“Tshwanelo ya Ngwana ya go Gola Moyeng”

KA DECEMBER 9 2008, Sekolo sa Sweden sa Ditshwanelo tša Bana se ile sa swara seminari ya moswana-noši yeo e nago le sehlogo se se rego: “Tshwanelo ya Ngwana ya go Gola Moyeng.” Diboledi tšeo di bego di emela Kereke ya Sweden, mekgatlo e mengwe ya dikereke tša Bojakane, bodumedi bja Mamoseleme le mekgatlo ya ditekanyetšo tša batho, di ile tša bolela dikgopolo tša tšona tše dintši mabapi le taba ye.

Gare ga diboledi tšeo go be go e-na le moruti yo a boletšego gore: “Ga go na motho yo a ka hlalosago ka mo go nepagetšego le ka mo go kwagalago kamoo dipego tša Beibele di lego bohlokwa kudu ka gona kgolong ya bana ya moya.” Mangwalo a kgotsofatša bjang dinyakwa tša bana tša moya?

Moruti yoo o itše: “Ditemana le dipego tšeo di nea bana tsebišo yeo e ba thušago go naganišiša ba le noši.” O boletše ka “kanegelo ya Adama le Efa, Kaine le Abele, Dafida le Goliata, ya go belegwa ga Jesu, ya molekgetho yo a bitšwago Sakeo, papišo ya morwa wa lehlaswa le ya Mosamaria wa kgaugelo.” Tše di ile tša bolelwa e le “tše dingwe tša dipego tšeo e lego mehlala tšeo di ka šomago e le tlhahlo tseleng ya [ngwana] ya go nagana ditabeng tše bohlokwa tše bjalo ka boradia, go lebalela, go dira poelanyo, lehloyo, go phuhlama ga boitshwaro, go lokiša ditaba le go ba le lerato la borwarre leo le se nago boithati.” O okeditše ka gore: “Ditemana tše di nea mehlala yeo motho a ka phelago ka yona, a e diriša le go itlwaetša yona.”

Ke therešo gore ke selo se sebotse go kgothaletša gore Beibele e balwe. Lega go le bjalo, na ruri bana ba ka kgona go “naganišiša ba le noši” ka seo ba se balago Mangwalong le go dira diphetho tše di nepagetšego?

Gaešita le batho ba bagolo ba nyaka go hlalosetšwa Mangwalo ao ba a badilego. Ka mohlala, Beibele e re botša ka monna yo a ilego a palelwa ke go kwešiša bomoya bja kgonthe ge a be a ‘naganišiša a le noši.’ Monna yoo e be e le molaki wa Ethiopia. O be a bala boporofeta bja Jesaya eupša a sa kwešiše seo bo se bolelago. Ka ge a be a nyaka go kwešiša molaetša wa boporofeta, o ile a amogela tlhaloso yeo a ilego a e newa ke morutiwa Filipi. (Dit. 8:26-40) Ga se feela monna yoo wa Ethiopia yo a bego a nyaka go hlalosetšwa. Ka moka ga rena re nyaka go hlalosetšwa dikarolo tša Mangwalo—kudu-kudu bana.

Beibele e re lemoša ka gore: “Bošilo . . . bo xwêrana le pelo ya mošemanyana.” (Die. 22:15) Bana ba nyaka tlhahlo gomme batswadi ba bona ba na le boikarabelo bja go ba nea thuto ya boitshwaro le ya moya yeo e theilwego Beibeleng le seo se rutwago phuthegong ya Bokriste. Bana ba na le tshwanelo ya go hwetša tlwaetšo e bjalo. Go tloga ge e sa le ba banyenyane, ba nyaka thušo ya go thea motheo o tiilego Beibeleng gore ba gole moyeng e le gore ba tle ba be “batho ba godilego, bao ka go diriša matla a bona a tlwaeditšwego a go hlatha, ba kgethologanyago se se nepagetšego le se se fošagetšego.”—Baheb. 5:14.