Go Lebeletšana le go se Botege ga Molekane

MARGARITA le monna wa gagwe Raúl, ba hlanketše Jehofa e le badiredi ba nako e tletšego ka nywaga e mentši. * Eupša nakwana ka morago ga go belegwa ga morwa wa bona wa mathomo, tswalano ya Raúl le Jehofa e ile ya thoma go fokola. Mafelelong, Raúl o ile a thoma go phela bophelo bjo bo gobogilego gomme o ile a kgaolwa ka phuthegong ya Bokriste. Margarita o re: “Ge tše ka moka di be di direga, ke ile ka ikwa e ka ke tlo hwa. Ke be ke kwele bohloko gomme ke sa tsebe gore ke dire eng.”

Kapejana ka morago ga gore Jane a nyalwe, monna wa gagwe o ile a se sa botega le go mo rata. O ile a thoma go mo tlaiša mmeleng. Jane o re: “La mathomo ge a be a mpetha ke be ke maketše, ke lewa ke dihlong e bile ke ikwa ke se sa na seriti. Ka mehla o be a ntlaiša gomme ka morago a kgopele tshwarelo. Ke be ke nagana gore ka mehla ke boikarabelo bja-ka bja Bokriste gore ke swarele le go lebala. Ke ile ka ba ka nagana gore e tla be e se go botega ge nka botša yo mongwe ka bothata bjo—gaešita le bagolo ka phuthegong. Mokgwa wo wa go tlaišwa le go kgopelwa tshwarelo ka morago o tšwetše pele ka nywaga e mentši. Nako ye ka moka ke be ke nagana gore go swanetše go ba go e-na le selo seo nka se dirago gore monna wa-ka a nthate. Ge  mafelelong a be a ntlogela le morwedi wa rena, ke ile ka ikwa eka ke paletšwe le gore nkabe ke dirile goba go bolela selo se sengwe go dira gore lenyalo la rena le swarelele.”

Go swana le Margarita le Jane, o ka ba o gateletšegile maikwelong, o e-na le mathata a tša ditšhelete gomme o fokola moyeng ka baka la ge monna wa gago a ile a se go botegele. Goba o ka ba o le monna yo a lebeletšanego le bohloko bja pelo le mathata ka gobane mosadi wa gago a sa go botegele. Ka mo go kwagalago, re phela ‘dinakong tšeo di hlobaetšago tšeo go lego thata go lebeletšana le tšona,’ go etša ge Beibele e boletše e sa le pele. Boporofeta bjo bo bontšha gore “mehleng ya bofelo,” botee bja malapa a mantši bo tla hlaselwa ke go se be gona ga lerato la tlhago. Ba bangwe ba tla ipolela gore ba hlankela Modimo eupša go se bjalo. (2 Tim. 3:1-5) Bakriste ba therešo le bona ba lebeletšana le mathata a; eupša o ka thušwa ke’ng ge e ba o ile wa se botegelwe?

Itebelele ka Tsela Yeo Jehofa a go Lebelelago ka Yona

Mathomong, o ka thatafalelwa ke go dumela gore motho yo o mo ratago a ka go kweša bohloko ka tsela ye. O ka ba wa thoma go ipea molato wa gore ke wena o dirago gore a itshware gampe.

Lega go le bjalo, gopola gore Jesu yo a phethagetšego le yena o ile a ekwa ke motho yo a bego a mmota le go mo rata. Jesu o kgethile bagwera ba gagwe, baapostola, ka morago ga go naganišiša ka kelohloko le go rapela ka taba ye. Ka moka ga bona e le ba 12 e be e le bahlanka ba Jehofa bao ba ka botwago. Ka gona, go molaleng gore Jesu o ile a kwa bohloko kudu ge Judase a be a “fetoga moeki.” (Luka 6:12-16) Lega go le bjalo, Jehofa ga se a ka a sola Jesu ka baka la ditiro tša Judase.

