Hwetša Tšhireletšego Gare ga Batho ba Modimo

“Ke tlo bá ka Xo leboxa phuthexong e kxolo.”—PS. 35:18.

1-3. (a) Ke’ng seo se ka lebišago Bakriste ba bangwe boemong bjo kotsi bja moya? (b) Batho ba Modimo ba ka hwetša tšhireletšego kae?

GE BA be ba le maikhutšong, Joe le mosadi wa gagwe ba be ba rutha lebopong la molatšatšing ba tsentšhitše diphaephe tša go hema mo go tletšego dihlapi tša mebalabala le tša go fapa-fapana ka bogolo. Ba ile ba rutha ba tsenelela ka meetseng bakeng sa go bona bobotse bja meetse ka tlase-tlase lebopong. Ge ba be ba thoma go tsenelela kudu, mosadi wa Joe o ile a re, “Ke nagana gore re thoma go fetelela kudu.” Joe o ile a araba ka gore: “O se ke wa tshwenyega. Ke tseba seo ke se dirago.” Joe o gopola a ipotšiša ka moragonyana gore, ‘Dihlapi tšela di bego di le mo di kae?’ A tšhogile, o ile a bona lebaka. Tlase-tlase bodibeng, go ile gwa tšwa šaka yeo e bego e lebile go yena. Bjale gona o be a lebane le sebata. Ge šaka e be e le bokgoleng bja mo e ka bago mithara, e ile ya retologa gomme ya sepela.

² Mokriste a ka fapošwa kudu ke dikgoketšo tša tshepedišo ya dilo ya Sathane—boithabišo, mošomo, dilo tše a nago le tšona—moo a sa lemogego gore o nwelela dilong tše kotsi. Joe, yo e lego mogolo wa Mokriste o re: “Phihlelo ya-ka e dirile gore ke nagane mabapi le batho bao re gweranago le bona. Rutha mo go šireletšegilego le mo go kgahlišago—ka phuthegong!” O se ke wa rutha bodibeng bja meetse, mo o ka ikhwetšago o le lekatana moyeng e bile o le kotsing. Ge o ka ikhwetša o le boemong bjoo, kapejana retologela moo re ka rego ke meetseng a šireletšegilego. Go sego bjalo, o ka ikhwetša o le kotsing ya go hwa moyeng.

³ Lefase lehono ke lefelo le kotsi go Bakriste. (2 Tim. 3:1-5) Sathane o a tseba gore nako ya gagwe ke e kopana gomme o ikemišeditše go metša bao ba sego šedi. (1 Pet. 5:8; Kut. 12:12, 17) Lega go le bjalo, re šireletšegile. Jehofa o neile batho ba gagwe botšhabelo bja moya bjo bo šireletšegilego—phuthego ya Bokriste.

4, 5. Batho ba bantši ba ikwa bjang ka bokamoso bja bona, gona ka baka la’ng?

⁴ Mekgatlo ya lefase e nea tšhireletšego e lekanyeditšwego feela—e ka ba nameng goba maikwelong. Batho ba bantši ba nagana gore selo se se dirago gore ba se ke ba šireletšega nameng ke bosenyi, bošoro, boemo bja tša maphelo bjo bo ba nyakago mo gontši gaešita le ditaba tša tikologo. Ka moka ga rena re lebana le mathata a botšofadi le bolwetši. Le gona bao ba šomago, ba nago le magae, ba nago le tšhelete e lekanego e bile ba phetše gabotse mmeleng ka tekanyo e itšego ba ka ipotšiša gore ba tla dula ba le ka tsela yeo go fihla neng.

⁵ Ba bantši ba nagana gore ba ka se tsoge ba šireletšegile maikwelong. Ka maswabi, ditebelelo tša batho ba bantši bao ba bego ba holofela gore ba tla hwetša khutšo le kgotsofalo manyalong le malapeng a bona di ile tša folotša. Ge go tliwa dilong tša moya, batho ba bantši bao ba tsenago kereke ba ile ba šala ba gakanegile, ba belaela mohola wa tlhahlo yeo ba e hweditšego. Se se tloga se le bjalo ditabeng tša boitshwaro bjo bo belaetšago le dithuto tše di sa thewago mangwalong tša baetapele ba bona ba bodumedi. Ka baka leo, batho ba bantši ba nagana gore kgetho feela yeo ba nago le yona ke go holofela tša thutamahlale goba mahlatse le dikgopolo tše dibotse tša batho ba bangwe. Ka gona, ga go makatše gore batho bao re phelago le bona ba ikwa ba sa šireletšega le gatee goba ba fo kgetha go se nagane kudu ka bokamoso bja bona.

