“Tšwela Pele o Fenya Bobe” ka go Laola Kgalefo

‘Le se ke la itefeletša, baratiwa, . . . eupša tšwelang pele le fenya bobe ka bolo.’—BAROMA 12:19, 21.

1, 2. Dihlatse tšeo di bego di le leetong di ile tša bea mohlala ofe o mobotse?

DIHLATSE TŠA JEHOFA tše 34 di be di le leetong la go yo kgakola ofisi ya lekala ge sefofane sa tšona se diegišwa ke go se šome gabotse ga entšene. Ba be ba swanetše go ema iri e tee ba tšhela makhura, eupša ba ile ba ema diiri tše 44 tše thata boema-fofaneng bjo bo lego lekatana ba se na dijo, meetse goba dintlwana tša boithomelo. Banamedi ba bantši ba ile ba galefa gomme ba tšhošetša bašomi ba boema-fofane bja moo. Eupša bana babo rena le dikgaetšedi ba ile ba dula ba theošitše maswafo.

² Mafelelong, Dihlatse di ile tša fihla mo di bego di e-ya gona lenaneo la kgakolo le šetše le e-ya mafelelong. Gaešita le ge di be di lapile, di ile tša dula ka morago ga lenaneo gore di thabele bogwera le bana babo tšona ba tikologong yeo. Ka morago di ile tša lemoga gore mohlala wa tšona wa go se fele pelo le wa boitshwaro o ile wa lemogwa. Yo mongwe wa banamedi o boditše balaodi ba sefofane gore, “Ge nkabe e se ka baka la Bakriste ba 34 bao ba bego ba le ka sefofaneng, go be go tla tsoga moferefere kua boema-fofaneng.”

Go Phela Lefaseng Leo le Galefilego

3, 4. (a) Bošoro bo kgomile batho bjang gona ka nako e kaaka’ng? (b) Kaine o be a ka laola kgalefo ya gagwe bjang? Hlalosa.

³ Dikgateletšo tša bophelo tša tshepedišo ye e kgopo di ka dira gore batho ba ikwe ba galefile. (Mmo. 7:7) Gantši kgalefo ye e feleletša ka lehloyo le bošoro. Go tsoga dintwa magareng ga dinaga goba ka nageng, mola go se kwane ga malapa go tsoša dintwa ka malapeng a mantši. Kgalefo le bošoro bjo bjalo di thomile kgale. Kaine, morwa wa leitšibulo wa Adama le Efa, o ile a bolaya morwarragwe Abele ka baka la kgalefo e tletšego lehufa. Kaine o dirile tiro ye e mpe gaešita le ge Jehofa a be a mo kgothaleditše go laola maikwelo a gagwe le go mo holofetša gore o tla mo šegofatša ge a ka dira bjalo.—Bala Genesi 4:6-8.

⁴ Go sa šetšwe go se phethagale ga leabela, Kaine o be a ka kgona go dira phetho tabeng ye. O be a ka fo tlogela go galefa. Ke ka baka leo a ilego a ikarabela ka mo go feletšego ka tiro ya gagwe ya bošoro. Ka tsela e swanago, go se phethagale ga rena go dira gore re thatafalelwe ke go phema go galefa le ditiro tša go bontšha gore re galefile. E bile dilo tše dingwe tšeo di oketšago kgateletšo ye ‘mehleng ye ya bofelo’ ke ditutuetšo tše matla tše di fošagetšego. (2 Tim. 3:1) Ka mohlala, mathata a tša boiphedišo a ka dira gore re gateletšege kudu maikwelong. Mekgatlo ya maphodisa le ya go thuša malapa e bolela gore mathata a tša ditšhelete a feleletša ka go tlalelana ka bogale le bošoro ka malapeng.

5, 6. Ke moya ofe wa lefase mabapi le go galefa woo o ka re kgomago?

⁵ Go oketša moo, batho ba bantši bao re dirišanago le bona ke “baithati,” “ba ikgogomošago” gaešita le “ba bogale.” Go ka ba bonolo kudu gore dika tše tše mpe di re fetele gomme tša dira gore re galefe. (2 Tim. 3:2-5) Ge e le gabotse, gantši difilimi le mananeo a thelebišene di bontšha go itefeletša e le selo se sebotse gomme bošoro e le selo sa tlhago e bile e le selo se sekaone sa go rarolla mathata. Difilimi tše dingwe di dira gore babogedi ba fele pelo ya go bona sekebekwa se hwetša dilo tšeo go ka thwego di se swanetše—gantši se feleletša ka gore se bolawe ga sehlogo ke mogale wa filimi yeo.

