Hwetša Tapologo Dilong tša Moya

“Rwalang joko ya-ka, . . . gomme le tla hweletša meoya ya lena tapologo.” —MAT. 11:29.

1. Modimo o ile a rulaganya’ng kua Thabeng ya Sinai, gona ka baka la’ng?

GE KGWERANO ya Molao e be e hlongwa kua Thabeng ya Sinai, e be e akaretša tokišetšo ya Sabatha ya beke le beke. Ka mmoleledi wa gagwe e lego Moše, Jehofa o ile a laela setšhaba sa Isiraele gore: “O dirê medirô ya xaxo ka matšatši a selêlaxo; ka la xo šupa O khutšê, xore kxomo ya xaxo le pôkôlô ya xaxo di khutšê, xore morwa wa molata wa xaxo, le modiiledi, ba lapoloxê.” (Ek. 23:12) Ee, ka ge Jehofa a be a naganela bao ba bego ba le ka tlase ga Molao, ka lerato o ile a rulaganya gore go be le letšatši la go khutša gore batho ba gagwe ba ‘lapologe.’

2. Baisiraele ba ile ba holwa bjang ke go boloka Sabatha?

² Na Sabatha e be e le letšatši la go fo iketla? Aowa, e be e le karolo e bohlokwa ya borapedi bja Baisiraele go Jehofa. Go boloka Sabatha go ile gwa nea dihlogo tša malapa nako ya go ruta malapa a tšona “xore ba swarê ka tsela ya Morêna xore xo dirwê tokô le thswanêlô.” (Gen. 18:19) Go ile gwa ba gwa nea malapa le bagwera sebaka sa go ba gotee gore ba naganišiše ka mediro ya Jehofa le gore ba thabele bogwera. (Jes. 58:13, 14) Sa bohlokwa le go feta, ka tsela ya boporofeta Sabatha e ile ya bontšha nako yeo tapologo ya kgonthe e tlago go tla nakong ya Pušo ya Kriste ya Nywaga e Sekete. (Baroma 8:21) Eupša go thwe’ng ka mehla ya rena? Ke bjang le gona ke kae moo Bakriste ba therešo, bao ba kgahlegelago ditsela tša Jehofa, ba ka hwetšago tapologo e bjalo?

Hwetša Tapologo ka go Gwerana le Bakriste

3. Bakriste ba lekgolong la pele la nywaga ba ile ba thekgana bjang, gona mafelelo e bile afe?

³ Moapostola Paulo o hlalositše phuthego ya Bokriste e le “kokwane le sethekgo sa therešo.” (1 Tim. 3:15) Bakriste ba pele ba ile ba thekgwa kudu ke go kgothatšana le go agana ka lerato. (Baef. 4:11, 12, 16) Ge a be le kua Efeso, Paulo o ile a etelwa ke ditho tša phuthego ya Korinthe tšeo di bego di kgothatša kudu. Ela hloko mafelelo a bilego gona, Paulo o itše: “Ke thabela go ba gona ga Stefanase le Fotšhunato le Akhaiko, . . . gobane ba lapološitše moya wa-ka.” (1 Bakor. 16:17, 18) Ka mo go swanago, ge Tito a be a e-ya Korinthe go ya go hlankela bana babo ba moo, Paulo o ile a ngwalela phuthego yeo gape a re: “Moya wa gagwe o lapološitšwe ke lena ka moka.” (2 Bakor. 7:13) Le lehono, Dihlatse tša Jehofa di hwetša tapologo ya kgonthe ka go gwerana le Bakriste bao ba agago.

4. Diboka tša Bokriste di re lapološa bjang?

⁴ Le wena o a tseba gore diboka tša phuthego ke mothopo wa lethabo le legolo. Ge re le moo re a “kgothatšana . . . yo mongwe le yo mongwe ka tumelo ya yo mongwe.” (Baroma 1:12) Bana babo rena le dikgaetšedi ba Bakriste ga se feela batho bao re ba tlwaetšego, bao re felago re kopana le bona. Ke bagwera ba paale, batho bao re ba ratago le go ba hlompha. Re hwetša lethabo le legolo le khomotšo ka go kopana le bona ka mehla dibokeng tša rena.—Fil. 7.

