Go Lebeletšana le Diteko go Matlafaditše go Bota ga Rena Jehofa

Ka ge go anega ada Dello Stritto

Ke sa tšwa go fetša go ngwalollela temana ya letšatši ka pukung ya-ka. Ke na le nywaga e 36, eupša go ngwala methaladi yeo e mmalwa go ntšere diiri tše pedi. Ke ka baka la’ng go tšere nako e telele gakaakaa? Mma o tla hlalosa.—Joel

NNA le monna wa-ka re kolobeditšwe ka 1968 bjalo ka Dihlatse tša Jehofa. Ka morago ga go belega barwa ba babedi bao ba phetšego gabotse mmeleng e lego David le Marc, ke ile ka belega morwa wa rena wa boraro e lego Joel. O belegwe pele ga nako ka 1973 sepetleleng seo se lego motseng wa Binche kua Belgium, moo e ka bago dikhilomithara tše 60 go tloga ka borwa bja Brussels. O be a imela dikhilograma tše 1,7 feela. Ge ke be ke tloga sepetlele, go ile gwa nyakega gore Joel a šale gore boima bja mmele wa gagwe bo oketšege.

Ka morago ga dibeke tše mmalwa ge morwa wa rena a sa bontšhe maswao a go kaonefala, nna le monna wa-ka e lego Luigi re ile ra mo iša ngakeng ya malwetši a bana. Ka morago ga go hlahloba Joel, ngaka e ile ya re: “Ke maswabi. Joel o bonagala a e-na le mathata ao bana babo ba se nago ona.” Go ile gwa ba le setu ka nako e telele. Ka nako yeo, ke ile ka lemoga gore morwa wa rena yo monyenyane o be a e-na le bothata bjo bogolo bja tša maphelo. Ngaka e ile ya ya le monna wa-ka ka thoko gomme ya mmotša gore: “Ngwana wa gago o na le trisomy 21” yeo e tsebjago gape e le bolwetši bja Down. *

Ka ge re be re nyamišitšwe ke seo ngaka e se utollotšego, re ile ra phetha ka go ya ngakeng e nngwe yeo e lego setsebi sa tša kalafo. E ile ya hlahlobišiša Joel yo mo nyenyane mo e ka bago iri ka moka e sa bolele selo. Nna le Luigi re be re nagana gore e tšere nako e telele kudu. Mafelelong, ngaka e ile ya lebelela godimo gomme ya re: “Ngwana wa lena o tlo ithekga ka lena kudu.” Ke moka, ka lentšu leo le tletšego botho ya oketša ka gore: “Eupša Joel o tla thaba ka gobane batswadi ba gagwe ba a mo rata!” Ke tšeegile maikwelo ke ile ka kuka Joel ka kelohloko gomme ra mo iša gae. Ka nako yeo o be a e-na le dibeke tše seswai.

Re Matlafaditšwe ke Diboka tša Bokriste le Bodiredi

Dinyakišišo tše dingwe tša tša maphelo di utolotše gape gore pelo ya Joel e be e sa bopega gabotse e bile o be a e-na le bolwetši bjo šoro bja marapo. Ka baka la gore pelo ya gagwe e be e le e kgolo kudu, e be e kgorometša maswafo gomme e dira  gore a fetelwe ke malwetši gabonolo. Go se go ye kae, ge a be a e-na le dikgwedi tše nne, Joel o ile a swarwa ke bolwetši bja bronchial pneumonia gomme o ile a swanelwa ke go boela sepetlele moo a ilego a tswalelelwa. Re be re kwešwa bohloko kudu ke go mmona a tlaišega. Re be re duma eka re ka mo swara gomme ra mo phaphatha ka borutho eupša dibekeng tše lesome tšeo di bego di gateletša, re be re sa swanela go mo kgoma le gatee. Go be go se seo nna le Luigi re bego re ka se dira ge e se go lebelela, go gokarelana le go rapela.

Nakong yeo ya manyami, re be re tšwela pele re e-ya dibokeng tša phuthego gotee le David le Marc bao ka nako yeo ba bego ba e-na le nywaga e 6 le 3. Go ba gona Holong ya Mmušo go be go swana le gore re ka diatleng tša Jehofa tše borutho. Diiri ka moka tšeo re bego re le go tšona, re dikologilwe ke bana babo rena le dikgaetšedi ba Bakriste, re be re ikwa re kgona go lahlela morwalo wa rena go Jehofa gomme ra ba le kgotsofalo ya ka gare. (Ps. 55:22) Gaešita le baoki bao ba bego ba hlokomela Joel ba boletše gore ba lemogile kamoo go ba gona ga rena dibokeng tša Bokriste go re thušitšego ka gona go ba le teka-tekano.

