahumo?

¹¹ Mangwalong a gagwe a mabedi a yago go Timotheo, Paulo o neile keletšo ditseleng tše dintši tša boitshwaro. Ka mohlala, Timotheo o be a swanetše go efoga go phegelela mahumo. Paulo o ngwadile gore: “Lerato la tšhelete ke modu wa mehuta ka moka ya dilo tše di gobatšago, gomme ka go phegelela lerato le, ba bangwe ba ile ba arošwa tumelong gomme ba itlhabile gohle ka mahloko a mantši.” (1 Tim. 6:10) Go rata tšhelete ke leswao la go fokola moyeng. Ka mo go fapanego, Bakriste bao ba kgotsofatšwago ke ge ba phela bophelo bjo bonolo, e lego “[go ba] le dijo le diaparo,” ba kgona go dira tšwelopele ya moya.—1 Tim. 6:6-8; Bafil. 4:11-13.

12. Re ka dira bjang gore tšwelopele ya rena e bonagale maphelong a rena?

¹² Paulo o boditše Timotheo kamoo go lego bohlokwa gore basadi ba Bakriste “ba ikgabiše ka moaparo o rulagantšwego gabotse, ka go se solege le ka go hlaphogelwa ga monagano.” (1 Tim. 2:9) Basadi bao ba aparago le go ikgabiša ka tsela e sa solegego le e bontšhago gore ba hlaphogetšwe monaganong, gaešita le dikarolong ka moka tša bophelo, ba bea mohlala o mobotse. (1 Tim. 3:11) Molao wo wa motheo o šoma gape le go banna ba Bakriste. Paulo o eleditše balebeledi gore ba swanetše go ‘ba ba lekanetšego mekgweng, ba hlaphogetšwego monaganong le ba ba nago le thulaganyo.’ (1 Tim. 3:2) Ge re  bontšha dika tše bophelong bja letšatši le letšatši, tšwelopele ya rena e tla bonagala go batho bohle.

13. Re ka bea mohlala wa thakgafalo bjang bjalo ka Timotheo?

¹³ Timotheo o be a swanetše go bea mohlala gape thakgafalong. Ge a be a diriša lentšu le, Paulo o be a bolela ka mohuta o itšego wa boitshwaro, e lego boitshwaro bjo bo hlwekilego bja tša botona le botshadi. Boitshwaro bja Timotheo bo be bo swanetše go hloka bosodi, kudu-kudu ge a dirišana le basadi. O be a swanetše go swara “basadi ba bagolo bjalo ka bo-mma, basadi ba bafsa bjalo ka dikgaetšedi ka thakgafalo yohle.” (1 Tim. 4:12; 5:2) Modimo o tseba gaešita le ditiro tše di gobogilego tšeo e ka bago e le sephiri gomme mafelelong di tla tsebja ke batho ba bangwe. Eupša ke therešo gore ditiro tše dibotse tša Mokriste le tšona di ka se dule e le sephiri. (1 Tim. 5:24, 25) Bohle ka phuthegong ba ka dira gore tšwelopele ya bona e bonagale ka boitshwaro le thakgafalo.

Lerato le Tumelo di Bohlokwa

14. Mangwalo a gatelela bjang bohlokwa bja go ratana seng sa rena?

¹⁴ Seka se segolo sa Bokriste bja therešo ke lerato. Jesu o boditše barutiwa ba gagwe gore: “Bohle ba tla tseba ka se gore le barutiwa ba-ka, ge e ba le ratana.” (Joh. 13:35) Re ka bontšha bjang lerato le bjalo? Lentšu la Modimo le re kgothaletša gore re kgotlelelane “ka lerato,” gore re be ‘botho yo mongwe go yo mongwe, re šokelane ka bonolo, re lebalelane ka bolokologi’ le gore re amogele baeng. (Baef. 4:2, 32; Baheb. 13:1, 2) Moapostola Paulo o ngwadile gore: “Leratong la borwarre e-bang le maikwelo a borutho a bonolo go yo mongwe le yo mongwe.”—Baroma 12:10.

15. Ke ka baka la’ng go le bohlokwa gore ka moka ga rena, kudu-kudu balebeledi ba Bakriste, re bontšhe lerato?

¹⁵ Ge e ba Timotheo a be a dirišana le Bakriste-gotee le yena ka tsela ya makgwakgwa goba e sego botho, seo se be se tla bipa botse bjo a bo dirilego bjalo ka morutiši le molebeledi. (Bala 1 Bakorinthe 13:1-3.) Ka lehlakoreng le lengwe, ga go pelaelo gore go bontšha ga Timotheo gore o kgomegile e le ka kgonthe ka bana babo gotee le go amogela ga gagwe baeng le mediro e mebotse yeo a ba diretšego yona go ile gwa bontšha tšwelopele ya gagwe ya moya. Ka gona, e be e le mo go swanetšego gore lengwalong la gagwe leo le yago go Timotheo, Paulo a bolele ka mo go kgethegilego gore lerato ke se sengwe sa dika tšeo Timotheo a bego a swanetše go bea mohlala go tšona.

