Ruri Tsela ya Sathane ya go Buša e ka se Atlege
Ruri Tsela ya Sathane ya go Buša e ka se Atlege
“Yo mobe a ka se tlêlwe ke tše botse.”—MMO. 8:13.
1. Ke ka baka la’ng kahlolo e tlago ya ba babe e le ditaba tše di kgothatšago?
KGAUFSINYANE ba babe ba tla ahlolwa. Ba tla swanelwa ke go ikarabela bakeng sa dilo ka moka tšeo ba di dirilego. (Die. 5:22; Mmo. 8:12, 13) Tšeo ke ditaba tše di kgothatšago, kudu-kudu go bao ba ratago toka gomme ba ile ba kgotlelela go hloka toka le go se swarwe gabotse ke ba babe. Yo mongwe wa ba babe bao ba tlago go ahlolwa, ke tatago bobe ka moka, Sathane Diabolo.—Joh. 8:44.
2. Ke ka baka la’ng go be go nyakega nako gore go rarollwe kgang yeo e tsošitšwego tšhemong ya Edene?
2 Morago kua Edene, Sathane a tutuetšwa ke moya wa boithati, o ile a dira gore batho ba furalele tsela ya Jehofa ya go buša. Ka baka leo, batswadi ba rena ba pele ba ile ba tlatša Sathane go hlohleng pušo ya Jehofa ya go loka gomme ba fetoga badiradibe mahlong a Gagwe. (Baroma 5:12-14) Ke therešo gore Jehofa o be a tseba kamoo tsela ya bona ya go se bontšhe tlhompho le ya borabele e bego e tla felela ka gona. Lega go le bjalo, dibopiwa ka moka tše bohlale di be di swanetše go bona ditla-morago tše tšeo di sa phemegego. Ka gona, go be go nyakega nako gore kgang ye e rarollwe le go bontšha ka tsela e kgodišago gore borabele bja bona e be e le bjo bo fošagetšego e le ruri.
3. Re lebelela mebušo ya batho bjang?
3 Ka ge batho ba ile ba gana pušo ya Jehofa, ba ile ba swanela ke go itirela mebušo ya bona. Ge moapostola Paulo a be a ngwalela badumedi-gotee le yena ba kua Roma, o ile a bolela ka mebušo e bjalo ya batho e le “balaodi ba bagolo.” Mehleng ya Paulo, balaodi ba bagolo e be e le mmušo wa Roma ka tlase ga Mmušiši wa Roma e lego Nero, yo a bušitšego ka 54-68 C.E. Paulo o boletše gore balaodi ba bjalo ba bagolo “ba beilwe ke Modimo maemong a bona a lekanyeditšwego.” (Bala Baroma 13:1, 2.) Na se se bolela gore Paulo o be a emela mebušo ya batho e le e phagametšego tsela ya Modimo ya go buša? Ga go bjalo le gatee. Go e na le moo, o be a bolela gore ge feela Jehofa a sa dumeletše pušo ya batho gore e be gona, Bakriste ba swanetše go hlompha “thulaganyo ya Modimo” gomme ba amogele babuši ba bjalo.
Tsela e Lebišago Kotsing
4. Hlalosa lebaka leo ka lona mebušo ya batho e ka se atlegego.
4 Lega go le bjalo, mebušo ya batho yeo e tutuetšwago ke Sathane e ka se atlege e le ruri. Ka baka la’ng? Lebaka ke gore ga se ya thewa bohlaleng bjo bo tšwago go Modimo. Ke Jehofa feela yo a nago le bohlale bjo bo phethagetšego. Ka gona, ke yena feela yo re ka mmotago gore a re bontšhe mohuta wa pušo e atlegilego. (Jer. 8:9; Baroma 16:27) Ka go se swane le batho bao gantši ba ithutago diphošong tša bona, ka mehla Jehofa o tseba tsela e kaone ya go dira dilo. Pušo le ge e le efe yeo e sa latelego tlhahlo ya gagwe e ka se atlege. Ka lona lebaka leo—re sa bolele ka maikemišetšo a mabe ao a akaretšwago—tsela ya Sathane ya go buša ka mebušo ya batho e be e ka se atlege le go tloga mathomong.
5, 6. Ke’ng seo se dirilego gore Sathane a be kgahlanong le Jehofa?
5 Motho yo a nago le tlhaologanyo ga a leke go dira selo seo go bonagalago gore se ka se atlege. Ge e ba a phegelela go dira selo seo, o tla gapeletšega go lebeletšana le diphošo tša gagwe. Histori e hlatsetše ka makga a mantši gore ga se gabohlale go ba kgahlanong le Mmopi Ra-matla-ohle. (Bala Diema 21:30.) Lega go le bjalo, Sathane o ile a hlanogela Jehofa, a foufaditšwe ke moya wa boithati le boikgogomošo. Ka gona, Diabolo ka boomo o ile a kgetha tsela yeo mafelelong e bego e tla lebiša kotsing.
