Bafsa—Matlafatšang Kganyogo Ya Lena Ya Go Hlankela Jehofa

“Xopola Mmopi wa xaxo Ò sa le yo mofsa.”—MMO. 12:1.

1. Ke taletšo efe yeo e bego e lebišitšwe go bana kua Isiraeleng?

NYWAGA e ka bago e 3 500 e fetilego, moporofeta wa Jehofa e lego Moše o ile a laela baperisita le banna ba bagolo ba Isiraele gore: “[Phuthegang] sethšaba mmôxô, banna le basadi le bana, . . . O ba balêlê ba kwê, ba ithutê, xomme ba boifê Morêna Modimo wa lena, ba hlôkômêlê se se bolêlwaxo ke molaô wó, ba dirê ka wôna.” (Doit. 31:12) Ela hloko gore go ile gwa laelwa gore go phuthege bomang bakeng sa go rapela: banna, basadi le bana. Ee, gaešita le bana ba be ba le gare ga bao ba ilego ba laelwa gore ba theetše, ba ithute le go latela tlhahlo ya Jehofa.

2. Jehofa o ile a bontšha bjang gore o tshwenyega ka bafsa phuthegong ya Bokriste ya lekgolong la pele la nywaga?

² Lekgolong la pele la nywaga, Jehofa o ile a tšwela pele a bontšha gore o tshwenyega ka bafsa bao ba lego gare ga batho ba gagwe. Ka mohlala, o ile a budulela moapostola Paulo gore a akaretše le ditaelo tšeo di lebišitšwego go bafsa go a mangwe a mangwalo a gagwe ao a yago diphuthegong. (Bala Baefeso 6:1; Bakolose 3:20.) Bafsa ba Bakriste bao ba ilego ba diriša keletšo yeo ba ile ba godiša tebogo ya bona go Tatago bona yo lerato wa legodimong gomme ba hwetša ditšhegofatšo tša gagwe.

3. Bafsa ba bantši lehono ba bontšha bjang gore ba kganyoga go hlankela Modimo?

³ Na bafsa lehono ba laletšwa go bokana gore ba rapele Jehofa? Ee! Ke ka baka leo go thabišago go batho ka moka ba Modimo go bona bahlanka ba bafsa ba bantši gakaakaa ba tšeela godimo keletšo ya Paulo e rego: “A re naganelaneng gore re hlohleletšaneng leratong le medirong e mebotse, re sa tlogele go bokana ga rena gotee, go etša ge ba bangwe ba tlwaetše go dira bjalo, eupša re kgothatšana, kudu-kudu ka ge le bona letšatši le batamela.” (Baheb. 10:24, 25) Go feta moo, bana ba bantši ba tšea karolo le batswadi ba bona go boleleng ditaba tše dibotse tša Mmušo wa Modimo. (Mat. 24:14) Le gona, e le go bontšha gore ba rata Jehofa go tšwa pelong, ngwaga le ngwaga bafsa ba dikete ba a kolobetšwa gomme ba thabela ditšhegofatšo tšeo di tlišwago ke go ba barutiwa ba Kriste.—Mat. 16:24; Mar. 10:29, 30.

Amogela Taletšo—Gona Bjale

4. Bafsa ba ka amogela neng taletšo ya Modimo ya gore ba mo hlankele?

⁴ Mmoledi 12:1 e re: “Xopola Mmopi wa xaxo Ò sa le yo mofsa.” Lena bafsa, le swanetše go ba le nywaga e mekae gore le amogele taletšo ye e borutho ya go rapela le go hlankela Jehofa? Ga go nywaga yeo go bolelwago ka yona ka Mangwalong. Ka baka leo, o se ke wa dika-dika, o nagana gore o sa le yo monyenyane kudu go ka theetša Jehofa le go mo hlankela. Go sa šetšwe gore o na le nywaga e mekae, o kgothaletšwa gore o arabele ka ntle le go senya nako.

