Dipotšišo Tše Tšwago go Babadi

Ke maemong afe moo go ka nyakegago gore motho a kolobetšwe lefsa?

Maemong a mangwe, motho yo a kolobeditšwego a ka nyaka go naganišiša ka seo se bolelwago ke kolobetšo ya gagwe gomme a nagana ka go kolobetšwa lefsa. Ka mohlala, nakong ya kolobetšo, motho ka sephiring a ka ba a be a phela goba a dira dilo tšeo di bego di ka dira gore a kgaolwe ge nkabe go be go šetše go tsebja gore o kolobeditšwe. Na a ka ineela go Modimo ka tlase ga maemo ao? Motho yo bjalo a ka kgona go ineela ka kgonthe go Jehofa ge feela a kgaoditše boitshwaro bjo e sego bja Mangwalo. Ka gona, e ka ba mo go swanetšego gore motho a naganišiše ka go nyakega ga go kolobetšwa lefsa ge e ba a ile a kolobetšwa a dutše a itshwere ka tsela yeo.

Go thwe’ng ka motho yoo a bego a sa dire sebe nakong ya ge a kolobetšwa eupša ka morago a ilego a dira sebe seo se ilego sa nyaka gore go hlongwe komiti ya boahlodi? Mohlomongwe a ka bolela gore o be a sa kwešiše gabotse seo a bego a se dira nakong ya ge a be a kolobetšwa gomme a bolela gore kolobetšo ya gagwe e be e se e swanetšego e le ka kgonthe. Ge bagolo ba kopana le modiri wa bobe, ga se ba swanela go belaela kolobetšo ya gagwe gomme ba mmotšiša ge e ba a ikwa eka boineelo bja gagwe le kolobetšo e be e le tša kgonthe. Go ba gona, o kwele polelo yeo e theilwego Mangwalong e bolela ka seo se bolelwago ke kolobetšo. O arabile ka gore Ee! dipotšišong tša mabapi le boineelo le kolobetšo. Ke moka o ile a fetoša diaparo tša gagwe gomme a inwa ka meetseng e le ka kgonthe. Ka baka leo, go a kwagala go dumela gore o be a kwešiša gabotse bohlokwa bja seo a bego a se dira. Ka gona bagolo ba tla mo swara bjalo ka motho yo a kolobeditšwego.

Ge e ba motho a tsoša taba ya go belaela kolobetšo ya gagwe, bagolo ba ka mo lebiša go Morokami (wa Seisemane) wa March 1, 1960, matlakala 159 le 160, le wa February 15, 1964, matlakala 123 go ya go 126, moo taba ya go kolobetšwa lefsa e hlaloswago ka botlalo. Mafelelong taba ya go kolobetšwa lefsa ka tlase ga maemo a itšego (a bjalo ka go se be le tsebo e lekanego ya Beibele ge motho a be a kolobetšwa) ke kgetho ya motho ka noši.

Ke dilo dife tšeo Bakriste ba swanetšego go di ela hloko ge go tliwa tabeng ya go dula le batho ba bangwe?

Motho yo mongwe le yo mongwe o nyaka moo a ka dulago gona. Lega go le bjalo, lehono batho ba bantši ga ba na magae a bona. Maemo a motho a tša boiphedišo, a tša maphelo goba maemo a mangwe a ka dira gore go nyakege gore a dule lapeng le legolo, leo le ka dirago gore ba leloko ba mmalwa ba dule gotee. Dikarolong tše dingwe tša lefase, ba leloko ba ka patagana ka gare ga phapoši e tee yeo motho a ka se hwetšego nako ya go ba noši go yona.

Ga se boikarabelo bja mokgatlo wa Jehofa go nea lelokelelo le letelele la melao ya mabapi le gore ke legae la mohuta mang le le swanetšego bakeng sa bohle ka phuthegong ya lefase ka bophara. Bakriste ba kgothaletšwa go nagana ka melao ya motheo ya Mangwalo e le gore ba kgone go bona ge e ba moo ba dulago gona e le mo  go amogelegago go Modimo goba go se bjalo. E mengwe ya melao ye ya motheo ke efe?

