Le se ke la Nyamiša Moya o Mokgethwa wa Jehofa

“Le se ke la nyamiša moya o mokgethwa wa Modimo, woo le swailwego ka wona.”—BAEF. 4:30.

1. Ke’ng seo Jehofa a se diretšego batho ba dimilione, gona ba na le boikarabelo bofe?

JEHOFA o dirile selo se se kgethegilego bakeng sa batho ba dimilione bao ba phelago lefaseng le leo le tletšego khuduego. O dirile gore ba kgone go mmatamela ka Morwa wa gagwe yo a tswetšego a nnoši, Jesu Kriste. (Joh. 6:44) O yo mongwe wa batho ba ge e ba o ineetše go Modimo gomme o phela ka go dumelelana le boineelo bjoo. Bjalo ka motho yo a kolobeditšwego leineng la moya o mokgethwa, o na le boikarabelo bja go itshwara ka tsela yeo e dumelelanago le moya woo.—Mat. 28:19.

2. Ke dipotšišo dife tšeo re tlago go di ahla-ahla?

² Rena bao re “bjalelago moya” re apara motho yo mofsa. (Bagal. 6:8; Baef. 4:17-24) Eupša moapostola Paulo o re nea keletšo le temošo gore re se nyamiše moya o mokgethwa wa Modimo. (Bala Baefeso 4:25-32.) Ga bjale re tla ahla-ahla ka mo go tseneletšego keletšo ye ya moapostola. Paulo o be a e-ra go re’ng ge a be a bolela ka go nyamiša moya o mokgethwa? Ke  bjang motho yo a ineetšego go Jehofa a ka dirago selo sa mohuta woo? Gona re ka phema bjang go nyamiša moya o mokgethwa wa Jehofa?

Seo ge e le Gabotse Paulo a Bego a se Bolela

3. O be o ka hlalosa bjang seo se bolelwago ke mantšu ao a begilwego go Baefeso 4:30?

³ Sa pele, ela hloko mantšu a Paulo ao a begilwego go Baefeso 4:30. O ngwadile gore: “Le se ke la nyamiša moya o mokgethwa wa Modimo, woo le swailwego ka wona bakeng sa letšatši la go lokollwa ka topollo.” Paulo o be a sa nyake gore badumedi-gotee le yena bao ba rategago ba bee boemo bja bona bja moya kotsing. Ba ‘swailwe ka moya wa Jehofa bakeng sa letšatši la go lokollwa ka topollo.’ Moya o mokgethwa wa Modimo e be e sa le leswao e bile e sa dutše e le leswao, goba “pontšho ya seo se tlago go tla” bakeng sa batlotšwa bao ba dulago ba botega. (2 Bakor. 1:22) Go swaiwa moo go bontšha gore ke batho ba Modimo gomme ba tla phela legodimong. Bao mafelelong ba ilego ba swaiwa ke ba 144 000.—Kut. 7:2-4.

4. Ke ka baka la’ng go le bohlokwa go phema go nyamiša moya wa Modimo?

⁴ Go nyamiša moya o mokgethwa e ka ba kgato ya mathomo yeo e lebišago Mokriste go lahlegelweng ka mo go feletšego ke tutuetšo ya moya wa Modimo o šomago. Go kgonega ga seo go bontšhwa ke seo Dafida a se boletšego ka morago ga go dira sebe le Batseba. Ka go itshola, Dafida o ile a lopa Jehofa ka gore: “Se nthakê pele xa xaxo; ’me O se tlošê môya-mokxêthwa wa xaxo xo nna.” (Ps. 51:11) Ke feela batlotšwa bao ba dulago ba “botega gaešita le go iša lehung,” bao ba tlago go amogela “mphapahlogo” wa bophelo bja go se hwe legodimong. (Kut. 2:10; 1 Bakor. 15:53) Bakriste bao ba nago le kholofelo ya go phela mo lefaseng le bona ba nyaka moya o mokgethwa e le gore ba dule ba botegela Modimo gomme ba amogele mpho ya gagwe ya bophelo motheong wa go dumela sehlabelong sa Kriste sa topollo. (Joh. 3:36; Baroma 5:8; 6:23) Ka baka leo, ka moka ga rena re swanetše go itiša malebana le go nyamiša moya o mokgethwa wa Jehofa.

