Go ba ba Jehofa​—Botho bjo bo sa re Swanelago

“Re ba Jehofa.”—BAROMA 14:8.

1, 2. (a) Re na le tokelo efe? (b) Ke dipotšišo dife tšeo re tlago go di ahla-ahla?

SETŠHABA sa Isiraele se ile sa newa tokelo e bohlokwa gakaakang ge Jehofa a be a re go sona: “Le tl’o . . . ba baruiwa ba-ka mo dithšabeng ka moka.” (Ek. 19:5) Lehono, ditho tša phuthego ya Bokriste le tšona di na le tokelo ya go ba batho ba Jehofa. (1 Pet. 2:9; Kut. 7:9, 14, 15) Ke tokelo e tla re holago ka mo go sa felego.

² Go ba ba Jehofa ga se tokelo feela, eupša ke boikarabelo. Ba bangwe ba ka ipotšiša gore: ‘Na ke tla kgona go dira seo Jehofa a se letetšego go nna? Ge e ba nka wela sebeng, na o tla ntahla? Na go ba wa Jehofa go tla nkamoga tokologo?’ Go bohlokwa go naganišiša ka dipotšišo tše bjalo. Eupša sa pele, go na le potšišo ya bohlokwa yeo re swanetšego go e hlahloba e rego: Ke mehola efe e tlišwago ke go ba ba Jehofa?

Go ba ba Jehofa go Tliša Lethabo

3. Rahaba o ile a holwa bjang ke phetho yeo a e dirilego ya go hlankela Jehofa?

³ Na batho bao e lego ba Jehofa ba holwa ke boemo bja bona? Ela hloko mohlala wa Rahaba, mogweba-ka-mmele yo a bego a dula Jeriko ya bogologolo. Ga go pelaelo gore o godišeditšwe borapeding bja medimo e gobogilego ya Kanana. Lega go le bjalo, ge a be a e-kwa ka phenyo yeo Modimo a e neilego Baisiraele, o ile a lemoga gore Jehofa ke Modimo wa therešo. Ka gona, o ile a bea bophelo bja gagwe kotsing e le gore a šireletše batho ba kgethilwego  ke Modimo gomme a bea bokamoso bja gagwe diatleng tša bona. Beibele e re: “Na Rahaba mogweba-ka-mmele le yena ga a ka a bolelwa a lokile ka mediro, ka morago ga ge a ile a amogela baromiwa ka kamogelo e borutho ya baeng gomme a ba tšhabiša ka tsela e nngwe?” (Jak. 2:25) Nagana ka mehola yeo a ilego a e thabela ge a be a e-ba karolo ya batho ba hlwekilego ba Modimo, bao ba rutilwego tsela ya lerato le ya toka ka melao ya Modimo. O swanetše go ba a ile a thaba gakaakang ge a be a tlogela tsela ya gagwe ya pele ya bophelo! O ile a nyalwa ke Moisiraele gomme a godiša morwa wa bona, Boase, gore e be monna yo a kgahlišago wa Modimo.—Još. 6:25; Ruthe 2:4-12; Mat. 1:5, 6.

4. Ruthe o ile a holwa bjang ke phetho ya gagwe ya go hlankela Jehofa?

⁴ Ruthe wa Moaba le yena o ile a kgetha go hlankela Jehofa. Ge e be e sa le yo monyenyane, mohlomongwe o be a rapela Kamosi le medimo e mengwe ya Moaba, eupša o ile a tseba Modimo wa therešo Jehofa gomme a nyalwa ke Moisiraele yo a bego a diiletše nageng ya Moaba. (Bala Ruthe 1:1-6.) Ka morago, ge Ruthe le ngwetši-gotee le yena e lego Oropa ba e-na le mmatswale’a bona Naomi tseleng ya go ya Betlelehema, Naomi o ile a ba kgopela gore ba boele gabo bona. Go be go ka se be bonolo gore ba dule nageng ya Isiraele. Oropa ka kgonthe o ile a “boêla sethšabeng sa xabo,” eupša Ruthe ga se a ka a boela. O ile a dira ka go dumelelana le tumelo ya gagwe ka ge a be a tseba gore o nyaka go ba wa mang. O boditše Naomi gore: “A k’O se nkôtêlêlê wa re ke Xo tloxêlê ke xomê kè se na naxô’; ka xobane mo O yaxo, le nna ke ya xôna; mo O dulaxo, le nna ke tlo dula xôna; sethšaba sa xeno ke tlo re ké sa xešo; Modimo wa xaxo e tlo ba Modimo wa-ka.” (Ruthe 1:15, 16) Ka baka la go kgetha go hlankela Jehofa, Ruthe o ile a holwa ke melao ya Modimo yeo e bego e hlokomela bahlologadi, badiidi le bao ba se nago madulo. Ge a be a hlokometšwe ke Jehofa o ile a hwetša lethabo, tšhireletšego le polokego.