5. Batswadi ba ka thuša bana ba bona bjang go dira tšwelopele ya moya?

⁵ Bontši bja lena le thušwa ke motswadi goba batswadi ba lena go dira tšwelopele ya moya. Ka tsela ye, le swana le Timotheo wa mehleng ya Beibele. Ge e be e sa lesea, o ile a rutwa mangwalo a makgethwa ke mmagwe, Yunise, le makgolo’agwe Loisa. (2 Tim. 3:14, 15) Mohlomongwe batswadi ba gago ba go tlwaetša ka tsela e swanago ka go ithuta Beibele le wena, ka go rapela le  wena, ka go ya le wena dibokeng tša phuthego le dikopanong tše dikgolo tša batho ba Modimo gotee le ka go tšea karolo le wena bodireding bja tšhemo. Ee, batswadi ba gago ba tšeela godimo kudu boikarabelo bjo Jehofa ka boyena a ba neilego bjona bja go go ruta ditsela tša Gagwe. Na o thabela lerato le tlhokomelo tšeo ba go neago tšona?—Die. 23:22.

6. (a) Go ya ka Psalme 110:3, Jehofa o thabišwa ke borapedi bja mohuta mang? (b) Ke’ng seo re tlago go se ahla-ahla gona bjale?

⁶ Lega go le bjalo, ge lena bafsa le dutše le gola, Jehofa o nyaka gore le “itlhatselele thato e botse le e amogelegago le e phethegilego ya Modimo,” go etša ge Timotheo a dirile. (Baroma 12:2) Ge e ba le dira bjalo, le tla tšea karolo medirong ya phuthego, e sego ka gobane batswadi ba lena ba nyaka gore le dire bjalo eupša ka gobane le nyaka go dira thato ya Modimo. Ge e ba le hlankela Jehofa ka gobane le rata, seo se tla mo thabiša. (Ps. 110:3) Ka gona, le ka bontšha bjang gore le nyaka go matlafatša kganyogo ya lena ya go theetša Jehofa le go latela tlhahlo ya gagwe? Re tla ahla-ahla ditsela tše tharo tše bohlokwa tša kamoo le ka dirago se ka gona. Tšona ke go ithuta, go rapela le boitshwaro. Anke re di ahla-ahleng ka e tee ka e tee.

Tseba Jehofa e le Motho

7. Jesu o beile mohlala bjang bjalo ka motho yo a balago Mangwalo, gona o thušitšwe ke’ng go dira bjalo?

⁷ Tsela ya pele yeo o bontšhago ka yona gore o nyaka go tiiša kganyogo ya gago ya go hlankela Jehofa ke ka go bala Beibele ka mehla. O ka kgotsofatša senyakwa sa gago sa moya gomme wa hwetša tsebo e bohlokwa ya Beibele ka go bala Lentšu la Modimo ka mehla. (Mat. 5:3) Jesu o beile mohlala o mobotse. Nakong e nngwe ge a be a e-na le nywaga e 12, batswadi ba gagwe ba ile ba mo hwetša ka tempeleng, “a dutše gare ga barutiši, a ba theeditše gomme a ba botšiša dipotšišo.” (Luka 2:44-46) Ge e be e sa le ngwana, Jesu o be a šetše a e-na le mokgwa wa go hlologela Mangwalo le go nyaka go a kwešiša. Ke’ng seo se mo thušitšego go dira bjalo? Ga go pelaelo gore mmagwe e lego Maria, le Tatagwe wa mogodiši e lego Josefa, ba kgathile tema e bohlokwa. E be e le bahlanka ba Modimo bao ba ilego ba nea Jesu thuto ya Modimo go tloga boseeng.—Mat. 1:18-20; Luka 2:41, 51.

8. (a) Batswadi ba swanetše go thoma neng go tiišetša lerato la go rata Modimo baneng ba bona? (b) Laodiša phihlelo yeo e bontšhago bohlokwa bja go tlwaetša bana go tloga boseeng?

⁸ Ka tsela e swanago, batswadi bao ba boifago Modimo lehono ba lemoga bohlokwa bja go tiišetša kganyogo ya therešo ya Beibele ka dipelong tša bana ba bona go tloga bjaneng. (Doit. 6:6-9) Se ke seo Rubi, kgaetšedi wa Mokriste, a se dirilego ka morago ga go belegwa ga morwa wa gagwe wa mathomo, Joseph. O be a mmalela Puku Ya-ka ya Ditaba tša Beibele letšatši le letšatši. Ge Joseph a be a dutše a gola, Rubi o ile a mo thuša go swara mangwalo a mmalwa ka hlogo. Na Joseph o ile a holwa ke tlwaetšo e bjalo? Kapejana ka morago ga go ithuta go bolela, o be a kgona go laodiša dikanegelo tše dintši tša Beibele ka mantšu a gagwe. Le gona, ge a be a e-na le nywaga e mehlano, o ile a nea polelo ya gagwe ya mathomo Sekolong sa Bodiredi sa Pušo ya Modimo.