6, 7. (a) Ke’ng seo se dirago gore pono yeo bao ba hlankelago Modimo ba nago le yona e fapane le ya bao ba sa mo hlankelego? (b) Re tla ahla-ahla’ng?

 ⁶ Ruri go na le phapano e kgolo magareng ga tsela yeo bao e lego Bakriste le bao e sego bona ba lebelelago dilo ka yona! Gaešita le ge rena bjalo ka batho ba Jehofa re lebetšana le mathata a swanago le ao baagišani ba rena ba lebeletšanago le ona, re arabela ka tsela e fapanego. (Bala Jesaya 65:13, 14; Maleaki 3:18.) Ka baka la’ng? Ka gobane re hwetša tlhaloso e kgotsofatšago ka Beibeleng mabapi le maemo ao batho ba lego go ona e bile re a hlangwa gore re kgone go lebeletšana le ditlhohlo le mathata a bophelo. Ka baka leo, ga re belaele ka bokamoso go feta tekanyo. Go ba barapedi ba Jehofa go re šireletša mokgweng wo o sa kwagalego wa go nea mabaka le wo o sa thewago mangwalong, go re šireletša ditirong tše di gobogilego le ditla-moragong tša dilo tše bjalo. Ka gona, ditho tša phuthego ya Bokriste di khutšong yeo ba bangwe ba se nago yona.—Jes. 48:17, 18; Bafil. 4:6, 7.

⁷ Mehlala e mengwe e ka re thuša go nagana ka tšhireletšego yeo e lego gona go bao ba hlankelago Jehofa gomme e se gona go bao ba sa mo hlankelego. Mehlala ye e ka re tutueletša go hlahloba mabaka a rena ka noši le ditiro gomme re hlahlobe ge e ba re ka kgona go diriša keletšo ya Modimo ka botlalo, yeo e hlametšwego go re šireletša.—Jes. 30:21.

“Ke Nyakil’o Kxopya”

8. Ke’ng seo ka mehla bahlanka ba Jehofa ba ilego ba swanelwa ke go se dira?

⁸ Go tloga mathomong a histori ya motho, bao ba kgethilego go hlankela Jehofa le go mo kwa ba be ba nyaka go phema go ikgweranya le bao ba sa mo hlankelego. Ka kgonthe, Jehofa o bontšhitše gore go tla ba le bonaba magareng ga barapedi ba gagwe le bao ba latelago Sathane. (Gen. 3:15) Ka baka la go emela melao ya motheo ya Modimo ka go tia, batho ba Modimo ba itshwere ka tsela e fapanego le ya bao ba phelago le bona. (Joh. 17:15, 16; 1 Joh. 2:15-17) Ga se ka mehla go bilego bonolo go gata mogato o bjalo. Ee, ba bangwe gare ga bahlanka ba Jehofa ka dinako tše dingwe ba ile ba belaela ge  e ba e le gabohlale go phela bophelo bja boikgafo.

9. Hlalosa bothata bjo mongwadi wa Psalme 73 a bego a e-na le bjona.

⁹ Yo mongwe wa bahlanka ba Jehofa yo a kilego a ipotšiša ge e ba a dirile phetho e bohlale ke mongwadi wa Psalme 73, yo mohlomongwe e bego e le yo mongwe wa ditlogolo tša Asafa. Mopsalme o ile a botšiša gore ke ka baka la eng go bonagala ba kgopo ba atlega, ba thabile e bile dilo di ba sepelela gabotse mola ba bangwe bao ba katanelago go hlankela Modimo ba kopana le diteko le mathata.—Bala Psalme 73:1-13.

