Tšwela Pele o Aga Phuthego

“Tšwelang pele le homotšana e bile le agana.”—1 BATHES. 5:11.

1. Ke ditšhegofatšo dife tšeo di tlišwago ke go ba ka phuthegong ya Bokriste, eupša ke ditlhohlo dife tšeo di ka bago gona?

RURI ke tšhegofatšo e kgolo go ba setho sa phuthego ya Bokriste. O na le tswalano e botse le Jehofa. Go ithekga ka Lentšu la gagwe bakeng sa tlhahlo go go šireletša ditla-moragong tše mpe tša bophelo bjo e sego bja Bokriste. O dikologilwe ke bagwera ba kgonthe bao ba go lakaletšago dilo tše dibotse. Ee, go na le ditšhegofatšo tše dintši. Lega go le bjalo, Bakriste ba bantši ba lebeletšana le mathata a mehuta-huta. Ba bangwe ba ka nyaka thušo gore ba kwešiše madiba a diphiri tša Lentšu la Modimo. Ba bangwe ba a babja goba ba gateletšegile, goba ba ka ba ba tlaišwa ke ditla-morago tša diphetho tšeo di sego bohlale tšeo ba di dirilego. E bile ka moka ga rena re swanelwa ke go phela lefaseng la batho bao ba sa ratego Modimo.

2. Re swanetše go arabela bjang ge bana babo rena ba tlaišega, gona ka baka la’ng?

² Ga go le o tee wa rena yo a ratago go bona Bakriste-gotee le yena ba tlaišega. Moapostola Paulo o ile a swantšha phuthego le mmele gomme a re “ge e ba setho se tee se tlaišega, ditho tše dingwe ka moka di tlaišega le sona.” (1 Bakor. 12:12, 26) Maemong a bjalo, re swanetše  go katanela go thekga bana babo rena le dikgaetšedi. Go na le dipego tše dintši tša Mangwalo tšeo go tšona ditho tša phuthego di ilego tša thuša tše dingwe go lebeletšana le ditlhohlo le go di fenya. Ge re dutše re hlahloba dipego tšeo gona bjale, bona kamoo o ka thušago ba bangwe ka tsela e swanago le yeo e hlaloswago. O ka thuša bjang bana beno moyeng gomme ka go dira bjalo wa aga phuthego ya Jehofa?

“Ba Sepela le Yena”

3, 4. Akhwila le Perisila ba ile ba thuša Apollo bjang?

³ Ge Apollo a be a e-ya go dula Efeso, e be e šetše e le moebangedi yo a fišegago. Pego ya Ditiro e re: “Ka ge a be a fišega moyeng, o ile a thoma go bolela le go ruta ka mo go nepagetšego dilo tše di lego mabapi le Jesu, eupša o be a tlwaelane le kolobetšo ya Johane feela.” Ka ge Apollo a be a sa tsebe selo ka go kolobetšwa “leineng la Tate le la Morwa le la moya o mokgethwa” mohlomongwe o be a neilwe bohlatse ke barutiwa ba Johane Mokolobetši goba ke balatedi ba Jesu ba pele ga Pentekoste ya 33 C.E. Gaešita le ge Apollo a be a fišega, tsebo ya gagwe e be e lekanyeditšwe. Go gwerana le badumedi-gotee le yena go mo thušitše bjang?—Dit. 1:4, 5; 18:25; Mat. 28:19.

⁴ Banyalani ba Bakriste e lego Akhwila le Perisila ba ile ba kwa Apollo a bolela ka sebete sinagogeng, ba sepela le yena gomme ba mo ruta ka mo go oketšegilego. (Bala Ditiro 18:24-26.) Ye e be e le tiro e bontšhago lerato. Ke therešo gore Akhwila le Perisila ba swanetše go ba ba ile ba boledišana le Apollo ka šedi le ka go nyaka go thuša, ba sa dire gore a ikwe eka o swawa diphošo. E be e le feela gore o be a sa tsebe histori ya phuthego ya pele ya Bokriste. Ga go pelaelo gore Apollo o ile a leboga ge bagwera ba gagwe ba bafsa ba be ba boledišana le yena ka ditaba tše tša bohlokwa. Ka ge Apollo a be a kwele ditaba tše, o ile a ‘thuša bana babo kudu’ kua Akaya gomme a nea bohlatse bjo matla.—Dit. 18:27, 28.