Ke Bjang Mokriste a ka Nyamišago Moya?

5, 6. Mokriste a ka nyamiša bjang moya wa Jehofa?

⁵ Bjalo ka Bakriste bao ba ineetšego, re ka phema go nyamiša moya. Se se a kgonega ge e ba re ‘tšwela pele re sepela le go phela ka moya,’ ka gobane re tla ba re sa laolwe ke dikganyogo tša nama gomme re ka se bontšhe dika tšeo di sa kgahlišego Modimo. (Bagal. 5:16, 25, 26) Eupša seo se ka fetoga. Re ka nyamiša moya wa Modimo ka tsela e itšego ka go dumelela gore re arošwe ganyenyane-ganyenyane, mohlomongwe re sa lemoge, ke boitshwaro bjoo bo iletšwago ka Lentšung la Modimo leo le buduletšwego ka moya.

⁶ Ge e ba re tšwela pele re dira dilo ka go se dumelelane le tlhahlo ya moya o mokgethwa, re tla ba re o nyamiša le go nyamiša Jehofa, Mothopo wa moya woo. Ge re hlahloba Baefeso 4:25-32, re tla bona kamoo re swanetšego go itshwara ka gona gomme seo se tla re thuša go phema go nyamiša moya wa Modimo.

Kamoo re ka Phemago go Nyamiša Moya

7, 8. Hlalosa lebaka leo ka lona re swanetšego go bolela therešo.

⁷ Re swanetše go bolela therešo. Go ya ka Baefeso 4:25, Paulo o ngwadile gore: “Ka ge bjale le lahlile maaka, bolelang therešo yo mongwe le yo mongwe wa lena le moagišani wa gagwe, gobane re ditho seng sa rena.” Ka ge re kopantšwe re le “ditho seng sa rena,” ruri ga se ra swanela go fora-foretša goba go leka go aroša badumedi-gotee le rena ka boomo, ka ge seo se swana le go ba botša maaka. Le gona, motho yo a tšwelago pele a dira dilo tše bjalo o tla feleletša a se na tswalano le Modimo.—Bala Diema 3:32.

⁸ Mantšu le ditiro tša bofora di ka senya botee bja phuthego. Ka gona, re swanetše go swana le moporofeta yo a botegago Daniele, yoo ba bangwe ba bego ba sa hwetše kgobogo go  yena. (Dan. 6:5) Le gona, re swanetše go dula re gopola keletšo ya Paulo e yago go Bakriste bao ba nago le kholofelo ya go phela legodimong ya gore setho se sengwe le se sengwe sa “mmele wa Kriste” ke sa bohle gomme se swanetše go dula se le boteeng le balatedi ba Jesu ba tloditšwego ba therešo. (Baef. 4:11, 12) Ge e ba re e-na le kholofelo ya go phela ka mo go sa felego lefaseng la Paradeise, le rena re swanetše go bolela therešo, ka go dira bjalo re tla ba re tsenya letsogo borwarreng bja rena bja lefase ka bophara.

