Dula o Swaregile e Bile o Thabile Tirelong ya Modimo

JEHOFA o nyaka gore o thabe. (Ps. 100:2) Bjalo ka yo mongwe wa bahlanka ba gagwe, mohlomongwe le wena o dula o swaregile. Mohlomongwe o be o sa dule o swaregile ka tsela ye ge o be o ineela go Modimo, eupša ga bjale mošomo wa boiphedišo le boikarabelo bja phuthego di ka dira gore o ikwe o gateletšegile. O ka ba wa ikwa o e-na le molato ge o palelwa ke go fihlelela dilo ka moka tšeo o bego o ipeetše pakane ya go di fihlelela. O ka leka-lekanya boikarabelo bja gago bjang gomme wa dula o “thabêla Morêna”?—Neh. 8:10.

O phela dinakong tše hlobaetšago gomme le wena o a gateletšega, ka gona o swanetše go rulaganya maemo a gago gabotse. Tabeng ye, o ka thušwa ke keletšo e nngwe ya moapostola Paulo e buduletšwego e rego: “Ka gona dulang le phakgametše gore kamoo le sepelago ka gona ga se bjalo ka batho ba ba sa hlalefago eupša ke bjalo ka ba bohlale, le ithekele nako e swanetšego gobane mehla ke e mebe.”—Baef. 5:15, 16.

Ka baka la keletšo ye e bohlale, o ka ipeela bjang dipakane tša kgonthe le go leka-lekanya thuto ya motho ka noši, go hlokomela lapa, bodiredi bja tšhemo, mošomo wa boiphedišo le dilo tše dingwe tša bohlokwa?

Na o sa gopola kamoo o bego o thabile ka gona ge o be o ineela go Modimo gomme o kolobetšwa? Lethabo le tlišwa ke go tseba Jehofa le merero ya gagwe. Go ka ba go go tšere dikgwedi tše dintši tša go ithuta ka mo tseneletšego gore o fihlelele kwešišo yeo le lethabo. Eupša maiteko ao e be e se a lefeela. Thuto yeo e fetotše bophelo bja gago gore e be bjo bokaone.

Gore o dule o thabile, o swanetše go iphepa moyeng. Ge e ba o palelwa ke go bala le go ithuta Beibele, hlahloba thulaganyo ya gago. Gaešita le go ithuta le go naganišiša ka nakwana letšatši le letšatši go tla go batametša kgaufsi le Jehofa gomme seo se tla tlaleletša lethabong la gago.

Bahlanka ba bantši ba Modimo ba ka ithekela nako bakeng sa dilo tša bohlokwa go tšwa nakong yeo ba e fetšago ba dira dilo tšeo di sego bohlokwa. Ipotšiše gore: ‘Ke fetša nako e kaakang ke bala dimakasine tša lefase goba kuranta, ke bogetše thelebišene, ke theeditše mmino goba ke dira selo se sengwe seo ke se ratago kudu? Mediro e bjalo e ka ba e thabišago ge e ba e dirwa ka teka-tekano. (1 Tim. 4:8) Ge e ba o bona gore o palelwa ke go laola nako  ya gago, tšea kgato ka go akgofa gore o beakanye thulaganyo ya gago.

Adam, e lego monna yo a nyetšego yoo gape e lego tatago bana ba bararo e bile e le mogolo ka phuthegong, o hlalosa seo se mo thušago ka gore: “Ke katanela go phela bophelo bjo bonolo. Ke phema mediro yeo e jago nako le dithoto tšeo di nyakago nako e ntši e le gore ke di hlokomele. Ga se gore ke phela bophelo bja go itima dilo—ke fo ba ke thabela boithabišo bjo bo sego bja raragana.”