5. Re ka lapološana bjang ge re le dikopanong tše dinyenyane le tše dikgolo?

⁵ Mothopo o mongwe wa tapologo o  hwetšwa ka dikopano tše dinyenyane le tše dikgolo tšeo re bago le tšona ngwaga le ngwaga. Go tlaleletša tabeng ya gore di re nea meetse ao a neago bophelo a tšwago Lentšung la Modimo, Beibele, dipokano tše tše dikgolo di re nea sebaka sa go ‘katologa’ bogwereng bja rena. (2 Bakor. 6:12, 13) Eupša go thwe’ng ge e ba re e-na le dihlong gomme re thatafalelwa ke go dira bagwera? Tsela e nngwe ya gore re tlwaelane le bana babo rena le dikgaetšedi ke gore re ikgafele go thuša ba bangwe ge re le dikopanong. Ka morago ga go thuša kopanong ya ditšhaba-tšhaba, kgaetšedi yo mongwe o itše: “Ke be ke sa tsebe batho ba bantši kopanong yeo, ntle le ba lapa lešo le bagwera ba mmalwa. Eupša ge ke be ke thuša go hlwekiša, ke ile ka kopana le bana babo rena le dikgaetšedi ba bantši! Ruri go be go thabiša!”

6. Ke tsela efe e nngwe yeo re ka hwetšago tapologo ge re le maikhutšong?

⁶ Baisiraele ba be ba tlwaetše go ya Jerusalema bakeng sa borapedi meletlong e meraro ngwaga le ngwaga. (Ek. 34:23) Gantši seo se be se bolela gore ba tla tlogela mašemo le mabenkele a bona gomme ba tšea maeto ka matšatši a mantši ba sepela ka maoto tseleng ya marole. Go dutše go le bjalo, go ya tempeleng go be go ‘thabiša gagolo’ ka ge bao ba bego ba le gona ba be ba “rêta Morêna.” (2 Kor. 30:21) Ka mo go swanago, bahlanka ba Jehofa ba bantši lehono ba thabela go sepela le malapa a bona go etela legae la Bethele, e lego meago ya kgaufsi ya lekala ya Dihlatse tša Jehofa. Na le ka itokišeletša go tšea leeto le bjalo maikhutšong a latelago a lapa?

7. (a) Dipokano tša bogwera e ka ba tše di holago bjang? (b) Ke’ng seo se ka dirago gore dipokano e be tše di gopolegago le tše di kgothatšago?

⁷ Go ba gotee le lapa le bagwera dipokanong tša bogwera e ka ba mo go kgothatšago. Kgoši Solomone yo bohlale o itše: “Motho xa a na se se kaone; a a jê, a a nwê; pelo ya xaxwe e thabêlê botse mo ’tirong tša xaxwe.” (Mmo. 2:24) Dipokano tša bogwera ga di fo re lapološa moyeng eupša di matlafatša tlemo ya rena ya  lerato le Bakriste-gotee le rena ge re dutše re ba tseba gakaone. Gore dipokano tša bogwera e be tše di sa lebalegego le tše di kgothatšago, go kaone go dira gore e be tše dinyenyane le go kgonthišetša gore di beilwe leihlo ka tshwanelo, kudu-kudu ge e ba go tla ba le bjala.

Tirelo ya Tšhemo e Tliša Tapologo

8, 9. (a) Bontšha phapano magareng ga molaetša wa Jesu le wa bamangwalo le Bafarisei. (b) Re holwa bjang ke go boledišana le batho ka ditherešo tša Beibele?

