Ganetša Phatlalatšo ya Maaka ya Sathane

‘LE SE ke la forwa. Modimo wa lena a ka se le thuše. Ineeleng, go sego bjalo le tla lebeletšana le ditla-morago!’ Ye ke kgwekgwe ya molaetša woo Rabasake, motseta wa Kgoši Sanheribe wa Asiria, a o neilego badudi ba Jerusalema. Madira a kgoši a ile a gapeletša go tsena motseng wa Juda. Maikemišetšo a motseta yoo ka go bolela mantšu ao e be e le go senya leina la batho ba Jerusalema le go ba tšhošetša gore ba ineele.—2 Dikx. 18:28-35.

Baasiria ba be ba tsebja ka go ba šoro le go ba sehlogo. Ba be ba dira gore manaba a bona a tšhoge ka go a botša tsela e sehlogo yeo ka yona ba ilego ba swara batho bao ba ba thopilego. Go ya ka radihistori Philip Taylor, ba ile ba diriša “mokgwa wa go tšhošetša batho woo o sepedišanago le phatlalatšo ya maaka yeo e bego e direlwa go tšhošetša batho bao ba fentšwego le go dira gore bao e ka bago manaba a bona ba dule ba tšhogile ge ba e-kwa dipego tša kamoo ba ilego ba ba sehlogo go ba bangwe le ka boradia bjo bogolo bja menagano ya bona.” Phatlalatšo ya maaka ke sedirišwa se matla kudu. Taylor o re: “Maikemišetšo a yona ke go senya megopolo ya batho.”

Bakriste ba therešo “ga [ba] kakadipane le madi le nama, eupša [ba] kakadipana . . . le madira a kgopo a moya,” ke gore, ba lwa le dibopiwa tša moya tšeo di ilego tša rabela kgahlanong le Modimo. (Baef. 6:12) Lenaba la bona le legolo ke Sathane Diabolo. Le yena o diriša botšhošetši bjo bo kopanego le phatlalatšo ya maaka.

Sathane o re a ka kgona go senya potego ya yo mongwe le yo mongwe wa rena. Mehleng ya mopatriareka Jobo, o ile a botša Jehofa Modimo gore: “Motho tše a naxo natšô’ a ka di nthša tšohle xe a hlêkêlêla bophelô bya xaxwe.” Ka mantšu a mangwe, ge motho a ka gatelelwa kudu, mafelelong o tla roba potego ya gagwe go Modimo. (Jobo 2:4) Na Sathane o nepile ka mantšu a? Na ka moka ga rena re na le tekanyetšo ya seo re ka se kgotlelelago e le gore re boloke potego ya rena—tekanyetšo yeo ge go le thata kudu e ka dirago gore re lahle melao ya rena ya motheo e le gore re phele? Sathane o nyaka gore re nagane bjalo. Ka baka leo, o diriša phatlalatšo e kotsi ya maaka bakeng sa go bjala kgopolo e bjalo menaganong ya rena. A re hlahlobeng e mengwe ya mekgwa ya gagwe ya go dira bjalo gomme re ele hloko kamoo re ka mo ganetšago ka gona.

“Ba xo Thea Methêô Mmung”

Sathane o ile a diriša Elifase, yo mongwe wa bagwera ba bararo ba Jobo bao ba bego ba mo etetše, go bolela gore batho ba fokola kudu. Ge a swantšha batho e le ba bjalo ka “ba xo ikaxêla ka seretse,” o boditše Jobo gore: “Ba xo thea methêô mmung? Bôná ba pitleletšwa bo-ka-thswêlê. Le hlaba bà le xôna; le dikêla bà thosantšwe; ba senyêxa xo ya xo ile, bà sa šetšwe selô.”—Jobo 4:19, 20.

Go na le mo Mangwalo a re swantšhwago le “dibjana tša letsopa”—dibjana tše di thubegago gabonolo. (2 Bakor. 4:7) Re a fokola ka baka la sebe sa leabela le go se phethagale. (Baroma 5:12) Ka borena re ka se kgone go lebeletšana le ditlhaselo tša Sathane. Eupša ka ge re le Bakriste, go na le yo a ka re thušago. Go sa šetšwe mafokodi a rena, re ba bohlokwa mahlong a Modimo. (Jes. 43:4) Go feta moo, Jehofa o nea moya o mokgethwa go bao ba mo kgopelago. (Luka 11:13) Moya wa gagwe o ka re nea “matla a fetago a tlwaelegilego,” ao a re thušago go lebeletšana le mathata le ge e le afe ao Sathane a re tlišetšago ona. (2 Bakor. 4:7; Bafil. 4:13) Ge e ba re ema re tiile kgahlanong le Diabolo, re “tiile tumelong,” Modimo o tla re tiiša le go re matlafatša.  (1 Pet. 5:8-10) Ka baka leo, ga se ra swanela go boifa Sathane Diabolo.