 ⁶ Ditutuetšo tše bjalo tša maaka ga di thekge ditsela tša Modimo, eupša di thekga “moya wa lefase” le mmuši wa lona yo bogale e lego Sathane. (1 Bakor. 2:12; Baef. 2:2; Kut. 12:12) Moya woo o kgothaletša gore go kgotsofatšwe dikganyogo tša nama e sa phethagalago gomme ruri o kgahlanong le moya o mokgethwa wa Modimo le dienywa tša wona. Ke therešo gore thuto e kgolo ya Bokriste ga se go itefeletša ge o galefišitšwe. (Bala Mateo 5:39, 44, 45.) Ka gona, re ka diriša bjang dithuto tša Jesu ka botlalo?

Mehlala e Mebotse le e Mebe

7. Go ile gwa direga’ng ge Simeone le Lefi ba be ba palelwa ke go laola kgalefo ya bona?

⁷ Beibele e hupere keletšo mabapi le go laola kgalefo e bile e na le mehlala e šomago ya seo se ka diregago ge re laola kgalefo ya rena le ge re sa e laole. Ela hloko seo se diregilego ge barwa ba Jakobo e lego Simeone le Lefi ba be ba itefeletša go Sikeme ka baka la ge a be a gobošitše kgaetšedi ya bona Dina. Ba ile “ba kwa bohloko, ba befêlwa xaxolo.” (Gen. 34:7) Ka morago, barwa ba bangwe ba Jakobo ba ile ba hlasela motse wa gabo Sikeme, ba o thopa gomme ba iša basadi le bana ba motse woo bothopša. Ga se ba dira dilo tše ka baka la Dina feela eupša go bonagala ba di dirile le ka baka la boikgogomošo, ba nagana gore ba ka tšeelwa fase. Ba ile ba ikwa eka Sikeme o kgopišitše bona le tatago bona, Jakobo. Eupša Jakobo o ile a lebelela boitshwaro bja bona bjang?

8. Pego ya Simeone le Lefi e bontšha’ng mabapi le go itefeletša?

⁸ Phihlelo e sa kgahlišego ya Dina e swanetše go ba e ile ya kweša Jakobo bohloko kudu; lega go le bjalo, ga se a ka a kgahlwa ke go itefeletša ga barwa ba gagwe. Simeone le Lefi ba be ba sa dutše ba leka go lokafatša ditiro tša bona gomme ba re: “Xomme kxaetšedi ya rena a ka fo dirwa byalo ka seotswa naa?” (Gen. 34:31) Eupša go be go sa felele moo, gobane Jehofa o be a sa kgahlišwe ke seo. Nywaga e mentši ka morago, Jakobo o ile a bolela e sa pele gore ka baka la ditiro tše šoro le  tša go galefa tša Simeone le Lefi, ditlogolo tša bona di tla gašanywa gare ga meloko ya Isiraele. (Bala Genesi 49:5-7.) Ee, go se laole ga bona kgalefo go ile gwa dira gore ba se ratwe ke Modimo le tatago bona.

9. Ke neng moo Dafida a nyakilego a laolwa ke kgalefo?

⁹ Kgoši Dafida ga a se a ka a dira bjalo. O ile a hwetša dibaka tše dintši tša go itefeletša, eupša ga se a ka a di šomiša. (1 Sam. 24:3-7) Lega go le bjalo, ka letšatši le lengwe o nyakile a laolwa ke kgalefo. Monna wa mohumi yo a bitšwago Nabala o ile a fotlela banna ba Dafida, gaešita le ge ba be ba ile ba hlokomela mehlape ya Nabala le badiši ba yona. Mohlomongwe ka ge Dafida, kudu-kudu banna ba gagwe, ba be ba kgopišitšwe ba be ba le kgaufsi le go itefeletša ka tsela e šoro. Ge Dafida le banna ba gagwe ba be ba e-ya go hlasela Nabala le ba lapa la gagwe, lesogana le lengwe le ile la botša Abigaile, mosadi yo bohlale wa Nabala, ka seo se diragetšego gomme la mo kgothaletša go tšea kgato. Gatee-tee, o ile a phutha mpho e kgolo gomme a ya go gahlanetša Dafida. Ka boikokobetšo o ile a kgopela tshwarelo ka baka la boikgogomošo bja Nabala gomme a kgothaletša Dafida gore a dule a boifa Jehofa. Dafida o ile a hlaphogelwa gomme a re: “Xo leboxwê wêna xe O nthšexetše lehono ka se ôbê molato wa madi.”—1 Sam. 25:2-35.