⁸ Jesu o be a fišegela bodiredi gomme o ile a kgothaletša barutiwa ba gagwe gore le bona ba be ka tsela e swanago. Se se bonala gabotse mantšung a gagwe a rego: “Puno ke e kgolo, eupša badiri ke ba sego kae. Ka baka leo, kgopelang Mong wa puno gore a romele badiri punong ya gagwe.” (Mat. 9:37, 38) Molaetša woo Jesu a bego a o ruta o be o lapološa e le ka kgonthe; e be e le “ditaba tše dibotse.” (Mat. 4:23; 24:14) Se se be se tloga se fapana le melao e boima yeo Bafarisei ba bego ba e rweša batho.—Bala Mateo 23:4, 23, 24.

⁹ Ge re bolela le batho ka molaetša wa Mmušo, re ba lapološa moyeng gomme ka nako e swanago, re nweletša ditherešo tše di thabišago tša Beibele ka menaganong le dipelong tša rena. Mopsalme o ile a bolela ka mo go swanetšego gore: “Haleluya! xobane xo bina koša ya Modim’a rena ké xa-botse; xo mo rêta xo monate xomme xo swanetše.” (Ps. 147:1) Na o ka oketša lethabo leo o le hwetšago ge o tumiša Jehofa go baagišani ba gago?

10. Na katlego ya rena bodireding e ithekgile ka gore re hwetše batho bao ba arabelago gabotse? Hlalosa.

¹⁰ Ke therešo gore ditšhemong tše dingwe batho ba amogela ditaba tše dibotse go feta mafelong a mangwe. (Bala Ditiro 18:1, 5-8.) Ge e ba o dula tikologong yeo batho ba bantši ba sa amogelego molaetša wa Mmušo, leka go lebiša tlhokomelo botseng bjoo o bo dirago bodireding. Gopola gore maiteko a gago a tšwelago pele a go tsebatša leina la Jehofa ga se a lefeela. (1 Bakor. 15:58) Go oketša moo, katlego ya rena ga e lekanyetšwe ke tsela yeo batho ba arabelago ka yona ditabeng tše dibotse. Re ka kgodišega gore Jehofa o tla dira gore batho ba dipelo tše dibotse ba newe sebaka sa go arabela molaetšeng wa Mmušo.—Joh. 6:44.

Borapedi bja Lapa bo a Lapološa

11. Ke boikarabelo bofe bjo Jehofa a bo neilego batswadi, gona ba ka bo phetha bjang?

¹¹ Batswadi bao ba boifago Modimo ba na le boikarabelo bja go ruta bana ba bona ka Jehofa le ka ditsela tša gagwe. (Doit. 11:18, 19) Ge e ba o le motswadi, na o ipeela nako ya go ruta bana ba gago ka Tatago rena yo lerato wa legodimong? Jehofa o re neile motlalo wa dijo tša moya tšeo di agago ka dipuku, dimakasine, dibidio le mananeo a gatišitšwego gore o phethe boikarabelo bjo bjo bohlokwa le go hlokomela dinyakwa tša lapa la gago.

12, 13. (a) Malapa a ka holwa bjang ke mantšiboa a Borapedi bja Lapa? (b) Batswadi ba ka kgonthišetša bjang gore borapedi bja bona bja lapa ke mothopo wa tapološo?

¹² Go tlaleletša moo, sehlopha sa mohlanka yo a botegago le wa temogo se dirile ditokišetšo tša gore go be le mantšiboa a Borapedi bja Lapa. A ke mantšiboa ao a beelwago ka thoko beke le beke bakeng sa thuto ya lapa ya Beibele. Ba bantši ba ile ba hwetša ba batamelane kgaufsi kudu ka lerato le go matlafatša tswalano ya bona le Jehofa ba thušwa ke thulaganyo ye. Eupša batswadi ba ka kgonthišetša bjang gore borapedi bja bona bja lapa ke mothopo wa tapološo ya moya?