16. Ke ka baka la’ng go be go nyakega gore Timotheo a be le tumelo e tiilego?

¹⁶ Nakong ya ge Timotheo a le Efeso, tumelo ya gagwe e ile ya lekwa. Ba bangwe ba be ba ruta dithuto tšeo di bego di sa dumelelane le therešo ya Bokriste. Ba bangwe ba be ba phatlalatša “ditaba tša maaka” goba ba nyakišiša dikgopolo tšeo di bego di sa hole phuthego ka selo moyeng. (Bala 1 Timotheo 1:3, 4.) Paulo o ile a hlalosa batho ba bjalo e le ba ‘ikgogomošago ka boikgantšho, ba sa kwešišego selo, eupša ba babja monaganong ka baka la dipelaelo le go ngangišana ka mantšu.’ (1 Tim. 6:3, 4) Na Timotheo o be a ka ipea kotsing ya go nagana ka dikgopolo tše bjalo tše kotsi tšeo di bego di šwahletše ka phuthegong? Aowa, ka gobane Paulo o kgothaleditše Timotheo gore a ‘lwe ntwa e botse ya tumelo’ le gore a furalele “dipolelo tša lefeela tšeo di senyago se sekgethwa le dikganetšano tšeo ka maaka di bitšwago gore ke ‘tsebo.’” (1 Tim. 6:12, 20, 21) Ga go pelaelo gore Timotheo o ile a latela keletšo e bohlale ya Paulo.—1 Bakor. 10:12.

17. Tumelo ya rena e ka lekwa bjang lehono?

¹⁷ Go ba gona, Timotheo o ile a botšwa gore  “mabakeng a tlago ba bangwe ba [be ba] tla wa tumelong, ba ela hloko dipolelo tše di buduletšwego tše di timetšago le dithuto tša batemona.” (1 Tim. 4:1) Bohle ka phuthegong, go akaretša le bao ba lego maemong a boikarabelo, ba swanetše go ba bjalo ka Timotheo gomme ba bontšhe tumelo e tiilego le e sa šišinyegego. Ge e ba re ema re tiile kgahlanong le bohlanogi, re ka dira gore tšwelopele ya rena e bonagale gomme ra bea mohlala wa tumelo.

Katanela go Dira Gore Tšwelopele ya Gago e Bonagale

18, 19. (a) O ka dira bjang gore tšwelopele ya gago e bonagale go batho bohle? (b) Ke’ng seo se tlago go ahla-ahlwa sehlogong se se latelago?

¹⁸ Ke therešo gore tšwelopele ya moya ya Mokriste wa therešo ga e tswalane le ponagalo ya gagwe, bokgoni bja gagwe goba maemo a gagwe. E bile ga go bolele gore e bonagatšwa ke nywaga ya gagwe ya tirelo ka phuthegong. Go e na le moo, tšwelopele ya kgonthe ya moya e bonagala ka go kwa ga rena Jehofa ka menagano ya rena, tsela ya rena ya go bolela le boitshwaro. (Baroma 16:19) Re swanetše go kwa taelo ya gore re ratane le go hlagolela tumelo e tiilego. Ka gona, a re eleletšeng ka mantšu a Paulo a yago go Timotheo gomme re nwelele go ona e le gore tšwelopele ya rena e bonagale go batho bohle.

¹⁹ Seka se sengwe seo se bonagalago ge re dira tšwelopele ya moya le ge re gola tsebong ya rena bjalo ka Bakriste ke lethabo, e lego karolo ya seenywa sa moya o mokgethwa wa Modimo. (Bagal. 5:22, 23) Sehlogo se se latelago se tla ahla-ahla kamoo re ka hlagolelago le go boloka lethabo dinakong tša mathata.

O be o tla Araba Bjang?

• Batho ba bangwe ba ka ithuta’ng ka rena go tšwa go seo re se bolelago?

• Tšwelopele ya rena e bonagala bjang boitshwarong le thakgafalong ya rena?

• Ke ka baka la’ng Bakriste ba swanetše go bea mohlala leratong le tumelong?

[Dipotšišo tša Thuto]

[Seswantšho go letlakala 11]

Timotheo wa mofsa o bontšhitše gore o gotše kudu tsebong

[Seswantšho go letlakala 13]

Na tšwelopele ya gago e a bonagala go batho ba bangwe?