Taba ya bohlokwa yeo e swanetšego go elwa hloko ke mafelelo ao go dula le batho ba bangwe go tla bago le ona go rena le bomoya bja rena. Batho bao ke bomang? Na ke barapedi ba Jehofa? Na ba phela ka go dumelelana le ditekanyetšo tša Beibele? Moapostola Paulo o ngwadile gore: “Le se ke la timetšwa. Ditlwaelano tše mpe di senya mekgwa e holago.”—1 Bakor. 15:33.

Mangwalo a bontšha gore Jehofa o hlaswa bootswa le bohlotlolo. (Baheb. 13:4) Ka gona, tokišetšo le ge e le efe ya madulo yeo e dumelelago batho bao ba sa nyalanago ba bong bjo bo fapanego gore ba dule gotee go le bjalo ka ge eka ke monna le mosadi, ruri e ka se amogelwe ke Modimo. Mokriste a ka se dule moo boitshwaro bjo bo gobogilego bo dumelelwago gona.

Go oketša moo, Beibele e kgothaletša bohle bao ba nyakago go amogelwa ke Modimo gore ba ‘tšhabe bootswa.’ (1 Bakor. 6:18) Ka baka leo, e tla ba gabohlale go Bakriste go phema tokišetšo le ge e le efe ya madulo yeo e ka ba dirago gore ba lekege go itshwara ka tsela e gobogilego. Ka mohlala, nagana ka boemo bjo go bjona Bakriste ba mmalwa ba robalago ka ntlong e tee. Na tokišetšo yeo e ka dira gore go be le maemo a lekago? Go thwe’ng ge e ba ka tsela e sa letelwago batho ba babedi bao ba sa nyalanago ba ikhwetša ba le noši ka gobane batho bao ka tlwaelo ba dulago le bona ba se gona ka nako yeo? Ka mo go swanago, go dula ka ntlong e tee ga batho bao ba sego lenyalong bao ba kgahlegelanago ka tša marato go ka ba kotsi kudu boitshwarong. Ke gabohlale go phema maemo a swanago le ao.

Ka tsela e swanago, e tla ba mo go sa swanelago go batho bao ba hlalanego go tšwela pele ba dula ka ntlong e tee. Go tšwela pele ba e-ba le ditswalano tša kgaufsi seng sa bona go ka lebiša boitshwarong bjo bo gobogilego.—Die. 22:3.

Taba ya mafelelo eupša e le ya bohlokwa yeo e swanetšego go elwa hloko ke tsela yeo ka yona batho ba tikologong yeo ba lebelelago kgetho yeo motho a e dirago. Tokišeletšo ya bodulo yeo Mokriste a e lebelelago e swanetše eupša e tsoša dipolelo tše di sa kgahlišego tikologong e swanetše go elwa hloko. Ga re nyake gore boitshwaro bja rena bo goboše leina la Jehofa. Paulo o beile taba ka tsela ye: “Phemang go ba ba kgopišago go Bajuda gotee le go Bagerika le go phuthego ya Modimo, go etša ge ke kgahliša batho ka moka dilong ka moka, ke sa tsome seo se holago nna ke nnoši eupša seo se holago ba bantši, e le gore ba phološwe.”—1 Bakor. 10:32, 33.

Go hwetša le go rulaganya madulo a swanetšego e ka ba tlhohlo e kgolo go bao ba nyakago go kgomarela ditekanyetšo tša Jehofa tša go loka. Lega go le bjalo, Bakriste ba swanetše go “kgonthišetša se se amogelegago go Morena.” Ba swanetše go kgonthišetša gore ga go na selo seo se sa hlwekago seo se dirwago ka malapeng a bona. (Baef. 5:5, 10) Se se bolela gore Bakriste ba swanetše go rapelela tlhahlo ya Modimo gomme ba dire sohle seo ba ka se kgonago go šireletša ba bangwe nameng le boitshwarong gotee le go šireletša leina le lebotse la Jehofa.