Go Kopanywa ke Lerato​—Pego ya Seboka sa Ngwaga le Ngwaga

GO BE go foka moya wa lethabo Holong ya Kopano ya Dihlatse tša Jehofa kua Jersey City, New Jersey, U.S.A. Mesong ya October 3, 2009, batho ba fetago 5 000 ba be ba bokane sebokeng sa ngwaga le ngwaga sa bo-125 sa Watch Tower Bible and Tract Society of Pennsylvania. Ba bangwe ba dikete ba be ba theeditše le go bogela lenaneo bidiong yeo e bego e kgokagantšwe le meago e meraro ya Bethele kua United States le Bethele ya Canada. Batho ka moka ba 13 235, bao ba bego ba kopantšwe ke go rata ga bona Jehofa, ba ile ba thabela seboka se sa diiri tše tharo.

Modula-setulo e be e le Geoffrey Jackson wa Sehlopha se Bušago. O butše lenaneo ka go rola diopedi tšeo e lego ditho tša lapa la Bethele tšeo di ilego tša opela dikopelo go tšwa pukung ya rena e mpsha ya dikopelo. Mohlahli wa diopedi tše e be e le setho se sengwe sa Sehlopha se Bušago, David Splane, yoo a hlalositšego ka boripana bohlokwa bja mmino borapeding bjo bo sekilego. Batheetši ba ile ba laletšwa go opela dikopelo tše tharo tše difsa sebokeng se; diopedi di ile tša thoma gomme ka morago tša opela gotee le batheetši. Sehlopha sa diopedi se be se rulagantšwe feela bakeng sa seboka se seo se kgethegilego; ga se gwa swanela go naganwa gore go nyakega dihlopha tše bjalo diphuthegong, dikopanong tša tikologo goba tša selete.

Dipego go tšwa Makaleng

Baeng bao e lego ditho tša Dikomiti tša Makala ba ile ba nea dipego go tšwa makaleng a mahlano. Kenneth Little o boletše gore kgaufsinyane Canada e tla thoma go gatišetša United States le Canada bontši bja dimakasine, gomme seo se tla feleletša ka koketšego e kgolo ya tšweletšo lekaleng leo. Gore se se fihlelelwe, motšhene o mofsa wa go gatiša o tla dirišwa ke dihlopha tše pedi tša bašomi bao ba šiedišanago gomme seo se tla dira gore go šongwe diiri tše 16 ka letšatši.

Reiner Thompson o begile ka modiro wa Mmušo wa kua Dominican Republic gomme Albert Olih a bolela ka modiro wa rena kua Nigeria. Emile Kritzinger yo a tšwago Mozambique o hlalositše gore ka morago ga nywaga-some ya tlaišo yeo e bilego gona nageng yeo, Dihlatse tša Jehofa di ile tša ngwadišwa ka 1992. Dinaga tše tše tharo ka moka di sa tšwa go ba le koketšego e kgolo palong ya bagoeledi. Viv Mouritz yo a tšwago lekaleng la Australia o boletše ka koketšego ya kua East Timor, yeo e hlokometšwego ke bana babo rena ba Australia.

Dikomiti tša Sehlopha se Bušago

Ka 1976, mediro ka moka ya Dihlatse tša Jehofa e ile ya thoma go laolwa ke dikomiti tše tshelelago tša Sehlopha se Bušago. Ka morago, ditho tša sehlopha sa dinku tše dingwe di ile tša kgethwa gore e be bathuši. Gona bjale ditho tše 23 di thuša ka modiro wo o dirwago. Go ile gwa boledišanwa le ditho tše tshela tša tšona. Di na le palo-moka ya nywaga e 341 di le tirelong ya nako e tletšego—e lego palo-gare ya nywaga e 57 setho se tee.

Don Adams, yo a tlilego Bethele ka 1943, o hlalositše gore Komiti ya Molomaganyi e bopša ke balomaganyi ba dikomiti tše dingwe tše tlhano, e lego seo se kgonthišetšago gore ka moka ga tšona e le tše tlhano di šoma gotee ka thelelo. Komiti ye e arabela maemong a magolo a tšhoganetšo, tlaišo, ditaba tša kgorong ya tsheko, dikotsi tša tlhago le ditaba tše dingwe tša tšhoganetšo tšeo di kgomago Dihlatse tša Jehofa lefaseng ka bophara.

