O a Amogelwa Tseleng e di Phalago Tšohle ya Bophelo!
O a Amogelwa Tseleng e di Phalago Tšohle ya Bophelo!
“Ge re phela le ge re e-hwa re ba Jehofa.”—BAROMA 14:8.
1. Ke’ng seo Jesu a se rutilego mabapi le tsela e di phalago tšohle ya bophelo?
JEHOFA o nyaka gore re thabele tsela e di phalago tšohle ya bophelo. Batho ba ka phela ka ditsela tše di fapa-fapanego, eupša go na le tsela e tee feela e di phalago tšohle. Tsela e kaone yeo re ka phelago ka yona ke go phela ka go dumelelana le Lentšu la Modimo le go ithuta go Morwa wa gagwe, Jesu Kriste. Jesu o rutile barutiwa ba gagwe go rapela Modimo ka moya le ka therešo, gomme a ba laela go dira barutiwa. (Mat. 28:19, 20; Joh. 4:24) Ge re phela ka go dumelelana le ditaelo tša Jesu, re thabiša Jehofa le go hwetša ditšhegofatšo tša Gagwe.
2. Lekgolong la pele la nywaga, ba bantši ba ile ba arabela bjang molaetšeng wa Mmušo gomme ke’ng seo se bego se bolelwa ke go ba wa “Tsela”?
2 Ge bao “ba nago le tshekamelo e swanetšego ka bophelo bjo bo sa felego” ba e-ba badumedi gomme ba kolobetšwa, re na le mabaka a kwalago a gore re re go bona, “Le a amogelwa tseleng e di phalago tšohle ya bophelo!” (Dit. 13:48) Lekgolong la pele la nywaga la Mehla ya Rena, batho ba dikete bao ba tšwago ditšhabeng tše di fapa-fapanego ba ile ba amogela therešo gomme ba bontšha phatlalatša boineelo bja bona go Modimo ka go kolobetšwa. (Dit. 2:41) Baapostola bao ba pele e be e le ba “Tsela.” (Dit. 9:2; 19:23) Polelwana ye e be e le e swanetšego ka gobane bao e ilego ya ba balatedi ba Kriste ba be ba kgomaretše mokgwa wa bophelo woo o bego o theilwe tumelong go Jesu Kriste le go ekišeng mohlala wa gagwe.—1 Pet. 2:21.
3. Ke ka baka la’ng batho ba Jehofa ba kolobetšwa, gomme ke batho ba bakae bao ba kolobeditšwego nywageng e lesome e fetilego?
3 Modiro wa go dira barutiwa o oketšegile kudu mehleng ye ya bofelo gomme ga bjale o dirwa dinageng tše di fetago tše 230. Nywageng e lesome e fetilego, batho ba fetago ba 2 700 000 ba ile ba dira phetho ya go hlankela Jehofa gomme ba kolobetšwa e le pontšho ya go ineela ga bona go yena. Ye ke palo-gare ya batho ba 5 000 beke le beke! Phetho ya go kolobetšwa e theilwe go rateng Modimo, go tsebeng Mangwalo le go dumeleng go seo a se rutago. Kolobetšo ke selo sa bohlokwa bophelong bja rena, ka gobane ke mathomo-mayo a tswalano e botse le Jehofa. E bile ke pontšho ya go holofela gore o tla re thuša go mo hlankela ka potego, bjalo ka ge a thušitše bahlanka ba gagwe ba bogologolo go sepela tseleng ya gagwe.—Jes. 30:21.
Ke ka Baka La’ng o Swanetše go Kolobetšwa?
4, 5. Bolela tše dingwe tša ditšhegofatšo le mehola ya go kolobetšwa.
4 Mohlomongwe o ithutile ka Modimo, o dirile diphetogo bophelong bja gago gomme ga bjale o mogoeledi yo a sa kolobetšwago. Re a go reta ka tšwelopele yeo. Eupša na o ineetše go Modimo ka thapelo gomme na o ikemišeditše go kolobetšwa? Go tšwa go seo o ithutilego sona Beibeleng, mohlomongwe o a tseba gore bophelo bja gago bo swanetše go lebiša tlhokomelo tabeng ya go reta Jehofa, e sego feela tabeng ya go ithabiša goba go hwetša mahumo. (Bala Psalme 148:11-13; Luka 12:15) Ka gona, go kolobetšwa go tliša ditšhegofatšo le mehola efe?
