Ke ka Baka La’ng re Swanetše go Hlompha Batšofadi?

LEBOPONG la California, U.S.A., go na le mohuta wa sehlare seo se tšewago diswantšho kudu lefaseng ka bophara. Leina la sona ke Lone Cypress. Go begwa gore sehlare se se na le nywaga ya ka godimo ga e 250. Sehlare se se sebotse se kgahlile batho ka ditsela tše dintši ka baka la kgotlelelo ya sona. Ka mohlala, se ile sa tiišwa le go thekgwa ka dithapo le go kgabišwa ka mafsika go dikologa kutu ya sona.

Sehlare sa Lone Cypress se re gopotša ka Bakriste ba ba tšofetšego bao re nago le bona, bao ba bontšhago kgotlelelo e makatšago. Tsela e nngwe yeo ba dirago se ka yona ke ka go bolela ditaba tše dibotse. Moporofeta Joele o boletše e sa le pele gore ba “baxolo” ba tla phatlalatša molaetša wa Beibele. (Joele 2:28-32; Dit. 2:16-21) E fo nagana ka diiri tše dintši tšeo ka mafolofolo ba di fetšago ba thuša ba bangwe go ithuta ka “ditaba tše dibotse tša Mmušo”! (Mat. 24:14) Ba bangwe ba bagoeledi ba ba ba tšofetšego ba Mmušo ba ile ba kgotlelela nywaga ya tlaišo goba mathata a mangwe. Ge e ba sehlare sa cypress se etšwe hloko ka baka la kgotlelelo ya sona gomme se tiišitšwe ka mafsika le dithapo, gona batšofadi bao ba nago le rena ba swanelwa ke go elwa hloko kudu le go swarwa ka seriti le tlhompho!

Jehofa Modimo o ile a laela batho ba gagwe ba bogologolo gore: “Xe O lebana le hlôxô e pududu O êmê; sefahloxô sa mokgalabyê O se hlomphê.” (Lef. 19:32) Gare ga bahlanka ba Jehofa lehono, re hwetša mehlala e mebotse ya babotegi bao ba bego ba dutše ba “sepela  le Modimo” ka nywaga-some. (Mika 6:8) Ge ba dutše ba diriša melao ya motheo ya Mangwalo, bohlogo-pududu bja bona ruri ke “’ala sa bothšephi.”—Die. 16:31.

Moapostola Paulo o ile a laela Timotheo yo mofsa gore: “O se ke wa kgalema monna yo mogolo ka matla.” Go e-na le moo, Timotheo o be a swanetše gore a mo “lope bjalo ka tate” gomme “basadi ba bagolo bjalo ka bo-mma.” (1 Tim. 5:1, 2) Ge e le gabotse, Timotheo o be a swanetše go ‘ema’ pele ga hlogo e pududu. Ka gona, ke mo go kwagalago gore Jehofa a letele gore mokgwa wa rena wa go bolela o bonagatše tlhompho e bjalo.

Baroma 12:10 e re: “Go bontšhaneng kgodišo, etelelang pele.” Balebeledi ka phuthegong ba tloga ba hlompha Bakriste ba ba tšofetšego. Eupša ka moka ga rena re swanetše go etelela pele go bontšhaneng tlhompho.

Ke therešo gore ditho tša malapa di na le boikarabelo bjo bo kgethegilego go batswadi ba tšona le go bo-rakgolo le bo-makgolo’a tšona. Tabeng ya sehlare sa Lone Cypress, batho ba tsomile ditsela tša go se boloka se phela gomme ba tšwela pele ba dira bjalo. Ka gona, ruri re swanetše go tsoma ditsela tša go thuša go boloka seriti sa batswadi ba rena le bo-rakgolo le bo-makgolo’a rena. Ka mohlala, go ba motheetši yo mobotse go tla re phemiša go phegelela go dira dilo ka tsela ya rena re se na taba le maikwelo a bona.—Die. 23:22; 1 Tim. 5:4.

Batšofadi bao re nago le bona ke ba bohlokwa kudu go Jehofa. A ka se ba tlogele. (Ps. 71:18) Ge e le gabotse, Modimo wa therešo o a ba matlafatša gore ba tšwele pele ba mo hlankela ka potego. Anke le rena re tšweleng pele re thekga le go hlompha batšofadi.

[Diswantšho go letlakala 7]

Bjalo ka ge sehlare sa “Lone Cypress” se nyaka thekgo, batšofadi ba nyaka go swarwa ka seriti le tlhompho

[Mothopo]

American Spirit Images/age fotostock