6 Ka morago moya wa Sathane wa boikgodišo o ile wa bontšhwa ke mmuši wa Babilona yo go begilwego ka yena a ikgantšha a re: “Ke tlo rotoxêla kwa lexodimong, ke y’o phaxamiša ’dulô sa-ka sa boxoši kwa xodimo xa dinaledi tša Modimo, wa re ke y’o dula Thaba ’a molaka, morumô wa Leboa. O be O re: Ke y’o dula kua xo ithlophilexo maru, ke y’o etša Yo-xodimo-dimo.” (Jes. 14:13-15) Maano a mmuši yoo a se nago tlhaologanyo a ile a folotša, gomme pušo ya Babilona e ile ya phuhlama ka mo go nyamišago. Ka tsela e swanago, kgaufsinyane Sathane le lefase la gagwe ba tla fenywa ka mo go feletšego.
Ke ka Baka La’ng e Dumeletšwe?
7, 8. Ke mehola efe e tlišitšwego ke go dumelela ga Jehofa bokgopo gore bo be gona ka nakwana?
7 Ba bangwe ba ka ipotšiša gore ke ka baka la eng Jehofa a se a ka a thibela batho gore ba se tšee lehlakore la Sathane le go latela tsela e fapanego ya go buša yeo e bego e ka se atlege. Bjalo ka Modimo Ra-matla-ohle, ruri o be a ka kgona go dira bjalo. (Ek. 6:3) Go e na le moo, ga se a ka a dira bjalo. Bohlale bja gagwe bo ile bja mmontšha gore go se tsene gare ditaba tša borabele bja batho ka nakwana go be go tla ba le mafelelo a mabotse. Mafelelong, Jehofa o be a tla godišwa e le Mmuši yo a lokilego le yo lerato, gomme batho bao ba botegago ba be ba tla holwa ke phetho yeo ya Modimo.
8 Ruri moloko wa batho o ka ba o ile wa šireletšwa manyaming ge nkabe batho ba ile ba ganetša maiteko a Sathane gomme ba gana go nyaka go ipuša go e na le go bušwa ke Modimo! Lega go le bjalo, phetho ya Jehofa ya go dumelela batho gore ba ipuše ka nakwana e bile le mehola. E bontšhitše batho ba dipelo tše di lokilego bohlale bja go theetša Modimo le go mmota. Go theoša le nywaga-kgolo, batho ba ile ba leka mebušo yeo e fapa-fapanego, eupša ga go le o tee wa yona wo o ilego wa ipontšha e le o lokilego. Seo se ile sa tiiša kgodišego ya barapedi ba Modimo ya gore tsela ya Jehofa ya go buša ke e kaone-kaone. Lega go le bjalo, go dumelela ga Jehofa pušo e kgopo ya Sathane go feleleditše ka mathata molokong wa batho, go akaretša le bao ba mo rapelago ka potego. Eupša go dumelelwa ka nakwana ga bokgopo go bile go hotše barapedi ba ba botegago.
Borabele bjo bo Ilego bja Godiša Jehofa
9, 10. Hlalosa kamoo pušo ya Sathane e ilego ya feleletša ka go godiša Jehofa.
9 Go dumelela batho gore ba tutuetšwe ke Sathane le gore ba ipuše ga se gwa hlompholla tsela ya Jehofa ya go buša. Go dirile se se fapanego e le ruri! Histori e hlatsela gore mantšu ao Jeremia a ilego a budulelwa go a bolela a gore batho ba ka se kgone go ipuša ke a therešo. (Bala Jeremia 10:23.) Go tlaleletša moo, borabele bja Sathane bo neile Jehofa sebaka sa go bonagatša dika tša Gagwe tše dibotse ka tsela e lego molaleng kudu. Ka ditsela dife?
10 Ka ge re bona mafelelo a mabe a pušo ya Sathane, dika tša Jehofa di bonagala kudu go feta ka tsela yeo di bego di ka bonagala ka yona. Ka tsela ye, o ile a godišwa pele ga bao ba mo ratago. Ee, go sa šetše gore se se ka ba se sa kwagale, tsela ya Sathane ya go buša ge e le gabotse e godišitše Modimo. E bontšhitše tsela e phalago tšohle yeo ka yona Jehofa a ilego a lebeletšana le go hlohlwa ga bogoši bja gagwe. Gore re kwešiše therešo yeo, anke ka boripana re ahla-ahle tše dingwe tša dika tša Jehofa le go bona kamoo pušo e kgopo ya Sathane e ilego ya tutuetša Jehofa go bonagatša dika tše ka ditsela tše oketšegilego.
