Bana Babo Rena​—Bjalelang Moya Gomme le Katanele go Swanelega!

“Yo a bjalelago moya o tla buna bophelo bjo bo sa felego moyeng.”—BAGAL. 6:8.

1, 2. Mateo 9:37, 38 e phethagala bjang gomme se se dira gore go nyakege’ng ka gare ga diphuthego?

LE HLATSELA ditiragalo tša histori! Modiro wo o boletšwego ke Jesu Kriste o a phethagatšwa. Jesu o itše: “Puno ke e kgolo, eupša badiri ke ba sego kae. Ka baka leo, kgopelang Mong wa puno gore a romele badiri punong ya gagwe.” (Mat. 9:37, 38) Jehofa Modimo o araba dithapelo tše bjalo ka tsela e makatšago kudu. Ngwageng wa tirelo wa 2009, palo ya diphuthego tša Dihlatse tša Jehofa lefaseng ka bophara e oketšegile ka 2 031, ya fihla go 105 298. Palo-gare ya batho ba 757 e be e kolobetšwa letšatši le letšatši!

² Kgolo e bjalo e dira gore go nyakege bana babo rena bao ba swanelegago go etelela pele go ruteng le go dišeng diphuthego. (Baef. 4:11) Go theoša le nywaga-some, Jehofa o ile a kgetha banna bao ba swanelegago bakeng sa go hlokomela dinyakwa tša dinku tša gagwe gomme re kgodišegile gore o tla tšwela pele a dira bjalo. Boporofeta bjo bo begilwego go Mika 5:4 bo re tiišetša gore mehleng ya bofelo, batho ba Jehofa ba tla ba le “badiši ba ba šupaxo” le “matona a seswai a dirá,” bao ba swantšhetšago palo e kgolo ya banna ba ba nago le bokgoni bao ba ba etelelago pele.

3. Hlalosa seo se bolelwago ke go ‘bjalela moya.’

³ Ge e ba o le monna yo a kolobeditšwego yo e lego Hlatse ya Jehofa, ke’ng seo se ka go thušago go nyaka go katanela ditokelo tša tirelo? Taba-kgolo ke gore o ‘bjalele moya.’ (Bagal. 6:8) Go dira bjalo go akaretša go phela ka tsela yeo e tlago go dira gore moya o mokgethwa wa Jehofa o šome ka bolokologi go wena. Ikemišetše gore o se ke wa ‘bjalela nama.’ Phema go dumelela dilo tša go swana le boiketlo, maipshino le boithabišo di fokotša kganyogo ya gago ya go katološa tirelo ya Modimo. Bakriste ka moka ba swanetše go ‘bjalela moya’ gomme ge nako e dutše e e-ya, banna bao ba dirago bjalo ba ka swanelegela ditokelo ka gare ga phuthego. Ka ge go e-na le tlhokagalo e kgolo ya bahlanka ba bodiredi le bagolo lehono, sehlogo se se lebišitšwe ka mo go kgethegilego go banna ba Bakriste. Ka gona, bana babo rena, re kgopela gore le hlahlobišiše sehlogo se ka thapelo.

Katanela Modiro o Mobotse

4, 5. (a) Banna bao ba kolobeditšwego ba kgothaletšwa go katanela ditokelo dife ka phuthegong? (b) Motho a ka katanela go swanelega ka tsela efe?

⁴ Ga go fo itiragalela gore monna wa Mokriste e be molebeledi. O swanetše go katanela “modiro o mobotse.” (1 Tim. 3:1) Modiro wo o akaretša go hlankela badumedi-gotee le yena ka go hlokomela dinyakwa tša bona e le ka kgonthe. (Bala Jesaya 32:1, 2.) Monna yo a katanelago go swanelega ka maikemišetšo a mabotse ga a na megabaru. Go e na le moo, o na le kganyogo e se nago boithati ya go hola ba bangwe.