5. Bagoeledi ba Mmušo ba dikete ba nea thušo efe, gona ka mafelelo afe?

⁵ Ba bantši ka phuthegong ya Bokriste lehono ba leboga kudu bao ba ba thušitšego go kwešiša Beibele. Go bile le ba bantši bao ba bopago segwera se se kgotlelelago gare ga barutwana le barutiši ba bona. Maemong a mantši, go thuša batho go kwešiša therešo go nyaka gore go be le dipoledišano tša ka mehla le bona mo e ka bago ka dikgwedi tše mmalwa. Lega go le bjalo, bagoeledi ba Mmušo ba ikemišeditše go dira boikgafo bjoo ka gobane ba lemoga gore se se bolela bophelo le lehu. (Joh. 17:3) Le gona, go thabiša gakaakang go bona batho ba kgomarela therešo, ba phela ka go dumelelana le yona gomme ba diriša maphelo a bona go dira thato ya Jehofa!

“O be a Bolelwa Gabotse”

6, 7. (a) Ke ka baka la’ng Paulo a ile a kgetha Timotheo gore e be mosepedi-gotee le yena? (b) Timotheo o ile a thušwa go dira tšwelopele efe?

⁶ Ge moapostola Paulo le moapostola Silase ba be ba etela Lisitara leetong la bona la bobedi la boromiwa, ba ile ba hwetša lesogana leo le bitšwago Timotheo, mohlomongwe le le nywageng ya go obelela e 20 goba le le mathomong a yona. “O be a bolelwa gabotse ke bana  babo ba Lisitara le Ikonia.” Mmago Timotheo, Yunise, le makgolo’agwe Loisa e be e le Bakriste bao ba ineetšego, eupša tatagwe e be e se modumedi. (2 Tim. 1:5) Go ka direga gore Paulo o ile a tlwaelana le ge a be a etetše motse wo la mathomo nywageng e mmalwa e fetilego. Eupša ga bjale moapostola yo o lebiša tlhokomelo ya gagwe go Timotheo ka gobane e le lesogana le bohlale. Ka gona, ka tumelelo ya sehlopha sa bagolo ba lefelong leo, Timotheo o ile a ba modirišani wa Paulo medirong ya boromiwa.—Bala Ditiro 16:1-3.

⁷ Timotheo o ithutile mo gontši go modirišani-gotee le yena yo a godilego. O ile a ithuta mo gontši go fihla bokgoleng bja gore ka morago ga nakwana, Paulo ka kgodišego o ile a roma Timotheo go etela diphuthego le go hlankela e le moemedi wa gagwe. Nywageng e 15 goba go feta moo yeo Timotheo a e thabetšego a dirišana le Paulo, lesogana le leo le bego le se na phihlelo le leo mohlomongwe le bego le e-na le dihlong le ile la gola go fihlela e e-ba molebeledi yo mobotse.—Bafil. 2:19-22; 1 Tim. 1:3.

8, 9. Ditho tša phuthego di ka dira’ng bakeng sa go kgothatša bafsa? Nea mohlala.

⁸ Masogana a mantši le dikgarebe ka phuthegong ya Bokriste lehono ba tšwela pele gabotse kudu. Ge ba ka kgothatšwa le go matlafatšwa ke bagwera bao ba sekametšego dilong tša moya, bafsa ba ba ka katanela go swanelegela boikarabelo bjo bogolo gare ga batho ba Jehofa gomme ba a bo amogela. Gaša mahlo ka phuthegong ya geno! Na o bona go e-na le bafsa bao ba ka itirago bao ba hwetšagalago, go etša ge Timotheo a dirile? Ka thušo le kgothatšo ya gago, ba ka ba babulamadibogo, ditho tša lapa la Bethele, baromiwa goba balebeledi ba basepedi. O ka dira’ng gore o ba thuše go katanela go fihlelela dipakane tše bjalo?

