“Moya le Monyadiwa ba Tšwela Pele ba re: ‘Tlaa!’”
“Moya le Monyadiwa ba Tšwela Pele ba re: ‘Tlaa!’”
“Moya le monyadiwa ba tšwela pele ba re: ‘Tlaa!’ . . . Mang le mang yo a ratago a tle a tšee meetse a bophelo ka ntle le tefo.”—KUT. 22:17.
1, 2. Dikgahlego tša Mmušo di swanetše go ba boemong bofe maphelong a rena, gona ka baka la’ng?
DIKGAHLEGO tša Mmušo di swanetše go ba boemong bofe maphelong a rena? Jesu o kgothaleditše barutiwa ba gagwe go ‘tšwela pele ba tsoma mmušo pele,’ gomme a ba kgonthišetša gore ge ba ka dira bjalo, Modimo o tla ba nea seo ba se nyakago. (Mat. 6:25-33) O swantšhitše Mmušo wa Modimo le perela e bohlokwa kudu yeo ge e se na go hwetšwa, mmapatši wa mosepedi a ilego a “rekiša ka bjako dilo ka moka tšeo a bego a e-na le tšona, a e reka.” (Mat. 13:45, 46) Na ga se ra swanela go tšea modiro wa go bolela ka Mmušo le go dira barutiwa o le bohlokwa kudu?
2 Bjalo ka ge re bone dihlogong tše pedi tše di fetilego, go bolela ga rena ka sebete le go diriša Lentšu la Modimo ka bokgwari bodireding go bontšha gore re hlahlwa ke moya wa Modimo. Moya woo gape o kgatha tema e bohlokwa go tšeeng ga rena karolo ka mehla modirong wa go bolela ka Mmušo. Anke re boneng gore bjang.
Taletšo e Yago go Bohle!
3. Batho ka moka ba laletšwa gore ba ‘tle’ meetseng a mohuta ofe?
3 Batho ba laletšwa ka moya o mokgethwa. (Bala Kutullo 22:17.) Taletšo ye ke ya gore ba ‘tle’ ba kgotsofatše lenyora ka mohuta o kgethegilego kudu wa meetse. Ga se meetse a tlwaelegilego ao a nago le dikarolo tše pedi tša hydrogen le e tee ya oksitšene. Gaešita le ge meetse a kgonthe a nyakega gore motho a kgone go phela mo lefaseng, Jesu o be a naganne ka mohuta o mongwe wa meetse ge a be a bolela le mosadi wa Mosamaria sedibeng a re: “Mang le mang yo a nwago meetse ao ke tlago go mo nea ona a ka se ke a ba a nyorwa, eupša meetse ao ke tlago go mo nea ona e tla ba mothopo wa meetse o runyago bakeng sa go nea bophelo bjo bo sa felego.” (Joh. 4:14) Meetse a sa tlwaelegago ao batho ba laletšwago go a nwa a nea bophelo bjo bo sa felego.
4. Go nyakega ga meetse a bophelo go thomile bjang, gona meetse ao a emela’ng?
4 Go nyakega ga meetse a bjalo a bophelo go ile gwa thoma ge motho wa mathomo, Adama, a be a tlatša mosadi wa gagwe, Efa, go se kweng yoo a ba bopilego—Jehofa Modimo. (Gen. 2:16, 17; 3:1-6) Batho ba pele ba babedi ba ile ba rakwa tšhemong yeo e bego e le legae la bona e le gore “[Adama] a se kê a iša seatla a buša a fula sehlare sa bophelô, a ja, a phela ka xo sa felexo.” (Gen. 3:22) Bjalo ka rakgolokhukhu wa batho, Adama mafelelong o ile a tliša sebe molokong ka moka wa batho. (Baroma 5:12) Meetse a bophelo a emela ditokišetšo ka moka tša Modimo tša go lokolla batho ba kwago sebeng le lehung le go ba nea bophelo bjo bo sa felego bjo bo phethagetšego lefaseng la Paradeise. Sehlabelo sa topollo sa Jesu Kriste ke sona se dirilego gore tokišetšo ye e kgonege.—Mat. 20:28; Joh. 3:16; 1 Joh. 4:9, 10.