Ke therešo gore ga go na molekane wa lenyalo yo a phethagetšego gona bjale. Balekane ka bobedi ba tla dira diphošo. Mopsalme yo a buduletšwego o ngwadile ka mo go kwagalago gore: “Xe Wene Morêna Ò latiša molato, xôna xo ka êma mang?” (Ps. 130:3) E le ge ba ekiša Jehofa, balekane ba swanetše go katanela go lebalelana mafokodi a bona.—1 Pet. 4:8.

Lega go le bjalo, “yo mongwe le yo mongwe wa rena o tla ikarabela go Modimo.” (Baroma 14:12) Ge molekane wa lenyalo a gobošwa ka mantšu goba ka ditiro, mogoboši ke yena a tlago go ikarabela go Jehofa. Jehofa o hloile bošoro le polelo e gobošago, ka gona ga go na lebaka la gore molekane a swarwe ka tsela e šoro kudu, e se nago lerato le e se nago tlhompho. (Ps. 11:5; Baef. 5:33; Bakol. 3:6-8) Ge e le gabotse, ge e ba Mokriste, e ka ba monna goba mosadi, a tlalelana ka bogale leboelela le ka go se itshole gomme a sa fetoge o swanetše go kgaolwa ka phuthegong ya Bokriste. (Bagal. 5:19-21; 2 Joh. 9, 10) Molekane wa lenyalo ga se a swanela go ikwa a le molato go tsebiša bagolo ka boitshwaro bjo bjalo bjoo e sego bja Bokriste. Ka kgonthe, Jehofa o kwela bohloko bao ba swarwago gampe ka tsela e bjalo.

Ge molekane wa lenyalo a dira bohlotlolo, ga a senyetše molekane yo a botegago feela, eupša o senyetša le Jehofa. (Mat. 19:4-9; Baheb. 13:4) Ge e ba molekane yo a se nago molato a be a dutše a katanela go phela ka go dumelelana le melao ya motheo ya Beibele, ga go nyakege gore a ipee molato ka tiro e mpe ya go se botege ya yo a dirilego bohlotlolo.

Gopola gore Jehofa o tseba kamoo o ikwago ka gona. O itlhalosa e le monna le mong wa setšhaba sa Isiraele gomme Lentšu la gagwe le hupere ditemana tšeo di kgomago pelo tšeo di bontšhago bohloko bjoo a ilego a bo kwa ka baka la bohlotlolo bja moya bja setšhaba sa gagwe. (Jes. 54:5, 6; Jer. 3:1, 6-10) Kgonthišega gore Jehofa o bona megokgo yeo o e tšhollago ka baka la go se botege ga molekane wa gago wa lenyalo. (Mal. 2:13, 14) O a tseba gore o nyaka go homotšwa le go kgothatšwa.

Kamoo Jehofa a Neago Khomotšo

E nngwe ya ditsela tšeo Jehofa a re neago khomotšo ka tšona ke ka phuthego ya Bokriste. Jane o ile a hwetša thekgo e bjalo. Jane o gopola gore: “Ketelo ya molebeledi wa tikologo e tlile  ka nako yeo ke bego ke ikwa ke gateletšegile maikwelong. O be a tseba kamoo ke bego ke gateletšegile ka gona ka baka la ge monna wa-ka a be a nyaka re hlalana. O ile a ipha nako ya go nthuša go kwešiša mangwalo a bjalo ka 1 Bakorinthe 7:15. Ditemana tša Beibele le mantšu a gagwe a botho di nthušitše go tloša maikwelo a go ipea molato gomme tša nnea khutšo ya monagano.” *