⁹ Martin, yo e bilego setho sa lapa la Bethele ka nywaga e 20, o gopola ka tebogo tsela yeo molebeledi wa tikologo a ilego a bontšha kgahlego go yena nywageng e 30 e fetilego ge ba be ba sepela gotee bodireding. Molebeledi wa mosepedi o ile a bolela ka phišego mabapi le go hlankela ga gagwe legaeng la Bethele ge e be sa le yo mofsa. O ile a kgothaletša Martin gore le yena a naganele go itira yo a hwetšagalago bakeng sa mokgatlo wa Jehofa. Martin o bona poledišano ye yeo a sa e lebalego e le yona e kgomilego diphetho tšeo a di dirilego ka morago. Go tseba mang, mohlomongwe le wena o ka ba le tutuetšo e botse go bagwera ba gago bao e sa lego bafsa ka go boledišana le bona ka dipakane tša pušo ya Modimo?

“Bolelang ka mo go Homotšago le Meoya e Nyamilego”

10. Epaforodito o ile a ikwa bjang, gona ka baka la’ng?

¹⁰ Epaforodito o ile a sepela leeto le letelele le leo le lapišago go tloga Filipi go ya Roma a yo etela moapostola Paulo, yo a bego a golegilwe  ka baka la tumelo ya gagwe. Epaforodito o ile a sepela eka ke motseta wa Bafilipi. Ga se feela gore o be a rwele dimpho tša bona tšeo di yago go moapostola, eupša o ile a rulaganya go dula le yena gore a dire sohle seo a ka se kgonago go thuša Paulo maemong a thata ao a lego go ona. Lega go le bjalo, ge a be a le Roma, Epaforodito o ile a babja “a le kgaufsi le lehu.” Ge Epaforodito a be a bona gore seo a bego a ikemišeditše sona ga se sa kgonega, o ile a nyema moko.—Bafil. 2:25-27.

11. (a) Ke ka baka la’ng re sa swanela go makala ge ba bangwe ka phuthegong ba gateletšegile? (b) Ke’ng seo Paulo a ilego a kgothaletša gore se direlwe Epaforodito?

¹¹ Dikgateletšo tše di fapa-fapanego di dira gore batho lehono ba gateletšege monaganong. Dipalo-palo tšeo di tšwago Mokgatlong wa Lefase wa tša Maphelo di bolela gore motho o 1 go ba 5 ba badudi ba lefase a ka ba le kgateletšego ya monagano nakong e itšego bophelong bja gagwe. Batho ba Jehofa le bona ba lebeletšana le kgateletšego. Mathata a go hlokomela lapa, malwetši, go nyamišwa ke mafokodi a motho ka noši goba maemo a mangwe go ka dira gore motho a ikwe a nyamile. Ke’ng seo Bafilipi ba bego ba ka se dira go thuša Epaforodito? Paulo o ngwadile gore: “Mo amogeleng ka kamogelo e tlwaelegilego Moreneng ka lethabo lohle; le dule le swara batho ba mohuta woo ka tlhompho, gobane o ile a gomela lehu ka baka la modiro wa Morena, a bea moya wa gagwe kotsing, gore a thibe ka botlalo sekgoba sa ge le se gona mo gore le ntirele.”—Bafil. 2:29, 30.

