Harane​—Motse wa Bogologolo wa Ditiragalo tše Dintši

GO BAO ba tlwaelanego le Mangwalo, go fo bolela ka leina Harane go ba gopotša mopatriareka yo a botegago Aborahama. Leetong la gagwe la go tloga Uri go ya nageng ya Kanana, yena le mosadi wa gagwe, Sara, tatagwe, Thara, gotee le motlogolo’agwe Lota ba ile ba ema Harane. Ge ba le moo, Aborahama o ile a hwetša dilo tše dintši tše di bonagalago. Ka morago ga lehu la tatagwe, Aborahama o ile a tšwela pele ka leeto la gagwe go ya nageng yeo Modimo wa therešo a bego a mo holofeditše yona. (Gen. 11:31, 32; 12:4, 5; Dit. 7:2-4) Ka morago, Aborahama o ile a romela mohlanka wa gagwe yo mogolo kua Harane goba lefelong la kgaufsi go hweletša Isaka mosadi. Setlogolo sa Aborahama e lego Jakobo, le sona se ile sa dula moo ka nywaga e mentši.—Gen. 24:1-4, 10; 27:42-45; 28:1, 2, 10.

Ge Kgoši Sanheribe wa Asiria a be a tšhošetša Kgoši Hesekia wa Juda, o ile a bolela gore Harane e gare ga “dithšaba” tšeo di fentšwego ke dikgoši tša Asiria. Tabeng ye, Harane ga e šupe feela motse eupša e šupa selete seo se e dikologilego. (2 Dikx. 19:11, 12) Boporofeta bja Hesekiele bo bolela ka Harane e le o mongwe wa metse yeo e dirišanago le motse wa Tiro ka tša kgwebo, e lego seo se kgonthišetšago gore Harane e be e le motse o bohlokwa go tša kgwebo.—Hesek. 27:1, 2, 23.

Ga bjale Harane ke motse o monyenyane wo o lego kgaufsi le Şanlıurfa, yeo e lego ka bohlabela bja Turkey. Eupša ka nako e nngwe, motse wa bogologolo wa Harane e be e le motse o tletšego ka ditiragalo. Harane ke o mongwe wa metse e mmalwa ya bogologolo yeo leina la yona leo le boletšwego ka Beibeleng le sa dutšego le dirišwa le mehleng yeno. Leina la yona la se-Asiria e lego Harranu le ka bolela “Tsela” goba “Tsela ya Kgwebo,” e lego seo se bontšhago gore Harane e be e le tseleng e kgolo ya tša kgwebo magareng ga metse e megolo. Go ya ka tlhaloso yeo e bego e fihlilwe kua Harane, mmago Kgoši Nabonidus wa Babilona e be e le moperisita yo a phagamego wa mosadi tempeleng ya Sin, modimo wa ngwedi wa Harane. Ba bangwe ba re Nabonidus o ile a tsošološa tempele ye. Ka morago ga moo, mebušo e ile ya tsoga le go wa kua Harane.

Lehono, Harane ga e sa le ka tsela yeo e bego e le ka yona mehleng ya bogologolo. Harane ya bogologolo e be e le motse o hlabologilego kudu le o bohlokwa, kudu-kudu ka dihla tše itšego. Lega go le bjalo, Harane ya mehleng yeno e tletše ka dintlo tšeo di nago le marulelo a nkgokolo. Go dikologa motse woo go na le marope a metse ya bogologolo yeo e bego e hlabologile. Lefaseng le lefsa la Modimo, ba bantši bao ba ilego ba dula Harane—go akaretša Aborahama, Sara le Lota—ba tla tsošwa. Go molaleng gore ba tla re botša mo gontši ka Harane, motse wa bogologolo wa ditiragalo tše dintši.

[Seswantšho go letlakala 20]

Marope a Harane

[Seswantšho go letlakala 20]

Dintlo tšeo di nago le marulelo a nkgokolo

[Seswantšho go letlakala 20]

Ponagalo ya motse wa Harane lehono