Margarita, yo go boletšwego ka yena pejana, le yena o ile a ithuta gore Jehofa o nea thušo e šomago ka phuthego ya Bokriste. Margarita o re: “Ge ke be ke thoma go bona gore monna wa-ka ga a itshole, ke ile ka tšea barwa ba-ka gomme ra hudugela toropong e nngwe. Ge re fihla moo, re ile ra hiriša diphapoši tše pedi. Letšatšing le le latelago, ke sa dutše ke nyamile kudu gomme ke pakolla merwalo ya rena, go ile gwa kokotwa mojako. Ke be ke letetše gore e be mong wa lefelo leo, yo a bego a dula kgaufsi le rena. Se se makatšago ke gore e be e le kgaetšedi yo a swaretšego mma thuto ya Beibele le go thuša lapa lešo go ithuta therešo. O be a sa nagane gore o tla kopana le nna eupša o be a tlile ntlong ye ka gobane o be a ithuta Beibele le mong wa lefelo leo. Ke ile ka imologa—ka ba ka palelwa ke go itshwara. Ke ile ka mo hlalosetša boemo bja-ka gomme ra lla gotee. O ile a rulaganya le semeetseng gore re ye dibokeng tša letšatši leo. Phuthego e ile ya re amogela gomme bagolo ba ile ba dira dithulaganyo tša go hlokomela lapa la-ka moyeng.”

Kamoo ba Bangwe ba ka Thušago ka Gona

Ke therešo gore ditho tša phuthego ya Bokriste di ka thuša ka ditsela tše dintši. Ka mohlala, Margarita o ile a swanelwa ke go nyaka mošomo. Lapa le lengwe ka phuthegong le ile la ithapela gore ge go nyakega le hlokomele bana ba gagwe ge ba e-tšwa sekolong.

Margarita o re: “Seo ke se lebogago kudu ke go bona bana babo rena le dikgaetšedi ba ithapela go sepela le nna le bana ba-ka tirelong ya tšhemo.” Ka go thuša ka tsela yeo, ditho tša phuthego di thušana ka go “rwalelana maima” gomme ka go rialo di phethagatša “molao wa Kriste.”—Bagal. 6:2.

Bao ba tlaišegago ka baka la dibe tša ba bangwe ba tloga ba leboga thušo ya mohuta wo. Monique, yo monna wa gagwe a ilego a mo tlogela le sekoloto sa karata ya mokitlana sa R110 000 gotee le bana ba bane bao ba swanetšego go godišwa, o re: “Bana babo rena le dikgaetšedi ba ile ba mpontšha lerato kudu. Ga ke tsebe gore nkabe ke le kae ntle le thušo ya bona. Ke ikwa eka Jehofa o nneile bana babo rena ba dipelo tše dibotse kudu bao ba ilego ba ithapela go hlokomela bana ba-ka. Ke thabetše go bona  bana ba-ka ba gola le go tia moyeng ka baka la thušo yeo. Ge ke be ke nyaka keletšo, bagolo ba be ba nthuša. Ge ke be ke nyaka motho yo nka bolelago le yena, ba be ba ntheetša.”—Mar. 10:29, 30.

Ee, mogwera yo lerato o tla lemoga gore ke neng moo a sa swanelago go bolela ka taba e kwešago bohloko yeo mogwera wa gagwe a kilego a lebeletšana le yona. (Mmo. 3:7) Margarita o re: “Gantši ke be ke thabela go bolela le dikgaetšedi ka phuthegong ye e mpsha ka modiro wa boboledi, dithuto tša rena tša Beibele, bana ba rena—selo le ge e le sefe ka ntle le mathata a-ka. Ke thabetše gore ba ile ba ntumelela go tlogela tša kgale gomme ba nthuša go thomološa lefsa.”

Phema Moya wa go Itefeletša

Ka dinako tše dingwe, go e na le go ikwa o ikarabela ka dibe tša molekane wa gago, o ka ikwa o galefišwa ke taba ya gore o tlaišwa o šoro ke ditla-morago tša ditiro tša gagwe. Ge o ka dumelela sekgopi seo se gola, se ka fokodiša phetho ya gago ya go nyaka go dula o botegela Jehofa. Ka mohlala, o ka lekega gore o nyake ditsela tša go itefeletša go molekane wa gago yo a sa botegego.