Nakong yeo, ke ile ka ba ka lopa Jehofa gore a mphe matla a go ya tirelong ya tšhemo. Go e na le go dula gae ke lla, ke be ke nyaka go bolela le ba bangwe le go ba botša lebaka leo ka lona go bota ga-ka dikholofetšo tša Modimo tša lefase leo le se nago bolwetši go mphilego matla ka gona. Nako le nako ge ke be ke kgona go ya bodireding bja tšhemo, ke be e-kwa gore Jehofa o arabile dithapelo tša-ka.

“Se se a Makatša!”

Re be re thabile kudu ge mafelelong re be re boa gae le Joel go tšwa sepetlele. Eupša letšatšing le le latelago, lethabo la rena le ile la fetoga manyami. Boemo bja Joel bo ile bja gakala kapejana, gomme ra swanela ke go mo kitimišetša sepetlele gape. Ka morago ga go mo hlahloba, dingaka di ile tša re botša gore: “Joel o šaletšwe ke dikgwedi tše tshela feela tša go phela.” Ka morago ga dikgwedi tše pedi, ge a be a e-na le dikgwedi tše e ka bago tše seswai, seo ngaka e se boletšego se ile sa bonagala e le therešo gobane boemo bja Joel bo ile bja mpefalela pele. Ngaka e ile ya dula fase le rena gomme ya re: “Ke tloga ke le maswabi. Ga go sa na seo re ka kgonago go mo direla sona.” Ke moka ya oketša ka gore: “Sebakeng se, ke Jehofa feela yo a ka mo thušago.”

Ke ile ka boela phapošing ya sepetlele yeo Joel a bego a robetše go yona. Gaešita le ge ke be ke gateletšegile kudu maikwelong e bile ke lapile mmeleng, ke be ke ikemišeditše go se tloge kgaufsi le yena. Dikgaetšedi tše mmalwa tša Bakriste di be di dula le nna ka go šiedišana ka ge Luigi a be a swanetše go hlokomela bašemane ba rena ba babedi ba bagolo. Go ile gwa feta beke. Ke moka ka tšhoganetšo, Joel o ile a swarwa ke bolwetši bja pelo. Baoki ba ile ba kitimela ka phapošing ya gagwe eupša ga go na selo seo ba bego ba ka mo thuša ka sona. Ka morago ga metsotso e mmalwa, yo mongwe wa bona ka boleta a re: “Go fedile . . . ” Ke lapile, ke ile ka lla gabohloko gomme ka tšwa ka phapošing. Ke ile ka leka go rapela Jehofa, eupša ga se ka hwetša mantšu a go hlalosa bohloko bjo ke bego ke bo kwa. Ka morago ga metsotso e ka bago e 15, mooki o ile a tla go nna a re, “Joel o a kaonefala!” O ile a ntshwara ka letsogo gomme a re: “E-tla, o ka mmona bjale.” Ge ke boela go Joel, pelo ya gagwe e be e betha gape. Gatee-tee, ditaba tša mabapi le go kaonefala ga Joel di ile tša phatlalala. Baoki le dingaka ba ile ba tla go mmona, gomme ba bantši ba re, “Se se a makatša!”

Ge a E-na le Nywaga e Mene, o Tšea Kgato ya go Makatša

Nywageng ya pele ya bophelo bja Joel, ngaka ya malwetši a bana e ile ya re botša gantši gore: “Joel o nyaka go ratwa kudu.” Ka ge nna  le Luigi re bone tlhokomelo e lerato ya Jehofa ka mo go kgethegilego ka morago ga go belegwa ga Joel, re be re nyaka gore morwa wa rena a dule a hwetša tlhokomelo e lerato. Re bile le dibaka tše dintši tša go dira bjalo ka ge a be a nyaka thušo dilong tšohle tšeo a bego a di dira.

