Dipotšišo tše Tšwago go Babadi

Na Hesekiele 18:20, yeo e rego “morwa wa motho a ka se kê a rwala molato wa tat’axwe,” e ganetšana le Ekisodo 20:5, yeo e rego Jehofa o tla ‘lata bokgopo bja bo-tatago bana go bana ba bona’?

Ditemana tše ga di ganetšane. Taba e nngwe e lebišitše tlhokomelo boikarabelong bja motho ka o tee ka o tee, gomme e nngwe e bontšha therešo ya gore bobe bja motho bo ka ba le mafelelo a mabe go ditlogolo tša gagwe.

Taba e dikologilego Hesekiele kgaolo 18 e gatelela gore motho yo mongwe le yo mongwe o tla ikarabela. Temana ya 4 e re: “Xo tlo hwa bophelô bya e a sentšexo.” Go thwe’ng ka monna yo a ‘dirago tše di swanetšego, a ya ka toko’? “Ó tlo phela.” (Hesek. 18:5, 9) Ka gona, ge a fihla nywageng ya go ikarabela, motho yo mongwe le yo mongwe o ahlolwa “xo ya ka ditsela tša xaxwe.”—Hesek. 18:30.

Molao wo wa motheo o bontšhwa ke taba ya Molefi yo a bitšwago Kora. Nakong ya leeto la Baisiraele la lešokeng, Kora o ile a se sa kgotsofalela ditokelo tša gagwe tša tirelo. Maitekong a gagwe a go ikhweletša maemo a boperisita, Kora le ba bangwe ba ile ba rabela kgahlanong le baemedi ba Jehofa e lego Moše le Arone. Ge ka boikgogomošo ba be ba katanela go fihlelela tokelo ye—tokelo yeo ge e le gabotse e bego e sa ba swanela—Jehofa o ile a bolaya Kora le marabele-gotee le yena. (Num. 16:8-11, 31-33) Lega go le bjalo, barwa ba Kora ga se ba ka ba thekga borabele bjoo. Modimo ga se a ka a ba  lebelela ba e-na le molato ka baka la sebe sa tatago bona. Go botegela ga bona Jehofa go ile gwa feleletša ka gore ba phološe maphelo a bona.—Num. 26:10, 11.

Eupša go thwe’ng ka temošo e lego go Ekisodo 20:5, e lego karolo ya Melao e Lesome? Le mo tabeng ye, ela hloko taba e dikologilego. Jehofa o ile a dira kgwerano ya Molao le setšhaba sa Isiraele. Ka morago ga go kwešiša seo se bolelwago ke kgwerano ye, Baisiraele ba ile ba bolela phatlalatša gore: “Tšohle tše Morêna a di boletšexo re tlo di dira.” (Ek. 19:5-8) Ka gona, setšhaba ka moka se ile sa tsena tswalanong e kgethegilego le Jehofa. Ka go rialo mantšu a Ekisodo 20:5 ge e le gabotse a be a lebišitšwe go setšhaba ka moka.

Ge Baisiraele ba be ba botegela Jehofa, setšhaba se be se holega le go thabela ditšhegofatšo tše dintši. (Lef. 26:3-8) Go be go direga se se fapanego ge ba be ba sa botege. Ge setšhaba sa Isiraele se be se hlanoga gomme se šala medimo ya maaka morago, Jehofa o ile a se sa hlwa a se šegofatša le go se šireletša; setšhaba se ile sa welwa ke mathata. (Baa. 2:11-18) Ke therešo gore go ile gwa ba le ba bangwe bao ba ilego ba dula ba botega gomme ba boloka melao ya Modimo go sa šetšwe gore setšhaba se be se hlankela medimo ya diswantšho. (1 Dikx. 19:14, 18) Babotegi ba ile ba lebeletšana le mathata ka baka la dibe tša setšhaba, eupša Jehofa o ile a ba bontšha botho bjo lerato.

Ge go be go bonagala gore setšhaba sa Isiraele se roba melao ya motheo ya Jehofa moo leina la gagwe le bego le gobošwa ditšhabeng, Jehofa o ile a ikemišetša go otla batho ba gagwe ka go ba dumelela gore ba išwe bothopša Babilona. Ke therešo gore kotlo ye e be e akaretša motho ka o tee ka o tee gaešita le batho ba gagwe bjalo ka sehlopha. (Jer. 52:3-11, 27) Ge e le gabotse, Beibele e bontšha gore molato wa Isiraele e be e le o mogolo moo meloko e meraro, e mene goba go feta moo e ilego ya kgongwa ke diphošo tša borakgolokhukhu ba yona, go etša ge Ekisodo 20:5 e bontšha.

Lentšu la Modimo gape le hupere dipego tša malapa ao a ilego a kgongwa ke diphošo tša batswadi ba bona. Moperisita yo a phagamego e lego Eli o ile a rumola Jehofa ka go dumelela “batho ba dihlôla,” e lego barwa ba gagwe, go dula e le baperisita. (1 Sam. 2:12-16, 22-25) Ka ge Eli a be a hlompha barwa ba gagwe go feta Jehofa, Modimo o ile a tsebiša gore lapa la Eli le be le tla tlošwa boemong bja boperisita bjo bogolo, e lego seo se ilego sa thoma ka setlogolo-khukhu sa gagwe, Abiathara. (1 Sam. 2:29-36; 1 Dikx. 2:27) Molao wa motheo woo o lego go Ekisodo 20:5 o bontšhwa gape ke mohlala wa Gehasi. O ile a diriša gampe tokelo ya gagwe ya go ba mohlanka wa Eliša e le gore a ikhole nameng ka go fodišwa ga Tona ya madira a Siria e lego Naamane. A diriša Eliša, Jehofa o ile a mo tsebiša kotlo e rego: “Lephêra la Naemane le tlo xomarêla wêna le bana ba xaxo neng le neng.” (2 Dikx. 5:20-27) Ka gona, ditlogolo tša Gehasi di ile tša kgongwa ke ditla-morago tša sebe sa gagwe.

Bjalo ka Mmopi le Monei wa Bophelo, Jehofa o swanelega ka botlalo go bona gore ke kotlo efe e lokilego le e swanetšego. Ditiragalo tšeo di bontšhitšwego ka mo godimo di bontšha gore bana goba ditlogolo di ka kgongwa ke mafelelo a mabe a sebe sa borakgolokhukhu ba bona. Lega go le bjalo, Jehofa ‘o kwa kgoeletšo tša badiidi,’ gomme batho bao ba tlago go yena ka pelo ka moka ba ka amogelwa ke yena gaešita le go ikwa ba imologile.—Jobo 34:28.

[Seswantšho go letlakala 29]

Kora le marabele-gotee le yena ba ile ba ikarabela ka ditiro tša bona