⁵ Motho yo a nyakago go swanelegela go ba mohlanka wa bodiredi gomme a nyaka go ba molebeledi o swanetše go katanela go fihlelela ditshwanelego tšeo di lego ka Mangwalong. (1 Tim. 3:1-10, 12, 13; Tito 1:5-9) Ge e ba o le monna yo a ineetšego, ipotšiše gore: ‘Na ke tšea karolo ka botlalo modirong wa boboledi, le gona na ke thuša ba bangwe go dira bjalo? Na ke  aga barapedi-gotee le nna ka go tshwenyega kudu ka boiketlo bja bona? Na ke tsebja ka go ba morutwana yo mobotse wa Lentšu la Modimo? Na ke kaonefatša mokgwa woo ke arabago ka wona dibokeng? Na ke phetha ka mafolofolo dikabelo tšeo bagolo ba nneago tšona?’ (2 Tim. 4:5) Dipotšišo tše bjalo di nyaka go naganišišwa ka kelohloko.

6. Taba ya bohlokwa bakeng sa go swanelegela ditokelo ka phuthegong ke efe?

⁶ Tsela e nngwe ya go swanelegela boikarabelo bja ka phuthegong ke ‘gore o matlafatšwe mothong yo o lego yena ka gare ka matla ka moya wa Modimo.’ (Baef. 3:16) Go ba mohlanka wa bodiredi goba mogolo ka phuthegong ya Bokriste ga se taba ya gore o kgethelwa boemo bjo bo phagamego. Tokelo ye e hwetšwa feela ka kgolo ya moya. Kgolo ya moya e hwetšwa bjang? Tsela e nngwe ke ka go “tšwela pele o sepela ka moya” le go hlagolela dika tša wona. (Bagal. 5:16, 22, 23) Ge o dutše o bonagatša dika tša moya tšeo di nyakegago bakeng sa go swara ditokelo tše di oketšegilego gomme o diriša keletšo yeo o e hwetšago mabapi le kamoo o ka kaonefatšago ka gona, ‘tšwelopele ya gago e tla bonagala go batho bohle.’—1 Tim.4:15.

Go Nyakega Moya wa Boikgafo

7. Go hlankela ba bangwe go akaretša’ng?

⁷ Go hlankela ba bangwe go akaretša go šoma ka thata gomme go nyaka moya wa boikgafo. Ka ge balebeledi ba Bakriste e le badiši ba moya, ba tshwenyega kudu ka mathata a mohlape. Ela hloko kamoo boikarabelo bja modiro wa bodiši bo ilego bja kgoma moapostola Paulo ka gona. O boditše badumedi-gotee le yena kua Korinthe gore: “Ke le ngwaletše ka megokgo e mentši ke le tlaišegong kudu e bile ke le bohlokong bja pelo, e sego gore le nyame, eupša gore le tsebe lerato leo ke nago le lona kudu-kudu go lena.” (2 Bakor. 2:4) Go molaleng gore Paulo o dirile modiro wa gagwe ka pelo ka moka.

8, 9. Nea mehlala ya ka Beibeleng yeo e bontšhago kamoo banna ba ilego ba hlokomela dinyakwa tša ba bangwe.

⁸ Moya wa boikgafo e be e dutše e le leswao leo le hlaolago banna bao ba šometšego bahlanka ba  Jehofa ka thata. Ka mohlala, re ka se nagane ka Noa a botša ba lapa la gagwe gore: ‘Le ntsebišeng ge areka e fedile gore ke tle ke tsene le lena.’ Moše ga se a botša Baisiraele Egipita gore: ‘Ke tla le hwetša Lewatleng le Lehwibidu. Iponeleng gore le tšwa bjang.’ Jošua ga se a ka a re: ‘Le ntsebišeng ge merako ya Jeriko e e-wa.’ Gomme Jesaya ga se a šupa go motho yo mongwe ke moka a re: ‘Ke yoo! Roma yena.’—Jes. 6:8.