10. Ke ka baka la’ng ditaba tšeo di ilego tša bolelwa ke mopsalme di le bohlokwa go wena?

¹⁰ Na o kile wa ipotšiša dipotšišo tše di swanago le tša mopsalme yo? Ge e ba go le bjalo, o se ke wa ikwa o le molato kudu goba wa nagana gore tumelo ya gago e a fokola. Ge e le gabotse, bontši bja bahlanka ba Jehofa, go akaretša le ba bangwe bao Jehofa a ba dirišitšego go ngwala Beibele, ba ile ba ikwa ka tsela e swanago. (Jobo 21:7-13; Ps. 37:1; Jer. 12:1; Habak. 1:1-4, 13) Ka kgonthe, bohle bao ba nyakago go hlankela Jehofa ba swanetše go ipotšiša potšišo ye gomme ba e arabe: Na go hlankela Modimo le go mo kwa ke selo se sekaone kudu seo nka se dirago? Se se akaretša kgang yeo Sathane a ilego a e tsoša tšhemong ya Edene. Ke potšišo e bohlokwa ya legohle mabapi le bogoši bja Modimo. (Gen. 3:4, 5) Ka gona, ka moka ga rena re tla ba re dira gabotse ge re hlahloba taba yeo e ilego ya tsošwa ke mopsalme. Na re swanetše go hufegela baikgantšhi ba kgopo bao go bonagalago dilo di ba sepelela gabotse? Na re swanetše go “kxopya” ge re hlankela Jehofa gomme re ba ekiše? Se ge e le gabotse ke seo Sathane a ka ratago re se dira.

11, 12. (a) Mopsalme o ile a fenya dipelaelo tša gagwe bjang gomme se se re ruta’ng? (b) Ke’ng seo se go thušitšego go fihlelela phetho ya go swana le ya mopsalme?

¹¹ Ke’ng seo se thušitšego mopsalme go fenya dipelaelo tša gagwe? Gaešita le ge a ile a dumela gore o nyakile a tlogela tsela ya go loka, pono ya gagwe e ile ya fetoga ge a be a tsena “Sekxethweng sa Modimo”—ke gore, ge a be a tlwaelana le batho ba moya tabarenakeleng ya Modimo goba tempeleng gomme a nagana ka morero wa Modimo. Ke moka go ile gwa ba molaleng gore mopsalme yo ga a nyake go dira bobe bjalo ka badiradibe. O ile a bona gore tsela ya bona le dikgetho tša bona bophelong di be di ba bea “mo matheleding.” Mopsalme o ile a lemoga gore bohle bao ba tlogelago Jehofa ka baka la boitshwaro bjo bo gobogilego, ruri ba tla fedišwa ‘wa go šiiša,’ mola Jehofa a tla thekga bao ba mo hlankelago. (Bala Psalme 73:16-19, 27, 28.) Ga go pelaelo gore o bone gore mantšu ao ke a therešo. Go iphelela le go hlokomologa melao ya Modimo go ka bonagala e le taba e kgahlišago go ba bantši, eupša ditla-morago tše kotsi tša tsela e bjalo ga di phemege.—Bagal. 6:7-9.

¹² Ke’ng se sengwe seo re ithutago sona phihlelong ya mopsalme yo? O ile a hwetša tšhireletšego le bohlale bathong ba Modimo. Ge a be a e-ya lefelong leo Jehofa a rapelwago go lona, o ile a thoma go nea mabaka ka tsela e kwagalago le e bohlale. Ka mo go swanago lehono, re ka hwetša baeletši ba bohlale gomme ra thabela dijo tše di agago tša moya dibokeng tša phuthego. Ka gona, Jehofa o na le lebaka le lebotse la go botša bahlanka ba gagwe gore ba be gona dibokeng tša Bokriste. Ge ba le moo, ba tla ikwa ba kgothatšega gomme ba tutueletšega go dira dilo ka bohlale.—Jes. 32:1, 2; Baheb. 10:24, 25.

Kgetha Bagwera ba Gago ka Bohlale

13-15. (a) Dina o bile le phihlelo efe gomme seo se bontšha’ng? (b) Ke ka baka la’ng go gwerana le Bakriste-gotee le rena e le tšhireletšo?

