“Bolela Lentšu la Modimo ka Sebete”

“Ba tlala moya o mokgethwa ba bolela lentšu la Modimo ka sebete.”—DIT. 4:31.

1, 2. Ke ka baka la’ng re swanetše go katanela gore re atlege bodireding bja rena?

MATŠATŠI a mararo pele ga lehu la gagwe, Jesu o boditše barutiwa ba gagwe gore: “Ditaba tše tše dibotse tša mmušo di tla bolelwa lefaseng ka moka le go agilwego go lona gore e be bohlatse go ditšhaba tšohle; ke moka bofelo bo tla tla.” Pele a rotogela legodimong, Jesu yo a tsošitšwego o ile a laela barutiwa ba gagwe go ‘dira batho ba ditšhaba ka moka barutiwa le go ba ruta go boloka dilo ka moka tšeo a ba laetšego tšona.’ O ile a ba holofetša gore o tla ba le bona “matšatši ka moka go fihla bofelong bja tshepedišo ya dilo.”—Mateo 24:14; 26:1, 2; 28:19, 20.

² Bjalo ka Dihlatse tša Jehofa, re tšea karolo ka botlalo modirong wo o thomilwego lekgolong la pele la nywaga. Ga go na modiro o mongwe wo o lego bohlokwa go swana le modiro wo o phološago maphelo wa go bolela ka Mmušo le go dira barutiwa. Ka gona, ruri ke gabohlokwa gore re atlege bodireding bja rena! Sehlogong se, re tla bona kamoo go hlahlwa ke moya o mokgethwa go re thušago ka gona go bolela ka sebete ge re le bodireding. Dihlogo tše pedi tše di latelago di tla bontšha kamoo moya wa Jehofa o ka re hlahlago ka gona gore re rute ka bokgwari le go bolela re sa kgaotše.

Re Swanetše go ba le Sebete

3. Ke ka baka la’ng go tšea karolo modirong wa go bolela ka Mmušo go nyaka sebete?

³ Modiro wa rena woo re o neilwego ke Modimo wa go tsebatša Mmušo ke tokelo yeo e ka se bapišwego le selo. Lega go le bjalo, ga se gore ga o na ditlhohlo. Ge batho ba bangwe ba amogela ditaba tše dibotse tša Mmušo wa Modimo ka ntle le go dika-dika, ba bantši ba ipontšha ba swana le bao ba phetšego mehleng ya Noa. Jesu o itše ‘ba be ba sa ele hloko go fihla meetse-fula  a e-tla a ba gogola ka moka.’ (Mat. 24:38, 39) Le gona, go na le bao ba re kwerago goba ba re ganetšago. (2 Pet. 3:3) Kganetšo e ka tšwa go bao ba lego matleng a taolo, bao re tsenago le bona sekolo goba bašomi-gotee le rena, goba gaešita le bao e lego ba leloko la kgaufsi. Go oketša moo, re swanetše go lebeletšana le mafokodi a rena, a bjalo ka go ba le dihlong le go boifa go ganetšwa. Go na le dilo tše dintši tšeo di ka dirago gore re thatafalelwe ke go diriša “tokologo ya go bolela” le go bolela lentšu la Modimo ka “sebete.” (Baef. 6:19, 20) Go phegelela modirong wa go bolela lentšu la Modimo go nyaka sebete. Ke’ng seo se ka re thušago gore re be le sona?

4. (a) Go ba le sebete ke’ng? (b) Moapostola Paulo o ile a rapa bjang sebete sa go bolela le Bathesalonika?

⁴ Lentšu la Segerika leo le fetoletšwego e le go ba le “sebete” le bolela “go bolela ka bolokologi, ka go se pepetletše le ka go lebanya.” Lentšu leo le fetiša kgopolo ya go ba le “sebete, go ba le kholofelo . . . le go se boife.” Go ba le sebete ga go bolele go bolela ka go se šetše goba go fo phatloga. (Bakol. 4:6) Le ge re e-na le sebete, re nyaka go ba le khutšo le batho bohle. (Baroma 12:18) Go oketša moo, ge re dutše re bolela ditaba tše dibotse tša Mmušo wa Modimo, re swanetše go leka-lekanya go ba le sebete le go ba šedi gore re se ke ra kgopiša ba bangwe e se ka maikemišetšo. Ka kgonthe, go ba le sebete go nyaka gore re be le dika tšeo go nyakegago maiteko gore re di hlagolele. Sebete sa mohuta wo ga se tšwe go rena goba maitekong a rena. Ka morago ga gore moapostola Paulo le badirišani-gotee le yena ba ‘tlontlollwe kua Filipi,’ ba ile ba kgona bjang go “rapa sebete” sa go bolela le Bathesalonika? Paulo o ngwadile gore ba ile ba kgona “ka Modimo wa rena.” (Bala 1 Bathesalonika 2:2.) Jehofa Modimo a ka tloša poifo ya rena gomme a re nea sebete se se swanago le seo.