9. Ke ka baka la’ng go le bohlokwa go dira dilo ka go dumelelana le Baefeso 4:26, 27?

⁹ Re swanetše go ganetša Diabolo, re sa mo nee sebaka sa go re senya moyeng. (Jak. 4:7) Moya o mokgethwa o re thuša go ganetša Sathane. Ka mohlala, re ka dira bjalo ka go itiša malebana le kgalefo e sa laolegego. Paulo o ngwadile gore: “Galefang, eupša le se ke la dira sebe; letšatši le se ke la sobela le galefile, le gona le se ke la nea Diabolo sebaka.” (Baef. 4:26, 27) Ge e ba re e-na le lebaka la go galefa, thapelo ya kapejana ya setu e ka re thuša gore re be le “pelo-keledi,” re bontšhe boitshwaro go e na le go dira dilo ka tsela yeo e ka nyamišago moya wa Modimo. (Die. 17:27) Ka gona, a re se keng ra dula re galefile gomme ra nea Sathane sebaka sa gore a re tutuetše go dira selo se sebe. (Ps. 37:8, 9) Tsela e nngwe yeo re ka mo ganetšago ka yona ke ka go rarolla diphapano ka pela ka go dumelelana le keletšo ya Jesu.—Mat. 5:23, 24; 18:15-17.

10, 11. Ke ka baka la’ng re sa swanela go utswa goba go dira dilo ka go se botege?

¹⁰ Ga se ra swanela go ineela tekong le ge e le efe ya gore re utswe goba re se botege. Paulo o ngwadile mabapi le go utswa gore: “Yo a utswago a se ke a hlwa a utswa, eupša go e-na le moo a šome ka thata, a dire seo e lego modiro o mobotse ka diatla tša gagwe, gore a be le seo a ka se abelago yo mongwe yo a hlokago.” (Baef. 4:28) Ge e ba Mokriste yo a ineetšego a ka utswa, ge e le gabotse o tla ba a “senya ’ina la Modimo” ka go mo goboša. (Die. 30:7-9) Gaešita le bodiidi ga bo lokafatše go utswa. Bao ba ratago Modimo le moagišani ba lemoga gore le ka mohla bohodu ga bo lokafatšwe.—Mar. 12:28-31.

¹¹ Paulo ga a fo bolela feela seo re sa swanelago go se dira; o bolela gape seo re swanetšego go se dira. Ge e ba re phela le go sepela ka moya o mokgethwa, re tla šoma ka thata e le gore re hlokomele malapa a rena gomme re be le “seo [re] ka se abelago yo mongwe yo a hlokago.” (1 Tim. 5:8) Jesu le baapostola ba gagwe ba ile ba beela tšhelete ka thoko bakeng sa go thuša badiidi, eupša Judase Isikariothe wa moeki o ile a utswa e nngwe ya tšhelete yeo. (Joh. 12:4-6) Go molaleng gore o be a sa hlahlwe ke moya o mokgethwa. Rena bao re hlahlwago ke moya wa Modimo re “itshwara ka go botega dilong tšohle,” go etša ge Paulo a dirile. (Baheb. 13:18) Ka gona, re  phema go nyamiša moya o mokgethwa wa Jehofa.

Ditsela tše Dingwe tša go Phema go Nyamiša Moya

12, 13. (a) Go etša ge go bontšhitšwe go Baefeso 4:29, ke polelo ya mohuta mang yeo re swanetšego go e phema? (b) Polelo ya rena e swanetše go ba ya mohuta mang?

¹² Re swanetše go diša melomo ya rena. Paulo o itše: “A polelo e bodilego e se ke ya tšwa molomong wa lena, eupša go tšwe polelo e botse ya go aga moo go nyakegago, gore e fetišetše se se rategago go bao ba kwago.” (Baef. 4:29) Le mo tabeng ye, moapostola ga a fo re botša feela seo re sa swanelago go se dira, o re botša seo re swanetšego go ba re se dira. Re tutuetšwa ke moya wa Modimo, re tla tutueletšega go ‘bolela polelo e botse ya go aga gore e fetišetše se se rategago go bao ba kwago.’ Go oketša moo, ga se ra swanela go dumelela “polelo e bodilego” gore e tšwe melomong ya rena. Lentšu la Segerika leo le fetoletšwego e le ‘go bola’ le dirišetšwa go hlalosa seenywa, hlapi goba nama e bodilego. Bjalo ka ge re šišimišwa ke dijo tše bjalo, re hloya polelo yeo Jehofa a e lebelelago e le e mpe.