9. Ke ka baka la’ng go bala Beibele le go naganišiša ka seo o se balago go le bohlokwa?

⁹ Bafsa le swanetše go dira gore go bala Beibele letšatši le letšatši e be mokgwa woo le o dirago nywageng ya lena ya mahlalagading go fihlela le gola, e le gore le tšwetše pele kgolo ya lena ya moya. (Ps. 71:17) Ke ka baka la’ng go thwe go bala Beibele go tla le thuša go dira tšwelopele? Ela hloko seo Jesu a se boditšego Tatagwe thapelong, o itše: “Se se bolela bophelo bjo bo sa felego, gore ba hwetše tsebo ka wena Modimo a nnoši wa therešo.” (Joh. 17:3) Ke therešo gore ge o dutše o hwetša tsebo e oketšegilego ka Jehofa, o tla mo lebelela gabotse e le Motho wa kgonthe gomme wa tiiša tsela yeo o mo ratago ka yona. (Baheb. 11:27) Ka gona, nako le nako ge o bala karolo ya Beibele, diriša sebaka seo go ithuta mo go oketšegilego ka Jehofa. Ipotšiše gore: ‘Ke’ng seo pego ye e nthutago sona ka Jehofa bjalo ka Motho? Temana ye ya Beibele e bontšha bjang gore Modimo o a nthata le gore o tshwenyega ka nna?’ Go ipha nako ya go naganišiša ka dipotšišo tše bjalo go tla go thuša gore o ithute kamoo  Jehofa a naganago ka gona le kamoo a ikwago ka gona le seo a se nyakago go wena. (Bala Diema 2:1-5.) Go swana le Timotheo yo monyenyane, o tla ‘kgodišwa gore o dumele’ seo o ithutago sona Mangwalong gomme o tla tutueletšega go rapela Jehofa ka pelo e ratago.—2 Tim. 3:14.

Kamoo Thapelo e Tiišago Lerato la Gago go Jehofa

10, 11. Thapelo e go thuša bjang go matlafatša kganyogo ya gago ya go hlankela Modimo?

¹⁰ Tsela ya bobedi yeo ka yona o ka matlafatšago kganyogo ya gago ya go hlankela Jehofa ka pelo ka moka ke ka dithapelo tša gago. Go Psalme 65:2, re bala gore: “Batho ka moka ba tla xo Wene Mokwi wa dithapêlô.” Gaešita le nakong ya ge Baisiraele e be e le batho ba kgwerano ya Modimo, batho ba šele bao ba bego ba e-tla tempeleng ya Jehofa ba be ba ka mmatamela ka thapelo. (1 Dikx. 8:41, 42) Modimo ga a bebe sefahlego. Bao ba bolokago ditaelo tša gagwe ba ka kgodišega gore o tla ba theetša. (Die. 15:8) Ee, “batho ka moka” ba akaretša le lena bafsa.

¹¹ O a tseba gore motheo wa segwera le ge e le sefe sa kgonthe ke poledišano e botse. Mohlomongwe o thabela go botša mogwera wa gago wa paale seo o se naganago, seo se go tshwenyago le kamoo o ikwago ka gona. Ka tsela e swanago, ka go rapela go tšwa pelong, o boledišana le Mmopi wa gago yo Mogolo. (Bafil. 4:6, 7) Boledišana le Jehofa eka o tšhollela pelo ya gago go motswadi yo lerato goba mogwera wa paale. Ge e le gabotse, go na le tswalano e kgolo magareng ga tsela yeo o rapelago ka yona le tsela yeo o ikwago ka yona ka Jehofa. O tla lemoga gore ge segwera sa gago le Jehofa se dutše se matlafala, dithapelo tša gago le tšona di tla ba le morero kutšwanyana.

12. (a) Ke ka baka la’ng dithapelo tšeo di nago le morero di akaretša mo gontši go feta mantšu? (b) O tla thušwa ke’ng go lemoga gore Jehofa o kgaufsi le wena?