5. Taletšo ya gore go tle go ‘tšewe meetse a bophelo ka ntle le tefo’ e tšwa go mang? Hlalosa.
5 Taletšo ya gore go tle go ‘tšewe meetse a bophelo ka ntle le tefo’ e tšwa go mang? Ge batho bohle ba hwetša ditokišetšo tša bophelo ka Jesu nakong ya Pušo ya Kriste ya Nywaga e Sekete, seo se hlaloswa e le “noka ya meetse a bophelo e sekilego bjalo ka legakabje.” Noka yeo e bonwa e ‘ela e e-tšwa sedulong sa bogoši sa Modimo le sa Kwana.’ (Kut. 22:1) Ka gona, Jehofa, Monei wa Bophelo, ke Mothopo wa meetse ao a neago bophelo. (Ps. 36:9) Ke Yena a dirago gore meetse ao a hwetšagale ka “Kwana,” Jesu Kriste. (Joh. 1:29) Noka ye ya seswantšhetšo ke tsela ya Jehofa ya go tloša tshenyo ka moka yeo e tlišitšwego molokong wa batho ke go se kwe ga Adama. Ee, Jehofa Modimo ke yena Mothomi wa taletšo ya gore re ‘tle.’
6. Ke neng moo “noka ya meetse a bophelo” e thomago go ela?
6 Le ge “noka ya meetse a bophelo” e tla ela ka mo go tletšego nakong ya Pušo ya Kriste ya Nywaga e Sekete, e thoma go ela “letšatšing la Morena,” leo le thomilego ka go bewa sedulong sa bogoši ga “Kwana” legodimong ka 1914. (Kut. 1:10) Ka baka leo, ditokišetšo tše dingwe bakeng sa bophelo di ile tša thoma go hwetšagala ka morago ga moo. Di akaretša Lentšu la Modimo, Beibele, gobane molaetša wa yona o bitšwa “meetse.” (Baef. 5:26) Taletšo ya go tla go ‘tšea meetse a bophelo’ ka go kwa le go arabela ditabeng tše dibotse tša Mmušo e bulegetše bohle. Eupša ke mang yoo ge e le gabotse a laletšago batho letšatšing la Morena?
“Monyadiwa” o re “Tlaa!”
7. Ke bomang bao ba thomilego go fetišetša taletšo ya gore “tlaa” “letšatšing la Morena,” gona ba laletša bomang?
7 Ditho tša sehlopha sa monyadiwa—Bakriste ba tloditšwego ka moya—ke bona ba mathomo ba go fetišetša taletšo ya gore “tlaa.” Ba laletša bomang? Go ba gona, monyadiwa ga a italetše ge a re “Tlaa!” Mantšu a gagwe a lebišitšwe go bao ba ikemišeditšego go hwetša bophelo bjo bo sa felego mo lefaseng ka morago ga “[ntwa] ya letšatši le legolo la Modimo Ra-matla-ohle.”—Bala Kutullo 16:14, 16.
8. Ke’ng seo se bontšhago gore Bakriste ba tloditšwego ba be ba dutše ba fetišetša taletšo ya Jehofa go tloga morago kua ka 1918?
8 Balatedi ba tloditšwego ba Kriste ba be ba dutše ba fetišetša taletšo go tloga morago kua ka 1918. Ka wona ngwaga woo, polelo ya phatlalatša yeo e nago le sehlogo seo se rego “Ba Dimilione Bao ba Phelago mo Nakong ye ba ka se ke ba hwa le ka Mohla” e neile kholofelo ya gore ba bantši ba tla hwetša bophelo lefaseng la paradeise ka morago ga ntwa ya Haramagedone. Polelo yeo e neilwego kopanong ya Barutwana ba Beibele kua Cedar Point, Ohio, U.S.A., ka 1922 e ile ya kgothaletša batheetši go ‘tsebatša Kgoši le mmušo wa gagwe.’ Boipiletšo bjo bo ile bja thuša mašaledi a sehlopha sa monyadiwa gore a laletše batho ba bantši. Ka 1929, tokollo ya Morokami (wa Seisemane) wa March 15 e be e e-na le sehlogo se rego “Taletšo e Botho,” se se theilwego go Kutullo 22:17. Ka boripana tokollo yeo e itše: “Ditho tša sehlopha sa mašaledi tšeo di botegago di tla ba gotee [le Yo a Phagamego] taletšong e botho gomme tša re, ‘Tlaa.’ Molaetša wo o swanetše go tsebišwa bao ba kganyogago toko le therešo. E swanetše go dirwa gona bjale.” Go fihla le lehono, ditho tša sehlopha sa monyadiwa di tšwela pele di fetišetša taletšo ye.
