Na o a Gopola?
Na o a Gopola?
Na o thabetše go bala ditokollo tša morago bjale tša Morokami? Bona ge e ba o ka kgona araba dipotšišo tše di latelago:
• Ke ka baka la’ng Mesia a be a swanetše go hwa?
Lehu la Jesu le hlatsetše gore motho yo a phethagetšego a ka dula a ineetše go Modimo go sa šetšwe go lekwa o šoro. Gape o lefeletše molato wa sebe seo bana ba Adama ba se abetšego, le go bula tsela bakeng sa bophelo bjo bo sa felego.—12/15, matlakala 22-23.
• Motho a ka thušwa ke’ng go bea bjala boemong bja bjona?
A ka thušwa ke thapelo gotee le go ithuta Beibele. Go bohlokwa go hlagolela boitshwaro, go kgomarela diphetho tša gagwe gotee le go kgetha bagwera ba babotse. Yo a kgethago go nwa bjala o swanetše go ipeela mellwane e tiilego gomme a ithute go gana.—1/1, matlakala 7-9.
• Go boledišana le bana ka tsela e nago le morero go akaretša’ng?
Go feta go fo bolela le bona, go akaretša go botšiša dipotšišo le go theetša dikarabo tša bona ka go se fele pelo. Ba bantši ba lemogile gore nako ya dijo ke sebaka se sekaone sa poledišano.—1/15, matlakala 18-19.
• Jehofa o phethagetše, ka gona ke bjang a ka itsholago?
Ka dinako tše dingwe, Modimo o fetoša tsela yeo a lebelelago batho ka yona. Ka mohlala, ka makga a mantši Baisiraele ba bogologolo ba ile ba tlogela Jehofa gomme ba latela medimo e mengwe. Jehofa o ile a kgaotša go ba šireletša. Lega go le bjalo, ge batho ba itsholela diphošo tša bona gomme ba bitša Modimo gore a ba thuše, o ile a fetoša maikwelo a gagwe ka bona goba re ka re o be a itshola. (Baa. 2:18)—2/1, letlakala 21.
• Ke maemong afe moo go ka nyakegago gore motho a kolobetšwe lefsa?
Se se ka direga ge e ba nakong ya kolobetšo, motho ka sephiring a ka ba a be a phela goba a dira dilo tšeo di bego di ka dira gore a kgaolwe ge nkabe go be go šetše go tsebja gore o kolobeditšwe.—2/15, letlakala 22.
• Ke mabaka afe a mararo a fošagetšego ao ba bangwe ba lokafatšago go se botege ka ona?
Ba bangwe ba lokafatša go utswa ka gobane e le badiidi. Ba bangwe ba bea mabaka ka gore: “Batho ka moka ba dira se.” Ba bangwe ba hweditše dilo tša bohlokwa gomme ba di uta, ba bea mabaka ka gore: “Ka ge ke se thwetše, e napile e tla ba sa-ka.” Beibele ga e thekge le ge e le e tee ya dikgopolo tšeo.—3/1, matlakala 12-14.
• Papišong ya Jesu ya korong le mefoka, go bjalwa ga peu e botse go emela’ng?
Morwa wa motho, e lego Jesu, o ile a lokiša tšhemo nakong ya bodiredi bja gagwe bja lefaseng. Go tloga ka Pentekoste ya 33 C.E. go ya pele, peu e botse e ile ya bjalwa ge Bakriste ba be ba tlotšwa bjalo ka barwa ba Modimo, barwa ba Mmušo.—3/15, letlakala 20.
• Ke bjang korong ya seswantšhetšo yeo e lego papišong ya Jesu e ilego ya tlišwa ngwakong wa Jehofa wa bobolokelo? (Mat. 13:30)
Phethagatšo e ile ya katološetšwa pele go fihla nakong ya bofelo bja tshepedišo ye ya dilo. Barwa ba tloditšwego ba mmušo, korong ya seswantšhetšo, ba ile ba tlišwa ngwakong wa Jehofa wa bobolokelo ge ba be ba tlišwa phuthegong yeo e tsošološitšwego ya Bokriste goba ge ba hwetša moputso wa bona wa legodimong.—3/15, letlakala 22.
• Ke mang yo a ilego a hwetša lelokelelo la dipuku tšeo di akaretšago Mangwalo a Bakriste a Segerika?
E be e se lekgotla le itšego la kereke goba moetapele wa bodumedi. Go e na le moo, e be e le Bakriste ba therešo ka tlase ga tlhahlo ya moya o mokgethwa wa Modimo, ba ela hloko gore mangwalo ao a be a buduletšwe e le ka kgonthe. Se se dumelelana le taba ya gore e nngwe ya dimpho tša mohlolo tša moya tšeo di neilwego nywageng ya mathomo ya phuthego ya Bokriste e be e le “go lemoga dipolelo tše di buduletšwego.” (1 Bakor. 12:4, 10)—4/1, letlakala 28.