 Dan Molchan o hlalositše modiro wa Komiti ya Bašomi, yeo e okamelago boemo bja moya le bja nama bja ditho tša lapa la Bethele tše 19 851 lefaseng ka bophara. David Sinclair o hlalositše kamoo Komiti ya Kgatišo e okamelago go rekwa ga ditlabakelo le didirišwa tša makala. Ke moka Robert Wallen, yo a hlanketšego Bethele ka nywaga e ka bago e 60, o boletše kamoo Komiti ya Tirelo e okamelago modiro wa batho ba Jehofa tšhemong le ka diphuthegong. William Malenfant o hlalositše modiro o thata woo Komiti ya go Ruta e o dirago ge e rulaganya lenaneo la kopano. Mafelelong, John Wischuk o hlalositše kamoo Komiti ya Bongwadi e okamelago go rulaganywa ka kelohloko le go tšweletšwa ga tsebišo dikgatišong tša rena. *

Temana ya Ngwaga ya 2010 e Lebiša Tlhokomelo Leratong

Dipolelo tše tharo tše di latetšego di ile tša newa ke ditho tša Sehlopha se Bušago. Gerrit Lösch o thomile ka go botšiša gore, “Na o nyaka gore ba bangwe ba go rate?” O hlalositše gore lerato ke senyakwa sa motheo sa motho gomme bohle se a re thabiša. Re bile gona ka baka la lerato ka gobane Jehofa o re bopile ka lerato le le se nago boithati. Maikemišetšo a magolo a modiro wa rena wa boboledi le go ruta ke gore re rata Jehofa.

Lerato leo le laolwago ke melao ya motheo ga le bontšhwe baagišani ba rena feela eupša le bontšhwa le manaba a rena. (Mat. 5:43-45) Batheetši ba ile ba kgothaletšwa go ela hloko maemo ao Jesu a fetilego go ona ka baka la rena, go bethwa, go kwerwa, go tshwelwa ka mare le go hlabja. Go sa šetšwe dilo tše, o ile a rapelela bahlabani bao ba ilego ba mo kokotela koteng. Na se ga se dire gore re mo rate le go feta? Ke moka ngwanabo rena Lösch o ile a tsebiša temana ya ngwaga ya 2010: 1 Bakorinthe 13:7, 8, ‘Lerato le kgotlelela tšohle. Lerato le ka mohla ga le fele.’ Re na le tebelelo ya go phela ka mo go sa felego le ya go rata gotee le go ratwa ka mo go sa felego.

Na o Sepela ka Mašaledi?

Samuel Herd o thomile polelo ya gagwe ka papišo. Anke re re mogwera wa gago o feta a go tšea gore le sepele leeto la dikhilomithara tše 50. Ge o dutše ka thoko, o lemoga gore lenakana la peterole le bontšha gore e kgaufsi le go fela. O botša mogwera wa gago gore peterole e kgaufsi le go fela. O go botša gore o se ke wa tshwenyega; go sa na le dilithara tše dingwe tše nne ka tankeng. Lega go le bjalo, go se go ye kae peterole e a fela. Na go a hola go ‘sepela ka mašaledi’ ka kgonagalo ya go gakanega nageng ge peterole e fela? Ruri go kaone kudu go dula o tladitše tanka! Ka tsela ya seswantšhetšo, re swanetše go dula re tladitše tanka, peterole ke go tseba ga rena Jehofa.

Gore seo se kgonege, re swanetše go tšhela peterole e lekanego gomme re dire bjalo ka mehla. Go na le ditsela tše nne tša go dira se. Ya pele ke  thuto ya motho ka noši, e lego go tlwaelana le Beibele ka go e bala letšatši le letšatši. Ga se ra swanela go fo bala mantšu eupša re swanetše go kwešiša seo re se balago. Ya bobedi, re swanetše go diriša gabotse mantšiboa a rena a Borapedi bja Lapa. Na beke e nngwe le e nngwe re oketša peterole goba re fo sepela ka mašaledi ao a lego tankeng ya rena? Ya boraro, go ba gona dibokeng ka moka tša phuthego. Ya bone, go naganišiša ka setu go se na tšhitišo, o nagana ka ditsela tša Jehofa. Psalme 143:5 e re: “Ke eleletša tša mehla ya kxalê; ke êlêlwa tšohle O kilexo wa di dira.”