“Mang le Mang yo a Kwago a re: ‘Tlaa!’”
9, 10. Ke bjang bao ba kwelego taletšo ba laletšwago gore ba arabele ka gore “Tlaa!”?
9 Go thwe’ng ka bao ba kwago taletšo ya gore ba ‘tle’? Ba laletšwa gore le bona ba re “Tlaa!” Ka mohlala, tokollo ya Morokami (wa Seisemane) wa August 1, 1932 go letlakala 232, e itše: “Anke batlotšwa ba kgothaletše bohle bao ba ka kgonago go tšea karolo go boleleng ditaba tše dibotse tša mmušo. Ga se gore e swanetše go ba batlotšwa ba Morena gore ba tsebatše molaetša wa Morena. Ke khomotšo e kgolo go dihlatse tša Jehofa go tseba gore ga bjale di dumeletšwe go rwala meetse a bophelo le go a iša bathong bao ba ka phologago Haramagedone gomme ba newa bophelo bjo bo sa felego mo lefaseng.”
10 Ge o gatelela boikarabelo bja bao ba kwago taletšo ya gore: “Tlaa!” Morokami (wa Seisemane) wa August 15, 1934, letlakala 249, o itše: “Ditho tša sehlopha sa Jonadaba di swanetše go sepela gotee le sehlopha sa seswantšhetšo sa Jehu, e lego batlotšwa, gomme di tsebatše molaetša wa mmušo, gaešita le ge e se dihlatse tše di tloditšwego tša Jehofa.” Ka 1935, “lešaba le legolo” leo go boletšwego ka lona go Kutullo 7:9-17 le ile la bonagala gabotse. Seo se dirile gore go be le koketšego e kgolo kudu modirong wa go tsebatša taletšo ya Modimo. Go tloga ka nako yeo, palo e golago ya lešaba le legolo la barapedi ba therešo—leo ga bjale le fetago dimilione tše šupago—le ile la arabela taletšong yeo. Ka ge ba thabetše go kwa molaetša, ba ile ba ineela go Modimo, ba kolobetšwa meetseng gomme ba tlatša sehlopha sa monyadiwa ka go laletša ba bangwe ka mafolofolo go ‘tla go tšea meetse a bophelo ka ntle le tefo.’
“Moya” o re “Tlaa!”
11. Lekgolong la pele la nywaga C.E., moya o mokgethwa o ile wa akaretšwa bjang modirong wa boboledi?
11 Ge a be a dira boboledi sinagogeng kua Natsaretha, Jesu o ile a bula lengwalo la go phuthwa la moporofeta Jesaya gomme a bala gore: “Moya wa Jehofa o go nna, gobane o ntloleditše go tsebiša badiidi ditaba tše dibotse, o nthomile gore ke bolele tokologo go mathopša le go bolela gore difofu di bone gape, go lokolla ba ba gateletšwego, go bolela ngwaga wo o amogelegago wa Jehofa.” Ke moka Jesu o ile a diriša mantšu a go yena, a re: “Lehono lengwalo le leo le sa tšwago go le kwa le phethagetše.” (Luka 4:17-21) Pele Jesu a rotogela legodimong, o boditše barutiwa ba gagwe gore: “Le tla amogela matla ge moya o mokgethwa o fihla godimo ga lena, gomme le tla ba dihlatse tša-ka . . . go fihla karolong ya kgole ya lefase.” (Dit. 1:8) Lekgolong la pele la nywaga, moya o mokgethwa o ile wa kgatha tema ya bohlokwa modirong wa boboledi.