5 Bjalo ka Mokriste yo a ineetšego, bophelo bja gago bo tla ba le morero o mogolo kudu. O tla thaba ka gobane o dira thato ya Modimo. (Baroma 12:1, 2) Moya o mokgethwa wa Jehofa o tla dira gore o be le dika tša Modimo tše bjalo ka khutšo le tumelo. (Bagal. 5:22, 23) Modimo o tla araba dithapelo tša gago le go šegofatša maiteko a gago a go dumelelanya bophelo bja gago le Lentšu la gagwe. O tla thabela bodiredi bja gago gomme go phela ka tsela yeo Modimo a e amogelago go tla matlafatša kholofelo ya gago ya bophelo bjo bo sa felego. Go oketša moo, go ineela le go kolobetšwa go tla bontšha gore ruri o nyaka go ba yo mongwe wa Dihlatse tša Jehofa.—Jes. 43:10-12.
6. Kolobetšo ya rena e tsebatša’ng?
6 Ka go ineela go Modimo le go kolobetšwa, re tsebatša phatlalatša gore re ba Jehofa. Moapostola Paulo o ngwadile gore: “Ge e le gabotse, ga go le o tee wa rena yo a iphelelago, gomme ga go le o tee yo a ikhwelago; gobane ge re phela, re phelela Jehofa, le ge re e-hwa, re hwela Jehofa. Ka baka leo, ge re phela le ge re e-hwa re ba Jehofa.” (Baroma 14:7, 8) Modimo o re neile seriti ka go re nea tokologo ya boikgethelo. Ge ka go tia re kgetha go kgomarela tsela ye ka gobane re rata Modimo, re thabiša pelo ya gagwe. (Die. 27:11) Kolobetšo ya rena e bontšha gore re ineetše go Modimo e bile re tsebatša phatlalatša gore Jehofa ke Mmuši wa rena. E bontšha gore re kgethile go ema ka lehlakoreng la gagwe mabapi le kgang ya legohle ya bogoši. (Dit. 5:29, 32) Jehofa le yena o ba le rena. (Bala Psalme 118:6.) Le gona kolobetšo e re bulela tsela ya go hwetša ditšhegofatšo tše dingwe tše dintši tša moya gona bjale le nakong e tlago.
Go Šegofatšwa ka Borwarre bjo Lerato
7-9. (a) Ke’ng seo Jesu a ilego a se kgonthišetša bao ba ilego ba tlogela dilo ka moka gomme ba mo latela? (b) Kholofetšo ya Jesu yeo e begilwego go Mareka 10:29, 30 e phethagatšwa bjang?
7 Moapostola Petro o itše go Jesu: “Bona! Re tlogetše dilo ka moka gomme ra go latela; gabotse-botse re tla hwetša’ng?” (Mat. 19:27) Petro o be a nyaka go tseba gore ke eng seo yena le barutiwa ba bangwe ba Jesu ba bego ba tla se hwetša nakong e tlago. Gore ba ineele ka mo go feletšego modirong wa go bolela ka Mmušo, ba ile ba ikgafa kudu. (Mat. 4:18-22) Ke’ng seo Jesu a ilego a ba kgonthišetša sona?
8 Go ya ka pego ya Mareka e swanago le ye, Jesu o itše barutiwa ba gagwe ba be ba tla ba karolo ya borwarre bja moya. O itše: “Ga go yo a tlogetšego ntlo goba bana babo goba dikgaetšedi goba mmagwe goba tatagwe goba bana goba mašemo ka baka la-ka le ka baka la ditaba tše dibotse yo mo nakong ye a ka se hwetšego ga lekgolo dintlo le bana babo le dikgaetšedi le bo-mma le bana le mašemo, gotee le ditlaišego, gomme tshepedišong e tlago ya dilo o tla hwetša bophelo bjo bo sa felego.” (Mar. 10:29, 30) Bakriste ba lekgolong la pele la nywaga, ba bjalo ka Lidia, Akhwila, Perisila le Gayo, ba be ba le gare ga bao ba ilego ba bula ‘dintlo’ tša bona gomme ba ba ‘bana babo bona le dikgaetšedi le bo-mma’ go badumedi-gotee le bona, go etša ge Jesu a be a holofeditše.—Dit. 16:14, 15; 18:2-4; 3 Joh. 1, 5-8.