⁹ Mohlala wa rena o mogolo wa monna yo a ilego a dumelela moya wa Modimo o mo tutuetša ke Jesu Kriste. O ile a amogela ka go rata kabelo ya go hlankela e le Molopolodi wa batho. (Joh. 3:16) Na lerato la Jesu la boikgafo ga se la swanela go re tutueletša go ba le boikgafo? Ge mogolo yo mongwe yo a nago le phihlelo a be a hlalosa maikwelo a gagwe ka mohlape o itše: “Mantšu ao Jesu a a boditšego Petro—diša dinku tša-ka tše dinyenyane—a nkgoma pelo. Go theoša le nywaga, ke ile ka lemoga kamoo mantšu a sego kae ao a bontšhago lerato goba tiro e bonolo ya botho e ka kgothatšago motho ka gona. Go dira maeto a bodiši ke modiro woo ke o thabelago kudu.”—Joh. 21:16.

10. Ke’ng seo se ka tutueletšago banna ba Bakriste go ekiša mohlala wa Jesu tabeng ya go hlankela ba bangwe?

¹⁰ Ge go tliwa mohlapeng wa Modimo, ruri banna bao ba ineetšego ka phuthegong ba swanetše go bontšha boemo bja kgopolo bja Jesu, yo a itšego: “Ke tla le lapološa.” (Mat. 11:28) Go dumela go Modimo le go rata phuthego go tutueletša banna ba Bakriste go katanela modiro wo o mobotse, ba sa nagane gore ba ikgafa kudu goba go lebeletšwe mo gontši kudu go bona. Lega go le bjalo, go thwe’ng ge e ba ngwanabo rena a sa nape a sekametše tabeng ya go swanelega? Na ngwanabo rena yo a ka hlagolela kganyogo ya go hlankela phuthego?

Hlagolela Kganyogo ya go Hlankela

11. Motho a ka hlagolela bjang kganyogo ya go hlankela ba bangwe?

¹¹ Ge e ba o ikwa o sa swanelege gomme seo se go thibela go fihlelela seo se nyakegago, o swanetše go rapelela moya o mokgethwa. (Luka 11:13) Moya wa Jehofa o tla go thuša go lebeletšana le selo le ge e le sefe seo se go tshwenyago tabeng ye. Kganyogo ya go hlankela ke mpho e tšwago go Modimo, ka ge e le moya wa Jehofa woo o tutuetšago ngwanabo rena go katanela go swanelega le go mo nea matla a go phetha tirelo e kgethwa. (Bafil. 2:13; 4:13) Ka gona, ke mo go swanetšego go kgopela Jehofa gore a go thuše go hlagolela kganyogo ya go amogela ditokelo tša tirelo.—Bala Psalme 25:4, 5.

12. Motho a ka hwetša bjang bohlale bjo bo lekanego bakeng sa go phetha boikarabelo bjoo a bo neilwego?

¹² Mokriste a ka kgetha go se katanele go swanelega ka ge a lemoga gore dinyakwa tša mohlape ke tše dintši kudu le gore go di phethagatša go tla mo nyaka mo gontši. Goba a ka ikwa eka o hlaelelwa ke bohlale bjo bo lekanego bakeng sa go swaragana le boikarabelo bjoo. Ge e ba go le bjalo, mohlomongwe a ka hwetša bohlale ka gore e be morutwana yo mafolofolo wa Lentšu la Modimo le dikgatišo tšeo di theilwego Beibeleng. A ka ipotšiša gore, ‘Na ke beela nako ka thoko bakeng sa go ithuta Lentšu la Modimo, gona na ke rapelela bohlale?’ Morutiwa Jakobo o ngwadile gore: “Ge e ba mang le mang wa lena a hloka bohlale, a a tšwele pele a kgopela Modimo, gobane o fa bohle kudu ka ntle le go goboša; o tla bo newa.” (Jak 1:5) Na o dumela mantšu a ao a buduletšwego? Ge a araba thapelo ya Solomone, Modimo o ile a mo nea “pelo e bohlale ya temoxô” yeo e ilego ya mo thuša go kgethologanya magareng ga se se lokilego le se se fošagetšego ge a ahlola. (1 Dikx. 3:7-14) Ke therešo gore boemo e be e le bjo bo kgethegilego tabeng ya Solomone. Lega go le bjalo, re ka kgodišega gore banna bao ba neilwego boikarabelo ka phuthegong ba tla newa bohlale ke Modimo gore ba kgone go hlokomela dinku tša gagwe gabotse.—Die. 2:6.

