Polelo e Kgahlišago e Godiša Ditswalano tše Dibotse

“Anke polelo ya lena ka mehla e be e kgahlišago.”—BAKOL. 4:6.

1, 2. Polelo e kgahlišago ya ngwanabo rena e bile le mafelelo afe a mabotse?

NGWANABO rena yo mongwe o bega gore: “Ge ke be ke le bodireding bja ntlo le ntlo, ke ile ka gahlana le monna yo a ilego a galefa kudu moo a bego a thothomela molomo le mmele ka moka. Ka boleta ke ile ka leka go boledišana le yena ka Mangwalo eupša o ile a galefa le go feta. Mosadi wa gagwe le bana ba ile ba mo tlatša go nkgobošeng ka mantšu gomme ke ile ka lemoga gore e be e le nako ya gore ke sepele. Ke ile ka botša lapa leo gore ke be ke tlile ka khutšo e bile ke be ke kganyoga go tloga ka khutšo. Ke ile ka ba bontšha Bagalatia 5:22 le 23, moo go bolelwago ka lerato, boleta, boitshwaro le khutšo. Ke moka ke ile ka tloga.

² “Ka moragonyana, ge ke be ke etela dintlo tše di lego ka mošola wa setarata, ke ile ka bona lapa leo le dutše ka pele ga ntlo. Ba ile ba mpitša. Ke ile ka ipotšiša gore, ‘Bjale ba nyaka’ng?’ Monna yo o be a swere nkgo ya meetse a go tonya gomme a nnea gore ke nwe. O ile a kgopela tshwarelo gore o ile a nkgadimola gomme a ntheta ka gore ke na le tumelo e matla. Re ile ra arogana ka khutšo.”

3. Ke ka baka la’ng re swanetše go phema go dumelela ba bangwe ba re galefiša?

³ Lefaseng la lehono leo le tletšego ka dikgateletšo, ga se gantši re ka phemago go kopana le batho bao ba tletšego kgalefo go akaretša le bodireding. Ge seo se direga, ke gabohlokwa gore re bontšhe “moya o boleta le tlhompho e tseneletšego.” (1 Pet. 3:15) Ge nkabe ngwanabo rena yo go boletšwego ka yena ka mo godimo a ile a dumelela kgalefo ya mong wa ntlo le go hloka botho ga gagwe di mo galefiša, mohlomongwe boemo bja kgopolo bja monna yo bo be bo ka se ke bja fetoga; o be a ka galefa le go feta. Ka ge ngwanabo rena a ile a itshwara gomme a bolela ka botho, mafelelo e bile a mabotse.

Ke Eng Seo se Dirago Gore Polelo e Kgahliše?

4. Ke ka baka la’ng go le bohlokwa go diriša polelo e kgahlišago?

⁴ Go sa šetšwe gore re dirišana le bao ba lego ka ntle goba ka gare ga phuthego, gaešita le ditho tša malapa a rena, go bohlokwa go latela keletšo ya moapostola Paulo e rego: “Anke polelo ya lena ka mehla e be e kgahlišago, e nokilwego ka letswai.” (Bakol. 4:6) Polelo e bjalo e bose le e swanetšego e bohlokwa bakeng sa poledišano e botse le khutšo.

5. Ke’ng seo se sa bolelwego ke go ba le poledišano e botse? Bontšha.

⁵ Poledišano e botse ga se go fo bolela selo se sengwe le se sengwe seo o se naganago le kamoo o ikwago ka gona ka nako le ge e le efe, kudu-kudu ge o befetšwe. Mangwalo a bontšha gore dipolelo tšeo di sa laolegego tša bogale ke pontšho ya bofokodi, e sego matla. (Bala Diema 25:28; 29:11.) Moše—monna “yo bolêta ruri” go fetiša batho ka moka—o kile a dumelela borabele bja setšhaba sa Isiraele bo mo dira gore a palelwe ke go itshwara le go palelwa ke go nea Modimo letago. Moše o ile a hlalosa gabotse kamoo a bego a ikwa ka gona, eupša Jehofa o be a sa thabišwa ke seo. Ka morago ga nywaga e 40 a etelela Baisiraele pele, Moše ga se a hwetša tokelo ya go ba iša Nageng ya Kholofetšo.—Num. 12:3; 20:10, 12; Ps. 106:32.