5. Jehofa o ile a nea bjang Petro, Johane le baapostola ba bangwe sebete?

⁵ Ge ba be ba botšološišwa ke “babuši ba [batho] le banna ba bagolo le bamangwalo,” moapostola Petro le moapostola Johane ba ile ba re: “Ge e ba go lokile mahlong a Modimo go theetša lena go e-na le Modimo, ikahloleleng. Eupša ge e le rena, re ka se ke ra tlogela go bolela ka dilo tše re di bonego le tše re di kwelego.” Go e na le go rapela Modimo gore a thibele tlaišo, bona le badumedi-gotee le bona ba ile ba lopa ka gore: “Jehofa, lebiša tlhokomelo ditšhošetšong tša bona, gomme o dumelele bahlanka ba gago go tšwela pele ba bolela lentšu la gago ka sebete ka moka.” (Dit. 4:5, 19, 20, 29) Jehofa o ile a arabela bjang kgopelong ya bona? (Bala Ditiro 4:31.) Jehofa o ile a ba thuša go rapa sebete ka moya wa gagwe. Le rena moya wa Modimo o ka re direla se se swanago. Ka gona, ke bjang re ka hwetšago moya wa Modimo gomme wa re hlahla bodireding bja rena?

Hlagolela Sebete

6, 7. Ke tsela efe e lebanyago kudu ya go hwetša moya o mokgethwa wa Modimo? Nea mehlala.

⁶ Tsela e lebanyago ya go hwetša moya wa Modimo ke ka go o kgopela. Jesu o boditše batheetši ba gagwe gore: “Ge e ba lena gaešita le ge le le ba kgopo le tseba go nea bana ba lena dimpho tše dibotse, gona Tate yo a lego legodimong o tla nea gakaakang moya o mokgethwa go bao ba mo kgopelago!” (Luka 11:13) Ka kgonthe, re swanetše go rapelela moya o mokgethwa ka mehla. Ge e ba re boifišwa ke go dira dikarolo tše dingwe tša bodiredi—go nea bohlatse setarateng, go dira boboledi bjo bo sa rulaganyetšwago goba go dira boboledi mafelong a kgwebo—re ka rapela Jehofa gore a re nee moya wa gagwe le gore a re thuše go rapa sebete se se nyakegago.—1 Bathes. 5:17.

⁷ Se ke seo mosadi wa Mokriste yo a bitšwago Rosa a se dirilego. * Ka letšatši le lengwe ge Rosa a be a le mošomong, morutišigadi yo a šomago le yena o be a bala pego e tšwago sekolong se sengwe yeo e lego mabapi le tshwaro e mpe ya bana. Morutišigadi yoo o be a kgomilwe kudu ke seo a bego a se bala moo a ilego a lla ka gore: “Lefase le le tla feleletša kae?” Rosa ga se a ka a dumelela sebaka seo sa go nea bohlatse se mo feta. Ke’ng seo a ilego a se dira gore a hwetše sebete sa go thoma poledišano? Rosa o re: “Ke ile  ka rapela Jehofa gomme ka kgopela thušo ya moya wa gagwe.” O ile a kgona go nea bohlatse bjo bobotse gomme a thea motheo wa poledišano ya nakong e tlago. Ela hloko gape taba ya ngwanenyana wa nywaga e mehlano yo a bitšwago Milane, yo a dulago kua New York City. Milane o re: “Pele ke e-ya sekolong, nna le mma ka mehla re rapela Jehofa.” Ba rapelela’ng? Ba rapelela gore Milane a be le sebete sa go ikemela le go bolela ka Modimo wa gagwe! Mmagwe o re: “Se se ile sa thuša Milane gore a hlalose boemo bja gagwe ka matšatši a matswalo le a maikhutšo le go gana go tšea karolo ge go ketekwa matšatši ao.” Na mehlala ye ga e bontšhe gore thapelo e bohlokwa ge go tliwa tabeng ya go rapa sebete?