Go naganišiša ka mafelelo a mabotse a diphetho tša gago go ka tsošološa lethabo la gago gomme gwa go thuša go dula o e-na le pono e botse ka dilo. Ka mohlala, Mariusz, e lego mogolo yo a nago le bana ba bararo o re: “Ge ke be ke thoma go ithuta Beibele, ke ile ka hlagolela pono e botse ka dilo. Nako le nako ke sa dutše ke lebeletšana le mathata ao bontši bja ona e lego Jehofa feela yo a tsebago ka ona. Eupša ka baka la thekgo ya gagwe, ke kgona go fagahlela bokamoso ka lethabo.”

Go etša tabeng ya Mariusz, go ba le pono e botse ka dilo go ka se fediše dipelaelo ka moka. Eupša go ka go thuša go ikwa bokaone le go lebeletšana ka katlego le mathata a bophelo. Re bala gore: “Go yo madimabe matšatši ka moka ke a mabe; eupša pelo e thabilego ke monyanya wa ka mehla.” (Die. 15:15, PK) Le gona, naganišiša ka lerato leo Modimo a šetšego a go bontšhitše lona. Go naganišiša mo go bjalo go ka tiiša lerato leo o mo ratago ka lona gwa ba gwa oketša lethabo la gago leo le tšwago go Modimo.—Mat. 22:37.

Go bea Jehofa le dikgahlego tša gagwe pele bophelong go oketša lethabo la lapa. Go bonagatša dika tša Bokriste go fokotša dikgohlano gomme go feleletša ka tswalano e botse le e thabišago ya lapa. Ka go rialo, legae la lena e ba lefelo leo go lona go bago le khutšo le botee e le ka kgonthe bakeng sa lapa ka moka.—Ps. 133:1.

Go tšea karolo medirong ya moya le le lapa go oketša lethabo la lena e le ka kgonthe. Mariusz o hlalosa gore: “Nako yeo re e fetšago re le gotee bjalo ka lapa ke e tšea e le ya bohlokwa. Mosadi wa-ka o nthekga kudu. Nako le nako ge go kgonega o šoma le nna, go sa šetšwe gore ke tirelong ya tšhemo goba ke hlwekiša lebala pele ga kopano e bile o sepela le nna ge ke e-ya go nea polelo ya phatlalatša diphuthegong tše dingwe. Seo se nkgothatša kudu.”

Mangwalo a laela Bakriste gore ba nee malapa a bona dilo tše di bonagalago. (1 Tim. 5:8) Eupša ge e ba mošomo wa boiphedišo o go jela nako e ntši le matla, o ka go amoga lethabo tirelong ya Modimo. Botša Jehofa taba yeo ka thapelo. (Ps. 55:22) Ba bangwe ba dirile phetho ya gore go etiša Mmušo wa Modimo pele go bolela gore ba swanetše go tsoma mošomo o mongwe. Ga go na Mokriste yo a swanetšego go dumelela go foufatšwa ke tšhelete yeo a e hwetšago mošomong woo o mo jelago nako e ntši le matla moo a se sa hlwago a bona dilo tša bohlokwa tša moya.—Die. 22:3.

O ka hwetša e le mo go holago go ngwala mehola le dikotsi tša mošomo wa gago wa gona bjale goba woo o ka o hwetšago. Ke therešo gore moputso o mobotse le mošomo o kgotsofatšago ke dilo tšeo di rategago. Lega go le bjalo, na mošomo wa gago wa gona bjale o go thuša gore o etiše pele dinyakwa tša moya tša lapa la gago? Naganišiša ka ditaba ka moka gomme o dire diphetho tšeo di tla dirago gore o etiše tswalano ya gago le Jehofa pele.

Ge e ba mošomo wa gago wa gona bjale o sa go dumelele gore o gole moyeng, o swanetše go beakanya maemo a gago. Bakriste ba bantši ba dirile diphetogo tše dikgolo e le gore ba hwetše nako ya dilo tša moya. Ngwanabo rena yo mongwe kua Poland o anega ka gore: “Ka nako e nngwe ke ile ka ikhwetša ke se na kgetho ge e se go tlogela khamphani yeo ke bego ke e šomela ka gobane gantši ke be ke e-ba kgole le lapa la-ka ka mabaka a mošomo. Ke be ke se na nako e lekanego ya go hlokomela dilo tša moya goba lapa la-ka gabotse.” Ga bjale o iphediša ka mošomo woo o sa mo jelego nako e ntši le matla.