¹² Lega go le bjalo, gopola gore thapelo yeo e nago le morero e akaretša mo gontši go feta mantšu. E akaretša maikwelo a gago a ka gare-gare. Dithapelong tša gago, bontšha gore o rata Jehofa ka lerato le borutho, gore o mo hlompha kudu le gore o ithekgile ka Yena ka botlalo. Ge o dutše o lemoga kamoo Jehofa a arabago dithapelo tša gago ka gona, o tla thoma go lemoga go feta le ge e le neng pele gore “Morêna ó kxaufsi le bohle ba mmitšaxo.” (Ps. 145:18) Ee, Jehofa o tla batamela kgaufsi le wena, a go matlafatša gore o ganetše Diabolo gomme o dire dikgetho tše dibotse bophelong.—Bala Jakobo 4:7, 8.

13. (a) Go gwerana le Modimo go ile gwa thuša kgaetšedi yo mongwe bjang? (b) Go gwerana le Modimo go go thuša bjang go lwantšhana le kgateletšo ya dithaka?

¹³ Ela hloko kamoo Cherie a ilego a tia matla ka gona ka go ba le tswalano ya kgaufsi le Jehofa. Ge a be a le sekolong se se phagamego, o ile a thopa sefoka ka gobane a dirile gabotse dithutong gomme a atlegile dipapading. Ge a be a fetša sekolo, o ile a newa thušo ya tša ditšhelete yeo e bego e tla mo thuša gore a phegelele thuto e phagamego. Cherie o re: “Seo ba bego ba mpha sona se be se nteka, e bile bahlahli le barutwana-gotee le nna ba ile ba nkgatelela kudu gore ke dumele.” Lega go le bjalo, o ile a lemoga gore go phegelela thuto e oketšegilego go be go tla nyaka gore a gafele bontši bja nako ya gagwe go ithuteng le go itokišeletšeng dipapadi—a  šalelwe ke nako e nyenyane ya go hlankela Jehofa. Cherie o ile a dira’ng? O re, “Ka morago ga go rapela Jehofa, ke ile ka gana thušo yeo ya tša ditšhelete gomme ka thoma go hlankela ke le mmulamadibogo wa ka mehla.” Ka morago ga nako e sego kae, ke ge a šetše a e-na le nywaga e mehlano a bula madibogo. O re: “Ga ke itshole. Ke thabišwa ke go tseba gore ke dirile phetho yeo e kgahlago Jehofa. Ke therešo gore ge o etiša Mmušo wa Modimo pele, dilo tše dingwe ka moka o tla di okeletšwa.”—Mat. 6:33.

Boitshwaro bjo Bobotse bo Bontšha Gore o “wa Pelo-thsekexi”

14. Ke ka baka la’ng boitshwaro bja gago bjo bobotse bo le bohlokwa mahlong a Jehofa?

¹⁴ Tsela ya boraro yeo ka yona o ka bontšhago gore o hlankela Jehofa ka pelo e ratago ke ka boitshwaro bja gago. Jehofa o šegofatša bafsa bao ba dulago ba hlwekile boitshwarong. (Bala Psalme 24:3-5.) Samuele yo monyenyane o ile a gana go ekiša boitshwaro bjo bo gobogilego bja barwa ba Moperisita yo a Phagamego Eli. Boitshwaro bjo bobotse bja Samuele bo ile bja lemogwa. Pego ya Beibele e re: “Fêla Samuele, lesoxana lela a fêla a xola à e-ya à ratwa ke Modimo, à ratwa ke batho.”—1 Sam. 2:26.

15. Ke mabaka afe a mangwe ao a dirago gore o dule o itshwere gabotse?

¹⁵ Re phela lefaseng leo le tletšego ka batho bao e lego baithati, bao ba ikgogomošago, ba go se kwe batswadi, ba go se leboge, ba go se botege, ba bogale, bao ba tletšego boikgantšho, bao ba ratago maipshino go e na le go rata Modimo—ge re bolela tše dingwe tša dika tšeo Paulo a boletšego ka tšona. (2 Tim. 3:1-5) Ka gona, e ka ba tlhohlo e kgolo gore o dule o le mohlala boitshwarong go sa šetšwe go phela tikologong ye e kgopo. Lega go le bjalo, nako le nako ge o dira se se lokilego gomme o gana go tšea karolo boitshwarong bjo bo sa kgahlišego Modimo, o hlatsela gore o eme ka lehlakoreng la Jehofa mabapi le kgang ya bogoši ya legohle. (Jobo 2:3, 4) E bile o kgotsofatšwa ke go tseba gore o arabela kgopelong ya Jehofa e borutho e rego: “Ngwan’a-ka! Hlalefa, O nthabišê pelo, ke tsebê se nkaxo fetola sôna xe ba nnyatša.” (Die. 27:11) Go oketša moo, go tseba gore Jehofa o a go amogela go tla matlafatša kganyogo ya gago ya go mo hlankela.

