Mohlape o Tee le Modiši o Tee

“Lena ba le ntatetšego le lena le tla dula didulong tše lesome-pedi tša bogoši, le ahlola meloko e lesome-pedi ya Isiraele.”—MAT. 19:28.

1. Jehofa o ile a dirišana bjang le ditlogolwana tša Aborahama, gona ke ka baka la’ng seo se sa bolele gore o be a tloga a sa rate batho ba bangwe?

JEHOFA o be a rata Aborahama, ka baka leo O ile a bontšha gore o rata ditlogolo tša Aborahama e le ka kgonthe. Ka nywaga-kgolo e fetago e 15, o be a lebelela setšhaba sa Isiraele, ditlogolo tša Aborahama, e le batho ba gagwe bao ba kgethilwego, e le “sethšaba-seruiwa sa xaxwe.” (Bala Doiteronomio 7:6.) Na se se be se bolela gore Jehofa o be a tloga a sa rate batho ba ditšhaba tše dingwe? Aowa. Ka nako yeo, motho yo e bego e se Moisiraele yo a bego a nyaka go rapela Jehofa o be a dumelelwa go ikopanya le setšhaba sa gagwe seo se kgethilwego. Basokologi ba be ba lebelelwa e le karolo ya setšhaba. Ba be ba swanetše go swarwa bjalo ka karolo ya setšhaba. (Lef. 19:33, 34) Le gona, go be go nyakega gore ba boloke melao ka moka ya Jehofa.—Lef. 24:22.

2. Ke tsebišo efe e boifišago yeo Jesu a ilego a e nea, gomme e dira gore re ipotšiše potšišo efe?

² Lega go le bjalo, Jesu o ile a botša Bajuda ba mehleng ya gagwe taba ye e boifišago, a re: “Le tla amogwa mmušo wa Modimo wa newa setšhaba seo se tšweletšago dienywa tša wona.” (Mat. 21:43) Ke bomang bao ba bego ba tla bopa setšhaba se se sefsa, gona rena lehono re kgongwa bjang ke phetogo ye?

Setšhaba se Sefsa

3, 4. (a) Moapostola Petro o ile a utolla bjang setšhaba se sefsa? (b) Ke bomang bao ba bopago setšhaba se se sefsa?

³ Moapostola Petro o ile a utolla ka go lebanya setšhaba se se sefsa. O ile a ngwalela Bakriste-gotee le yena gore: “Le ‘morafo wo o kgethilwego, boperisita bja bogoši, setšhaba se sekgethwa, batho ba e lego leruo le le kgethegilego, gore le bolele ka gohle mabothakga’ a yo a le biditšego lefsifsing gomme a le biletša seetšeng sa gagwe se se makatšago.” (1 Pet. 2:9) Ka ge go boletšwe e sa le pele, Bajuda ba tlhago bao ba amogetšego Jesu e le Mesia e bile ditho tša mathomo tša setšhaba seo se sefsa. (Dan. 9:27a; Mat. 10:6) Ka morago ba bantši bao e sego Baisiraele ba ile ba akaretšwa setšhabeng se, ka gobane Petro o ile a tšwela pele ka gore: “Gobane le kile la se be setšhaba, eupša bjale le setšhaba sa Modimo.”—1 Pet. 2:10.

⁴ Petro o be a bolela ka bomang mo? Mathomong a lengwalo la gagwe, o re: “Go ya ka kgaugelo ya gagwe e kgolo [Modimo] o re tswetše lefsa kholofelong e phelago ka go tsoga ga Jesu Kriste bahung, go ya bohweng bjo bo sa senyegego le bjo bo sa šilafalago le bjo bo sa hwelelego. Bo bolokilwe magodimong bakeng sa lena.” (1 Pet. 1:3, 4) Ka gona, setšhaba se se sefsa se bopša ke Bakriste ba tloditšwego, bao ba nago le kholofelo ya go phela legodimong. Ke “Isiraele wa Modimo.” (Bagal. 6:16) Ge a be a bona pono, moapostola Johane o bone Baisiraele ba ba moya e le ba 144 000. “Ba rekilwe gare ga batho ba le bjalo ka dithakangwaga go Modimo le go Kwana” go hlankela e le “baperisita” le go “buša le [Jesu] ka nywaga e sekete.”—Kut. 5:10; 7:4; 14:1, 4; 20:6; Jak. 1:18.