6. Go ba le temogo polelong ya rena go bolela’ng?

⁶ Mangwalo a re kgothaletša go bontšha boitshwaro le temogo goba kahlolo e botse, ge re bolela. “Boati bya phokô xa bo hloke diphapoxô; matsebe ó swara molomo.” (Die. 10:19;  17:27) Lega go le bjalo, go ba le temogo ga go bolele gore ga se wa swanela go hlalosa maikwelo a gago. Go bolela go bea taba ka tsela “e kgahlišago,” goba ka botho re diriša leleme go fodiša go e na le go gobatša.—Bala Diema12:18; 18:21.

“Xo Homola xo na le Mohla wa Xôna, le xo Bolêla xo na le Mohla wa Xôna”

7. Ke dilo tša mohuta mang tšeo di sa swanelago go bolelwa, gona ka baka la’ng?

⁷ Bjalo ka ge go nyakega gore re bontšhe botho le boitshwaro ge re bolela le bašomi-gotee le rena goba batho bao re sa ba tsebego tšhemong, re swanetše go dira se se swanago ka phuthegong le ka gae. Go fo phatloga ka bogale ntle le go nagana ka ditla-morago tša seo go ka bakela rena le ba bangwe tshenyo e kgolo kudu moyeng, maikwelong le mmeleng. (Die. 18:6, 7) Re swanetše go laola maikwelo a mabe—ao a bontšhago tshekamelo ya tlhago ya go se phethagale. Polelo e gobošago, e lešago dihlong, ya lenyatšo le pefelo e nago le lehloyo di fošagetše. (Bakol. 3:8; Jak. 1:20) Di ka senya ditswalano tše dibotse le batho gaešita le Jehofa. Jesu o rutile gore: “Yo mongwe le yo mongwe yo a tšwelago pele a galefetše ngwanabo o tla seka kgorong ya toka; eupša mang le mang yo a bitšago ngwanabo ka lentšu le le sa bolelegego la lenyatšo o tla seka Kgorong e Phagamego; mola mang le mang yo a rego, ‘Wena lešilo-towe la monyatšegi!’ a tla lebanwa ke Gehenna ya mollo.”—Mat. 5:22.

8. Ke neng moo re ka tšweletšago tsela yeo re ikwago ka yona, eupša re ka dira seo bjang?

⁸ Lega go le bjalo, go na le ditaba tše dingwe tšeo mohlomongwe re ka naganago gore e ka ba mo gobotse go bolela ka tšona. Ge e ba go e-na le selo seo ngwanabo rena a se boletšego goba a se dirilego seo se go tshwenyago kudu moo o sa kgonego go se lebala, o se ke wa dumelela lehloyo le gola ka pelong ya gago. (Die. 19:11) Ge motho a go galefiša, leka go laola maikwelo a gago gomme o gate megato e nyakegago bakeng sa go rarolla bothata. Paulo o ngwadile gore: “Letšatši le se ke la sobela le galefile.” Ka ge bothata bo tšwela pele bo go tshwenya, bo rarolle ka botho ka nako e swanetšego. (Bala Baefeso 4:26, 27, 31, 32.) Bolela le ngwaneno ka taba yeo, o  tiile eupša o e-na le botho, ka moya wa go nyaka go boelana le yena.—Lef. 19:17; Mat. 18:15.

9. Ke ka baka la’ng re swanetše go laola maikwelo a rena pele re yo bolela le ba bangwe?

⁹ Go ba gona, o swanetše go kgetha nako e swanetšego. “Xo homola xo na le mohla wa xôna, le xo bolêla xo na le mohla wa xôna.” (Mmo. 3:1, 7) Go feta moo, “pelo ya moloki e akanya diphetolô.” (Die. 15:28) Se se ka akaretša go leta pele o ka bolela ka bothata. Go rarolla bothata ge motho a sa befetšwe kudu go ka senya ditaba; le gona ga se gabohlale go leta nako e telele kudu.