¹³ Morwedi wa Jakobo e lego Dina ke mohlala wa motho yo a ilego a tsena mathateng a magolo ka baka la go gwerana le batho ba lefase. Pego ya Genesi e re botša gore o be a tlwaetše go fetša nako a e-na le dikgarebe tša motseng wa Kanana, moo ba gabo ba bego ba dula gona. Bakanana ba be ba se na ditekanyetšo tše di phagamego tša boitshwaro tša go swana le tša barapedi ba Jehofa. Go e na le moo, seo baepi  ba marope ba se utollotšego se bontšha gore ditsela tša Bakanana di ile tša feleletša di bakile gore naga ya bona e tlale ka borapedi bja diswantšho, boitshwaro bjo bo gobogilego, borapedi bjo bo šišimišago bja dikopano tša botona le botshadi le bošoro. (Ek. 23:23; Lef. 18:2-25; Doit. 18:9-12) Gopola gore Dina o ile a feleletša kae ka baka la go gwerana le batho ba.

¹⁴ Monna yo a dulago gona moo, e lego Sikeme, yo a hlaloswago e le “mokxômana e moxolo motseng wa tat’axwe,” o ile a bona Dina gomme “a mo swara, a mo kata, a mo senya.” (Gen. 34:1, 2, 19) A manyami ruri! Na o nagana gore Dina o kile a nagana gore a ka diragalelwa ke selo sa mohuta wo? Mohlomongwe o be a fo ba a nyaka go gwerana le bafsa ba lefelong leo, bao yena a bego a ba bona ba se kotsi. Lega go le bjalo, Dina o be a forilwe e le ruri.

¹⁵ Pego ye e re ruta’ng? E re ruta gore re ka se gwerane le batho bao e sego badumedi gomme ra holofela gore go ka se be le ditla-morago tše mpe. Mangwalo a re “ditlwaelano tše mpe di senya mekgwa e holago.” (1 Bakor. 15:33) Ka lehlakoreng le lengwe, ke tšhireletšo go gwerana le batho bao o swanago le bona ka ditumelo, ditekanyetšo tše di phagamego tša boitshwaro le go rata ga lena Jehofa. Ditlwaelano tše bjalo tše dibotse di tla go kgothaletša go tšea kgato e bohlale.—Die. 13:20.

“Le Hlatswitšwe la Hlweka”

16. Ke’ng seo moapostola Paulo a se boletšego mabapi le ba bangwe ka phuthegong ya Korinthe?

¹⁶ Phuthego ya Bokriste e thušitše batho ba bantši go itlhwekiša mekgweng e šilafetšego. Ge moapostola Paulo a be a ngwala lengwalo la gagwe la pele le le yago phuthegong ya Korinthe, o boletše ka diphetogo tšeo Bakriste ba moo ba di dirilego gore ba phele ka go dumelelana le ditekanyetšo tša Modimo. Ba bangwe e be e kile ya ba diotswa, barapedi ba medimo ya diswantšho, dihlotlolo, banna ba ba robalago le banna, mahodu, matagwa, bjalo-bjalo. Paulo o ba boditše gore, “Eupša le hlatswitšwe la hlweka.”—Bala 1 Bakorinthe 6:9-11.

17. Go phela ka go dumelelana le ditekanyetšo tša Beibele go fetošitše bjang maphelo a ba bantši?

¹⁷ Batho bao ba se nago tumelo ga ba na melao ya motheo e kwagalago bakeng sa go ba hlahla. Ba ikgethela tsela yeo ba tla sepelago ka yona goba ba ka fo arošetšwa ditseleng tše di gobogilego tša boitshwaro, go etša ge ba bangwe ba Bakorinthe ba bogologolo ba dirile bjalo pele e ka ba badumedi. (Baef. 4:14) Lega go le bjalo, tsebo e nepagetšego ya Lentšu la Modimo le merero ya gagwe di na le matla a go fetoša maphelo a batho ka moka bao ba dirišago Mangwalo. (Bakol. 3:5-10; Baheb. 4:12) Bontši bja bao lehono e lego ditho tša phuthego ya Bokriste ba ka go botša gore pele ba ithuta le go amogela ditekanyetšo tša Jehofa tša go loka, ba be ba fo iphelela ka mokgwa wo ba ratago ka wona. Lega go le bjalo, ba be ba sa kgotsofala e bile ba sa thaba. Ba bile khutšong ge feela ba be ba thoma go tlwaelana le batho ba Modimo le go phela ka go dumelelana le melao ya motheo ya Beibele.