5. Ke’ng seo o se lemogilego ka batho bao ba hlankelago Jehofa ka potego?

⁵ O ka ba o tseba ba bangwe ba batho bao ba ineetšego go Jehofa bao ba bego ba dutše ba mo hlankela ka nywaga e mentši. Ba botšiše kamoo ba hotšwego ke go mo hlankela. Le ge go se na yoo a se nago mathata, bjo ke bohlatse bjo bo kwagalago bja mantšu a mopsalme a rego: “Go šego setšhaba seo Jehofa e lego Modimo wa sona.”—Ps. 144:15, PK.

Ditebelelo tša Jehofa Tšeo di Leka-lekanego

6. Ke ka baka la’ng re sa swanela go boifa gore re ka se kgone go dira seo Jehofa a se letetšego go rena?

⁶ O ka ba o ile wa ipotšiša ge e ba o ka kgona go dira seo Jehofa a se letetšego go wena. Go bonolo gore o ikwe o gateletšwa ke go ba mohlanka wa Modimo, go phela ka melao ya gagwe le go bolela ka leina la gagwe. Ka mohlala, Moše o ile a ikwa a sa swanelege ge a be a rongwa go bolela le Baisiraele le kgoši ya Egipita.  Eupša Modimo o be a e-na le teka-tekano mabapi le seo a se letetšego go Moše. Jehofa o ile ‘a mo ruta seo a bego a swanetše go se dira.’ (Bala Ekisodo 3:11; 4:1, 10, 13-15.) Ka ge Moše a ile a amogela thušo yeo a e neilwego, o ile a thabela go phethagatša thato ya Modimo. Ka tsela e swanago, Jehofa o bontšha teka-tekano go seo a se letetšego go rena. O kwešiša boemo bja rena bja go se phethagale, gomme o nyaka go re thuša. (Ps. 103:14) Go hlankela Modimo re le balatedi ba Jesu go a lapološa go e na le gore go lapiše gobane tsela e bjalo ya bophelo e hola ba bangwe le go thabiša pelo ya Jehofa. Jesu o itše: “Tlang go nna, . . . ke tla le lapološa. Rwalang joko ya-ka le ithute go nna, gobane ke wa moya o boleta e bile ke wa pelo e ikokobeditšego.”—Mat. 11:28, 29.

7. Ke ka baka la’ng o ka kgodišega gore Jehofa o tla go thuša go dira seo a se letetšego go wena?

⁷ Jehofa ka mehla o tla re nea kgothatšo yeo re e nyakago, ge feela re ithekga ka yena gore a re nee matla. Ka mohlala, go molaleng gore ka tlhago Jeremia e be e se motho yo a nago le bokgoni bja go bolela. Lega go le bjalo, ge Jehofa a be a mo nea kabelo ya go ba moporofeta wa Gagwe, Jeremia o ile a re: “Joo Morêna Mong’a-ka! Hleng xa ke tsebe xo bolêla ka xe kè sa le ngwana!” Ka morago o ile a ba a re: “Ke [tla lesa] xo bola leina la xaxwe.” (Jer. 1:6; 20:9) Ka gona, ka thekgo ya Jehofa, Jeremia o ile a kgona go tsebatša molaetša o sa tlwaelegago ka nywaga e 40. Jehofa o ile a mo kgonthišetša leboelela ka mantšu a: “Nna ke tlo ba le wêna, ka Xo hlakodiša!”—Jer. 1:8, 19; 15:20.