Ge o lemoga gore maikwelo a bjalo a a gola, o ka nagana ka mohlala wa Jošua le Kalebe. Banna ba bao ba botegago ba ile ba bea maphelo a bona kotsing gore ba yo hlola Naga ya Kholofetšo. Dihlodi tše dingwe di ile tša hlaelwa ke tumelo gomme tša dira gore batho ba se kwe Jehofa. Ba bangwe ba Baisiraele ba be ba nyaka go kgatla Jošua le Kalebe ka mafsika ge ba be ba leka go kgothatša setšhaba gore se dule se botega. (Num. 13:25–14:10) Ka baka la ditiro tša Baisiraele, Jošua le Kalebe ba ile ba gapeletšega go ralala lešokeng ka nywaga e 40, e se ka baka la phošo ya bona eupša ya ba bangwe.

Gaešita le ge go ka direga gore Jošua le Kalebe ba ile ba ikwa ba nyamile, ga se ba ka ba galefišwa ke dibe tša bana babo bona. Ba ile ba lebiša tlhokomelo go bolokeng teka-tekano ya bona ya moya. Mafelelong a nywaga e 40 lešokeng, bona gaešita le Balefi ba ile ba putswa ka go ba baphologi molokong woo le go dumelelwa go tsena Nageng ya Kholofetšo.—Num. 14:28-30; Još. 14:6-12.

Ditiro tša go se botege tša molekane wa gago di ka dira gore o kwe bohloko ka nako e telele. Lenyalo le ka fela, eupša ka morago o ka šala o tshwenyegile maikwelong e bile o le mathateng a tša ditšhelete. Lega go le bjalo, go e na le go dumelela dikgopolo tše di sa lokago di bipa monagano wa gago, gopola gore Jehofa o tseba gabotse kamoo a tla swaraganago le bao ka boomo ba hlokomologago ditekanyetšo tša gagwe, go fo swana le ge a dirile ka Baisiraele bao ba se nago tumelo lešokeng.—Baheb. 10:30, 31; 13:4.

O ka Atlega!

Go e na le go dumelela dikgopolo tše di fošagetšego di go imela, tlatša monagano wa gago ka dikgopolo tša Jehofa. Jane o re: “Ke ile ka thušwa ke go theetša dikgatišo tša Morokami le Phafoga! gore ke kgotlelele. Diboka le tšona e be e le mothopo o mogolo wa matla. Go tšea karolo ka mafolofolo dibokeng go nthušitše gore ke se nagane ka mathata a-ka. Modiro wa boboledi o nthušitše ka tsela e swanago. Ke matlafaditše tumelo ya-ka ka go thuša ba bangwe go ba le tumelo go Jehofa. Le gona, go hlokomela barutwana ba Beibele go nthušitše go dula ke nagana ka dilo tše bohlokwa.”

Monique, yo go boletšwego ka yena pejana o re: “Ke kgonne go kgotlelela ka ge ke be ke e-ba gona dibokeng ka mehla le go tšea karolo tirelong ya tšhemo gantši kamoo ke bego nka kgona ka gona. Lapa la-ka ka bolona le ile la batamelana kgaufsi kudu la ba la batamelana le phuthego. Phihlelo ya-ka e sa thabišego e nthušitše go lemoga mafokodi a-ka. Ke ile ka lekwa eupša ke kgonne go kgotlelela ka thušo ya Jehofa.”

Le wena o ka atlega go lebeletšaneng le diteko tše di swanago le tše. Go sa šetšwe bohloko bjo bo bakilwego ke go se botege ga molekane, katanela go latela keletšo e buduletšwego ya Paulo e rego: “Anke re se ke ra langwa go dira botse, gobane re tla buna ka nako e swanetšego ge e ba re sa lape.”—Bagal. 6:9.

[Mengwalo ya tlase]

[Seswantšho go letlakala 31]

Balekane bao ba tlogetšwego ba leboga bao ba ba thušago tirelong ya tšhemo