“Baloki ba tla Taga”

John Barr o neile polelo ya boraro yeo e lego ya mafelelo, yeo e hlalositšego seswantšho sa Jesu sa korong le mefoka. (Mat. 13:24-30, 38, 43) Seswantšho seo se šupa “punong” yeo go yona go kgoboketšwago “barwa ba mmušo” gomme mefoka e hlaolwago bakeng sa go yo fišwa.

Ngwanabo rena Barr o hlalositše gabotse gore modiro wa go kgoboketša o tla ba le mo o felelago gona. O boletše ka Mateo 24:34, e rego: “Moloko wo o ka se fete le ka mohla go fihla ge dilo tše ka moka di direga.” O badile mantšu a gabedi: “Go bonagala Jesu a be a bolela gore batlotšwa bao ba bego ba le gona ge pontšho e thoma go bonagala ka 1914 ba be ba tla fetana ka nywaga le batlotšwa ba bangwe bao ba bego ba tla bona mathomo a masetlapelo a magolo.” Ga re tsebe ka go lebanya botelele bja “moloko wo,” eupša o akaretša dihlopha tše tše pedi tšeo di fetanago ka nywaga ya bophelo. Gaešita le ge batlotšwa ba fetana ka nywaga, bao ba lego dihlopheng tše tše pedi ba bopa moloko gomme ba phela ka nako e tee karolong ya mehla ya bofelo. Ke mo go homotšago go tseba gore motlotšwa yo monyenyane wa bao ba phelago ka nako e tee le batlotšwa bao ba tšofetšego bao ba bonego pontšho ge e bonagala mathomong a 1914 a ka se ke a hwa pele masetlapelo a magolo a thoma!

“Barwa ba mmušo” ba letetše ka phagahlo moputso wa bona wa legodimong, eupša bohle re swanetše go dula re botega, re taga wa letšatši go fihla bofelong. Ruri re na le tokelo ya go bona go kgoboketšwa ga “korong” mehleng ya rena.

Ka morago ga kopelo ya go phetha, yo a ilego a phetha ka thapelo ke Theodore Jaracz wa Sehlopha se Bušago. Seboka sa ngwaga le ngwaga e bile se se agago gakaakang!

[Mongwalo wa tlase]

[Lepokisi go letlakala 5]

SEKOLO SA BAGOLO

Sebokeng sa ngwaga le ngwaga, Anthony Morris, e lego setho sa Sehlopha se Bušago, o tsebišitše gore go tla ba le tlwaetšo e tšwelago pele ya bagolo ba phuthego. Sekolo sa Bagolo bao ba tšwago United States se thomile go šoma mathomong a 2008 lefelong la thuto kua Patterson, New York. Sehlopha sa bo-72 se be se sa tšwa go fela gomme ga bjale go šetše go go tlwaeditšwe bagolo ba 6 720. Go sa na le mo gontši mo go swanetšego go dirwa. Kua United States feela, go na le bagolo ba fetago 86 000. Ka baka leo, Sehlopha se Bušago se dumeletše gore go be le sekolo se sengwe seo se swarwago kua Brooklyn, New York, go thoma ka December 7, 2009.

Ka dikgwedi tše pedi, balebeledi ba bane ba basepedi ba be ba tla tlwaetšwa go hlahla dikolo tša kua Patterson. Bona ba be ba tla išwa Brooklyn gore ba ye go ruta gomme go tla tlwaetšwa ba bangwe gape ba bane. Ke moka ba be ba tla ruta sekolong sa kua Brooklyn, gomme ba bane ba mathomo ba ye go ruta Diholong tša Kopano le Diholong tša Mmušo. Se se be se tla dirwa leboelela go fihlela go e-ba le bahlahli ba 12 bao ba rutago ka Seisemane bekeng e nngwe le e nngwe dikolong tše tshelelago kua United States. Ke moka bahlahli ba bane ba be ba tla tlwaeletšwa go ruta ka Sepaniši. Sekolo se se ka se tšee legato la Sekolo sa gona bjale sa Bodiredi sa Mmušo; morero wa sona ke go godiša bomoya bja bagolo. Makala lefaseng ka bophara a tla thoma go swara dikolo Diholong tša Kopano le Diholong tša Mmušo ngwageng wa tirelo wa 2011.

[Diswantšho go letlakala 4]

Seboka sa ngwaga le ngwaga se thomile ka go opelwa go tšwa kopelong ya rena e mpsha ya dikopelo, “Opelela Jehofa”