Thabela go Thuša ba Bangwe

Jesu o itše “go na le lethabo le legolo go neeng go feta go amogeleng.” (Dit. 20:35) Bakriste ba na le dibaka tše dintši tša go nea ka tsela e bjalo. Ka dinako tše dingwe, go myemyela, go dumediša motho ka seatla goba go leboga motho yo mongwe go tšwa pelong bakeng sa kabelo ya pušo ya Modimo yeo a e phethilego gabotse, e ka ba sohle seo se nyakegago e le gore bobedi bja lena le thabe.

Moapostola Paulo o kgothaditše Bakriste-gotee le yena ka gore: “Bolelang ka mo go homotšago le  meoya e nyamilego, thekgang ba fokolago.” (1 Bathes. 5:14) Batho bao ba nyamilego ba ka ikwa gore ga ba kgone go lebeletšana le mathata a bona ka matla a bona. Na o ka thuša batho ba bjalo? Ge e ba o bona gore yo mongwe wa bana beno ga a sa thabela tirelo ya gagwe go Jehofa, leka go mo kgothatša. Go dira bjalo go tla go kgothatša le wena. Mathata a mangwe ga a rarollege. Lega go le bjalo, o ka bontšha ngwaneno kwelobohloko ya kgonthe gomme wa mo kgothaletša gore a ithekge ka Jehofa yo a sa felelwego ke matla. Bao ba dirago bjalo ba ka se ke ba nyama le ka mohla.—Ps. 27:10; Jes. 59:1.

Tsela e nngwe e šomago ke ya go laletša motho yoo go bonalago a feletšwe ke lethabo gore a šome le wena bodireding. Ge Jesu a be a roma barutiwa ba 70, o ba rometše “ka babedi ka babedi.” (Luka 10:1) Na ga o dumele gore mokgwa wo o dirile gore ba kgothatšane? Na o ka diriša mokgwa o swanago go thuša ba bangwe gore ba buše ba thabe?

Bophelo bo tletše ka mathata ao e lego mo go swanetšego gore re tshwenyege ka ona. Lega go le bjalo, Paulo o re kgothatša ka gore: “Ka mehla thabang Moreneng. Ke tla buša ke re, Thabang!” (Bafil. 4:4) Bophelo bja gago bo na le morero ka ge o rata Modimo, o ikokobeletša yena e bile o phegelela ka phišego modirong woo a re neilego wona gore re o dire. Seo se a go thabiša. Sa bohlokwa le go feta, Jehofa o go thuša go lebeletšana ka katlego le dikgateletšo le mathata a gago.—Baroma 2:6, 7.

Ka mahlo a tumelo, re bona kamoo re lego kgaufsi ka gona le lefase le lefsa leo Jehofa a re holofeditšego lona. Ruri seo se tla re tlišetša ditšhegofatšo tše dintši le go re nea mabaka a mantši a go thaba! (Ps. 37:34) Ka gona, re ka thaba gomme ra kgona go bona kamoo Jehofa a re šegofatšago ka gona gaešita le gona bjale. Ka go rialo, re ka ‘hlankela Jehofa re thabile.’—Ps. 100:2.

[Seswantšho go letlakala 8]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

Go ka nyakega gore o dire diphetogo tseleng yeo o dirišago nako ya gago ka yona e le gore o dule o thabile

BOITAPOLOŠO le BOITHABIŠO

GO HLOKOMELA LEGAE le LAPA

MOŠOMO

DIBOKA TŠA BOKRISTE

THUTO YA MOTHO KA NOŠI

BODIREDI

[Diswantšho go letlakala 10]

Na o ka kgona go thuša ba bangwe gore ba buše ba thabe?