13, 14. (a) Hlalosa kamoo “lerato leo Kriste a nago le lona” le ilego la kgoma Paulo ka gona. (b) “Lerato leo Kriste a nago le lona” le swanetše go re kgoma bjang?

¹³ Se sengwe seo se ka thušago bakeng sa go hlagolela kganyogo ya go hlankela ba bangwe ke go naganišiša ka mo go tseneletšego ka tšohle tšeo Jehofa le Morwa wa gagwe ba re diretšego tšona. Ka mohlala, ela hloko 2 Bakorinthe 5:14, 15. (Bala.) Go tla bjang gore ‘lerato leo Kriste a nago le lona le re gapeletše?’ Lerato leo Kriste a le  bontšhitšego ka go gafa bophelo bja gagwe bakeng sa rena go ya ka thato ya Modimo ke le legolo kudu mo e lego gore tebogo ya rena e a oketšega gomme dipelo tša rena di kgomega kudu. Lerato la Kriste le be le hlahla Paulo. Ga se la ka la dira gore a be le boithati gomme le mo thušitše gore a ikemišetše go hlankela Modimo le batho ba bangwe ka gare le ka ntle ga phuthego.

¹⁴ Go naganišiša ka lerato leo Kriste a nago le lona ka batho go godiša tebogo ya rena. Ka baka leo, re lemoga gore e ka se be mo go swanetšego go tšwela pele re ‘bjalela nama’ ka go phegelela dipakane tša boithati le go phelela go kgotsofatša dikganyogo tša rena. Go e na le moo, re dira diphetogo maphelong a rena gore re etiše pele modiro woo Modimo a re neilego wona. Re tutueletšega go ‘hlankela’ bana babo rena ka lerato. (Bala Bagalatia 5:13.) Ge e ba re itebelela re le bahlanka bao ka boikokobetšo ba šomelago bahlanka ba Jehofa bao ba ineetšego, re tla ba swara ka seriti le tlhompho. Ruri ga re nyake go ekiša moya wa go swaya diphošo le go ahlola ba bangwe woo o tutuetšwago ke Sathane.—Kut. 12:10.

Maiteko a Lapa

15, 16. Ke tema efe yeo ditho tša lapa di e kgathago bakeng sa go dira gore monna a swanelegele go kgethwa bjalo ka mohlanka wa bodiredi goba mogolo?

¹⁵ Ge e ba ngwanabo rena a nyetše e bile a e-na le bana, boemo bja lapa la gagwe bo elwa hloko go bona ge e ba a swanelega go ba mohlanka wa bodiredi goba mogolo. Ee, bomoya le botumo bja lapa la gagwe di kgatha tema e kgolo go kgethweng ga gagwe. Se se gatelela bohlokwa bja tema yeo lapa le e kgathago go thekgeng monna le tate ge a dutše a nyaka go hlankela dikgahlego tša phuthego e le mohlanka wa bodiredi goba mogolo.—Bala 1 Timotheo 3:4, 5, 12.

¹⁶ Jehofa o a thaba ge ditho tša malapa a Bokriste di dirišana gotee. (Baef. 3:14, 15) Go nyakega teka-tekano gore hlogo ya lapa e phethe boikarabelo bja phuthego le go okamela ba lapa la yona ka “mokgwa o mobotse.” Ka baka leo, go bohlokwa gore mogolo goba mohlanka wa bodiredi a ithute Beibele le mosadi wa gagwe gotee le bana nakong ya Borapedi bja Lapa bja beke le beke gore bohle ba holege. O swanetše go ya tirelong ya tšhemo le bona ka mehla. Ka tsela e swanago, go bohlokwa gore ditho tša lapa di sepedišane le maiteko ao a dirwago ke hlogo ya lapa.

Na o tla Hlankela Gape?

17, 18. (a) Go ka nyakega’ng ge e ba ngwanabo rena a se sa swanelegela go hlankela? (b) Ke pono efe yeo ngwanabo rena yo a kilego a hlankela e le mogolo goba mohlanka wa bodiredi nakong e fetilego a swanetšego go ba le yona?

