Diriša Letšatši le Lengwe le Lengwe Bophelong Bakeng sa Letago la Modimo

MOPSALME DAFIDA o rapetše Jehofa ka gore: “A nke O nkwišê botho bya xaxo è sa le bosasa;  . . . Nthutê tsela ye nkaxo e swara.” (Ps. 143:8) Ge o tsoga gomme o leboga Jehofa bakeng sa go go hlabišetša letšatši le lengwe la bophelo, na le wena go swana le Dafida o kgopela Jehofa gore a go hlahle ge o dira diphetho le gore o gate megato e swanetšego? Ga go pelaelo gore o dira bjalo.

Bjalo ka bahlanka ba Jehofa ba ineetšego, ‘go sa šetšwe gore re a ja goba re a nwa goba re dira selo le ge e le sefe se sengwe,’ re katanela go ‘dira dilo tšohle bakeng sa letago la Modimo.’ (1 Bakor. 10:31) Re lemoga gore tsela yeo re phelago ka yona ka mehla e ka tumiša goba ya goboša Jehofa. Le gona, re gopola gore Lentšu la Modimo le bolela gore Sathane o bega bana babo Kriste—ge e le gabotse, le bahlanka ba Modimo ba lefaseng—“mosegare le bošego.” (Kut. 12:10) Ka gona, re ikemišeditše go arabela ditatofatšong tša Sathane tša maaka gomme re thabiše pelo ya Jehofa ka go direla Tatago rena wa legodimong tirelo e kgethwa “mosegare le bošego.”—Kut. 7:15; Die. 27:11.

A re hlahlobeng ka boripana ditsela tše pedi tše bohlokwa tšeo ka tšona re ka dirišago letšatši le lengwe le le lengwe la bophelo bja rena bakeng sa letago la Modimo. Ya pele e akaretša go etiša pele dilo tše bohlokwa bophelong gomme ya bobedi e akaretša go naganela ba bangwe.

Go Phelela Boineelo bja Rena

Ka go ineela go Jehofa, re bontšhitše kganyogo ya rena e tšwago pelong ya go nyaka go mo hlankela. Le gona re holofeditše Jehofa gore re tla sepela ditseleng tša gagwe “ka mehla le mehla”—ee, le ka mo go sa felego. (Ps. 61:5, 8) Eupša, re phelela kholofetšo yeo bjang? Re ka bontšha bjang gore re rata Jehofa ka pelo ka moka letšatši le lengwe le le lengwe?

Lentšu la Modimo le hlalosa gabotse boikarabelo bjo Jehofa a letetšego gore re bo phethe. (Doit. 10:12, 13) Bjo bongwe bo lokeleditšwe lepokising leo le nago le sehlogo se se rego  “Boikarabelo bjo re bo Neilwego ke Modimo,” go letlakala 22. Dikabelo tše ka moka re di neilwe ke Modimo, ka gona di bohlokwa. Re kgetha bjang yeo e tlago pele ge go e-na le tše pedi goba go feta moo tšeo di nyakago nako ya rena?

Tirelo ya rena e kgethwa e tla pele, yeo e akaretšago go ithuta Beibele, go rapela, diboka tša Bokriste le bodiredi. (Mat. 6:33; Joh. 4:34; 1 Pet. 2:9) Lega go le bjalo, mediro ya moya e ka se tšee letšatši ka moka. Re swanetše go akaretša le mošomo, sekolo le mediro e mengwe ya lapa. Go dutše go le bjalo, re leka ka gohle go dira gore mošomo wa boiphedišo le mediro e mengwe e se ke ya šitiša tirelo ya rena e kgethwa, bjalo ka go ba gona dibokeng tša Bokriste. Ka mohlala, ge re itokišeletša go ya maikhutšong, re kgonthišetša gore re se ke ra lahlegelwa ke ketelo ya molebeledi wa mosepedi, kopano ya letšatši le le kgethegilego, kopano ya tikologo goba ya selete. Ka dinako tše dingwe, re ka kgona go phetha a mangwe a maikarabelo a rena ka nako e tee. Ka mohlala, re ka dira gore go hlwekiša Holo ya Mmušo e be modiro wa lapa goba go diriša nako ya matena mošomong goba sekolong go nea bohlatse go bašomi-gotee goba barutwana-gotee le rena. Ka kgonthe, ge re nyaka go dira diphetho bophelong bja rena—bjalo ka go hwetša mošomo, go kgetha sekolo seo re tla tsenago go sona goba go kgetha bagwera—re nyaka gore diphetho tša rena di tutuetšwe ke selo seo  se tlago pele maphelong a rena—go rapela Jehofa, Tatago rena yo lerato.—Mmo. 12:13.

Bontšha Gore o Naganela ba Bangwe

Jehofa o nyaka gore re bontšhe gore re naganela ba bangwe gomme re ba direle dilo tše dibotse. Ka lehlakoreng le lengwe, Sathane o godiša moya wa boithati. Lefase la gagwe le tletše ka batho bao e lego “baithati,” ba “ba ratago maipshino” gaešita le bao ba “bjalelago nama ya [bona].” (2 Tim. 3:1-5; Bagal. 6:8) Ba bantši ga ba tshwenyege kamoo seo ba se dirago se tlago go kgoma ba bangwe ka gona. “Mediro ya nama” e bonagala gohle.—Bagal. 5:19-21.