Boemo bja Kgopolo bja Bokriste

10. Bakriste ba swanetše go ba le pono efe mabapi le go itefeletša?

¹⁰ Ga go pelaelo gore seo se diragaletšego Simeone le Lefi le seo se diragetšego magareng ga Dafida le Abigaile se bontšha gore Jehofa ga a rate kgalefo e sa laolegego le bošoro le gore o šegofatša maiteko a go dira khutšo. Moapostola Paulo o ngwadile gore: “Ge e ba go kgonega, go fihla moo go ithekgilego ka lena, e-bang le khutšo le batho bohle. Le se ke la itefeletša, baratiwa, eupša šuthelelang kgalefo; gobane go ngwadilwe gwa thwe: ‘Tefetšo ke ya-ka, ke tla lefetša, go re’alo Jehofa.’ Eupša, ‘ge e ba lenaba la gago le swerwe ke tlala, le fepe; ge e ba le nyorilwe, le nee sa go nwa; gobane ka go dira se o tla kgobelela magala a mollo hlogong ya lona.’ O se ke wa itesa o fenywa ke bobe, eupša tšwela pele o fenya bobe ka bolo.”—Baroma 12:18-21. *

11. Kgaetšedi yo mongwe o ile a ithuta bjang go laola kgalefo?

¹¹ Re ka diriša keletšo yeo. Ka mohlala, kgaetšedi yo mongwe o ile a botša mogolo gore o belaela ka molaodi yo mofsa mošomong wa gagwe. O mo hlalositše e le yo a sa dirego dilo ka teka-tekano e bile a se botho. O be a galefetše mosadi yoo moo a bego a nyaka le go ngala mošomo. Mogolo o ile a kgothaletša kgaetšedi gore a se kitimele go dira phetho. O lemogile gore go galefišwa ga kgaetšedi ke boitshwaro bja molaodi wa gagwe go fo ba go gakaditše boemo. (Tito 3:1-3) Mogolo yo o boletše gore gaešita le ge kgaetšedi a ka hwetša mošomo o mongwe, o sa dutše a tla swanelwa ke go fetoša tsela yeo a ilego a arabela ka yona ge a be a sa swarwe ka botho. O mo kgothaleditše go swara molaodi wa gagwe ka tsela yeo le yena a bego a ka rata go swarwa ka yona, go etša ge Jesu a re rutile bjalo. (Bala Luka 6:31.) Kgaetšedi yo o ile a dumela gore o tla leka seo. Mafelelo e bile afe? Ka morago ga nakwana, molaodi o ile a thoma go ba bonolo gomme a ba a leboga kgaetšedi yo ka mošomo wa gagwe.

12. Ke ka baka la’ng go se kwane gare ga Bakriste e ka ba mo kwešago bohloko kudu?

¹² Re ka no se makatšwe ke ge go tsoga mathata a bjalo magareng ga rena le motho yo a lego ka ntle ga phuthego ya Bokriste. Re a tseba gore bophelo tshepedišong ye ya Sathane gantši ga bo na toka e bile re swanetše go lwantšha maikwelo a go galefišwa ke batho ba babe. (Ps. 37:1-11; Mmo. 8:12, 13; 12:13, 14) Lega go le bjalo, ge go tsoga mathata magareng ga rena le ngwanabo rena goba kgaetšedi wa moya, re ka kwa bohloko kudu. Hlatse e nngwe e gopola gore, “Ge ke be ke sa tšwa go tsena therešong, go be go le thata kudu go amogela gore batho ba Jehofa ga se ba phethagala.” Re tšwile lefaseng leo le se nago lerato le leo le sa tshwenyegego ka batho ba bangwe, re nagana gore bohle ka phuthegong ba  tla swarana ka botho bja Bokriste. Ka gona, ge Mokriste-gotee le rena, kudu-kudu yo a nago le ditokelo ka gare ga phuthego, a dira dilo ka go se naganele goba ka tsela e sa swanelego Mokriste, seo se ka re kweša bohloko goba sa re galefiša. Re ka ba ra ipotšiša gore, ‘Na motho wa Jehofa a ka dira selo sa mohuta wo?’ Ge e le gabotse, dilo tše bjalo di ile tša direga le go Bakriste ba tloditšwego mehleng ya baapostola. (Bagal. 2:11-14; 5:15; Jak. 3:14, 15) Re swanetše go arabela bjang ge dilo tše di re diragalela?