Ngwageng o mongwe le o mongwe go e šupago ya mathomo a bophelo bja Joel, re ile ra lebeletšana le tatelano e swanago ya ditiragalo. Magareng ga October le March, o ile a tsenwa ke malwetši a go fapa-fapana gomme re be re swanelwa ke go mo iša le go mo lata sepetlele. Ka nako e swanago, ke be ke ikemišeditše go fetša nako e ntši kamoo go ka kgonegago ka gona le barwa ba rena David le Marc. Ka go rialo, ba ile ba kgatha tema e kgolo go thušeng Joel go dira tšwelopele—ka mafelelo a makatšago. Ka mohlala, dingaka tše mmalwa di be di re di boditše gore Joel o be ka se tsoge a kgonne go sepela. Eupša ka letšatši le lengwe ge Joel a be a e-na le nywaga e mene, morwa wa rena Marc o ile a re: “E-tla Joel, bontšha mma gore o a kgona!” Ke ile ka šala ke ahlame ge ke bona Joel a gata dikgato tša pele. Re be re thabile kudu gomme ra rapela gotee re le lapa re leboga Jehofa go tšwa dipelong tša rena. Ka dinako tše dingwe, gaešita le ge Joel a be a dira tšwelopele e nyenyane karolong le ge e le efe, re be re mo reta ka borutho ka mehla.

Go mo Tlwaetša Dilo tša Modimo go Tloga Boseeng go Enywa Dienywa

Re be e-ya le Joel dibokeng Holong ya Mmušo nako le nako ge go be go kgonega. Go mo šireletša gore a se fetelwe ke ditwatši tšeo di bego di ka mo lwatša gabonolo, re be re mo tsenya ka phoremeng e kgethegilego yeo e bego e tswaletšwe ka polasitiki yeo e se nago mmala. Lega go le bjalo, gaešita le ge a be a dutše ka gare ga polasitiki yeo, o be a thabela go ba gotee le phuthego.

Bana babo rena le dikgaetšedi ba Bakriste e be e le mothopo wa matla go rena, ba be ba re dikologile ka lerato gomme ba re nea thekgo yeo e šomago. Ngwanabo rena yo mongwe gantši o be a re gopotša mantšu ao a lego go Jesaya 59:1 a rego: “Tseba xobane letsôxo la Morêna xa se le le kôpana, le le kaxo šitwa xo phološa, ’tsêbê tša xaxwe xa di a thibala tša šitwa xo kwa.” Mantšu ao a kgothatšago a re thušitše go bota Jehofa.

Ge Joel a dutše a gola, re be re leka go dira gore go hlankela Jehofa e be karolo e kgolo ya bophelo bja gagwe. Ka mehla re be re bolela le yena ka Jehofa ka tsela yeo e lego gore Joel o be a hlagolela tswalano e lerato le Tatagwe wa legodimong. Re ile ra lopa Jehofa go šegofatša maiteko a rena e le gore tlhahlo ya dilo tša moya e ka tšweletša dienywa tše dibotse.

Ge a be a tsena nywageng ya mahlalagadi, re ile ra leboga kudu ge re lemoga gore Joel o be a rata go bolela le bao a bego a kopana le bona ka ditherešo tša Beibele. Ge a be a fola ka morago ga go buiwa mo gogolo a e-na le nywaga e 14, ke ile ka thaba kudu ge Joel a be a mpotšiša gore, “Mma, na nka nea ngaka puku ya O ka Phela ka mo go sa Felego?” Nywaga e mmalwa ka morago, Joel o ile a swanelwa ke go buiwa gape. Re be re tseba gabotse gore go ka direga gore a se phologe. Pele ga go buiwa, Joel o ile a nea dingaka tša gagwe lengwalo leo re ilego ra le lokišetša gotee le yena. Le be le hlalosa boemo bja gagwe mabapi le tirišo ya madi. Ngaka e ile ya botšiša Joel gore, “Na o dumelelana le se?” Joel o ile a fetola ka go tia a re: “Go bjalo ngaka.” Re ile ra ikgantšha kudu mabapi le tsela yeo morwa wa rena a bego a botile Mmopi wa gagwe ka yona le maikemišetšo a gagwe  a go Mo thabiša. Bašomi ba kua sepetlele ba ile ba re thekga kudu, e lego seo re ilego ra se leboga kudu.

Tšwelopele ya Moya ya Joel

Ge a e-na le nywaga e 17, Joel o ile bontšha boineelo bja gagwe go Modimo ka go kolobetšwa meetseng. Re ka se tsoge re lebetše letšatši leo! Go bona tšwelopele ya gagwe ya moya go re thabiša kudu. Go tloga ka nako yeo, lerato la gagwe go Jehofa le go fišegela therešo ga se tša ka tša fokotšega. Ge e le gabotse, Joel o rata go botša yo mongwe le yo mongwe yo a kopanago le yena gore, “Therešo ke bophelo bja-ka!”