12. Ke’ng seo se ka kgothatšago bao ba gateletšegilego?

¹² Le rena re swanetše go kgothatša bana babo rena bao ba nyamilego goba bao ba gateletšegilego. Ga go pelaelo gore go na le dilo tšeo re ka di retago ka tirelo ya bona go Jehofa. Mohlomongwe ba dirile diphetogo tše dikgolo maphelong a bona gore e be Bakriste goba ba tsenele tirelo ya nako e tletšego. Re thabela maiteko ao, e bile re ka ba kgonthišetša gore Jehofa le yena o a a thabela. Ge e ba botšofadi goba go se phele gabotse mmeleng go thibela babotegi ba bangwe go dira sohle seo ba kilego ba kgona go se dira, ba sa dutše ba swanelwa ke tlhompho ya rena bakeng sa nywaga ya bona ya tirelo. Go sa šetšwe gore boemo ke bofe, Jehofa o kgothatša babotegi ba gagwe ka moka gore: “Bolelang ka mo go homotšago le meoya e nyamilego, thekgang ba fokolago, e-bang le bopelotelele go bohle.”—1 Bathes. 5:14.

“Le mo Lebalele ka Botho Gomme le mo Homotše”

13, 14. (a) Phuthego ya Korinthe e ile ya gata kgato efe e kgolo, gona ka baka la’ng? (b) Go kgaolwa moo go bile le mafelelo afe?

¹³ Phuthego ya Korinthe ya lekgolong la pele la nywaga e ile ya lebeletšana le boemo bja monna yoo ka go se itshole a bego a dira bootswa. Boitshwaro bja gagwe bo be bo šitišana le tshekego ya phuthego gomme bo be bo tšhoša le bao e sego badumedi. Ka gona, Paulo o ile a laela ka mo go swanetšego gore monna yoo a tlošwe ka phuthegong.—1 Bakor. 5:1, 7, 11-13.

¹⁴ Tayo yeo e bile le mafelelo a mabotse. Phuthego e ile ya šireletšwa tutuetšong e mpe, e bile modiradibe o ile a hlaphogelwa gomme a itshola e le ka kgonthe. Ka baka la ditiro tša monna yo tšeo di bontšhago boitsholo, Paulo o ile a laela lengwalong la gagwe la bobedi leo le yago phuthegong yeo gore monna yoo a bušetšwe. Lega go le bjalo, go be go sa nyakege seo feela. Paulo o ile a ba a laela phuthego go ‘lebalela ka botho modiradibe yoo gomme e mo homotše, gore ka tsela e itšego motho yo bjalo a se metšwe ke go nyama ga gagwe go feta tekano.’—Bala 2 Bakorinthe 2:5-8.

15. Re swanetše go lebelela bjang badiradibe bao ba itsholago ba ba bušeditšwego ka phuthegong?

¹⁵ Ke’ng seo re ithutago sona pegong ye? Re a nyama ge batho ba kgaolwa. Ba ka ba ba gobošitše leina la Modimo gomme ba sentše phuthego leina. E bile ba ka ba dirile sebe kgahlanong le rena ka go lebanya. Lega go le bjalo, ge bagolo bao go ya ka tlhahlo ya Jehofa ba kgethilwego go hlahlobišiša taba ye ba lemoga gore modiradibe yo a itsholago o swanetše go bušetšwa ka phuthegong, se se bontšha gore o lebaletšwe ke Jehofa. (Mat. 18:17-20) Na le rena  ga se ra swanela go Mo ekiša? Ge e le gabotse, go mo swara makgwakgwa le go se mo lebalele go tla ba go bolela gore re ganetšana le Jehofa. E le gore re sepedišane le khutšo le botee bja phuthego ya Modimo le gore re amogelwe ke Jehofa, na ga se ra swanela go ‘kgonthišetša gore re rata’ badiradibe bao ba itsholago e le ka kgonthe gomme ba bušeditšwe ka phuthegong?—Mat. 6:14, 15; Luka 15:7.

‘O a Nkhola’

16. Lebaka la Paulo la go nyamišwa ke Mareka e be e le lefe?

¹⁶ Pego e nngwe ya Mangwalo e bontšha gore ga se ra swanela go boloka sekgopi kgahlanong le bao ba ilego ba re nyamiša. Ka mohlala, Johane Mareka o ile a swabiša moapostola Paulo kudu. Bjang? Ge Paulo le Baranaba ba be ba thoma leeto la bona la mathomo la boromiwa, Mareka o ile a sepela le bona bakeng sa go ba thuša. Eupša nakong e nngwe leetong leo le ka lebaka leo le sa hlaloswego, Johane Mareka o ile a ba tlogela gomme a boela gae. Paulo o be a nyamišitšwe kudu ke phetho ye moo e lego gore ge a be a rulaganya leeto la bobedi, ngangišano e ile ya tsoga magareng ga gagwe le Baranaba mabapi le ge e ba Mareka o swanetše go sepela le bona gape. Ka baka la seo se diragetšego leetong la mathomo, Paulo o be a sa nyake gore Mareka a sepele le bona.—Bala Ditiro 13:1-5, 13; 15:37, 38.