12. Moya wa Modimo o kgatha tema efe go fetišetšeng taletšo mehleng ya rena?
12 Moya o mokgethwa wa Modimo o kgatha tema efe go fetišetšeng taletšo go batho mehleng ya rena? Jehofa ke Mothopo wa moya o mokgethwa. O diriša moya wo go bula dipelo le menagano ya sehlopha sa monyadiwa gore se kwešiše Lentšu la gagwe, Beibele. Moya o ba tutueletša go fetišetša taletšo le go hlalosa ditherešo tša Mangwalo go bao ba nago kholofelo ya go phela ka mo go sa felego Paradeiseng mo lefaseng. Go thwe’ng ka bao ba amogelago taletšo, ba fetogago barutiwa ba Jesu Kriste gomme ba fetišetša taletšo ye go ba bangwe? Moya o a akaretšwa le go bona. Ka ge ba kolobeditšwe ‘leineng la moya o mokgethwa,’ ba dirišana le moya woo le go ithekga ka ona. (Mat. 28:19) Nagana gape ka molaetša o tsebatšwago ke batlotšwa le lešaba le legolo le le oketšegago. O tšwa ka Beibeleng—puku e ngwadilwego ka thlahlo e lebanyago ya moya wa Modimo. Ka gona, taletšo ye e fetišetšwa ka moya o mokgethwa. Ge e le gabotse, re hlahlwa ke moya woo. Seo se swanetše go kgoma bjang tsela yeo re tšeago karolo ka yona modirong wa go laletša ba bangwe?
Ba “Tšwela Pele ba re: ‘Tlaa!’”
13. Mantšu a rego “moya le monyadiwa ba tšwela pele ba re: ‘Tlaa!’” a ra go re’ng?
13 “Moya le monyadiwa” ga ba fo re “Tlaa!” Lediri la leleme la mathomo leo le dirišitšwego mo le šupa tirong yeo e tšwelago pele. Ge e ela hloko taba yeo, phetolelo ya New World Translation e balega ka gore: “Moya le monyadiwa ba tšwela pele ba re: ‘Tlaa!’” Se se bontšha gore taletšo ye ya Modimo e dirwa ka mehla. Go thwe’ng ka bao ba kwago le go amogela taletšo yeo? Le bona ba re: “Tlaa!” Lešaba le legolo la barapedi ba therešo le hlaloswa le ‘dira tirelo e kgethwa mosegare le bošego ka tempeleng ya Jehofa.’ (Kut. 7:9, 15) Ba dira ‘tirelo ya mosegare le bošego’ ka kgopolo efe? (Bala Luka 2:36, 37; Ditiro 20:31; 2 Bathesalonika 3:8.) Mohlala wa moporofeta yo a tšofetšego wa mosadi e lego Anna le wa moapostola Paulo e bontšha ‘tirelo ya mosegare le bošego’ e bolela go dira bodiredi ka mehla le ka go tšwa pelong.
14, 15. Daniele o ile a bontšha bjang bohlokwa bja go rapela ka mehla?
14 Moporofeta Daniele le yena o bontšhitše bohlokwa bja go rapela ka mehla. (Bala Daniele 6:5-11, 17.) Ga se a ka a fetoša lenaneo la gagwe la moya—mokgwa wa go rapela Modimo “ka mehla xararo . . . ka mokxwa woo wa ka mehla”—gaešita le ka kgwedi e tee, le ge seo se be se bolela gore o tla lahlelwa legageng la ditau. Ruri se se ile sa bontšha babogedi gore ga go na selo seo se lego bohlokwa kudu go feta go rapela Jehofa ka mehla!—Mat. 5:16.
15 Ka morago ga gore Daniele a fetše bošego ka moka a le ka legageng la ditau, kgoši ka boyona e ile ya ya moo gomme ya goeletša ka gore: “Daniele wene mohlanka wa Modimo a phelaxo! A Modimo wa xaxo Yo O mo hlankêlaxo ka mehla, a ó kxonne xo Xo hlakodiša ditaung?” Daniele o ile a araba le semeetseng a re: “A kxoši e phelê xo ya xo ile! Modimo wa-ka ó romile Morongwa wa xaxwe a khuparetša melomo Ya ditau, di se ntirê selô, ka xobane Modimo ó hweditše kè se n’e molato xo Yêna; le xo wene kxoši xa k’a senya selô.”—Dan. 6:20-23.
16. Ke dipotšišo dife tšeo mohlala wa Daniele o re tutueletšago go ipotšiša tšona mabapi le go tšea karolo ga rena bodireding?