Ditiro tše Botho di Godiša Ditswalano tše Dibotse

10. Go dira ditiro tše botho go ka kaonefatša ditswalano bjang?

¹⁰ Polelo e botho le poledišano e botse di thuša go aga le go boloka ditswalano tša khutšo. Ge e le gabotse, go dira seo re ka se kgonago bakeng sa go kaonefatša ditswalano tša rena le ba bangwe go ka kaonefatša poledišano ya rena le bona. Go swara ba bangwe ka botho bjo bo tšwago pelong—go hwetša dibaka tša go ba thuša, go ba nea dimpho tše di tšwago pelong le go ba le moya wa go amogela baeng—go ka dira gore go be le poledišano ka bolokologi. Go ka ba gwa “kgobelela magala a mollo” mothong e bile go ka tšweletša dika tše dibotse gomme gwa dira gore go be bonolo go bolela ka taba le go e rarolla.—Baroma 12:20, 21.

11. Jakobo o ile a nyaka go lokiša ditaba bjang le Esau, gona mafelelo e bile afe?

¹¹ Mopatriareka Jakobo o be a kwešiša se. Ngwanabo wa lefahla, Esau, o be a mo tuketše bogale moo Jakobo a ilego a tšhaba ka ge a be a boifa gore Esau a ka mmolaya. Jakobo o ile a boa ka morago ga nywaga e mentši. Esau o ile a tšwa go yo mo gahlanetša a e-na le banna ba 400. Jakobo o ile a rapelela thušo ya Jehofa. Ke moka a romela Esau mpho e kgolo ya diruiwa. Mpho yeo e ile ya fihlelela morero wa yona. Ge ba be ba kopana, Esau o be a fetotše kgopolo ke moka o ile a kitima gomme a atla Jakobo.—Gen. 27:41-44; 32:6, 11, 13-15; 33:4, 10.

Kgothatša ba Bangwe ka Polelo e Botho

12. Ke ka baka la’ng re swanetše go diriša mantšu a botho go bana babo rena?

¹² Bakriste ba hlankela Modimo, e sego batho ba bangwe. Lega go le bjalo, ka tlhago re rata go amogelwa ke ba bangwe. Mantšu a rena a botho a ka fokotša mathata a bana babo rena le dikgaetšedi. Lega go le bjalo, go ba swaya diphošo ka tsela e feteletšego go ka dira gore ba imelwe kudu gwa ba gwa dira gore ba bangwe ba ipotšiše ge e ba ba sa dutše ba amogelwa ke Jehofa. Ka gona, anke ka go tšwa pelong re boleleng dilo tše di kgothatšago ba bangwe, “polelo e botse ya go aga moo go nyakegago, gore e fetišetše se se rategago go bao ba kwago.”—Baef. 4:29.

13. Ke’ng seo bagolo ba swanetšego go se gopola (a) ge ba nea keletšo? (b) ge ba ngwala mangwalo?

¹³ Bagolo, ka mo go kgethegilego, ba swanetše go ba “bonolo” le go swara mohlape ka lerato. (1 Bathes. 2:7, 8) Ge go nyakega gore bagolo ba nee keletšo, pakane ya bona ke go dira seo “ka boleta,” gaešita le ge ba bolela le bao “ba sa sekamelago go lokeng.” (2 Tim. 2:24, 25) Gape bagolo ba swanetše go ba botho mangwalong ao go nyakegago gore ba a ngwalele sehlopha se sengwe sa bagolo goba ofisi ya lekala. Ba swanetše go ba botho le go ba šedi ka go dumelelana le seo re se balago go Mateo 7:12.

Go Diriša Polelo e Botho ka Lapeng

14. Paulo o nea banna keletšo efe, gona ka baka la’ng?

¹⁴ Go bonolo go tšeela fase kamoo mantšu, ponagalo ya sefahlego gaešita le go šišinyega ga mmele di ka kgomago ba bangwe ka gona. Ka mohlala, banna ba bangwe ba ka no ba ba sa lemoge ka botlalo kamoo mantšu a bona a ka kgomago basadi ka gona. Kgaetšedi yo mongwe o itše, “Ke a tšhoga ge monna wa-ka a nkomanya ka bogale.” Mantšu a bogale a ka kgoma mosadi kudu go feta monna gomme go ka tšea mosadi nako e telele go a lebala. (Luka 2:19) Se se tloga se le bjalo kudu-kudu ge mantšu a a bolelwa ke motho yoo mosadi a mo ratago e bile a nyakago go mo hlompha. Paulo o eleditše banna ka gore: “Tšwelang pele le rata basadi ba lena gomme le se ke la ba galefela o šoro.”—Bakol. 3:19.