17, 18. Re tsebja bjang gore bothata bjo bo bego go le gona magareng ga Paulo le Mareka bo ile bja rarollwa, gona re ka ithuta’ng tabeng ye?

¹⁷ Go molaleng gore Mareka ga se a dumelela gore go gana ga Paulo go sepela le yena go mo nyamiše kudu, ka gobane o ile a tšwela pele ka modiro wa gagwe wa boromiwa tšhemong e šele a sepela le Baranaba. (Dit. 15:39) Seo Paulo a se ngwadilego ka yena nywaga e itšego ka morago se bontšha gore o ile a dula a botega. Ge a be a golegilwe kua Roma, Paulo o ile a ngwalela Timotheo lengwalo. Lengwalong lona leo, Paulo o itše: “Tšea Mareka o tle le yena gobane o nkhola bodireding.” (2 Tim. 4:11) Ee, Paulo o ile a bona gore Mareka o dirile tšwelopele.

¹⁸ Go na le seo re ka ithutago sona tabeng ye. Mareka o ile a hlagolela dika tša go ba moromiwa yo mobotse. Ga se a ka a nyamišwa ke go latolwa ke Paulo. Yena le Paulo e be e le banna ba moya gomme ga se ba ka ba boloka sekgopi. Go fapana le seo, Paulo ka morago o ile a bona Mareka e le mothuši yo bohlokwa. Ka gona, ge bana babo rena ba fenya mapheko gomme ba rarolla mathata, selo se sekaone seo re ka se dirago ke gore re tšwele pele ka bophelo gomme re thuše ba bangwe go dira tšwelopele ya moya. Go ba le pono e nepagetšego go aga phuthego.

Phuthego le Wena

19. Ditho ka moka tša phuthego ya Bokriste di ka thušana bjang?

¹⁹ ‘Dinakong tše tše di hlobaetšago tšeo go lego thata go lebeletšana le tšona,’ o hloka thušo ya bana beno le dikgaetšedi ka phuthegong, le bona ba hloka thušo ya gago. (2 Tim. 3:1) Ga se ka mehla Mokriste yo mongwe le yo mongwe a ka tsebago tsela yeo a swanetšego go sepela ka yona gore a lebeletšane le boemo bjo itšego ka katlego, eupša Jehofa o a tseba. E bile a ka diriša ditho tše di fapa-fapanego tša phuthego—go akaretša le wena—go thuša ba bangwe gore ba latele tsela e nepagetšego. (Jes. 30:20, 21; 32:1, 2) Ka gona, ka mešego-fela diriša keletšo ya moapostola Paulo! Tšwelang pele “le homotšana e bile le agana, feela bjalo ka ge le dira e le ka kgonthe.”—1 Bathes. 5:11.

O be o tla Araba Bjang?

• Ke ka baka la’ng go nyakega gore re age ba bangwe ka phuthegong ya Bokriste?

• Ke mathata a mohuta mang ao wena o ka thušago ba bangwe go lebeletšana le ona ka katlego?

• Ke ka baka la’ng re hloka thušo ya ba bangwe ka phuthegong ya gabo rena?

[Dipotšišo tša Thuto]

[Seswantšho go letlakala 11]

Ge Mokriste-gotee le rena a lebeletšane le boemo bjo thata, re ka mo thekga

[Seswantšho go letlakala 12]

Masogana a mantši le dikgarebe ka phuthegong ya Bokriste lehono ba tšwela pele gabotse kudu