¹³ Mantšiboa a Borapedi bja Lapa ga se a swanela go ba a lešago bodutu. Go ba gona, re rapela “Modimo yo a thabilego,” gomme o nyaka gore re thabele borapedi bja rena. (1 Tim. 1:11; Bafil. 4:4) Go ba le bošego bjoo re hlahlobago dithuto tša moya tšeo di lego ka Beibeleng ke tšhegofatšo. Batswadi ba ka feto-fetoga le maemo mekgweng ya bona ya go ruta, ba diriša diswantšho-kgopolo le bokgoni bja go bopa taba. Ka mohlala, lapa le lengwe le ile la dumelela mošemane wa lona wa nywaga e lesome, Brandon, gore a nee pego e nago le sehlogo se  se rego: “Ke ka Baka La’ng Jehofa a Ile a Diriša Noga go Swantšhetša Sathane?” Taba ye e be e tshwenya Brandon ka ge a rata dinoga gomme a tshwenywa ke gore di swantšhwa le Sathane. Malapa a mangwe a bapala diterama tša Beibele, moo setho se sengwe le se sengwe sa lapa se bapalago karolo e itšego, se bala karolo ya sona go tšwa Beibeleng goba se diragatša tiragalo yeo. Ga se feela gore dikarolo tše tša thuto di a thabiša, eupša di dira gore bana ba gago ba tšee karolo e le gore melao ya motheo ya Beibele e ka kgoma dipelo tša bona. *

Phema Dilo Tšeo di ka go Gatelelago

14, 15. (a) Kgateletšego le go se bolokege di oketšegile bjang mehleng ye ya bofelo? (b) Ke kgateletšego efe e oketšegilego yeo re ka lebeletšanago le yona?

¹⁴ Kgateletšego ya monagano le go se bolokege di oketšegile mehleng ye ya bofelo ya tshepedišo e kgopo ya dilo. Go hlaela ga mošomo le maemo a thata a tša boiphedišo di kgoma ba dimilione. Gaešita le bao ba šomago ka dinako tše dingwe ba ka šala ba se na le sente ya lešidi ge ba fihla gae ka morago ga go hwetša megolo ya bona, gomme seo ga se hole lapa ka selo. (Bapiša le Hagai 1:4-6.) Bo-radipolitiki le baetapele ba bangwe ba ipontšhitše ba se na mohola ge ba dutše ba leka go lwantšhana le tšhošetšo le mehuta e mengwe ya bobe. Batho ba bantši ba gateleditšwe kudu ke mafokodi a bona.—Ps. 38:4.

¹⁵ Le Bakriste ba therešo ba lebeletšana le mathata le dikgateletšo tšeo di tlišwago ke tshepedišo ya dilo ya Sathane. (1 Joh. 5:19) Maemong a mangwe, barutiwa ba Kriste ba ka lebeletšana le kgateletšo e oketšegilego ge ba dutše ba leka go dula ba botegela Jehofa. Jesu o itše: “Ge e ba ba ntlhomere, le lena ba tla le hlomara.” (Joh. 15:20) Lega go le bjalo, gaešita le ge re “tlaišwa,” ga se “ra tlogelwa nyanyeng.” (2 Bakor. 4:9) Ke ka baka la’ng go le bjalo?

16. Ke’ng seo se ka re thušago gore re dule re thabile?

¹⁶ Jesu o itše: “Tlang go nna, lena bohle bao le lapišitšwego le go imelwa, ke tla le lapološa.” (Mat. 11:28) Ka go bontšha tumelo e feletšego tokišetšong ya sehlabelo sa Kriste sa topollo, ge e le gabotse re ipea ka diatleng tša Jehofa. Ka tsela ye, re hwetša “matla a fetago a tlwaelegilego.” (2 Bakor. 4:7) “Mothuši,” moya o mokgethwa wa Modimo, o tiiša tumelo ya rena ka go lebanya e sego feela gore re kgotlelele diteko le ditlaišego eupša le gore re dule re thabile.—Joh. 14:26; Jak. 1:2-4.

