Na o Lebelela Jehofa e le Tatago?

“MORENA, re rute go rapela.” Ge yo mongwe wa barutiwa ba gagwe a be a mo kgopela seo, Jesu o ile a araba ka gore: “Neng le neng ge le rapela le re, ‘Tate, leina la gago a le kgethagatšwe.’” (Luka 11:1, 2) Jesu a ka be a ile a bolela ka Jehofa a diriša direto tše di kgahlišago tše bjalo ka “Yomatla-ka-moka,” “Molai,” “Mohlodi,” “Motala-wa-mabaka” le “Kgoši ya bosafelego.” (Gen. 49:25; Jes. 30:20; 40:28; Dan. 7:9; 1 Tim. 1:17) Go e na le moo, Jesu o kgethile go diriša lentšu “Tate.” Ka baka la’ng? Mohlomongwe ke ka gobane a nyaka gore re boledišane le Motho yo a phagamego kudu legohleng go swana le ka tsela yeo ngwana yo a ikokobeditšego a boledišanago le tatagwe yo lerato ka yona.

Lega go le bjalo, batho ba bangwe ba thatafalelwa ke go lebelela Modimo e le Tatago bona. Mokriste yo a bitšwago Atsuko * o dumela ka gore, “Nywageng e mentši ka morago ga gore ke kolobetšwe, go be go le thata gore ke batamele kgaufsi le Jehofa gomme ke mo rapele bjalo ka Tate.” Ge a bolela lebaka la go thatafalelwa ga gagwe, o re: “Ga ke gopole le ka mohla tate wa-ka wa madi a mpontšha lerato.”

Mehleng ye e hlobaetšago ya bofelo, “maikwelo a borutho a tlhago” ao motho a lebeletšego gore o tla a hwetša go tatagwe a hlaela kudu. (2 Tim. 3:1, 3) Ka baka leo, go tlwaelegile gore batho ba ikwe go swana le Atsuko. Lega go le bjalo, re ka kgothatšwa ke go tseba gore re na le mabaka a kwagalago a go lebelela Jehofa e le Tatago rena.

Jehofa—Mohlokomedi yo Lerato

E le gore re lebelele Jehofa e le Tatago rena, re swanetše go tlwaelana le yena gabotse. Jesu o itše: “Ga go yo a tsebago Morwa ka botlalo ge e se Tate, le gona ga go yo a tsebago Tate ka botlalo ge e se Morwa le motho le ge e le ofe yo Morwa a ratago go mo utollela yena.” (Mat. 11:27) Tsela e botse kudu ya go tseba mohuta wa motho yo Jehofa a lego yena bjalo ka Tate ke ka go naganišiša ka seo Jesu a se boletšego ka Modimo wa therešo. Ka gona, ke’ng seo Jesu a ilego a se tsebatša ka Tatagwe?

Ka ge a be a lebelela Jehofa e le Mothopo wa bophelo, Jesu o itše: “Nna ke phela ka baka la Tate.” (Joh. 6:57) Le rena re a phela ka baka la Tate. (Ps. 36:9; Dit. 17:28) Ke’ng seo se tutueditšego Jehofa go nea ba bangwe bophelo? Na ga se lerato la gagwe? Ka baka la mpho yeo, ruri le rena re swanetše go rata Tatago rena wa legodimong.

Lerato la Modimo go batho le bonagetše gabotse ge a gafa Jesu e le sehlabelo sa topollo. Pontšho yeo ya lerato e dira gore go kgonege gore batho ba sa phethagalago ba be le tswalano ya kgaufsi le Jehofa ka Morwa wa gagwe yo a ratwago. (Baroma 5:12; 1 Joh. 4:9, 10) Le gona, ka ge Tatago rena wa legodimong e le Mophethagatši wa dikholofetšo tša gagwe, re ka kgodišega gore bohle bao ba mo ratago le go mo kwa mafelelong ba tla thabela “tokologo ya letago ya bana ba Modimo.”—Baroma 8:21.