Na ba Bangwe le Bona ba a Akaretšwa?

5. (a) Polelwana “Isiraele wa Modimo” e šupa go bomang? (b) Ke ka baka la’ng polelwana “Isiraele” e se ka mehla e šupago go Isiraele ya tlhago?

⁵ Ka gona, go molaleng gore “Isiraele wa Modimo” yoo go bolelwago ka yena go Bagalatia 6:16 o šupa feela go Bakriste ba tloditšwego. Lega  go le bjalo, na go na le moo Jehofa a dirišago setšhaba sa Isiraele e le seswantšho, goba papišo yeo e akaretšago Bakriste ba bangwe ka ntle le batlotšwa? Karabo e ka hwetšwa mantšung a a Jesu ao a yago go baapostola ba gagwe ba botegago, a rego: “Ke dira kgwerano le lena go etša ge Tate a dirile kgwerano le nna, ya mmušo, gore le je, le nwe tafoleng ya-ka mmušong wa-ka, gomme le dule didulong tša bogoši gore le ahlole meloko e lesome-pedi ya Isiraele.” (Luka 22:28-30) Se se tla direga nakong ya “go bopša lefsa,” goba ya go mpshafatšwa ga dilo, nakong ya Pušo ya Kriste ya Nywaga e Sekete.—Bala Mateo 19:28.

6, 7. Go ya Mateo 19:28 le Luka 22:30, ke bomang bao ba swantšhetšwago ke “meloko e lesome-pedi ya Isiraele”?

⁶ Ba 144 000 ba tla buša e le dikgoši, baperisita le baahlodi ba legodimong nakong ya Pušo ya Nywaga e Sekete. (Kut. 20:4) Ba tla ahlola le go buša bomang? Go Mateo 19:28 le Luka 22:30, re botšwa gore ba tla ahlola “meloko e lesome-pedi ya Isiraele.” “Meloko e lesome-pedi ya Isiraele” yeo go bolelwago ka yona mo e swantšhetša bomang? E swantšhetša batho ka moka bao ba nago le kholofelo ya go phela lefaseng—bao ba bontšhago tumelo sehlabelong sa Jesu eupša ba sa akaretšwe sehlopheng sa baperisita. (Moloko wa Lefi o be o sa akaretšwe melokong e 12 ya Isiraele ya tlhago.) Bao go bolelwago ka bona mo ge go bolelwa ka meloko e 12 ya Isiraele ke bao ba tla holwago moyeng ke ditirelo tša boperisita tša ba 144 000. Batho bao ba holegago eupša e se baperisita le bona ke batho ba Modimo, gomme o a ba rata le go ba amogela. Ke mo go swanetšego gore ba swantšhwe le batho ba gagwe ba mehleng ya bogologolo.

⁷ Ka mo go swanetšego, ka morago ga gore moapostola Johane a bone Baisiraele ba moya ba 144 000 ba swaelwa sa ruri pele ga masetlapelo a magolo, o ile a bona le palo e sa balegego ya “lešaba le legolo” leo le tšwago “ditšhabeng tšohle.” (Kut. 7:9) Ba ba tla phologa masetlapelo a magolo gomme ba fetela Pušong ya Kriste ya Nywaga e Sekete. Ka nako yeo ba tla tlatšwa ke dibilione tša bao ba tsošitšwego. (Joh. 5:28, 29; Kut. 20:13) Ba ka moka ba tla bopa “meloko e lesome-pedi ya Isiraele” ya seswantšhetšo, yeo e tla ahlolwago ke Jesu le babuši-gotee le yena ba 144 000.—Dit. 17:31; 24:15; Kut. 20:12.

8. Ke bjang ditiragalo tša ngwaga le ngwaga tša Letšatši la Poelanyo di swantšheditšego e sa le pele tswalano yeo e lego gona magareng ga ba 144 000 le moloko ka moka wa batho?