8. Re bontšha bjang gore re bota Jehofa?

⁸ Bjalo ka ge Jehofa a ile a matlafatša Moše le Jeremia, a ka re thuša go dira seo a letetšego gore Bakriste ba se dire lehono. Selo sa bohlokwa ke gore re ithekge ka yena. Beibele e re: “Bôʹta Modimo ka pelo ka moka; O se ké wa ithêkxa ka xo fo re: Ke n’e thlaloxanyô. Ditseleng tša xaxo tšohle tseba Yêna; ké mo Yêna a tl’o xo Xo thulêla tsela.” (Die. 3:5, 6) Re ipontšha re ithekgile ka Jehofa ge re amogela thušo yeo a re neago yona ka Lentšu la gagwe le ka phuthego. Ge e ba re dumelela Jehofa go hlahla dikgato tša rena bophelong, ga go seo se ka re thibelago go mmotegela.

Jehofa o Hlokomela Mohlanka yo Mongwe le yo Mongwe wa Gagwe

9, 10. Psalme ya bo-91 e re holofetša tšhireletšo ya mohuta mang?

⁹ Ge ba dutše ba nagana ka kgetho ya bona ya go ineela go Jehofa, ba bangwe ba ile ba nagana ka kotsi ya go dira sebe, go se swanelege le go lahlwa ke Jehofa. Ka mo go thabišago, Jehofa o re nea thekgo ka moka yeo re e nyakago bakeng sa go šireletša tswalano e botse yeo re nago le yona le yena. A re boneng kamoo seo se hlalositšwego ka gona go Psalme ya bo-91.

¹⁰ Psalme yeo e thoma ka mantšu a rego: “Mang le mang yo a dulago lefelong le le utegilego la Yo Godimo-dimo O tla ikhweletša bodulo tlase ga moriti wa Ra-matla-ohle. Ke tla botša Jehofa ka re: ‘O setšhabelo sa-ka le sebo sa-ka, O Modimo wa-ka yo ke tlago go mmota.’ Gobane yena o tla go hlakodiša moreong wa motanyi wa dinonyana, A go hlakodiša leubeng la bolwetši leo le bakago mathata.” (Ps. 91:1-3, NW) Hlokomela gore Modimo o holofetša go šireletša bao ba mo ratago le go mmota. (Bala Psalme 91:9, 14.) Ke tšhireletšo ya mohuta mang yeo a bolelago ka yona? Ee, Jehofa o ile a šireletša ba bangwe ba bahlanka ba gagwe ba botegago nameng—maemong a mangwe e le go šireletša leloko leo le išago go Mesia yo a holofeditšwego. Lega go le bjalo, ba bangwe ba banna ba botegago ba ile ba golegwa, ba tlaišwa le go bolawa ga sehlogo e le go ba dira gore ba se sa botegela Modimo. (Baheb. 11:34-39) Ba ile ba kgona go ba le sebete se se nyakegago gore ba kgotlelele ka gobane Jehofa o ile a ba šireletša kotsing ya go roba potego ya bona. Ka gona, Psalme ya bo-91 e ka kwešišwa e le kholofetšo ya gore re tla šireletšwa moyeng.

11. ‘Lefelo le le utegilego la Yo Godimo-dimo’ ke’ng, gona Modimo o šireletša bomang go lona?

¹¹ ‘Lefelo le le utegilego la Yo Godimo-dimo,’ leo mopsalme a bolelago ka lona, ke lefelo la seswantšhetšo la tšhireletšo ya moya.  Lefelong leo, bao ba dulago le Modimo e le baeng ba gagwe ba šireletšegile go selo le ge e le sefe goba motho le ge e le ofe yoo a nyakago go senya tumelo le lerato la bona go Modimo. (Ps. 15:1, 2; 121:5) Ke lefelo le le utegilego ka gobane bao ba sa dumelego ga ba le bone. Ke moo Jehofa a šireletšago batho bao ge e le gabotse ba rego: ‘O Modimo wa-ka yo ke mmotago.’ Ge e ba re dula lefelong le la tšhireletšego, ga se ra swanela go tshwenyega ka tsela e sa nyakegego ka go nagana gore Modimo a ka se re amogele gomme ra wela maanong a Sathane, e lego “motanyi wa dinonyana.”