Ge a be a le nywageng ya go obelela ya masome-pedi, Joel o ile a ithuta go bala le go ngwala. Go ile gwa nyakega boiteko bjo bogolo. Lentšu le lengwe le le lengwe leo a bego a kgona go le ngwala e be e tloga e le phenyo. Go tloga ka nako yeo, o thoma letšatši le lengwe le le lengwe ka go bala temana ya letšatši pukwaneng ya Go Hlahloba Mangwalo ka Mehla. Ka morago ga moo, a dutše a imelwa o ngwalollela lengwalo la temana go e nngwe ya dipukwana tša gagwe, tšeo ga bjale a dirilego mokgobo o kgahlišago wa tšona!

Ka matšatši a diboka, Joel o kgonthišetša gore re ya Holong ya Mmušo e sa le ka pela ka ge a nyaka go fihla ka nako gore a kgone go amogela ka borutho bohle bao ba tsenago ka holong. Nakong ya diboka, o thabela go araba le go dira dipontšho. E bile o thuša go hlokomela dimaekrofouno le go dira mešongwana e nngwe. Beke e nngwe le e nngwe, ge boemo bja gagwe bja tša maphelo bo mo dumelela, o sepela le rena modirong wa boboledi. Ka 2007 phuthego e ile ya tsebišwa gore Joel o kgethilwe go ba mohlanka wa bodiredi. Re ile ra tšholla megokgo ya lethabo. A tšhegofatšo e botho yeo e tšwago go Jehofa!

Re Bona Thušo ya Jehofa

Ka 1999 re ile ra lebeletšana le teko e nngwe gape. Koloi ya rena e ile ya thulwa ke mootledi wa go se šetše, gomme Luigi o ile a gobala o šoro. Le lengwe la maoto a gagwe le ile la swanelwa ke gore le kgaolwe, gomme lerapo la gagwe la mokokotlo le ile la buiwa ka makga a mmalwa. Ka tsela e swanago, ka go bota Jehofa, re ile ra bona matla ao a a neago bahlanka ba gagwe bao ba tsomago thušo. (Bafil. 4:13) Gaešita le ge Luigi a golofetše, re leka go ba le pono e nepagetšego ka seo. Ka ge a sa kgone go šoma mošomo wa boiphedišo, o na le nako e ntši ya go hlokomela Joel. Se se dira gore ke be le nako ya go dira mediro ya moya. E bile Luigi o kgona go hlokomela kudu dinyakwa tša moya tša lapa gotee le tša phuthego ya gabo rena moo a tšwelago pele a hlankela e le molomaganyi wa sehlopha sa bagolo.

Ka baka la maemo a rena a sa tlwaelegago, re fetša nako e ntši re le gotee bjalo ka lapa. Ge nako e dutše e e-ya, re ithutile go kgotsofala le go se letele seo se fetago se se ka kgonegago. Matšatšing ao re ikwago re nyamile, re tšhollela maikwelo a rena go Jehofa ka thapelo. Ka manyami, ge barwa ba rena e lego David le Marc ba gola ke moka ba e-tšwa ka lapeng la rena, ganyenyane-ganyenyane ba ile ba kgaotša go hlankela Jehofa. Re holofela gore ba tla boela go Jehofa.—Luka 15:17-24.

Go theoša le nywaga, re ile ra bona thekgo ya Jehofa gomme ra ithuta go ithekga ka yena tekong e nngwe le e nngwe yeo re lebeletšanago le yona. Mantšu ao a hwetšwago go Jesaya 41:13 e be e le a bohlokwa kudu go rena ge a re: “Nna Morêna ké Modimo w’axo; ke Xo swere ka seatla sa-ka sa le letona, ’me ke bolêla naxô ke re: Se boifê, ké Nna ke Xo phološaxo!” Go tseba gore Jehofa o re swere ka letsogo la gagwe le letona ke mothopo wa khomotšo. Ee, re ka bolela e le ka kgonthe gore go lebeletšana le diteko go matlafaditše tsela yeo re botago Tatago rena wa legodimong, Jehofa.

[Mongwalo wa tlase]

[Diswantšho go letlakala 16, 17]

Joel a e-na le mmagwe, Ada

[Seswantšho go letlakala 18]

Ada, Joel le Luigi

[Seswantšho go letlakala 19]

Joel o thabela go amogela bana babo rena le dikgaetšedi Holong ya Mmušo