17, 18. (a) Re swanetše go itiša malebana le moya wa mohuta mang? (b) Mafelelo e ka ba afe ge re lebiša tlhokomelo kudu boithabišong?

¹⁷ Bakriste ba therešo lehono ba swanetše go itiša malebana le go tutuetšwa ka mo go sa swanelwago ke boithabišo bja maitirelo bja lefase le. (Bala Baefeso 2:2-5.) Go sego bjalo, re ka tanywa ke “kganyogo ya nama le kganyogo ya mahlo le pontšho ya bompogeng ya dilo tša motho tša boiphedišo.” (1 Joh. 2:16) Goba ka phošo re ka thoma go dumela gore go itumelelanya le kganyogo ya nama go tla re lapološa. (Baroma 8:6) Ka mohlala, batho ba bangwe ba dirišitše dihlare-tagi le dino-tagi gampe, ba bogela diswantšho tše di kgothaletšago bootswa, dipapadi tše di gobogilego goba mediro e fapa-fapanego yeo e feteletšego ka maiteko a go nyaka go thaba. “Maano a bohwirihwiri” a Sathane a reretšwe go aroša batho ka go ba nea mohuta o mobe wa tapologo.—Baef. 6:11.

¹⁸ Ke therešo gore ga se phošo go ja, go nwa  le go tšea karolo mehuteng e itšego ya boithabišo ge e ba seo se dirwa ka tsela e lekaneditšwego. Lega go le bjalo, ga re nyake go etiša dilo tšeo pele maphelong a rena. Teka-tekano le boitshwaro di bohlokwa, kudu-kudu mehleng ye re phelago go yona. Go phegelela dilo tša motho ka noši go ka re imela go fihla bokgoleng bja gore re be “ba sa enywego mabapi le tsebo e nepagetšego ya go tseba Morena wa rena Jesu Kriste.”—2 Pet. 1:8.

19, 20. Tapologo ya kgonthe e ka hwetšwa bjang?

¹⁹ Ge re phela ka go dumelelana le melao ya Jehofa, re lemoga gore boithabišo le ge e le bofe bjoo bo tšweletšwago ke lefase le ke bja nakwana. Moše o ile a lemoga seo, gomme le rena re a se lemoga. (Baheb. 11:25) Therešo yeo e ka se fetogego ke gore tapologo ya kgonthe, yeo e tlišago lethabo le le tseneletšego, la ka mo go sa felego le kgotsofalo, e tlišwa ke go dira thato ya Tatago rena wa legodimong.—Mat. 5:6.

²⁰ Eka re ka tšwela pele re lapološwa ke dilo tša moya. Ka go dira bjalo, re “gana go se boife Modimo le dikganyogo tša lefase . . . ge re letile kholofelo e thabišago le ponagalo ya letago ya Modimo yo mogolo le ya Mophološi wa rena, Kriste Jesu.” (Tito 2:12, 13) Ka gona, a re ikemišetšeng go dula jokong ya Jesu ka go ikokobeletša bolaodi le tlhahlo ya gagwe. Ka go dira bjalo, re tla hwetša lethabo le tapologo tša kgonthe!

[Mongwalo wa tlase]

O be o tla Araba Bjang?

• Batho ba Jehofa ba hwetša tapologo bjang lehono?

• Bodiredi bo re lapološa le go lapološa bao re bolelago le bona bjang?

• Dihlogo tša malapa di ka dira’ng go kgonthišetša gore borapedi bja malapa a tšona bo a lapološa?

• Ke dilo dife tšeo di ka re imelago moyeng?

[Dipotšišo tša Thuto]

[Diswantšho go letlakala 26]

Ka go rwala joko ya Jesu, re hwetša mehuta e mentši ya tapologo