Boemo ke bjo bo fapanego gakaakang go bao ba hlohleletšwago ke moya o mokgethwa wa Jehofa, bao ba bontšhago lerato, botho le bolo ditirišanong tša bona le ba bangwe! (Bagal. 5:22) Lentšu la Modimo le re botša gore re etiše dinyakwa tša ba bangwe pele ga tša rena. Re bontšha kgahlego ka mediro ya rena go ba bangwe, eupša re le šedi gore re se tsena-tsene ditabeng tša bona tšeo di sa re nyakego. (1 Bakor. 10:24, 33; Bafil. 2:3, 4; 1 Pet. 4:15) Re bontšha go naganela kudu badumedi-gotee le rena. Lega go le bjalo, re leka go thuša bao ba sa dumelego. (Bagal. 6:10) Na lehono o ka tsoma tsela yeo ka yona o ka bontšhago kgahlego go motho yo mongwe yo o ka kopanago le yena?—Bona lepokisi le le nago le sehlogo se se rego  “Bontšha Gore o a ba Naganela,” go letlakala 23.

 Go naganela ba bangwe ga go a lekanyetšwa feela nakong goba boemong bjo bo itšego. (Bagal. 6:2; Baef. 5:2; 1 Bathes. 4:9, 10) Go e na le moo, letšatši le lengwe le lengwe re katanela go naganela maemo a ba bangwe le go leka go ba thuša, gaešita le ge go dira bjalo go le thata go rena. Re nyaka go nea ka seatla se se bulegilego selo le ge e le sefe seo re nago le sona—nako, dilo tše di bonagalago, phihlelo le bohlale bja rena. Jehofa o re kgonthišeditše gore ge re nea ba bangwe ka seatla se se bulegilego le yena o tla re nea ka seatla se se bulegilego.—Die. 11:25; Luka 6:38.

Tirelo e Kgethwa “Bošego le Mosegare”

Na ruri go a kgonega go direla Jehofa tirelo e kgethwa “bošego le mosegare”? Ee, ka go dira dikarolo ka moka tša borapedi bja rena ka mehla le ka mafolofolo. (Dit. 20:31) Re ka tlatša maphelo a rena ka tirelo e kgethwa ka go bala le go naganišiša ka Lentšu la Modimo letšatši le letšatši, ka go se kgaotše go rapela, ka go katanela go ba gona dibokeng ka moka ga tšona le ka go diriša sebaka se sengwe le se sengwe go nea bohlatse.—Ps. 1:2; Luka 2:37; Dit. 4:20; 1 Bathes. 3:10; 5:17.

Na re le motho ka noši re katanela go direla Jehofa tirelo e bjalo e kgethwa? Ge e ba go le bjalo, kganyogo ya rena ya go nyaka go mo thabiša le go nea karabo ditatofatšong tša Sathane tša maaka e tla bonala dikarolong ka moka tša bophelo bja rena. Re katanela go nea Jehofa letago ka selo se sengwe le se sengwe seo re se dirago le boemong bjo bongwe le bjo bongwe bjoo re ka ikhwetšago re le go bjona. Re dumelela melao ya gagwe ya motheo go laola polelo le boitshwaro bja rena le go re hlahla diphethong tšeo re di dirago. Re bontšha gore re leboga tlhokomelo ya gagwe e lerato le thekgo ka go mo holofela le go diriša matla le ge e le afe ao re nago le ona tirelong ya gagwe. Le gona, ka baka la go se phethagale ga rena, re amogela keletšo le tayo ya gagwe ge re sa fihlelele ditekanyetšo tša gagwe.—Die. 3:25, 26; Bakol. 3:17; Baheb. 6:11, 12.

A re tšweleng pele re phelela go nea Modimo letago letšatši le letšatši. Ka go dira bjalo, re tla hweletša meoya ya rena tapologo gomme ra thabela tlhokomelo e lerato ya Tatago rena ka mo go sa felego.—Mat. 11:29; Kut. 7:16, 17.

[Box/​Pictures on page 22]

 Boikarabelo bjo re bo Neilwego ke Modimo

• Rapela ka mehla.—Baroma 12:12.

• Bala le go ithuta Beibele gomme o diriše seo o ithutago sona.—Ps. 1:2; 1 Tim. 4:15.

• Rapela Jehofa phuthegong.—Ps. 35:18; Baheb. 10:24, 25.

• Hlokomela lapa la gago ka dinyakwa tša nama, tša moya le tša maikwelo. —1 Tim. 5:8.

• Bolela ditaba tše dibotse tša Mmušo gomme o dire barutiwa.—Mat. 24:14; 28:19, 20.

• Hlokomela dinyakwa tša gago tša nama, tša moya le tša maikwelo, e lego seo se akaretšago gore o rulaganye go ba le boithabišo bjo bo agago.—Mar. 6:31; 2 Bakor. 7:1; 1 Tim. 4:8, 16.

• Hlokomela boikarabelo bja gago ka phuthegong.—Dit. 20:28; 1 Tim. 3:1.

• Hlokomela ponagalo ya legae la gago le la Holo ya Mmušo.—1 Bakor. 10:32.

[Lepokisi/​Diswantšho go letlakala 23]

 Bontšha Gore o a ba Naganela

• Ngwanabo rena goba kgaetšedi yo a tšofetšego.—Lef. 19:32.

• Yo a babjago mmeleng goba maikwelong.—Die. 14:21.

• Setho sa phuthego seo se hlokago thušo ya kapejana ya selo sengwe seo o nago le sona.—Baroma 12:13.

• Setho sa kgaufsi sa lapa.—1 Tim. 5:4, 8.

• Modumedi-gotee yo a hwetšwego ke molekane.—1 Tim. 5:9.

• Mogolo yo a šomago ka thata phuthegong ya geno.—1 Bathes. 5:12, 13; 1 Tim. 5:17.