Motho “e a Nwaxo Bobe”

Elifase o ile a botšiša gore: “Motho ke wa’ng xe xo thwe a sêkêxê? Xe ngwana wa mosadi a thwe a hwetšwê à lokile?” O ile a tšwela pele ka go araba, a re: “Hleng le Bakxêthwa b’axwe [Modimo] ó šitwa xo ba bôta! Le lexodimo ó hwetša le s’a sêka. Byale selaloxi,—wa makxapha,— motho,—e a nwaxo bobe bo-ka meetse, yêna ó tlo mo re’ng?” (Jobo 15:14-16) Elifase o be a botša Jobo gore ga go na motho yo Jehofa a mmonago a lokile. Diabolo le yena o bjala dikgopolo tše di fošagetšego. O nyaka gore re tshwenyege ka diphošo tša nakong e fetilego, re itshwaye diphošo kudu gomme re nagane gore re ka se ke ra lopollwa. E bile o nyaka gore re nagane gore Jehofa o nyaka mo gontši kudu go rena gomme re tšeele fase kgaugelo, tebalelo le thekgo ya Gagwe.

Ke therešo gore ka moka ga rena re “dirile sebe gomme [re] hlaelelwa ke letago la Modimo.” Ga go na motho yo a sa phethagalago yo a ka fihlelelago ditekanyetšo tše di phethagetšego tša Jehofa. (Baroma 3:23; 7:21-23) Lega go le bjalo, seo ga se bolele gore ga a re tšee re le bohlokwa. Jehofa o a tseba gore ke “noga ya kgale, ye e bitšwago Diabolo le Sathane,” yeo e ikholago ka go ba ga rena batho ba sebe. (Kut. 12:9, 10) Ka ge Modimo a lemoga gore re “lerole,” o a re naganela gomme ga a ‘lwe le rena ka mehla.’—Ps. 103:8, 9, 14.

Ge e ba re tlogela tsela e kgopo gomme re batamela Jehofa ka pelo e itsholago, ‘o tla re lebalela ka tebalelo e ntši.’ (Jes. 55:7; Ps. 51:17) Beibele e re gaešita le ge dibe tša rena “di hubetše bo-ka madi, di tlo šweufala wa leswêla.” (Jes. 1:18) Ka gona, anke re ikemišetšeng gore re se langwe ge re dutše re leka go dira thato ya Modimo.

Re le batho ba sebe, re ka se tsoge re bile baloki mahlong a Modimo. Adama le Efa ba lahlegetšwe ke bophelo bjo bo phethagetšego le kholofelo ya bophelo bjo bo sa felego, e sego feela bakeng sa bona eupša le bakeng sa rena ka moka. (Baroma 6:23) Lega go le bjalo, ka baka la go rata batho kudu, Jehofa o ile a dira tokišetšo ya go re lebalela dibe ge e ba re bontšha tumelo sehlabelong sa topollo sa Morwa wa gagwe, Jesu Kriste. (Mat. 20:28; Joh. 3:16) A pontšho e kgolo gakaakaang ya “botho bjo bo sa swanelago” bja Modimo! (Tito 2:11) Re ka lebalelwa dibe! Ka gona, ke ka baka la’ng re dumelela Sathane a dira gore re nagane gore seo se ka se kgonege?

“Mo Išê Letsôxô O Kxwathê Mašapô a Xaxwe le Nama ya Xaxwe”

Sathane o be a re Jobo o tla lahla tumelo ya gagwe ge a be a ka thoma go se phele gabotse mmeleng. Ge a be a hlohla Jehofa, Sathane o itše: “O k’O mo išê letsôxô O kxwathê mašapô a xaxwe le nama ya xaxwe, O bônê xe a tlo Xo hlala pepeneneng.” (Jobo 2:5) Ga go pelaelo gore Lenaba la Modimo le tla thaba ge le ka dira gore re ikwe re se na mohola ka baka la mafokodi a rena.