⁸ Tswalano yeo e lego gona magareng ga ba 144 000 le moloko ka moka wa batho e ile ya swantšhetšwa e sa le pele ditiragalong tša ngwaga le ngwaga tša Letšatši la Poelanyo. (Lef. 16:6-10) Moperisita yo a phagamego o be a swanetše go thoma ka go dira sehlabelo ka poo bakeng sa tebalelo ya dibe “a itirêlê poêlanyô, le poêlanyô ya ba lapa la xaxwe.” Ka baka leo, sehlabelo sa Jesu se šoma pele go ba lapa labo la baperisita ba tlasana, bao ba tlago go hlankela le yena legodimong. E bile ka Letšatši leo la Poelanyo ya bogologolo, dipudi tše pedi di be di hlabja bakeng sa dibe tša Baisiraele ba bangwe. Tabeng ye, moo leloko la boperisita le swantšhetšago ba 144 000, Baisiraele ka moka ba swantšhetša bohle bao ba nago le kholofelo ya go phela mo lefaseng. Tlhaloso ye e bontšha gore polelwana “meloko e lesome-pedi ya Isiraele” yeo e lego go Mateo 19:28 ga e šupe go baperisita ba tlasana ba Jesu bao ba tswetšwego ka moya eupša e  akaretša bohle bao ba bontšhago tumelo sehlabelong sa Jesu. *

9. Baperisita bao ba lego ponong ya Hesekiele ba swantšhetša bomang, gomme Baisiraele bao e sego ba leloko la baperisita ba emela bomang?

⁹ Ela hloko mohlala o mongwe. Moporofeta Hesekiele o ile a bona pono e nabilego ya tempele ya Jehofa. (Hesek., dikgao. 40-48) Ponong yeo, moperisita o be a šoma tempeleng, a nea ditaelo le go amogela tayo le tlhahlo tša Jehofa. (Hesek. 44:23-31) Ponong yona yeo, ditho tša meloko e fapanego di be di e-tla go rapela le go neela dihlabelo. (Hesek. 45:16, 17) Ka gona, tabeng ye, baperisita ba emela batlotšwa, mola Baisiraele bao ba e sego ba leloko la baperisita ba emela bao ba nago le kholofelo ya go phela mo lefaseng. Pono ye e gatelela gore dihlopha tše tše pedi di šoma gotee ka go kwana, di etelelwa pele ke sehlopha sa baperisita borapeding bjo bo sekilego.

10, 11. (a) Ke phethagatšo efe e matlafatšago tumelo ya mantšu a Jesu yeo re e bonego? (b) Ke potšišo efe e rotogago mabapi le dinku tše dingwe?

¹⁰ Jesu o boletše ka “dinku tše dingwe,” tšeo di bego di ka se be karolo ya “lešaka” le tee la “mohlatswana” wa balatedi ba gagwe ba tloditšwego. (Joh. 10:16; Luka 12:32) O itše: “Le tšona ke swanetše go di tliša gomme di tla theetša lentšu la-ka, ya ba mohlape o tee le modiši o tee.” Ruri ke mo go matlafatšago tumelo go bona go phethagala ga mantšu a! Dihlopha tše pedi tša batho di kopantšwe—sehlopha se senyenyane sa batlotšwa le lešaba le legolo la dinku tše dingwe. (Bala Sakaria 8:23.) Gaešita le ge dinku tše dingwe di sa šome ka tsela ya seswantšhetšo mabaleng a ka gare a tempele ya moya, di hlankela mabaleng a ka ntle a tempele yeo.

¹¹ Eupša ge Jehofa ka dinako tše dingwe a diriša bao e sego ditho tša baperisita ba Isiraele ya bogologolo go swantšhetša dinku tše dingwe, na bao ba nago le kholofelo ya go phela mo lefaseng le bona ba swanetše go ja diswantšhetšo tša Segopotšo? Ga bjale re tla ahla-ahla karabo ya potšišo yeo.

Kgwerano e Mpsha

12. Ke tokišetšo efe e mpsha yeo Jehofa a boletšego ka yona e sa le pele?

¹² Jehofa o boletše e sa le pele ka tokišetšo e mpsha bakeng sa batho ba gagwe ge a be a re: “Kxwêranô ye ke tl’o xo e dira le bôná xe xo fetile mehla yeno . . . šé: Ke tlo bea melaô ya-ka matswalong a bôná, ke tlo e tlôka dipelong tša bôná. Ké tlo ba Modimo wa bôná; ’me bôná e tlo ba sethšaba sa-ka.” (Jer. 31:31-33) Ka kgwerano ye e mpsha, kholofetšo ya Jehofa go Aborahama e be e tla ba le phethagalo e tagafaditšwego le ya ka mo go sa felego.—Bala Genesi 22:18.