9 Seo Jesu a se boletšego se phethagala kudu lehono. “Mašemo” ao balatedi ba gagwe ba a tlogelago a šupa bophelong bjoo ba bantši, go akaretša le baromiwa, ditho tša lapa la Bethele, bahlanka ba ditšhaba-tšhaba le ba bangwe, ba bo tlogelago ka go rata e le gore ba tšwetše pele dikgahlego tša Mmušo dinageng tše di fapa-fapanego. Bana babo rena ba bantši le dikgaetšedi ba tlogetše magae a gabo bona e le gore ba nolofatše maphelo a bona gomme re thabišwa ke go kwa diphihlelo tša bona tšeo di bontšhago kamoo Jehofa a ba hlokometšego ka gona le kamoo tirelo yeo ba mo direlago yona e dirilego gore ba thabe. (Dit. 20:35) Go oketša moo, bahlanka ka moka ba Jehofa bao ba kolobeditšwego ba ka thabela ditšhegofatšo tša go “tsoma mmušo pele le toko ya [Modimo]” e le karolo ya borwarre bja Bokriste bja lefase ka bophara.—Mat. 6:33.
Go Dula o Šireletšegile Moo o “Phêmêlwaxo”
10, 11. Lefelo leo go lona re “phêmêlwaxo ke Yo-xodimo-dimo” ke’ng, gona re ka tsena bjang go lona?
10 Boineelo le kolobetšo di feleletša ka tšhegofatšo e nngwe e humilego—tokelo ya go dula moo o “phêmêlwaxo ke Yo-xodimo-dimo.” (Bala Psalme 91:1.) Le ke lefelo la seswantšhetšo la tšhireletšego le polokego—boemo bja go šireletšwa dikotsing tša moya. Ke lefelo la ‘phemelo’ goba leo le utegilego ka gobane ga le tsebje ke batho bao ba sa lebelelego dilo ka leihlo la moya le bao ba sa botego Modimo. Ge re phela ka go dumelelana le boineelo bja rena le ka go bontšha kholofelo e feletšego go Jehofa, ge e le gabotse re re: “O ’thšabêlô sa-ka, ’me O sebô sa-ka; O Modimo wa-ka yo ke mmotilexo.” (Ps. 91:2) Jehofa Modimo e ba lefelo la rena le le šireletšegilego la bodulo. (Ps. 91:9) Ke’ng se se fetago se seo motho a ka se nyakago?
11 Le gona, go ba lefelong la ‘phemelo’ la Jehofa go bolela gore re šegofaditšwe ka tokelo ya go hlagolela tswalano ya kgaufsi kudu le yena. Se se thoma ka boineelo le kolobetšo. Ka morago ga moo, re hlagolela tswalano le Modimo ka go batamela kgaufsi le yena ka go ithuta Beibele, go rapela go tšwa pelong le ka go mo kwa ka mo go feletšego. (Jak. 4:8) Ga go motho yo a kilego a ba kgaufsi le Jehofa kudu go feta Jesu, yoo ka mehla a bego a dutše a holofela Mmopi. (Joh. 8:29) Ka gona, anke re se keng ra belaela Jehofa goba kganyogo ya gagwe le bokgoni bja go re thuša go phethagatša keno ya rena ya boineelo. (Mmo. 5:4) Ditokišetšo tša moya tšeo Modimo a di diretšego batho ba gagwe ke bohlatse bjo bo sa ganetšegego bja gore ruri o a rata e bile o nyaka gore re atlege ge re mo hlankela.
Tšeela Godimo Paradeise ya Rena ya Moya
12, 13. (a) Paradeise ya moya ke’ng? (b) Re ka kgona bjang go thuša bao ba sa tšwago go thoma go kopanela?
12 Boineelo le kolobetšo di re bulela tsela ya go dula paradeiseng ya moya yeo e šegofaditšwego. Ke lefelo la moswana-noši la moya leo re dulago le badumedi-gotee go lona, bao ba lego khutšong le Jehofa Modimo le magareng ga bona. (Ps. 29:11; Jes. 54:13) Lefase ga le na selo seo se ka bapišwago le paradeise ya rena ya moya. Se se bonala kudu dikopanong tša ditšhaba-tšhaba, moo bana babo rena le dikgaetšedi bao ba tšwago ditšhabeng, malemeng le ditlogong tše dintši ba kopanago lefelong leo le nago khutšo, botee le lerato la borwarre.
