Sedirišwa sa go Thuša Bafsa go Gopola Mmopi wa Bona

NYWAGENG e ka bago e 3 000 e fetilego, monna yo bohlale Solomone o ngwadile gore: “Xopola Mmopi wa xaxo Ò sa le yo mofsa.” (Mmo. 12:1) Bafsa ba Bakriste ga bjale ba na le sedirišwa sa go ba thuša go dira bjalo. Puku ya Questions Young People Ask—Answers That Work, Volume 2, e lokolotšwe Kopanong ya Selete ya Dihlatse tša Jehofa ya “Go Hlahlwa ke Moya wa Modimo,” yeo e bego e swerwe lefaseng ka bophara go tloga ka May 2008 go fihla ka January 2009. Gaešita le ge e se gona ga bjale ka Sepedi, dihlogo tša yona tše di tšwelelago sehlogong se di fetoletšwe.

Letlakaleng la mathomo la puku yeo go na le lengwalo le le tšwago go Sehlopha se Bušago leo le yago go bafsa. Ka boripana, le re: “Re rapela go tšwa pelong gore tsebišo yeo e lego ka kgatišong ye e le thuše go lebeletšana le dikgateletšo le diteko tšeo bafsa ba lebeletšanago le tšona lehono, gomme e le bontšhe kamoo le ka dirago diphetho tšeo di dumelelanago le thato ya Modimo.”

Batswadi ka mo go swanetšego ba nyaka go godiša bana ba bona ka “tayo le tlhahlo ya monagano ya Jehofa.” (Baef. 6:4) Lega go le bjalo, ge bafsa ba bantši ba se na go tsena mahlalagading, ga ba sa ikholofela gomme ba nyaka tlhahlo. Ge e ba o le motswadi wa ngwana yo a lego mahlalagading, o ka thuša bjang ngwana wa gago go holwa ke kgatišo ye? Ditšhišinyo ke tše di latelago.

▪ Ikhweletše kopi ya kgatišo ye gomme o tlwaelane le dikagare tša yona. Se se akaretša se se fetago go fo e bala. Katanela go kwešiša tsela yeo e hlalosago ditaba ka yona. Go e na le go fo botša bafsa seo se lokilego le seo se fošagetšego, puku ye e katanela go tlwaetša ‘matla a bona a go hlatha.’ (Baheb. 5:14) E ba nea ditšhišinyo tše di šomago tša kamoo ba ka emelago se se nepagetšego ka gona. Ka mohlala, Kgaolo 15 (“Nka Lwantšhana Bjang le Kgateletšo ya Dithaka?”) e botša bafsa go dira se sengwe go e na le go fo gana. E hlalosa kamoo ba ka dirišago melao ya metheo ya Beibele bakeng sa go rarolla mathata le kamoo ba ka arabelago ka gona maemong ao ba kopanago le ona e le gore ba kgone go “araba yo mongwe le yo mongwe.”—Bakol. 4:6.

▪ Diriša dikarolo tša puku tšeo di šušumeletšago mmadi go arabela. Le ge dikarolo tše di hlametšwe  bafsa, ke ka baka la’ng o sa ngwale mo go swanetšego dikarolong tšeo ka koping ya gago? * Ka mohlala, ge o hlahloba dipotšišo tše pedi tšeo di lego mabapi le go beana mabaka go letlakala 16, leka go nagana kamoo o bego o ikwa ka gona ge o be o sa le nywageng yeo ngwana wa gago a lego go yona. Dikgobeng tšeo di lego moo, mohlomongwe o tla rata go ngwala dikarabo tša dipotšišo ka tsela yeo o bego o tla di araba ka yona ka nako yeo. Ke moka,o ka ipotšiša gore: ‘Tsela yeo ke ikwago ka yona tabeng ye e fetogile bjang go theoša le nywaga? Ke kwešišo efe yeo ke ilego ka e hwetša ge ke be ke le mahlalagading, gona nka e fetišetša bjang go ngwana wa-ka ka katlego?’

▪ Hlompha seo ngwana a se ngwadilego ka sephiring. Dikarolo tša puku tšeo di šušumeletšago mmadi go arabela di hlametšwe go gogela ngwana wa gago le go dira gore a nee karabo ka go ngwala goba ka monagano. Pakane ya gago ke go bona seo se lego ka pelong ya gagwe e sego seo se lego ka pukung ya gagwe. Go letlakala 3 la karolo yeo e nago le sehlogo se se rego “Lengwalo Leo le Yago go Batswadi,” puku ye e šišinya gore: “Gore o kgothaletše ngwana wa gago yo a lego mahlalagading go ngwala ka pukung ya gagwe ka bolokologi, hlompha seo a se ngwadilego a le ka sephiring. Ka morago ga nako e itšego, a ka go botša ka seo a se ngwadilego.”