Le gona, Tatago rena wa legodimong ‘o re hlabišetša letšatši la gagwe’ ka mehla. (Mat. 5:45) Ga se gantši moo re bonago go le bohlokwa go rapelela gore letšatši le hlabe. Lega go le bjalo, ruri re nyaka mahlasedi a lona a borutho e bile re a a thabela! Go feta moo, Tatago rena ke Mohlokomedi yo a sa bapišwego, yo a tsebago dinyakwa tša rena tša nama pele re mo kgopela tšona. Ka gona, na ga se ra swanela go ipha nako ya go hlahloba le go naganišiša ka tebogo kamoo Tatago rena wa legodimong a hlokomelago dibopiwa tša gagwe ka gona?—Mat. 6:8, 26.

 Tatago Rena—‘Mošireletši yo Lerato’

Boporofeta bja Jesaya bo ile bja kgonthišetša batho ba Modimo ba bogologolo gore: “Dithaba di tlo šutha, le meboto ya tekema, eupša segwera sa-ka le lena se ka se šuthe, gomme kgwerano ya-ka ya khutšo e ka se ke ya tekema, go bolela Jehofa mošireletši wa lena yo lerato.” (Jes. 54:10, The Bible in Living English) Ge e gatelela ntlha ye, thapelo ya Jesu bošegong bja gagwe bja mafelelo a le mo lefaseng e bontšha gore Jehofa ke ‘mošireletši yo lerato.’ Mabapi le barutiwa ba gagwe, Jesu o rapetše ka gore: “Bona ba lefaseng gomme nna ke tla go wena. Tate yo Mokgethwa, ba šireletše ka baka la leina la gago.” (Joh. 17:11, 14) Jehofa o lebelela le go šireletša balatedi ba Jesu.

Tsela yeo Modimo a re šireletšago ka yona lehono makatikeng a Sathane ke ka go re nea dijo tša moya ka nako e swanetšego a diriša “mohlanka yo a botegago le wa temogo.” (Mat. 24:45) Go bohlokwa go ja dijo tše tše di matlafatšago ge e ba re nyaka go ‘apara ditlhamo tše feletšego tše di tšwago go Modimo.’ Ka mohlala, ela hloko “kotse e kgolo ya tumelo,” yeo ka yona re “kgonago go tima mesebe ka moka e tukago ya yo kgopo.” (Baef. 6:11, 16) Tumelo ya rena e re šireletša kotsing ya moya e bile ke bohlatse bja matla a Tatago rena a šireletšago.

Re ka ithuta mo gontši ka lerato la Tatago rena wa legodimong ka go hlahloba tsela yeo Morwa wa Modimo a ilego a itshwara ka yona ge a be a le lefaseng. Ela hloko pego yeo e begilwego go Mareka 10:13-16. Go yona Jesu o tsopolwa a botša balatedi ba gagwe gore: “Lesang bana ba banyenyane ba tle go nna.” Ge bana bao ba be ba mo kgobokanela, Jesu o ile a ba gokarela le go ba šegofatša. Difahlego tša bona di swanetše go ba di ile tša phadima ka lethabo! Ka gona, ka ge Jesu a boletše gore: “Yo a bonego nna o bone le Tate,” re a tseba gore Modimo wa therešo o nyaka gore re mmatamele.—Joh. 14:9.

Jehofa Modimo ke Mothopo o sa gopego wa lerato. Ke Mohlokomedi le Mošireletši yo a sa bapišwego, yo a nyakago re mmatamela kgaufsi. (Jak. 4:8) Ka gona, Jehofa ke Tate yo mokaone-kaone yo go ka naganwago ka yena!

Ruri re Holega Kudu!