8. Re ka ithuta’ng go moporofeta Jeremia mabapi le go ba le sebete?

⁸ Nagana gape ka seo se thušitšego moporofeta Jeremia go ba le sebete. Ge Jehofa a be a mo kgetha go ba moporofeta wa ditšhaba, Jeremia o ile a fetola ka gore: “Hleng xa ke tsebe xo bolêla ka xe kè sa le ngwana!” (Jer. 1:4-6) Lega go le bjalo, ge nako e dutše e e-ya Jeremia o ile a phegelela ka matla modirong wa gagwe wa boboledi moo ba bantši ba ilego ba mo lebelela e le mmoledi wa bošula. (Jer. 38:4) Ka nywaga e fetago e 65, o ile a bolela ka dikahlolo tša Jehofa ka sebete. O ile a tsebja kudu Isiraeleng ka go bolela ga gagwe ka ntle le poifo le ka sebete moo nywageng e ka bago e 600 ka morago ge Jesu a be a bolela ka sebete, ba bangwe ba ilego ba dumela gore ke Jeremia yo a tsošitšwego. (Mat. 16:13, 14) Ke bjang moporofeta Jeremia yo a bego a dika-dika a ilego a fenya go ba ga gagwe le dihlong? O itše: “Mo pelong [lentšu la Modimo le] mphiša bo-ka mollô o tukaxo, ó ntsene mašapong. Ka ipolaiša kxôtlêlêlô ka palêlwa.” (Jer. 20:9) Ee, lentšu la Jehofa le bile le matla go Jeremia gomme la mo tutueletša go bolela.

9. Ke ka baka la’ng lentšu la Modimo le ka re kgoma go etša kamoo le kgomilego Jeremia?

⁹ Lengwalong la gagwe leo le yago go Baheberu, moapostola Paulo o ngwadile gore: “Lentšu la Modimo le a phela e bile ke le matla gomme le bogale go feta tšhoša le ge e le efe ya magale a mabedi, le gona le phuleletša gaešita le go arola moya le seo motho a lego sona ka gare le malokololo le moko, gomme le kgona go lemoga dikgopolo le maikemišetšo a pelo.” (Baheb. 4:12) Molaetša, goba lentšu, la Modimo le ka re kgoma go etša ge le kgomile Jeremia. Gopola gore gaešita le ge go ile gwa dirišwa batho go ngwala Beibele, ga se puku yeo e huperego bohlale bja batho, ka gobane e buduletšwe ke Modimo. Go 2 Petro 1:21 re bala gore: “Boporofeta ga se bja ka bja tlišwa ke go rata ga motho, eupša batho ba boletše se se tšwago go Modimo ge ba be ba išwa ke moya o mokgethwa.” Ge re ipha nako ya go swara thuto ya motho ka noši ya Beibele yeo e nago le morero, menagano ya rena e tlala ka molaetša wo o buduletšwego ka moya o mokgethwa. (Bala 1 Bakorinthe 2:10.) Molaetša woo o ka ipontšha e le o swanago le “mollô o tukaxo” ka gare ga rena, moo e bile re ka se kgonego go o boloka go rena feela.

10, 11. (a) Ke mokgwa ofe wa go ithuta wo re swanetšego go o diriša gore re tle re hwetše sebete sa go bolela? (b) Bolela o mongwe wa megato yeo o rulaganyago go e gata bakeng sa go kaonefatša tsela yeo o swarago thuto ya gago ya motho ka noši.