 Lega go le bjalo, Jehofa ga a re lahle ge re se sa hlwa re kgona go dira dilo ka moka tšeo re kilego ra di dira tirelong ya gagwe. Go thwe’ng ge e ba mogwera wa rena a ile a hlaselwa le go gobatšwa? Na re tla mo tšeela fase ka gobane a se sa kgona go re direla dilo tšeo a bego a re direla tšona pele? Ga go bjalo le gatee! Re tla dula re mo rata le go mo hlokomela—kudu-kudu ge a ile a gobala a leka go re direla selo se itšego. Na re swanetše go letela selo se se fapanego le seo go Jehofa? Beibele e re: “Modimo ga se yo a sa lokago moo a ka lebalago modiro wa lena le lerato leo le le bontšhitšego leineng la gagwe.”—Baheb. 6:10.

Mangwalo a bolela ka “mohlologadi yo mongwe wa mohloki” yo a ka bago a feditše nywaga e mentši a thekga borapedi bja Modimo. Ge Jesu a be a mmona a lahlela “ditšheletiana tša tšhipi tše pedi” lepokising la meneelo la tempele, na o ile a nyatša mosadi yoo le moneelo wa gagwe? Ka mo go fapanego, o ile a mmolela gabotse ka ge a dirile sohle seo maemo a gagwe a bego a mo dumelela go se dira gore a thekge borapedi bja therešo.—Luka 21:1-4.

Ge e ba re dula re botega, re ka kgonthišega gore tswalano ya rena le Jehofa e tla dula e tiile, go sa šetšwe tshenyo yeo go se phethagale ga rena go ka bago go e bakile ka tsela ya botšofadi goba ya bolwetši. Modimo le ka mohla a ka se tlogele bao ba botegago e le feela ka gobane mathata a lekanyetša seo ba kgonago go mo direla sona.—Ps. 71:9, 17, 18.

Amogela “Kefa ya Phološo”

Re ka itšhireletša bjang phatlalatšong ya maaka ya Sathane? Moapostola Paulo o ngwadile gore: “Tšwelang pele le hwetša matla Moreneng le bonatleng bja matla a gagwe. Aparang ditlhamo tše feletšego tše di tšwago go Modimo gore le kgone go emela maano a bohwirihwiri a Diabolo le tiile.” Karolo e nngwe ya ditlhamo tšeo ke “kefa ya phološo.” (Baef. 6:10, 11, 17) Ge e le mabapi le phatlalatšo ya maaka ya Sathane, re swanetše go kgonthišetša gore re amogela ‘kefa yeo ya phološo’ le go dula re e rwele. Kefa ya lešole e šireletša hlogo ya lona. ‘Kholofelo ya rena ya phološo’—go holofela gore dikholofetšo tša Modimo tša mabapi le lefase la gagwe le lefsa la letago di tla phethagala—e tla šireletša menagano ya rena maakeng a Sathane. (1 Bathes. 5:8) Re swanetše go boloka kholofelo yeo e phela e bile e tiile ka go fišegela go ba le thuto ya motho ka noši ya Mangwalo.

Jobo o ile a kgotlelela ditlhaselo tše šoro le tša lehloyo tša Sathane. Tumelo ya Jobo kholofetšong ya tsogo e be e tiile kudu moo gaešita le tšhošetšo ya lehu e sa kago ya mo nyamiša. Go e na le moo, o boditše Jehofa gore: “Wa tlo mpitša ka Xo arabêla, Ò hloloxetšwe ’bopya sa diatla tš’axo.” (Jobo 14:15) Le ge Jobo a be a ka hwa ka baka la go dula a botega, o be a holofetše gore lerato la Modimo go bahlanka ba Gagwe bao ba botegago le be le tla Mo tutueletša go ba tsoša bahung.

Eka re ka ba le kholofelo e bjalo go Modimo wa therešo. Jehofa a ka kgona go fenya selo le ge e le sefe seo Sathane le baemedi ba gagwe ba ka re lwantšhago ka sona. Le gona, gopola gore ge Paulo a re kgonthišetša, o re: “Modimo o a botega, gomme a ka se le lese le lekwa go feta kamoo le ka kgonago go kgotlelela ka gona, eupša gotee le moleko o tla ba a bula tsela ya go tšwa e le gore le kgone go o kgotlelela.”—1 Bakor. 10:13.

[Seswantšho go letlakala 20]

Jehofa o tšeela godimo tirelo ya gago ya potego

[Seswantšho go letlakala 21]

Amogela kefa ya phološo gomme o dule o e rwele