11. Lerato la Jehofa le bonagaditšwe bjang?
11 Lerato. Mangwalo a re botša gore “Modimo ke lerato.” (1 Joh. 4:8) Go tloga mathomong, go bopša ga batho e be e le pontšho ya lerato la Modimo. Go oketša moo, tsela e makatšago le ya matete-tete yeo re bopilwego ka yona e hlatsela lerato la Modimo. Jehofa gape ka lerato o ile a nea batho legae le lebotse leo le nago le selo se sengwe le se sengwe seo se nyakegago gore ba thabe. (Gen. 1:29-31; 2:8, 9; Ps. 139:14-16) Eupša ka morago ga ge bokgopo bo aparetše moloko wa batho, Jehofa o ile a bontšha lerato la gagwe ka ditsela tše difsa. Bjang? Moapostola Johane o tsopola Jesu a re: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.” (Joh. 3:16) Na go na le tsela nngwe e kaone yeo Modimo a bego a ka bontšha lerato ka yona molokong wa batho go feta go romela Morwa wa gagwe yo a tswetšego a nnoši go tla go lopolla badiradibe? (Joh. 15:13) Tsela ye e kaone-kaone ya go bontšha lerato gape e šomile e le mohlala go batho, e ba nea sebaka sa go bontšha lerato le le swanago le la Modimo la boikgafo bophelong bja bona bja letšatši le letšatši, go etša ge Jesu a dirile.—Joh. 17:25, 26.
12. Matla a Jehofa a bonagatšwa ka tsela efe?
12 Matla. Ke feela “Modimo, Ra-matla-ohle,” yo a nago le matla a go tšweletša bophelo. (Kut. 11:17; Ps. 36:9) Nakong ya ge motho a belegwa, o thoma eka ke letlakala la puku leo le sa ngwalwago selo. Ge a e-hwa, o tladitše letlakala leo ka diphetho, ditiro le diphihlelo tša bophelo tšeo di dirilego gore e be yo a fapanego le batho ba bangwe gaešita le go mo nea semelo. Tsebišo yeo e ka bolokwa ka mogopolong wa Jehofa. Ka nako e swanetšego, Jehofa a ka dira gore motho yoo a phele gape, a e-na le tsela ya gagwe ya moswana-noši ya bophelo. (Joh. 5:28, 29) Ka gona, le ge e be e se morero wa Modimo gore batho ba hwe, lehu le neile Jehofa sebaka sa go bontšha gore o na le matla a go tsoša bahu. Ka kgonthe Jehofa ke “Modimo, Ra-matla-ohle.”
13. Ke bjang sehlabelo sa Jesu se ilego sa bontšha toka e phethagetšego ya Jehofa?
13 Toka. Jehofa ga a aketše goba go dira dilo ka go hloka toka. (Doit. 32:4; Tito 1:2) O dula a kgomaretše ditekanyetšo tše di phagamego kudu tša therešo le toka, le ge go dira bjalo go ka mo kweša bohloko. (Baroma 8:32) Go swanetše go ba go ile gwa kweša Jehofa bohloko gakaakang go bona Morwa wa gagwe yo a ratwago a e-hwa koteng ya tlhokofatšo bjalo ka ge eka Jesu ke morogaki yo a sa botegego! Lega go le bjalo, ka lebaka la go rata batho ba sa phethagalago, Jehofa o be a ikemišeditše go dumelela tiragalo ye e kwešago bohloko gore e direge e le gore a boloke ditekanyetšo tša gagwe tše di phethagetšego tša toka. (Bala Baroma 5:18-21.) Lefase le le tletšego ka go hloka toka le neile Jehofa sebaka sa go ipontšha e le mohlala o phagamego wa toka.
14, 15. Ke ditsela dife tše dingwe tšeo ka tšona bohlale le go se fele pelo ga Jehofa mo go phagamego go ilego gwa bonagatšwa?