16. Kgaetšedi yo mongwe o ile a thabiša pelo ya Jehofa bjang?

¹⁶ Ge kgaetšedi wa Mokriste yo a bitšwago Carol a be a sa tsena sekolo nywageng ya gagwe ya mahlalagading, o ile a kgomarela melao ya motheo ya Beibele gomme boitshwaro bja gagwe bjo bobotse bo ile bja lemogwa. Go ile gwa direga’ng? Carol o be a kwerwa ke bao a tsenago le bona ka klaseng ka gobane letswalo la gagwe leo le tlwaeditšwego ka Beibele le be le sa mo dumelele go tšea karolo ge go ketekwa matšatši a maikhutšo le ditirelo tša borata-naga. Ditiragalong tšeo, ka dinako tše dingwe o be a e-ba le dibaka tša go hlalosetša ba bangwe ditumelo tša gagwe. Nywaga e mentši ka morago, Carol o ile a amogela karata yeo e tšwago go motho yo a bego a tsena le yena ka klaseng, a ngwadile gore: “Ke kgale ke duma go ikgokaganya le wena le go go leboga. Ga ke lebale boitshwaro bja gago le mohlala wa gago o mobotse bjalo ka mofsa wa Mokriste, go akaretša le go ema ga gago ka sebete kgahlanong le matšatši a maikhutšo. O bile Hlatse ya Jehofa ya mathomo yeo ke kopanego le yona.” Mohlala wa Carol o kgomile kudu motho yo a tsenago le yena ka klaseng moo ka morago a ilego a thoma go ithuta Beibele. Karateng ya gagwe yeo e yago go Carol, o ngwadile gore o na le nywaga e fetago e 40 e le Hlatse yeo e kolobeditšwego! Go swana le Carol, lena bafsa bao lehono le kgomarelago ka go tia melao ya motheo  ya Beibele le ka tutuetša batho ba dipelo tše di botegago gore ba tsebe Jehofa.

Bafsa Bao ba Tumišago Jehofa

17, 18. (a) O ikwa bjang ka bafsa bao ba lego ka phuthegong ya geno? (b) Ke bokamoso bofe bjoo bo letšego ka pele bakeng sa bafsa bao ba boifago Modimo?

¹⁷ Ka moka ga rena mokgatlong wa Jehofa wa lefase ka bophara re thabišwa ke go bona bafsa ba dikete tše dintši bao ba fišegago bao ba tšeago karolo borapeding bja therešo! Bafsa ba ba matlafatša kganyogo ya bona ya go rapela Jehofa ka go bala Beibele ka mehla, ka go rapela le ka go itshwara ka go dumelelana le thato ya Modimo. Bafsa ba bjalo bao ba beago mohlala o mobotse ba lapološa batswadi ba bona le batho ba Jehofa ka moka.—Die. 23:24, 25.

¹⁸ Nakong e tlago, bafsa bao ba botegago ba tla balwa gare ga bao ba tlago go phologela lefaseng le lefsa la Modimo. (Kut. 7:9, 14) Ke gona moo mo ba tlago go thabela ditšhegofatšo tše dintši ge ba tšwela pele ba leboga Jehofa gomme ba tla kgona go mo tumiša ka mo go sa felego.—Ps. 148:12, 13.

Na o ka Hlalosa?

• Bafsa ba ka tšea karolo bjang borapeding bja therešo lehono?

• Ke ka baka la’ng go naganišiša go le bohlokwa gore o holwe ke go bala Beibele?

• Thapelo e go thuša bjang gore o batamele kgaufsi le Jehofa?

• Ke’ng seo se fihlelelwago ge Mokriste a itshwere gabotse?

[Dipotšišo tša Thuto]

[Seswantšho go letlakala 5

Na o itlwaeditše go bala Beibele letšatši le letšatši?