13, 14. (a) Batšea-karolo kgweranong e mpsha ke bomang? (b) Ke bomang bao ba holwago ke kgwerano ye e mpsha, gona ba e ‘kgomarela’ bjang?

¹³ Jesu o boletše ka kgwerano ye e mpsha bošegong bja pele ga lehu la gagwe ge a be a re: “Senwelo se se bolela kgwerano e mpsha ka baka la madi a-ka ao a tlago go tšhollelwa lena.”  (Luka 22:20; 1 Bakor. 11:25) Na Bakriste ka moka ba a akaretšwa kgweranong ye e mpsha? Aowa. Ba bangwe, go swana le baapostola bao ba nwelego senwelo bošegong bjoo, ke batšea-karolo kgweranong e mpsha. * Jesu o dirile kgwerano e nngwe le bona ya go buša gotee le yena Mmušong wa gagwe. (Luka 22:28-30) Ba tla tšea karolo gotee le Jesu Mmušong wa gagwe.—Luka 22:15, 16.

¹⁴ Go thwe’ng ka bao ba tlago go phela ka mo go sa felego mo lefaseng Mmušong wa gagwe? Ke ba holwago ke kgwerano e mpsha. (Bagal. 3:8, 9) Gaešita le ge e se batšea-karolo, ba ‘kgomarela’ kgwerano ye ka go ikokobeletša dinyakwa tša yona, go etša ge go be go boletšwe e sa le pele ke moporofeta Jesaya, ge a re: “Ba mathokô ba xo diilêla xa Morêna, ’me ba mo dirêla, ba rata ’ina la Morêna, ’me ya ba balata ba Morêna, bohle ba-lôta-sabatha ba se e xoboše, kxwêranô ya-ka ba e xomarêla, Ke tlo ba tliša fá thabeng e kxêthwa ya-ka, ka ba thabiša Ntlong ya-ka ya thapêlô.” Ke moka Jehofa o re: “Ntlo ya-ka e tlo ba lé: Ngwakô wa thapêlo wa dithšaba tšohle.”—Jes. 56:6, 7, mongwalo o sekamego ke wa rena.

Ke Bomang Bao ba Swanetšego go ja?

15, 16. (a) Moapostola Paulo o tswalanya kgwerano e mpsha le’ng? (b) Ke ka baka la’ng bao ba nago le kholofelo ya go phela lefaseng ba sa je diswantšhetšo tša Segopotšo?

¹⁵ Bao ba lego kgweranong e mpsha ‘ba na le sebete sa go tsena tseleng e yago lefelong le lekgethwa.’ (Bala Baheberu 10:15-20.) Ba ke bao ba tlago “go amogela mmušo wo o ka se šišinywego.” (Baheb. 12:28) Ka gona, ke feela bao ba tlago go ba dikgoši le baperisita legodimong le Jesu Kriste ba swanetšego go nwa “senwelo” seo se emelago kgwerano e mpsha. Batšea-karolo ba ba kgwerano e mpsha ke bona ba holofeditšwego go nyalwa ke Kwana. (2 Bakor. 11:2; Kut. 21:2, 9) Ba bangwe bao ba bago gona Segopotšong sa ngwaga le ngwaga ke babogedi ba hlomphago, bao ba sa jego diswantšhetšo.

¹⁶ Paulo gape o re thuša go kwešiša gore bao ba nago le kholofelo ya go phela mo lefaseng ga ba je diswantšhetšo tša Segopotšo. O boditše Bakriste ba tloditšwego gore: “Gobane nako le nako ge le e-ja senkgwa se le go nwa senwelo se, le dula le tsebatša lehu la Morena, go fihlela a fihla.” (1 Bakor. 11:26) Morena o tla “fihla” neng? O tla fihla ge a e-tla go tšea ba mafelelo ba sehlopha sa monyadiwa yo a tloditšwego go ya legaeng la bona la legodimong. (Joh. 14:2, 3) Go molaleng gore go gopola Selalelo sa Morena sa ngwaga le ngwaga go ka se dirwe ka mo go sa felego. “Ba šetšego” ba peu ya mosadi bao ba lego lefaseng ba tla tšwela pele go ja dijo tše go fihlela ge ka moka ba hweditše moputso wa bona wa legodimong. (Kut. 12:17) Lega go le bjalo, ge e ba bao ba tlago go phela lefaseng ka mo go sa felego ba be ba dumeletšwe go ja diswantšhetšo, gona Segopotšo se be se tla swanelwa ke go tšwela pele ka mo go sa felego.

