Dipotšišo tše Tšwago go Babadi

Ka ge Jehofa a hloile borapedi bja diswantšho, ke ka baka la’ng a se a otla Arone ka baka la go dira namane ya gauta?

Ge Arone a be a dira namane ya gauta, bjalo ka ge go begilwe go Ekisodo kgaolo 32, o robile molao wa Modimo mabapi le borapedi bja diswantšho. (Ek. 20:3-5) Ka baka leo, “Arone Morêna . . . a mo tukêla boxale a rata xo mo senya; ’me le yêna Arone [Moše a] mo rapêlêla lebakeng leo.” (Doit. 9:19, 20) Na topo ya monna yo a lokilego Moše e be e le e “matla kudu” tabeng ya Arone? (Jak. 5:16) Ee. Ka baka la topo e bjalo bonyenyane le ka mabaka a mangwe a mabedi, go bonagala Jehofa a arabile thapelo ya Moše gomme a se otle Arone.

Lebaka la pele le mabapi le pego ya go botega ga Arone. Ge Moše a be a laelwa go ya go Farao go ntšha Baisiraele Egipita, Jehofa o ile a kgetha Arone gore a sepele le Moše le go ba mmoleledi wa gagwe. (Ek. 4:10-16) Banna bao ba babedi ba ile ba kwa gomme ba ya go kgoši ya Egipita ka makga a mantši, ba kgotlelela bopelothata bja Farao. Ka gona, ge ba dutše ba le Egipita Arone o ile a dula a botega, a tsepame tirelong ya Jehofa.—Ek. 4:21.

Ela hloko gape seo se ilego sa dira gore Arone a dire namane ya gauta. Moše o be a le Thabeng ya Sinai ka matšatši a 40. “Sethšaba xe se bôna Mošê à diêxa xo boa thabeng,” se ile sa gapeletša Arone gore a se direle modimo wa seswantšho. Arone o ile a dirišana le sona gomme a dira seswantšho sa namane ya gauta. (Ek. 32:1-6) Lega go le bjalo, seo Arone a se dirilego ka morago se bontšha gore o be a sa thabele borapedi bja diswantšho. Go bonagala a ile a ineela kgateletšong yeo. Ka mohlala, ge mafelelong Moše a be a bolela ka borapedi bja diswantšho, barwa ba Lefi ka moka—go akaretša le Arone—ba ile ba ema ka lehlakoreng la Jehofa ka go tia. Barapedi ba diswantšho ba dikete tše tharo bao ba bego ba eteletše pele ge go be go rapelwa diswantšho ba ile ba bolawa.—Ek. 32:25-29.

Ka morago ga moo, Moše o ile a botša batho gore: “Le dirile sebe se sexolo.” (Ek. 32:30) Ka go rialo, ga se Arone feela yo a ilego a ikwa a le molato ka baka la sebe seo se dirilwego. Yena gotee le batho bao ba ile ba holwa ke kgaugelo e kgolo ya Jehofa.

Ka morago ga tiragalo yeo ya namane ya gauta, Jehofa o ile a laela gore Arone a kgethwe go ba moperisita yo a phagamego. Modimo o boditše Moše gore: “Arone O mo apešê diaparô tše kxêthwa, O mo tlotšê, O mo kxêthê, xore e bê moperisita wa xo ntirêla.” (Ek. 40:12, 13) Go molaleng gore Jehofa o ile a lebalela Arone ka baka la bofokodi bja gagwe. Ka pelong, Arone o be a thekga borapedi bja therešo ka potego, e be e se lerabele la morapedi wa diswantšho.