15. Bontšha lebaka leo ka lona monna a swanetšego go swara mosadi wa gagwe ka boleta.

 ¹⁵ Tabeng ye, ngwanabo rena yo e lego mahlwa-a-di-bona yo gape a nyetšego o bontšhitše gore ke ka baka la eng monna a swanetše go swara mosadi wa gagwe ka botho, go etša “sebjana se fokolago.” O itše: “Ge o swere sebjana se sebotse sa letsopa, ga se wa swanela go se pinyeletša, go se go bjalo se ka palega. Gaešita le ge se ka lokišwa, go palega moo go ka fo dula go bonala. Ge monna a foša mosadi wa gagwe ka mantšu, a ka mo gobatša. Se se ka dira gore tswalano ya bona e dule e palegile.”—Bala 1 Petro 3:7.

16. Mosadi a ka aga lapa la gagwe bjang?

¹⁶ Banna le bona ba ka kgothatšwa goba ba nyamišwa ke mantšu a ba bangwe, go akaretša le a basadi ba bona. “Mosadi wa thlalefô,” yo monna wa gagwe a ka dulago a “mmotile” e le ka kgonthe, o naganela maikwelo a monna wa gagwe, bjalo ka ge le yena a ka rata ge monna a dira se se swanago. (Die. 19:14; 31:11) Ke therešo gore mosadi a ka ba le tutuetšo e kgolo ka lapeng, e botse goba e mpe. “Mosadi yo bohlale o aga ngwako wa gagwe; eupša mosadi wa lešilo o o rutla ka diatla tša gagwe.”—Die. 14:1, PK.

17. (a) Bana ba swanetše go bolela bjang le batswadi ba bona? (b) Batho ba bagolo ba swanetše go boledišana bjang le bafsa, gona ka baka la’ng?

¹⁷ Ka mo go swanago batswadi le bana ba swanetše go boledišana ka botho. (Mat. 15:4) Go naganela ba bafsa ge re bolela le bona, go tla re thuša go phema go ba “befediša” goba go ba ‘galefiša.’ (Bakol. 3:21; Baef. 6:4, mongwalo wa tlase wa NW.) Gaešita le ge bana ba swanetše go kgalengwa, batswadi le bagolo ba swanetše go boledišana le bona ka tlhompho. Ka tsela ye, bao ba godilego ba dira gore go be bonolo gore bafsa ba phošolle ditsela tša bona gomme ba dule ba e-na le tswalano e botse le Modimo. Seo se kaone kudu go feta go ba nea kgopolo ya gore ga re sa na taba le bona, moo le bona ba ka feleletšago ba se sa na taba le bona beng. Bafsa ba ka no se gopole dikeletšo ka moka tšeo ba di neilwego eupša ba tla gopola kamoo ba bangwe ba ilego ba bolela le bona ka gona.

Go Bolela Dilo tše Dibotse go tšwa Pelong

18. Re ka tloša bjang dikgopolo le maikwelo a kgopišago?

¹⁸ Go laola kgalefo re theošitše maswafo ga se feela taba ya go se šošobantšhe sefahlego. Pakane ya rena e swanetše go ba se se fetago go gatelela  maikwelo a matla ao re ka bago re e-na le ona. Go leka go bonagala re theošitše maswafo mola ka gare re tuka bogale go ka re bakela kgateletšego. Go swana le go gata diporiki le go gata makhura koloing ka nako e tee. Seo se tlišetša koloi kgateletšego e oketšegilego gomme se ka baka tshenyo. Ka gona o se ke wa dumelela kgalefo e tlalelana ka gare gomme wa e ntšha ka morago. Rapela Jehofa gore a go thuše go tloša bohloko pelong ya gago. Dumelela moya wa Jehofa go fetoša monagano le pelo ya gago gore o dire dilo ka go dumelelana le thato ya gagwe.—Bala Baroma 12:2; Baefeso 4:23, 24.