¹³ Polelo ya rena e swanetše go ba e botse, e botho le e “nokilwego ka letswai.” (Bakol. 3:8-10; 4:6) Batho ba swanetše go lemoga gore re ba fapanego ge ba e-kwa dipolelo tša rena. Ka gona, anke re thušeng ba bangwe ka go bolela “polelo e botse ya go aga.” Le gona, eka re ka ikwa go swana le mopsalme yo a opetšego ka gore: “A nkê O kxahlwê-hlê ke polêlô tša molomo wa-ka, le dikeleletšô tšé tša pelo ya-ka, Wêna Morêna Lentswê la-ka, Wêna Monamoledi wa-ka.”—Ps. 19:14.

14. Go ya ka Baefeso 4:30, 31, re swanetše go tloša’ng go rena?

¹⁴ Re swanetše go tloša kgalako, pefelo, polelo e gobošago le bobe bjohle go rena. Ka morago ga go lemoša malebana le go nyamiša moya wa Modimo, Paulo o ngwadile gore: “A kgalako yohle e bošula le bogale le pefelo le mašata le polelo e gobošago di tlošwe go lena gotee le bobe bjohle.” (Baef. 4:30, 31) Bjalo ka batho ba sa phethagalago, ka moka ga rena re swanetše go katanela go laola menagano le ditiro tša rena. Ge e ba re be re ka dumelela go laolwa ke “kgalako yohle e bošula le bogale le pefelo,” re tla ba re nyamiša moya wa Modimo. Go bjalo le ge re dula re gopola diphošo tšeo re diretšwego tšona, ra boloka sekgopi gomme ra gana go boelana le motho yo a re kgopišitšego. Ge e ba re ka thoma go hlokomologa keletšo ya Beibele, re ka hlagolela dika tšeo di ka lebišago gore re dire sebe kgahlanong le moya gomme re ka lebeletšana le mafelelo a sa kgahlišego.

15. Ge e ba re fošeditšwe, re swanetše go dira’ng?

¹⁵ Re swanetše go ba ba botho, ba gaugelago le ba lebalelago. Paulo o ngwadile gore: “E-bang ba botho yo mongwe go yo mongwe, le šokelane ka bonolo, le lebalelane ka bolokologi go etša ge Modimo le yena a le lebaletše ka bolokologi ka Kriste.” (Baef. 4:32) Gaešita le ge re kgopišitšwe kudu ke ge ba bangwe ba re fošeditše, anke re lebaleleng go etša ge Modimo a dira. (Luka 11:4) A re re mohlomongwe modumedi-gotee le rena o re boletše gampe. E le go leka go lokiša ditaba, re a mmatamela. O tloga a bontšha gore o kwešwa bohloko ke seo gomme o kgopela tshwarelo. Re a mo swarela, eupša re swanetše go dira se se fetago seo. Lefitiko 19:18 e re: “O se kê wa  itefetša; O se kê wa dula Ò befeletšwe wa xeno xo ya xo ile. Wa xeno O mo ratê ka mokxwa wo O ithataxo ka wôna. Ké Nna Morêna.”

Go Nyakega Gore re Phafoge

16. Nea mohlala wo o bontšhago gore re ka swanelwa ke go dira diphetogo gore re se ke ra nyamiša moya wa Jehofa.

¹⁶ Re ka lekega go dira selo seo se sa kgahlego Modimo gaešita le ge re le ka sephiring. Ka mohlala, ngwanabo rena a ka ba a theetša mmino o belaetšago. Mafelelong, letswalo la gagwe le a mo tshwenya ka gobane a hlokomologile keletšo ya Beibele yeo re e hwetšago dikgatišong tša “mohlanka yo a botegago le wa temogo.” (Mat. 24:45) A ka rapela ka bothata bjo gomme a gopola mantšu a Paulo ao a begilwego go Baefeso 4:30. Ka ge a ikemišeditše go se dire selo seo se ka kgopišago moya wa Modimo, o phetha ka gore go tloga ga bjale o tla phema mmino o belaetšago. Jehofa o tla šegofatša moya woo ngwanabo rena a o bontšhago. Ka gona, anke ka mehla re itiše kgahlanong le go nyamiša moya wa Modimo.