16 Daniele o be a ikemišeditše go hwa go e na le go hlokomologa lenaneo la gagwe la borapedi. Go thwe’ng ka rena? Ke boikgafo bofe bjo re bo dirago goba bjo re ikemišeditšego go bo dira gore re tsebatše ditaba tše dibotse tša Mmušo wa Modimo re sa kgaotše? Ka gona, ga se ra swanela go dumelela gore kgwedi e fete re sa ka ra botša ba bangwe ka Jehofa! Ge e ba go kgonega, na ga se ra swanela go katanela go tšea karolo beke e nngwe le e nngwe bodireding? Gaešita le ge re fokola kudu mmeleng gomme re ka kgona go nea bohlatse ka metsotso e 15 feela ka kgwedi, re swanetše go bega modiro woo. Ka baka la’ng? Ka gobane re nyaka go tšwela pele re re: “Tlaa!” gotee le moya le monyadiwa. Ee, re nyaka go dira sohle seo re ka se kgonago gore re dule re le bagoeledi ba Mmušo ba ka mehla.
17. Ke dibaka dife tša go fetišetša taletšo ya Jehofa tšeo di sa swanelago go re feta?
17 Re swanetše go katanela go fetišetša taletšo ya Jehofa boemong le ge e le bofe, e sego feela nakong yeo re e beetšego ka thoko bakeng sa bodiredi bja phatlalatša. Ruri re na le tokelo e kgolo ya go laletša bao ba nyorilwego gore ba ‘tle ba tšee meetse a bophelo ka ntle le tefo’ dinakong tše bjalo ka ge re le mabenkeleng, maetong, maikhutšong, mošomong goba re e-ya sekolong. Gaešita le ge bao ba lego matleng a taolo ba thibela modiro wa boboledi, re tšwela pele re bolela re diriša temogo—mohlomongwe ka go šoma dintlo tše sego kae ka ntlo le ntlo tikologong e itšego gomme re fetele tikologong e nngwe goba re nee bohlatse kutšwanyana ka tsela e sa rulaganyetšwago.
Tšwela Pele o re “Tlaa!”
18, 19. O bontšha bjang gore o tšeela godimo tokelo ya go ba modirišani wa Modimo?
18 Ga bjale e šetše e le nywaga-some e senyane moya le monyadiwa ba dutše ba re “Tlaa!” go motho le ge e le ofe yo a nyoretšwego meetse a bophelo. Na o kwele taletšo ya bona e thabišago? Gona o kgothaletšwa go fetišetša taletšo yeo go ba bangwe.
19 Ga re tsebe gore taletšo ya Jehofa e lerato e tla tšwela pele go fihla neng, eupša go arabela ga rena ka go re “Tlaa!” go re dira badirišani ba Modimo. (1 Bakor. 3:6, 9) A tokelo e kgolo gakaakang! Eka re ka bontšha gore re tšeela godimo tokelo yeo gomme ‘ka mehla re direle Modimo sehlabelo sa tumišo’ ka go bolela re sa kgaotše. (Baheb. 13:15) Bohle bao ba nago le kholofelo ya go phela lefaseng, anke gotee le sehlopha sa monyadiwa ba tšwele pele ba re: “Tlaa!” Le gona, eka ba bangwe ba bantši ba ka ‘tšea meetse a bophelo ka ntle le tefo’!
O Ithutile’ng?
• Taletšo ya gore “tlaa” e fetišeditšwe go bomang?
• Ke ka baka la’ng re ka re taletšo ya gore “tlaa” e tšwa go Jehofa?
• Ke tema efe yeo e kgathwago ke moya o mokgethwa go fetišetšeng taletšo ya gore “tlaa”?
• Ke ka baka la’ng re swanetše go katanela go ba gona ka mehla bodireding?
[Dipotšišo tša Thuto]
[Tšhate/Diswantšho go letlakala 16]
(Bakeng sa mongwalo o beakantšwego ka mokgwa wa kgatišo, bona kgatišo ka boyona)
Tšwela Pele o re “Tlaa!”
1914
Bagoeledi ba 5 100
1918
Ba bantši ba tla hwetša bophelo Paradeiseng mo lefaseng
1922
“Tsebatšang, tsebatšang, tsebatšang Kgoši le mmušo wa yona”
1929
Mašaledi a batlotšwa a re “Tlaa!”
1932
Taletšo ya gore “Tlaa!” e fetišeditšwe go bao e sego batlotšwa
1934
Sehlopha sa Jonadaba se laletšwa go dira boboledi
1935
“Lešaba le legolo” le a lemogwa
2009
Bagoeledi ba 7 313 173