13 Paradeise ya moya yeo re e thabelago e fapana kudu le maemo a mabe ao a lego gona lefaseng lehono. (Bala Jesaya 65:13, 14.) Ka go tsebatša molaetša wa Mmušo, re na le tokelo ya go laletša ba bangwe gore ba tle paradeiseng ya moya. E bile ke tokelo go thuša ba bangwe bao ba sa tšwago go thoma go kopanela le phuthego gomme ba tla holwa ke go tlwaetšwa bodireding. Ka ge re hlahlwa ke bagolo, re ka ba le tokelo ya go thuša ba bangwe bao ba sa tšwago go thoma go kopanela, go etša ge Akhwila le Perisila ba ‘hlathollotše Apollo tsela ya Modimo ka mo go nepagetšego.’—Dit. 18:24-26.
Tšwela Pele o Ithuta go Jesu
14, 15. Re na le mabaka afe a kwagalago a go tšwela pele re ithuta go Jesu?
14 Re na le mabaka ao a kwagalago a go tšwela pele re ithuta go Jesu. Pele ga ge e ka ba motho wa nama, Jesu o feditše nywaga e dikete tše di sa tsebjego a šoma gotee le Tatagwe. (Die. 8:22, 30) O be a tseba gore tsela e di phalago tšohle ya bophelo e theilwe go hlankeleng Modimo le go hlatseleng therešo. (Joh. 18:37) Go be go le molaleng go Jesu gore tsela le ge e le efe ya bophelo e be e tla ba ya boithati le ya nakwana. O be a tseba gore o tla lekwa o šoro le go bolawa. (Mat. 20:18, 19; Baheb. 4:15) Bjalo ka Mohlala wa rena, o re rutile kamoo re ka dulago re botega.
15 Nakwana ka morago ga gore Jesu a kolobetšwe, Sathane o ile a mo leka gore a tlogele tsela e phalago tšohle ya bophelo—eupša ga se a atlega. (Mat. 4:1-11) Se se re ruta gore go sa šetšwe seo Sathane a ka se dirago, re ka dula re botega. Gantši o lebiša tlhokomelo go bao ba nyakago go kolobetšwa gaešita le go bao ba sa tšwago go kolobetšwa. (1 Pet. 5:8) Kganetšo e ka tšwa go ditho tša lapa tšeo di nago le maikemišetšo a mabotse eupša di boditšwe maaka ka Dihlatse tša Jehofa. Lega go le bjalo, diteko tše bjalo di re nea sebaka sa go bonagatša dika tše di swanago le tša Kriste, tše bjalo ka tlhompho le go ba šedi ge re araba dipotšišo le go nea bohlatse. (1 Pet. 3:15) Ka baka leo, diphihlelo tše di ka ba le mafelelo a mabotse go bao ba re theetšago.—1 Tim. 4:16.
Kgomarela Tsela e di Phalago Tšohle ya Bophelo!
16, 17. (a) Ke dinyakwa dife tše tharo bakeng sa bophelo tšeo di hwetšwago go Doiteronomio 30:19, 20? (b) Ke bjang Jesu, Johane le Paulo ba ilego ba thekga seo Moše a se ngwadilego?
16 Nywaga e ka bago e 1 500 pele Jesu a e-tla lefaseng, Moše o ile a kgothaletša Baisiraele go kgetha tsela e di phalago tšohle ya bophelo yeo e bego e hwetšagala mehleng yeo. O itše: “Lehono lexodimo le lefase ké dihlatse tša-ka xe ke beile bophelô le lehu, le thšexofatšô le thoxô, pele xa lena. Hlê ikxetheleng bophelô xore Le phelê, lena le bana ba lena, Lè le ba ba rataxo Morêna Modimo wa lena, Lè e-kwa se a se bolêlaxo, Lè mo xomaretše.” (Doit. 30:19, 20) Baisiraele ba ile ba ipontšha ba sa botegele Modimo, eupša dinyakwa tše tharo tša bohlokwa bakeng sa bophelo tšeo di boletšwego ke Moše ga se tša fetoga. Di ile tša bolelwa gape ke Jesu le ba bangwe.