‘Bona e tla ba Setšhaba Sa-ka’

17, 18. Boporofeta bjo bo begilwego go Hesekiele 37:26, 27 bo phethagaditšwe bjang?

¹⁷ Jehofa o boletše e sa le pele ka botee bja batho ba gagwe ka mantšu a: “Ke tlo dira kxwêranô ya khutšô le bôná; e tlo ba kxwêranô ye e sa felexo ye ke e diraxo le bôná. Ke tlo ba bea xôna ka ba atiša, ka bea Sekxêthwa sa-ka xare xa bôná ka xo sa felexo. Ntlo ya-ka e tlo ba mo xo bôná, ka  ba Modimo wa bôná, ’me bôná ya ba sethšaba sa-ka.”—Hesek. 37:26, 27.

¹⁸ Batho ka moka ba Modimo ba na le tokelo ya go holwa ke phethagatšo ya kholofetšo ye e thabišago, e lego kgwerano ye ya khutšo ya Bokriste. Ee, Jehofa o kgonthišeditše gore bahlanka ba gagwe ka moka bao ba kwago ba tla ba le khutšo. Seenywa se sa moya wa gagwe se bonala kudu lehono. Gare ga bona go na le sekgethwa-kgethwa sa gagwe, seo mo se swantšhetšago borapedi bjo bo sekilego bja Bokriste. Ka kgonthe e bile batho ba gagwe, gobane ba ganne mehuta ka moka ya borapedi bja diswantšho gomme ba kgetha Jehofa e le Modimo a nnoši yo ba mo rapelago.

19, 20. Ke bomang bao ba akaretšwago go bao Jehofa a ba bitšago “sethšaba sa-ka,” gona ke’ng seo kgwerano e mpsha e dirago gore se kgonege?

¹⁹ Ruri e bile mo go thabišago go bona go kopanywa ga dihlopha tše tše pedi mehleng ya rena! Gaešita le ge lešaba le legolo leo le oketšegago ka palo le se na kholofelo ya go phela legodimong, le thabela go gwerana le bao ba yago gona. Ba ikgokagantše le Isiraele wa Modimo. Ka go dira bjalo, ba balwa gare ga bao Jehofa a ba bitšago “sethšaba sa-ka.” Go phethagala boporofeta bjo go bona: “Mohla woo Morêna ó tlo xomarêlwa ke dithšaba tše di ntši: ’me e tlo ba batho ba-ka, ka dula xare xa lena.”—Sak. 2:15; 8:21, mongwalo o sekamego ke wa rena; bala Jesaya 65:22; Kutollo 21:3, 4.

²⁰ Jehofa o dirile gore tše ka moka di kgonege ka kgwerano e mpsha. Batho ba dimilione bao ba tšwago dinageng di šele ba bile karolo ya setšhaba se ratwago sa Jehofa. (Mika 4:1-5) Ba ikemišeditše go tšwela pele ba kgomarela kgwerano yeo ka go dumela ditokišetšo tša yona le go kwa dinyakwa tša yona. (Jes. 56:6, 7) Ka go dira bjalo, ba thabela ditšhegofatšo tše di humilego tša khutšo ya ka mehla gotee le Isiraele wa Modimo. Eka o ka diragalelwa ke seo—gona bjale le ka mo go sa felego!

[Mengwalo ya tlase]

Na o a Gopola?

• “Meloko e lesome-pedi ya Isiraele” yeo ba 144 000 ba tlago go e ahlola ke bomang?

• Ke tswalano efe yeo batlotšwa le dinku tše dingwe ba nago le yona kgweranong e mpsha?

• Na Bakriste ka moka ba swanetše go ja diswantšhetšo tša Segopotšo?

• Ke botee bofe bjoo go boletšwego ka bjona e sa le pele bakeng sa mehla ya rena?

[Dipotšišo tša Thuto]

[[Graph/​Pictures on page 25]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

Ba bantši ga bjale ba hlankela le Isiraele wa Modimo

1950 | 373,430

1970 | 1,483,430

1990 | 4,017,213

2009 | 7,313,173