17. Go ka direga’ng ge e ba re sa phakgama goba re sa rapele ka mehla?

¹⁷ Ka ntle le ge re ka dula re phakgame e bile re rapela, re ka wela mokgweng o sa hlwekago goba o fošagetšego woo o ka dirago gore re nyamiše moya. Ka ge moya o mokgethwa o tšweletša dika tša semelo sa Tatago rena wa legodimong, o ka nyamišwa goba wa kwešwa bohloko—selo seo le ka mohla re ka se nyakego go se dira. (Baef. 4:30) Ba mangwalo bao e lego Bajuda ba lekgolong la pele la nywaga ba ile ba dira sebe ka go bolela gore mehlolo ya Jesu ke ya Sathane. (Bala Mareka 3:22-30.) Manaba ao a Kriste a ile a ‘rogaka moya o mokgethwa’ gomme a dira sebe seo se sa lebalelwego. Anke le ka mohla re se ke ra dira bjalo!

18. Re ka kgonthišega bjang gore ga se ra dira sebe seo se sa lebalelwego?

¹⁸ Ka ge re sa nyake go dira sebe seo se sa lebalelwego, re swanetše go gopola seo Paulo a se boletšego mabapi le go se nyamiše moya. Eupša go thwe’ng ge e ba re dirile sebe se segolo? Ge e ba re ile ra itshola gomme ra thušwa ke bagolo, re ka phetha ka gore Modimo o re lebaletše le gore ga se ra dira sebe kgahlanong le moya o mokgethwa. Ka thušo ya Modimo, re ka phema go nyamiša moya o mokgethwa ka tsela le ge e le efe.

19, 20. (a) Ke dilo dife tše dingwe tšeo re swanetšego go di phema? (b) Re swanetše go ikemišetša go dira’ng?

¹⁹ Modimo o diriša moya wa gagwe o mokgethwa go tšweletša lerato, lethabo le botee bathong ba gagwe. (Ps. 133:1-3) Ka gona, re swanetše go phema go nyamiša moya ka go se tšee karolo lesebong leo le gobatšago goba ka go bolela dilo tšeo di ka hlomphollago badiši bao ba kgethilwego ka moya. (Dit. 20:28; Juda 8) Go e na le moo, re swanetše go godiša botee le go hlomphana ka phuthegong. Ruri ga se ra swanela go kgothaletša moya wa go bopa dihlophana bathong ba Modimo. Paulo o ngwadile gore: “Ke a le kgothatša, bana bešo, ka leina la Morena wa rena Jesu Kriste gore ka moka le bolele ka go dumelelana, le gore go se be le dikarogano gare ga lena, eupša gore le be batee ka mo go swanetšego monaganong o swanago le tseleng e swanago ya go nagana.”—1 Bakor. 1:10.

²⁰ Jehofa o ikemišeditše e bile o kgona go re thuša go phema go nyamiša moya wa gagwe. Anke re tšweleng pele re rapelela moya o mokgethwa gomme re ikemišetše go se o nyamiše. Eka re ka tšwela pele re ‘bjalela moya,’ re nyaka tlhahlo ya wona ka pelo ka moka gona bjale le ka mo go sa felego.

O be o tla Araba Bjang?

• Ke’ng seo se bolelwago ke go nyamiša moya wa Modimo?

• Motho yo a ineetšego go Jehofa a ka nyamiša moya wa gagwe bjang?

• Re ka phema go nyamiša moya o mokgethwa ka ditsela dife?

[Dipotšišo tša Thuto]

[Seswantšho go letlakala 30]

Rarolla diphapano ka pela

[Seswantšho go letlakala 31]

Ke dienywa dife tšeo di swantšhetšago seo se tšwago molomong wa gago?