18. Ke phihlelo efe yeo mofsa yo mongwe a bilego le yona, gona e hlatsela’ng?

¹⁸ Ka mo go fapanego, bao ba kilego ba kgetha go tlogela seo re ka rego ke meetse a šireletšegilego a phuthego ya Bokriste ba itshola kudu ka baka la phetho yeo. Kgaetšedi yo mongwe, yo re tla mmitšago Tanya, o hlalosa gore “o godišeditšwe therešong,” eupša ge a be a e-na le nywaga e 16, o ile a tlogela phuthego gomme “a phegelela menate ya lefase.” Tše dingwe tša ditla-morago tše a bilego le tšona ke go ima a sa letela le go ntšha mpa. Ga bjale o re: “Nywaga e meraro yeo ke e feditšego ke le ka ntle ga phuthego e ntlogetše ke e-na le mabadi  a go šiiša maikwelong gomme mabadi ao a ka se ke a hwelela. Selo seo nka se tsogego ke se lebetše ke gore ke bolaile ngwana wa-ka pele a ka belegwa. . . . Ke nyaka go botša bafsa bohle bao ba dumago go ‘latswa’ menate ya lefase gaešita le ka nakwana gore: ‘Le se ke la leka!’ Mathomong go ka kwagala go le bose, eupša mafelelong go tla go galakela. Selo feela seo o ka se hwetšago lefaseng ke manyami. Ke a tseba. Ke tšwa gona. Dula mokgatlong wa Jehofa! Ke yona feela tsela e thabišago ya bophelo.”

19, 20. Ke tšhireletšo efe yeo phuthego ya Bokriste e e neago, gona e e nea ka tsela efe?

¹⁹ E-fo nagana ka seo se ka go diragalelago ge o ka tlogela tikologo e šireletšegilego ya phuthego ya Bokriste. Ge ba gopola tsela ya lefeela ya bophelo pele ba amogela therešo, ba bantši ga ba nyake le go nagana ka yona. (Joh. 6:68, 69) O ka tšwela pele o šireletšegile le go bolokega madimabeng le manyaming ao a tletšego kudu lefaseng la Sathane ka go dula o le kgaufsi le bana beno le dikgaetšedi ba Bakriste. Go tlwaelana le bona le go ba gona ka mehla dibokeng tša phuthego go tla tšwela pele go go gopotša ka bohlale bja ditekanyetšo tša Jehofa tša go loka gomme go tla go kgothaletša go phela ka go dumelelana le tšona. O na le mabaka a kwagalago a ‘go leboga Jehofa phuthegong e kgolo,’ go fo swana le ge mopsalme a dirile.—Ps. 35:18.

²⁰ Ke therešo gore go na le mabaka a fapa-fapanego ao a dirago gore Bakriste ka moka ba lebeletšane le dinako tšeo go bonagalago ba thatafalelwa ke go kgomarela potego ya Bokriste. Ba ka fo ba ba nyaka go bontšhwa mo ba swanetšego go leba gona. Wena—le phuthego ka moka—le ka dira’ng go thuša badumedi-gotee le lena dinakong tše bjalo? Sehlogo se se latelago se tla ahla-ahla kamoo o ka ‘tšwelago pele o homotša le go aga’ bana beno.—1 Bathes. 5:11.

O be o tla Araba Bjang?

• Re ithuta’ng diphihlelong tša mongwadi wa Psalme 73?

• Phihlelo ya Dina e re ruta’ng?

• Ke ka baka la’ng o ka hwetša tšhireletšego ka phuthegong ya Bokriste?

[Dipotšišo tša Thuto]

[Diswantšho go letlakala 7]

Rutha mo go šireletšegilego; dula ka phuthegong!