 ¹⁰ Gore thuto ya motho ka noši ya Beibele e re kgome kudu, e swanetše go swarwa ka tsela yeo e tlago go dumelela molaetša wa yona go fihlelela ka gare ga rena gomme wa kgoma motho yo re lego yena ka gare. Ka mohlala, moporofeta Hesekiele o ile a bona pono yeo go yona a ilego a kgopelwa gore a je lengwalo le le mennwego leo le bego le swere molaetša o matla wo o bego o swanetše go išwa bathong bao ba sa o amogelego. Hesekiele o be a swanetše go monya molaetša woo ka botlalo gomme a o dire karolo ya bophelo bja gagwe. Go dira bjalo go be go tla dira gore go fetišetša molaetša woo go be bose—go swana le tatso ya todi ya dinose.—Bala Hesekiele 2:8–3:4, 7-9.

¹¹ Re boemong bjo bo swanago le bja Hesekiele. Ba bantši lehono ba fo ba ba sa nyake go kwa seo Beibele e se bolelago. E le gore re phegelele go bolela lentšu la Modimo, go bohlokwa gore re ithute Mangwalo ka tsela yeo e tla dirago gore re kgone go kwešiša molaetša wa ona ka botlalo. Re swanetše go ithuta ona ka mehla—e sego ka sewelo. Kganyogo ya rena e swanetše go swana le ya mopsalme yo a opetšego ka gore: “A nkê O kxahlwê-hlê ke polêlô tša molomo wa-ka, le dikeleletšô tšé tša pelo ya-ka, Wêna Morêna Lentswê la-ka, Wêna Monamoledi wa-ka.” (Ps. 19:14) Ke gabohlokwa gakaakang gore re iphe nako ya go naganišiša ka seo re se balago, e le gore ditherešo tša Beibele di ka nwelela ka dipelong tša rena! Ke therešo gore re swanetše go katanela go kaonefatša tsela yeo ka yona re swarago thuto ya rena ya motho ka noši. *

12. Ke ka baka la’ng diboka tša Bokriste di re thuša go hlahlwa ke moya o mokgethwa?

¹² Tsela e nngwe ya go holwa ke moya wa Jehofa o mokgethwa ke ka go ‘naganelana gore re hlohleletšane leratong le medirong e medirong e mebotse, re sa tlogele go bokana ga rena gotee.’ (Baheb. 10:24, 25) Go katanela go ba gona ka mehla dibokeng tša Bokriste, go theetša ka kelohloko le go diriša seo re ithutago sona ke ditsela tše kaone tša go hlahlwa ke moya wa Modimo. Go ba gona, na moya wa Jehofa ga o re nee tlhahlo ka phuthego?—Bala Kutollo 3:6.

Mehola ya go ba le Sebete

13. Re ka ithuta’ng go seo Bakriste ba lekgolong la pele la nywaga ba ilego ba se fihlelela modirong wa boboledi?

¹³ Moya o mokgethwa ke matla a phagamego kudu legohleng gomme o ka matlafatša batho gore ba dire thato ya Jehofa. Ba tutuetšwa ke wona, Bakriste ba lekgolong la pele la nywaga ba ile ba fihlelela modiro o mogolo kudu. Ba ile ba tsebatša ditaba tše dibotse “tlholong yohle yeo e lego tlase ga legodimo.” (Bakol. 1:23) Ge re ela  hloko gore bontši bja bona e be e le “batho ba sa rutegago,” go ba molaleng gore ba be ba tutuetšwa ke matla a magolo kudu.—Dit. 4:13.

14. Ke’ng seo se ka re thušago go “fišega moyeng”?

¹⁴ Go phela ka tsela yeo e dumelelago moya o mokgethwa go hlahla maphelo a rena le gona go ka re tutueletša go dira bodiredi bja rena ka sebete. Go rapelela moya ka mehla, go ba le thuto ya motho ka noši e nago le morero e mafolofolo, go naganišiša ka thapelo ka seo re se balago le go ba gona ka mehla dibokeng tša Bokriste go ka re thuša kudu gore re ‘fišege moyeng.’ (Baroma 12:11) Mabapi le “Mojuda yo mongwe yo a bitšwago Apollo, yo a tswaletšwego Aleksandria, monna wa sethakga polelong, [yo a ilego] a fihla Efeso,” Beibele e re: “Ka ge a be a fišega moyeng, o ile a thoma go bolela le go ruta ka mo go nepagetšego dilo tše di lego mabapi le Jesu.” (Dit. 18:24, 25) Ka go “fišega moyeng,” re ka bontšha sebete kudu modirong wa boboledi wa ntlo le ntlo le ge re nea bohlatse bjo bo sa rulaganyetšwago.—Baroma 12:11.