¹⁷ Mohlomongwe o kile wa ba mogolo goba mohlanka wa bodiredi eupša ga bjale ga o sa hlankela kabelong e bjalo. O rata Jehofa gomme o kgodišegile gore o sa dutše a e-na le taba le wena. (1 Pet. 5:6, 7) Na o boditšwe gore o swanetše go dira diphetogo tše itšego? Ikemišetše go dumela phošo gomme o šomele go e lokiša ka thušo ya Modimo. Hlokomela gore o se ke wa galefa. Hlalefa gomme o bontšhe moya o mobotse. Mogolo yo a kilego a hlankela ka nywaga e mentši eupša a lahlegetšwe ke ditokelo tša tirelo o ile a re: “Ke be ke ikemišeditše go tšwela pele ke e-ya dibokeng, tirelong ya tšhemo le go bala Beibele go swana le ge ke be ke sa hlankela ke le mogolo—gomme ke ile ka kgona go fihlelela pakane yeo. Ke ile ka ithuta go se fele pelo ka gobane ke be ke nagana gore ke tla boela gape ditokelong tša-ka ka morago ga ngwaga o tee goba e mebedi, eupša go tšere mo e ka bago nywaga e šupago pele nka hlankela bjalo ka mogolo gape. Ka nako yeo ke ile ka thušwa kudu ke kgothatšo ya gore ke se ke ka nyema moko eupša ke tšwele pele ke katanela go swanelega gape.”

 ¹⁸ Ge e ba o le ngwanabo rena yo a lego boemong bjo bo sa tšwago go hlaloswa, o se ke wa nyama. Nagana kamoo Jehofa a šegofatšago bodiredi bja gago le lapa la gago ka gona. Aga lapa la gago moyeng, etela bao ba babjago le go kgothatša bao ba fokolago. Go feta tšohle, tšeela godimo tokelo ya gago ya go tumiša Modimo le ya go tsebatša ditaba tše dibotse tša Mmušo bjalo ka yo mongwe wa Dihlatse tša Jehofa. *—Ps. 145:1, 2; Jes. 43:10-12.

E-ba le Pono e Mpsha

19, 20. (a) Banna ka moka bao ba kolobeditšwego ba kgothaletšwa go dira’ng? (b) Ke’ng seo se tlago go ahla-ahlwa sehlogong se se latelago?

¹⁹ Go na le tlhokagalo e kgolo kudu ya balebeledi le bahlanka ba bodiredi go feta le ge e le neng pele. Ka baka leo, re kgothaletša banna ka moka bao ba kolobeditšwego go lebelela lefsa maemo a bona le go ipotšiša gore: ‘Ge e ba ke se mohlanka wa bodiredi goba mogolo, na ke swanetše go hlahlobišiša lebaka leo le dirago gore ke se ke ka hlankela dikabelong tšeo?’ Dumelela moya wa Modimo gore o go thuše go ba le pono e nepagetšego tabeng ye e bohlokwa.

²⁰ Ditho ka moka tša phuthego di tla holwa ke boikgafo bja badumedi-gotee le tšona. Ge e ba re dira ditiro tša botho, tše di se nago boithati, re hwetša lethabo leo le tlišwago ke go hlankela ba bangwe le go bjalela moya. Lega go le bjalo, go etša ge sehlogo se se latelago se tla bontšha, ga se ra swanela go nyamiša moya o mokgethwa wa Modimo. Seo se ka phengwa bjang?

[Mongwalo wa tlase]

O be o tla Araba Bjang?

• Boporofeta bjo bo begilwego go Mika 5:4 bo re kgonthišetša’ng?

• Hlalosa seo se akaretšwago ke moya wa boikgafo.

• Motho a ka hlagolela bjang kganyogo ya go hlankela ba bangwe?

• Go swarišana ga lapa go bohlokwa gakaaka’ng gore monna a swanelege go hlankela e le mohlanka wa bodiredi goba mogolo?

[Dipotšišo tša Thuto]

[Diswantšho go letlakala 25]

O ka dira’ng gore o katanele go swanelega?