Thušo Bakeng sa Thuto ya Beibele ya Lapa

Young People Ask, Volume 2, ke thušo e botse yeo e ka dirišwago nakong ya Borapedi bja Lapa. Ka ge puku ye e se na dipotšišo tšeo di botšišwago serapeng se sengwe le se sengwe, o ka e diriša bjang? Ke ka baka la’ng o sa itlhamele lenaneo la thuto ka go diriša mokgwa o atlegago baneng ba gago?

Ka mohlala, malapa a mangwe a ka thabela go ipha dinako tša go itlwaetša ge a ahla-ahla “Lenaneo la go Ganetšana le Kgateletšo ya Dithaka” leo le lego go matlakala 132 le 133. Potšišo ya mathomo moo e ka thuša morwa goba morwedi wa gago go lemoga bothata bjoo e lego tlhohlo e kgolo go yena. Potšišo ya bobedi e bontšha boemo bjoo gantši bothata bjo bo tšwelelago go bjona. Ka morago ga go ahla-ahla ditla-morago tša go ineela goba go ganetša kgateletšo ya dithaka, ngwana wa gago o kgopelwa go itokišeletša dikarabo tše di ka hlokomologago, tša ganetša goba tša bušetša kgateletšo yeo go beng ba yona. Thuša morwa goba morwedi wa gago gore a be le bokgoni bja go bea ditaba le go lokišeletša dikarabo tšeo a ikwago a ka di nea le tšeo a ka kgonago go di diriša ka kholofelo le ka kgodišego.—Ps. 119:46.

Sedirišwa sa Poledišano

Young People Ask, Volume 2, e kgothaletša bafsa go boledišana le batswadi ba bona. Ka mohlala, mapokisi a rego “Nka Boledišana Bjang le Tate Goba Mma ka Dikopano tša Botona le Botshadi?”  (matlakala 63-64) le “Boledišana le Batswadi ba Gago” (letlakala 189) a nea ditšhišinyo tše šomago tša kamoo o ka thomago poledišano ka dilo tšeo go sego bonolo go bolela ka tšona. Ngwanenyana yo mongwe wa nywaga e 13 o ngwadile gore, “Puku ye e nneile sebete sa go bolela le batswadi ba-ka mabapi le dilo tšeo di bego di dutše di le monaganong wa-ka—gotee le dilo tšeo ke di dirilego.”

Puku ye e bula dibaka tša poledišano ka tsela e nngwe gape. Mafelelong a kgaolo e nngwe le e nngwe go na le lepokisi leo le nago le sehlogo seo se rego “O Nagana’ng?” Go e na le go fo ba poeletšo, le ka dirišwa bjalo ka thulaganyo ya dipoledišano tša lapa. Go ya mafelelong a kgaolo e nngwe le e nngwe go na le lepokisi le le nago le sehlogo se se rego “Kgato Yeo o Rulaganyago go e Tšea!” Lepokisi le le nea bafsa sebaka sa go ngwala ditsela tše dingwe tšeo ka tšona ba ka dirišago seo ba ithutilego sona kgaolong yeo. Karolwana ya mafelelo ya lepokisi le le rego “Kgato Yeo o Rulaganyago go e Tšea!” e re: “Seo nka ratago go se botšiša batswadi ba-ka mabapi le taba ye ke gore . . . ” Seo se ka thuša bafsa go lebelela batswadi ba bona e le bao ba ka ba neago kgothatšo e botse.

Fihlelela Pelo!

Bjalo ka motswadi, pakane ya gago ke go fihlelela pelo ya ngwana wa gago. Puku ya Young People Ask, Volume 2, e ka go thuša go dira bjalo. Ela hloko kamoo tate yo mongwe a ilego a kgona go diriša puku ye bakeng sa go dira gore morwedi wa gagwe a kgone go mo ntšhetša sa mafahleng.

“Nna le Rebekah re na le mafelo a mabotse ao re ratago go ya go ona gore re bethwe ke moya, re sepele ka dipaesekele goba ka koloi. Ke hweditše mafelo a go swana le a a mo nea sebaka sa gore a lokologe.