14 Bohlale. Gatee-tee ka morago ga ge Adama le Efa ba dirile sebe, Jehofa o ile a utolla kamoo a tlago go fediša ditla-morago tše mpe tšeo di bakilwego ke borabele bja bona. (Gen. 3:15) Go tšea kgato e bjalo kapejana le go tšweletša ga gagwe ganyenyane-ganyenyane ditaba tša mabapi le morero wo go bahlanka ba gagwe, go ile gwa dira gore bohlale bja Jehofa bo bonagale gabotse. (Baroma 11:33) Ga go na selo seo se ka thibelago bokgoni bja Modimo bja go swaragana le dilo ka katlego. Lefaseng le leo le tletšego boitshwaro bjo bo gobogilego, dintwa, go hloka tlhaologanyo, go se kwe, go hloka kgaugelo, go beba sefahlego le boikaketši, Jehofa o bile le dibaka tše dintši tša go bontšha dibopiwa tša gagwe seo bohlale bja kgonthe e lego sona. Morutiwa Jakobo o itše: “Bohlale bjo bo tšwago godimo, sa pele-pele bo sekile, gape bo na le khutšo, bo leka-lekane, bo ikemišeditše go kwa, bo tletše kgaugelo le dienywa tše botse, ga bo kgetholle ka go beba sefahlego, ga bo na boikaketši.”—Jak. 3:17.
15 Go Kgotlelela le go se Fele Pelo. Dika tša Jehofa e lego go kgotlelela le go se fele pelo di ka ba di ile tša se bonagale gabotse ge nkabe go sa ka gwa nyakega gore a dirišane le batho ba sa phethagalago, dibe tša bona le mafokodi a bona. Go ikemišetša ga Jehofa go dira bjalo ka nywaga e dikete go ile gwa bontšha gore o na le dika tše tše di kgahlišago ka tekanyo e phethagetšego, gomme re swanetše go leboga seo kudu. Moapostola Petro o boletše ka mo go swanetšego gore re swanetše go “[tšea] go se fele pelo ga Morena wa rena e le phološo.”—2 Pet. 3:9, 15.
16. Ke ka baka la’ng go ikemišetša ga Jehofa go lebalela e le lebaka la gore re thabe?
16 Go Ikemišetša go Lebalela. Ka moka ga rena re badiradibe e bile re kgopša gantši. (Jak. 3:2; 1 Joh. 1:8, 9) Ruri re swanetše go leboga ka ge Jehofa a ikemišeditše go re lebalela ka “tebalêlô e nntši”! (Jes. 55:7) Le gona, ela hloko therešo ye: Ka ge re belegwe re le badiradibe ba sa phethagalago, re boemong bja go hwetša lethabo le legolo leo re bago le lona ge Modimo a re lebalela dibe tša rena. (Ps. 51:5, 9, 17) Go bona seka se bjalo sa Jehofa seo se kgomago pelo go matlafatša lerato la rena go yena le go re kgothaletša go latela mohlala wa gagwe ditirišanong tša rena le ba bangwe.—Bala Bakolose 3:13.
Lebaka Leo ka Lona Lefase le Babjago
17, 18. Tsela ya Sathane ya go buša e paletšwe ka ditsela dife?
17 Tshepedišo ka moka ya Sathane—e lego mediro ya tsela ya gagwe ya go buša—e paletšwe leboelela go theoša le nywaga-kgolo. Ka 1991, kuranta ya The European e boletše gore: “Na lefase le a babja? Ee, le babja e le ka kgonthe, eupša . . . e sego ka lebaka la Modimo—go babja ga lefase go bakilwe ke batho ba lona.” Ruri seo ke therešo! Ka baka la tutuetšo ya Sathane, batswadi ba rena ba pele ba ile ba kgetha pušo ya batho go e na le ya Jehofa. Ka go rialo, ba ile ba thoma tsela ya go buša yeo e bego e ka se atlege. Bohloko le manyami ao batho ba a kwago lefaseng ka bophara ke maswao a gore pušo ya batho e swere ke bolwetši bjo šoro.
18 Tsela ya Sathane ya go buša e tšweletša moya wa boithati. Lega go le bjalo, boithati bo ka se fenye lerato, e lego seka seo tsela ya Jehofa ya go buša e theilwego go sona. Tsela ya Sathane ya go buša e paletšwe ke go tlišetša batho khutšo, lethabo goba polokego. Tsela ya Jehofa ya go buša e a godišwa. Na re na le bohlatse bja mehleng yeno bja seo? Ee, go etša ge re tla bona sehlogong se se latelago.
Re Ithutile’ng ka Bolaodi ge re be re Bala . . .
• Diema 21:30?
[Dipotšišo tša Thuto]
[Diswantšho go letlakala 25]
Pušo ya Sathane ga se ya ka ya hola moloko wa batho le ka mohla
[Methopo]
U.S. Army photo
WHO photo by P. Almasy
[Diswantšho go letlakala 26]
Jehofa o na le matla a go tsoša bahu
[Diswantšho go letlakala 27]
Lerato le toka ya Jehofa di bonagetše sehlabelong sa Morwa wa gagwe