12. Ke dikotsi dife tšeo di ka senyago tswalano ya rena le Modimo?

¹² Ke dikotsi dife tšeo di ka senyago tswalano ya rena e botse le Modimo? Mopsalme o bolela ka tše mmalwa tša tšona gomme gare ga tšona ke “lehu le lebe le le khukhunaxo lefsifsing, . . . le thsenyêxô e bolayaxo mosexare.” (Ps. 91:5, 6) “Motanyi wa dinonyana” o tantše ba bantši ka kganyogo ya boithati ya go nyaka go ipuša. (2 Bakor. 11:3) O tanya ba bangwe ka go kgothaletša megabaru, boikgogomošo le go rata dilo tše di bonagalago. Go sa dutše go le bjalo, ba bangwe o ba fora ka difilosofi tše bjalo ka moya wa borata-naga, thuto ya tlhagelelo le bodumedi bja maaka. (Bakol. 2:8) Le gona, ba bantši ba gokeditšwe ka molaba wa dikopano tše di gobogilego tša botona le botshadi. Dikotsi tše bjalo tšeo di gobatšago moyeng di dirile gore ba dimilione ba lahlegelwe ke lerato la bona go Modimo.—Bala Psalme 91:7-10; Mat. 24:12.

Go Šireletša go Rata ga Gago Modimo

13. Jehofa o re šireletša bjang dikotsing tšeo di ka senyago boemo bja rena bja moya?

¹³ Jehofa o šireletša batho ba gagwe bjang dikotsing tše tša moya? Mopsalme o re: “Ó Xo rometše Barongwa ba xaxwe, xore ba Xo dišê ditseleng tša xaxo tšohle.” (Ps. 91:11) Barongwa ba legodimong ba a re hlahla le go re šireletša gore re bolele ditaba tše dibotse. (Kut. 14:6) Go tlaleletša go barongwa bao, bagolo ba Bakriste ba re šireletša gore re se forwe ke dithuto tše bjalo tša maaka ka go swarelela ka go tia Mangwalong ge ba ruta. Ba ka thuša yo mongwe le yo mongwe yo a thatafalelwago ke go fenya boitshwaro bja lefase. (Tito 1:9; 1 Pet. 5:2) Le gona, “mohlanka yo a botegago le wa temogo” o re nea dijo tša moya go re šireletša thutong ya tlhagelelo, dikgoketšong tša dikganyogo tše di gobogilego, go phegeleleng mahumo le botumo gotee le dikganyogong le ditutuetšong tše dingwe tše dintši tše di gobatšago. (Mat. 24:45) O thušitšwe ke’ng go lwantšha tše dingwe tša dikotsi tšeo?

14. Re ka ikhola bjang ka tlhokomelo yeo Modimo a re neago yona?

¹⁴ Re ka dira’ng gore re dule “lefelong le le utegilego la Yo Godimo-dimo” la tšhireletšego? Go etša ge re swanetše go dula re itšhireletša dikotsing tše bjalo ka tša mebileng, tlhaselong ya dikebekwa goba malwetšing a fetelago, re swanetše gore ka mehla re itšhireletše dikotsing tša moya. Ka gona, re swanetše gore ka mehla re diriše tlhahlo yeo Jehofa a re neago  yona ka dikgatišong tša rena le dibokeng tša phuthego le dikopanong. Re tsoma keletšo ya bagolo. Le gona, na ga re holwe ke dika tše di fapa-fapanego tšeo di bontšhwago ke bana babo rena le dikgaetšedi ba Bakriste? Ka kgonthe, go gwerana le phuthego go re thuša go ba ba bohlale.—Die. 13:20; bala 1 Petro 4:10.

15. Ke ka baka la’ng o ka kgodišega gore Jehofa o tla go šireletša selong le ge e le sefe seo se ka dirago gore o se sa amogelega go yena?

¹⁵ Ga re na lebaka la go belaela gore Jehofa a ka re šireletša selong le ge e le sefe seo se ka dirago gore re se sa amogelega go yena. (Baroma 8:38, 39) O šireleditše phuthego madumeding a matla le manabeng a dipolitiki ao maikemišetšo a ona e bego e se go re bolaya, eupša e le go re aroganya le Modimo wa rena yo mokgethwa. Kholofetšo ya Jehofa e ile ya bonala e le ya therešo ge e re: “Marumô ka moka a rulêlwaxo xo lwa naxô’, a ka se kxône selô.”—Jes. 54:17.