Re holega kudu ge re bota Jehofa ka ge e le Tatago rena yo lerato le yo borutho wa legodimong. (Die. 3:5, 6) Jesu o ile a holwa ke go bota Tatagwe ka mo go feletšego. Kriste o boditše barutiwa ba gagwe gore: “Ga ke noši eupša Tate yo a nthomilego o na le nna.” (Joh. 8:16) Jesu ka mehla o be a kgodišegile gore Jehofa o tla mo thekga. Ka mohlala, ge a be a kolobetšwa o ile a hwetša kgonthišetšo e lerato ya Tatagwe, yo a ilego a bolela gore: “Yo ke Morwa wa-ka, morategi, yo ke mo amogetšego.” (Mat. 3:15-17) Le gona, pele ga lehu la gagwe, Jesu o ile a goeletša ka gore: “Tate, ke gafela moya wa-ka diatleng tša gago.” (Luka 23:46) Jesu o be a sa dutše a bota Tatagwe go feta le ge e le neng pele.

Go ka ba bjalo le ka rena. Ge Jehofa a e-na le rena, re ka boifa’ng? (Ps. 118:6) Atsuko, yo go boletšwego ka yena mathomong, o be a tlwaetše go ithekga ka matla a gagwe ge a be a lebeletšane le mathata. Eupša o ile a ithuta ka bophelo bja Jesu le bodiredi bja gagwe, ka mo go kgethegilego a šeditše tswalano ya Jesu le Tatagwe wa legodimong. Mafelelo e bile afe? Atsuko o re: “Ke ile ka ithuta seo se bolelwago ke go ba le Tate le go mmota.” O oketša ka gore: “Ke ile ka ba le khutšo ya kgonthe le lethabo. Ruri ga go na le lebaka la gore re tshwenyege ka selo le ge e le sefe.”

Go lebelela Jehofa e le Tatago rena go re hola bjang gape? Bana gantši ba rata batswadi ba bona gomme ba nyaka go ba kgahliša. Ka baka la lerato, Morwa wa Modimo ‘ka mehla o be a dira dilo tše di kgahlišago Tatagwe.’ (Joh. 8:29) Ka mo go swanago, go rata Tatago rena wa legodimong go ka re tutueletša go dira dilo ka bohlale le go mo “tumiša phatlalatša.”—Mat. 11:25; Joh. 5:19.

Tatago Rena o ‘re Swere ka Seatla sa le Letona’

Tatago rena wa legodimong gape o re neile “mothuši”—moya o mokgethwa. Jesu o itše: “O tla le hlahla therešong ka moka.” (Joh. 14:15-17; 16:12, 13) Moya o mokgethwa wa Modimo o ka re thuša go kwešiša Tatago rena gabotse.  O ka re thuša go phethola “dilo tše di tsemilwego,” ke gore, dikgopolo tšeo re bego re e-na le tšona, dikgopolo tše di fošagetšego goba dipono tše di kgopamego, ke moka wa thopa “kgopolo e nngwe le e nngwe go e dira gore e kwe Kriste.” (2 Bakor. 10:4, 5) Ka gona, a re rapeleng Jehofa gore a re nee “mothuši” yo a holofeditšwego, re kgodišegile gore “Tate yo a lego legodimong o tla nea gakaakang moya o mokgethwa go bao ba mo kgopelago!” (Luka 11:13) Le gona, ke mo go swanetšego go rapelela gore moya o mokgethwa o re thuše go batamela kgaufsi le Jehofa.

Ngwana yo monyenyane o ikwa a šireletšegile, a bolokegile e bile a sa boife ge a swere tatagwe ka seatla ge ba sepela. Ge e ba o lebelela Jehofa e le Tatago, o ka homotšwa ke mantšu a rego: “Nna Morêna ké Modimo w’axo; ke Xo swere ka seatla sa-ka sa le letona, ’me ke bolêla naxô ke re: Se boifê, ké Nna ke Xo phološaxo!” (Jes. 41:13) O ka ba le tokelo e kgahlišago ya go “sepela” le Modimo ka mo go sa felego. (Mika 6:8) Tšwela pele o dira thato ya gagwe gomme o tla bona lerato, lethabo le go ikwa o šireletšegile, e lego dilo tšeo di tlišwago ke go lebelela Jehofa e le Tatago.

[Mongwalo wa tlase]