19. Ke megato efe yeo e ka re thušago go phema maemo ao a galefišago?

¹⁹ Gata megato e šomago. Ge o ka lemoga gore o swaregile gampe gomme wa ikwa eka o thoma go galefa, e ka ba mo go holago go tloga moo ka nakwana, ka go rialo o tla ba o ipha nako ya go phohliša pefelo. (Die. 17:14) Ge motho yo o boledišanago le yena a thoma go galefa, leka kamoo o ka kgonago ka gona go boledišana le yena ka botho. Gopola: “Phetolô e bolêta e phohliša dipêfêlô; lentšu la xo fêrêlêla le tsoša boxale.” (Die. 15:1) Mantšu a hlabago goba a bogale a ka gakatša mollo gaešita le ge a bolelwa ka lentšu le boleta. (Die. 26:21) Ka gona ge go bonagala boemo bo go palediša go itshwara, ‘diega go bolela le go galefa.’ Rapelela moya wa Jehofa gore o go thuše go bolela dilo tše dibotse, e sego tše mpe.—Jak. 1:19.

Go Lebalela go tšwa Pelong

20, 21. Re ka thušwa ke’ng gore re lebalele ba bangwe, gona ke ka baka la’ng re swanetše go dira bjalo?

²⁰ Ka maswabi, ga go le o tee wa rena yo a ka kgonago go laola leleme la gagwe ka mo go phethagetšego. (Jak. 3:2) Le ge ba ka leka kamoo ba ka kgonago ka gona, ka dinako tše dingwe gaešita le ditho tša malapa le bana babo rena le dikgaetšedi ba ba rategago ba ka bolela dilo tšeo di re kgopišago. Go e na le go kgopišega ka pela, ka go se fele pelo, seka-seka lebaka leo le ka bago le dirile gore ba bolele seo ba se boletšego. (Bala Mmoledi 7:8, 9.) Na ba be ba gateletšegile, ba boifa, ba sa ikwe gabotse goba ba e-na le mathata a motho ka noši?

²¹ Dilo tše bjalo ga di lokafatše go fo phatloga. Eupša go lemoga ga rena dilo tšeo go ka re thuša go kwešiša lebaka leo ka dinako tše dingwe le dirago gore batho ba bolele le go dira dilo tšeo ba bego ba sa swanela go di dira gomme go ka re tutueletša go ba bao ba lebalelago. Ka moka ga rena re kile ra bolela le go dira dilo tšeo di kgopišago ba bangwe, e bile re holofela gore ba tla re lebalela ka botho. (Mmo. 7:21, 22) Jesu o boletše gore re swanetše go lebalela ba bangwe gore le rena re kgone go lebalelwa ke Modimo. (Mat. 6:14, 15; 18:21, 22, 35) Ka baka leo, re swanetše go akgofela go kgopela tshwarelo le go swarela ba bangwe, ka go rialo re tla dula re e-na le lerato—“setlemo se se phethagetšego sa botee”—ka malapeng a rena le ka phuthegong.—Bakol. 3:14.

22. Ke ka baka la’ng re swanetše go katanela go diriša mantšu a botho?

²² Dilo tšeo di re amogago lethabo le botee bja rena di sa tlo tšwela pele di oketšega ge tshepedišo ye e galefilego e dutše e lebile bofelong. Go diriša melao ya motheo e šomago yeo e lego ka Lentšung la Modimo go tla re thuša go diriša maleme a rena gabotse, e sego gampe. Re tla ba le ditswalano tše dintši tša khutšo ka phuthegong le ka lapeng gomme mohlala wa rena o tla nea bohlatse bjo bobotse go ba bangwe mabapi le ‘Modimo wa rena yo a thabilego,’ Jehofa.—1 Tim. 1:11.

Na o ka Hlalosa?

• Ke ka baka la’ng go le bohlokwa go kgetha nako e swanetšego ya go rarolla bothata?

• Ke ka baka la’ng ka mehla ditho tša lapa di swanetše go boledišana ka tsela “e kgahlišago”?

• Re ka phema bjang go bolela dilo tše di kgopišago?

• Re ka thušwa ke’ng gore re be bao ba lebalelago?

[Dipotšišo tša Thuto]

[Diswantšho go letlakala 21]

Theoša maswafo gomme o hwetše nako e swanetšego ya go bolela

[Seswantšho go letlakala 23]

Ka mehla monna o swanetše go boledišana le mosadi wa gagwe ka tsela e boleta