“Karolo ya mathomo yeo re ilego ra e ahla-ahla pukung ye e be e le lengwalo leo le tšwago go Sehlopha se Bušago le ‘Lengwalo Leo le Yago go Batswadi.’ Ke be ke nyaka gore morwedi wa-ka a tsebe gore go etša ge go bontšhitšwe go letlakala 3, ga se a swanela go boifa go ngwala ka bolokologi ka pukung ya gagwe. Nka se nyake go bona seo a se ngwadilego.

“Ke be ke dumelela Rebekah go kgetha dikgaolo tšeo a bego a ka rata gore re boledišane ka tšona ka tsela yeo a bego a rata gore di latelane ka yona. E nngwe ya dikgaolo tša mathomo tšeo a ilego a di kgetha ke ya gore ‘Na ke Swanetše go Bapala Dipapadi tša Elektroniki?’ Ke be ke sa nagane gore a ka kgetha yeo! Lega go le bjalo, o be a e-na le mabaka a go dira bjalo. Bagwera ba gagwe ba bantši ba be ba bapala dipapadi tše sehlogo. Ke be ke sa tsebe gore di tletše ka bošoro le polelo e gobogilego gakaakaa! Eupša tše ka moka di ile tša tšwelela ge re be re hlahloba lepokisi le le rego “Kgato Yeo o Rulaganyago go e Tšea!” leo le lego go letlakala 25. Lepokisi leo le ile la thuša Rebekah go itokišeletša karabo yeo a tlago go e diriša ge yo mongwe a ka leka go mo gapeletša go bapala dipapadi tšeo.

“Ga bjale, Rebekah ga a sa boifa go mpotša seo a se ngwadilego ka pukung ya gagwe. Thuto ya rena e dira gore go be le dipoledišano tšeo di sa felego. Re šiedišana ka go e bala, ke moka o nyaka go bolela ka dilo tše dintši, go akaretša diswantšho le mapokisi. Seo se mpha sebaka sa go mmotša kamoo go bego go le ka gona ge ke be ke sa le nywageng ya gagwe, gomme o mpotša kamoo dilo di lego ka gona lehono. O nyaka go boledišana le nna ka selo se sengwe le se sengwe.”

Ge e ba o le motswadi, ga go na pelaelo gore o ile wa thaba ge go be go lokollwa puku ye. Ga bjale o na le sebaka sa go e diriša gabotse. Sehlopha se Bušago se kganyoga eka puku ya Questions Young People Ask—Answers That Work, Volume 2, e ka ba tšhegofatšo lapeng la gago. Eka e ka thuša bohle—kudu-kudu bafsa ba rena ba ba rategago—go ‘tšwela pele ba sepela ka moya.’—Bagal. 5:16.

[Mongwalo wa tlase]

[Lepokisi go letlakala 30]

Seo Bafsa ba Bangwe ba se Bolelago

“Wo ke mohuta wa puku yeo o swanetšego go dula fase o swere phentshele gomme wa e bala ka go naganišiša. Taba ya gore e dirilwe bjalo ka puku yeo o kgonago ngwala ditaba tša gago ka noši e dira gore o kgone go naganišiša o le noši o e-na le pakane ya go itirela tsela e kaone ya bophelo.”—Nicola.

“Ke gateletšwa kudu gore ke beane mabaka, gaešita le ke batho bao ba nago le maikemišetšo a mabotse. Karolo ya mathomo ya puku ye e nkgodišitše gore go sa šetšwe seo batho ba se bolelago, ga se ka lokela go beana mabaka.”—Katrina.

“Lepokisi leo le rego ‘Na o Nagana ka go Kolobetšwa?’ le nthušitše go tšeela godimo kolobetšo ya-ka. Le nthušitše go seka-seka mekgwa ya-ka ya go ithuta le go rapela.—Ashley.

“Gaešita le ge batswadi ba-ka ba Bakriste ba ile ba nthuta go tloga bjaneng, puku ye e dirile gore ke kgone go ikemela mabapi le megato yeo ke swanetšego go e gata bophelong bja-ka. E nthušitše gape gore ke ikwe ke lokologile ge ke e-na le batswadi ba-ka.”—Zamira.

[Seswantšho go letlakala 31]

Batswadi tlwaelanang le puku ye

[Seswantšho go letlakala 32]

Ipeele pakane ya go fihlelela pelo ya ngwana wa gago