Ke Mang yo a re Neago Tokologo?

16. Ke ka baka la’ng lefase le ka se re nee tokologo?

¹⁶ Na go ba ba Jehofa go tla re amoga tokologo? Ka mo go fapanego, go ba ba lefase go tla re amoga tokologo. Lefase le arogantšwe le Jehofa gomme le bušwa ke modimo yo sehlogo yo a dirago batho makgoba. (Joh. 14:30) Ka mohlala, tshepedišo ya dilo ya Sathane e diriša kgateletšo ya tša boiphedišo go amoga batho tokologo ya bona. (Bapiša le Kutollo 13:16, 17.) Sebe le sona se na le matla a forago bakeng sa go dira batho makgoba. (Joh. 8:34; Baheb. 3:13) Ka gona, gaešita le ge batho ba ba sa dumelego ba ka holofetša tokologo ge ba kgothaletša tsela ya bophelo yeo e lego kgahlanong le dithuto tša Jehofa, motho le ge e le ofe yo a ba theetšago kapejana o tla ikhwetša e le lekgoba la sebe le tsela e gobogilego ya bophelo.—Baroma 1:24-32.

17. Ke tokologo efe yeo Jehofa a re neago yona?

¹⁷ Ka lehlakoreng le lengwe, Jehofa o tla re lokolla selong le ge e le sefe seo se ka re gobatšago ge e ba re ineela go yena. Ka tsela e itšego, boemo bja rena bo swana le bja motho yo a beago bophelo bja gagwe ka diatleng tša ngaka e nago le bokgoni yeo e ka mo lokollago bolwetšing bjo bo bolayago. Ka moka ga rena re na le bolwetši bjo bo bolayago—sebe sa leabela. Ke feela ge re ineela go Jehofa motheong wa sehlabelo sa Kriste moo re ka holofelago go phologa ditla-moragong tša sebe gomme ra phela ka mo go sa felego. (Joh. 3:36) Go etša ge re ka bota ngaka kudu ge re e-kwa ka botumo bja yona, re tla bota Jehofa kudu ge re tšwela pele re ithuta ka yena. Ka gona, re tšwela pele re ithuta Lentšu la Modimo ka kelohloko ka gobane go dira bjalo go tla re thuša go mo rata ka tsela yeo e tla fedišago poifo le ge e le efe ya go ba ba gagwe.—1 Joh. 4:18.

18. Mafelelo a bao e lego ba Jehofa e tla ba afe?

¹⁸ Jehofa o nea batho ka moka tokologo ya boikgethelo. Lentšu la gagwe le re: “Ikxetheleng bophelô xore Le phelê, lena le bana ba lena, Lè le ba ba rataxo Morêna Modimo wa lena.” (Doit. 30:19, 20, mongwalo o sekamego ke wa rena.) O nyaka gore re bontšhe gore re a mo rata ka go kgetha go mo hlankela. Go e na le go re amoga tokologo, go ba ba Modimo yo re mo ratago ka kgonthe go tla dira gore re thabe le go re boloka re thabile.

19. Ke ka baka la’ng go ba ba Jehofa e le botho bjo bo sa re swanelago?

¹⁹ Bjalo ka badiradibe, ga re swanelege go ba ba Modimo yo a phethagetšego. Ke feela botho bjo bo sa re swanelago bja Modimo bjo bo dirago gore seo se kgonege. (2 Tim. 1:9) Ka gona, Paulo o ngwadile gore: “Ge re phela, re phelela Jehofa, le ge re e-hwa, re hwela Jehofa.” (Baroma 14:8) Ka kgonthe re ka se itsholele go kgetha go ba ba Jehofa.

O be o tla Araba Bjang?

• Ke mehola efe e tlišwago ke go ba ba Jehofa?

• Ke ka baka la’ng re kgona go dira seo Jehofa a se letetšego go rena?

• Jehofa o šireletša bahlanka ba gagwe bjang?

[Dipotšišo tša Thuto]

[Diswantšho go letlakala 8]

Botšiša ba bangwe kamoo ba hotšwego ke go ba ba Jehofa

[Diswantšho go letlakala 10]

Ke ditsela dife tše dingwe tšeo ka tšona Jehofa a re šireletšago?