15. Go bolela ka sebete se se oketšegilego go re hola bjang?

¹⁵ Go ba le sebete se se oketšegilego bodireding go ka re hola. Boemo bja rena bja kgopolo bo a kaonefala ka gobane re kwešiša ka botlalo bohlokwa bja modiro wa rena le mohola wa wona. Go ba ga rena mafolofolo go a oketšega ka gobane re hwetša lethabo le legolo ge re tšea karolo ka mehla bodireding. Le gona, phišego ya rena e a matlafala ka gobane re lemoga kudu go akgofa ga modiro wa rena wa boboledi.

16. Ke’ng seo re swanetšego go se dira ge e ba phišego ya rena bodireding e fokotšegile?

¹⁶ Go thwe’ng ge e ba re se sa hlwa re fišega bodireding goba re se sa hlwa re bo dira go etša mathomong? Gona ke gabohlokwa go itlhahloba ka potego. Paulo o ngwadile gore: “Dulang le itekola ge e ba le le tumelong, dulang le itlhatsela seo lena ka noši le lego sona.” (2 Bakor. 13:5) Ipotšiše gore: ‘Na ke sa fišega moyeng? Na ke rapela Jehofa gore a ntšhollele moya wa gagwe? Na dithapelo tša-ka di bontšha gore ke ithekga ka yena bakeng sa go dira thato ya gagwe? Na di akaretša mantšu a tebogo bakeng sa bodiredi bjoo a nkgafetšego bjona? Mekgwa ya-ka ya go ithuta e bjang? Ke fetša nako e kaaka’ng ke naganišiša ka seo ke se balago le seo ke se kwago? Ke tšea karolo gakaakang dibokeng tša phuthego?’ Go naganišiša ka dipotšišo tše bjalo go ka go thuša go bona moo o fokolago gona gomme wa leka go kaonefatša.

Dumelela Moya wa Modimo Gore o go Nee Sebete

17, 18. (a) Modiro wa boboledi o dirilwe go fihla bokgoleng bofe lehono? (b) Re ka bontšha bjang “tokologo e kgolo kudu ya polelo” ge re tsebatša ditaba tše dibotse tša Mmušo wa Modimo?

¹⁷ Jesu yo a tsošitšwego o boditše barutiwa ba gagwe gore: “Le tla amogela matla ge moya o mokgethwa o fihla godimo ga lena, gomme le tla ba dihlatse tša-ka Jerusalema le Judea ka moka le Samaria le go fihla karolong ya kgole ya lefase.” (Dit. 1:8) Modiro woo o thomilego ka nako yeo o dirwa ka tsela e kgolo kudu lehono. Dihlatse tša Jehofa tše e ka bago tše dimilione tše šupago di tsebatša molaetša wa Mmušo dinageng tše fetago tše 230, di fetša diiri tše e ka bago tše dibilione tše 1,5 ka ngwaga di le bodireding. Ke mo go thabišago gakaakang go tšea karolo ka phišego modirong wo woo o ka se kego wa bušeletšwa!

¹⁸ Go swana le lekgolong la pele la nywaga, modiro wa boboledi wa lefase ka bophara o dirwa ka tlase ga tlhahlo ya moya wa Modimo. Ge e ba re dumelela go hlahlwa ke moya, re tla bontšha “tokologo e kgolo kudu ya polelo” bodireding bja rena. (Dit. 28:31) Ka gona, a re direng sohle seo re ka se kgonago gore re hlahlwe ke moya ge re dutše re tsebatša ditaba tše dibotse tša Mmušo wa Modimo!

[Mengwalo ya tlase]

O Ithutile’ng?

• Ke ka baka la’ng re swanetše go ba le sebete ge re bolela lentšu la Modimo?

• Ke’ng seo se thušitšego barutiwa ba pele go bolela ka sebete?

• Re ka hwetša sebete bjang?

• Go ba le sebete go re hola bjang?

[Dipotšišo tša Thuto]

[Seswantšho go letlakala 7]

Batswadi ba ka thuša bjang bana ba bona go ba le sebete?

[Diswantšho go letlakala 8]

Thapelo e kopana e ka go thuša go rapa sebete ge o le bodireding