17 Sa pele, ‘re swanetše go rata Jehofa Modimo wa rena.’ Re bontšha gore re rata Modimo ka go dira dilo ka go dumelelana le ditsela tša gagwe tša go loka. (Mat. 22:37) Sa bobedi, ‘re swanetše go theetša Jehofa’ ka go ithuta Lentšu Modimo le go kwa melao ya gagwe. (1 Joh. 5:3) Se se bolela gore re be gona dibokeng tša Bokriste ka mehla, moo Beibele e ahla-ahlwago gona. (Baheb. 10:23-25) Sa boraro, ‘re swanetše go kgomarela Jehofa.’ Go sa šetšwe seo re ka lebeletšanago le sona, anke ka mehla re bontšheng tumelo go Modimo le Morwa wa gagwe.—2 Bakor. 4:16-18.
18. (a) Morokami o ile wa hlalosa therešo bjang ka 1914? (b) Re swanetše go ikwa bjang ka seetša sa therešo lehono?
18 Ke tokelo e kgolo gakaakaang go phela ka go dumelelana le therešo ya Beibele! Ka 1914, go ile gwa gatišwa taba ye ya bohlokwa go Morokami, wa re: “Na ga re batho ba šegofaditšwego le ba thabilego? Na Modimo wa rena ga se yo a botegago? Ge e ba go e na le o mongwe yo a tsebago se sengwe se se kaone, anke a se amogele. Ge e ba go e na le o mongwe wa lena yo a ilego a hwetša se sengwe se se kaone, re holofela gore o tla re botša. Ga go na selo se se kaone seo re se tsebago goba seo se nyakilego e le se sebotse go etša seo re se hweditšego ka Lentšung la Modimo. . . . Ga go na taba yeo e bolelwago ka molomo goba yeo e ngwadilwego yeo e ka hlalosago khutšo, lethabo le tšhegofatšo tšeo go tseba Modimo wa therešo go di tlišitšego dipelong le maphelong a rena. Taba ya Bohlale bja Modimo, Toka, Matla le Lerato e kgotsofatša ka botlalo dikganyogo tša menagano ya rena gotee le tša dipelo ya rena. Ga re sa nyaka se sengwe gape. Ga go sa na seo re ka se kganyogago ge e se go kwešiša ka botlalo Taba ye yeo e kgahlišago.” (Morokami [wa Seisemane] wa December 15, 1914, matlakala 377-378) Tebogo ya rena bakeng sa seetša sa moya le therešo ga e fetoge. Ke therešo gore ga bjale re na le mabaka a oketšegilego a go thabela gore re ‘sepela seetšeng sa Jehofa.’—Jes. 2:5; Ps. 43:3; Die. 4:18.
19. Ke ka baka la’ng bao ba swanelegelago kolobetšo ba swanetše go tšea kgato yeo ntle le go senya nako?
19 Ge e ba o nyaka go ‘sepela seetšeng sa Jehofa’ eupša o se wa hlwa o e-ba Mokriste yo a ineetšego le go kolobetšwa, o se ke wa senya nako. Dira sohle seo se nyakegago gore o fihlelele ditshwanelego tša Beibele tša go kolobetšwa—tsela ya moswana-noši ya go bontšha tebogo bakeng sa seo Modimo le Kriste ba re diretšego sona. Nea Jehofa selo sa gago se sekaone-kaone—bophelo bja gago. Bontšha gore o ikemišeditše go dira thato ya Modimo ka go latela Morwa wa gagwe. (2 Bakor. 5:14, 15) Ntle le pelaelo, yeo ke tsela e di phalago tšohle ya bophelo!
O be o tla Araba Bjang?
• Kolobetšo ya rena e bontšha’ng?
• Go ineela go Modimo le go kolobetšwa go tliša ditšhegofatšo dife?
• Ke ka baka la’ng go ithuta go Jesu go le bohlokwa gakaakaa?
• Ke’ng seo se tla re thušago go kgomarela tsela e di phalago tšohle ya bophelo?
[Dipotšišo tša Thuto]
[Seswantšho go letlakala 25]
Go kolobetšwa ga gago go bontšha gore o kgethile tsela e di phalago tšohle ya bophelo
[Diswantšho go letlakala 26]
Na o šireletšegile lefelong leo o “phêmêlwaxo” go lona?