13. Ke ka baka la’ng re swanetše go katanela go rarolla dikgohlano, gona re ka dira seo bjang?

¹³ Kgaetšedi yo re sa tšwago go bolela ka yena o itše: “Ke ithutile go rapelela yo mongwe le yo mongwe yo a nkgopišago. Se ka mehla se a thuša.” Bjalo ka ge re šetše re badile, Jesu o re rutile go rapelela bao ba re tlaišago. (Mat. 5:44) Gona re tloga re swanetše go rapelela bana babo rena le dikgaetšedi! Bjalo ka ge tate a nyaka gore bana ba gagwe ba ratane, Jehofa le yena o nyaka gore bahlanka ba gagwe mo lefaseng ba ratane. Re fagahletše go phela re le gotee ka khutšo le ka lethabo ka mo go sa felego gomme Jehofa o re ruta gore re ithute go dira bjalo gona bjale. O nyaka gore re dirišane go direng modiro wa gagwe o mogolo. Ka gona, anke re rarolleng mathata goba re se “latiše phošô” gomme re tšwele pele ka bophelo. (Bala Diema 19:11.) Go e na le gore re ikarole go bana babo rena ge mathata a tšwelela, re swanetše go katanela go thušana gore re dule gare ga batho ba Modimo, re dula re bolokegile ‘matsogong a neng le neng’ a Jehofa.—Doit. 33:27.

Go ba Bonolo go Bohle go Tliša Mafelelo a Mabotse

14. Re ka lwantšhana bjang le ditutuetšo tša Sathane tša go bopa dihlotswana?

¹⁴ E le go re thibela go bolela ditaba tše dibotse, Sathane le batemona ba gagwe ba katanela go senya malapa le diphuthego tšeo di thabilego. Ba leka go tsoša dikgohlano, ka ge ba tseba gore go bopa dihlotswana go ka baka tshenyo. (Mat. 12:25) E le gore re fenye tutuetšo ya bona e mpe, re dira gabotse ge re latela keletšo ya Paulo e rego: “Mohlanka wa Morena ga se a swanela go  lwa, eupša o swanetše go ba bonolo go bohle.” (2 Tim. 2:24) Gopola gore ntwa ya rena ‘ga e kgahlanong le madi le nama, eupša e kgahlanong le madira a kgopo a moya.’ Gore re atlege ntweng ye, re swanetše go apara ditlhamo tša moya, tšeo di akaretšago go ‘hlangwa ka ditaba tše dibotse tša khutšo.’—Baef. 6:12-18.

15. Re swanetše go arabela bjang ditlhaselong tšeo di tšwago ka ntle ga phuthego?

¹⁵ Manaba a Jehofa ao a tšwago ka ntle ga phuthego a thoma tlhaselo e šoro kgahlanong le batho ba gagwe ba khutšo. A mangwe a manaba a a hlasela Dihlatse tša Jehofa nameng. Ba bangwe ba re thomeletša dikuranteng goba dikgorong tša tsheko. Jesu o boditše balatedi ba gagwe gore se se tla direga. (Mat. 5:11, 12) Re swanetše go arabela bjang? Ga se ra swanela go “bušetša bobe ka bobe,” ka mantšu goba ka ditiro.—Baroma 12:17; bala 1 Petro 3:16.

16, 17. Phuthego e nngwe e ile ya lebeletšana le boemo bofe bjo bo lekago?

¹⁶ Go sa šetšwe gore Diabolo o re tlišetša eng, ge re “fenya bobe ka bolo,” re ka nea bohlatse bjo bobotse. Ka mohlala, phuthego e nngwe sehlakahlakeng se sengwe sa Pacific e ile ya hira holo bakeng sa Segopotšo. Ge bahlankedi ba dikereke tša lefelong leo ba be ba e-kwa se, ba ile ba botša balatedi ba bona gore ba kgobokane holong yeo bakeng sa tirelo ya kereke ka nako yeo Segopotšo sa rena se bego se tla swarwa ka yona. Lega go le bjalo, molaodi wa maphodisa o ile a laela bahlankedi bao ba kereke gore holo yeo e swanetše go ba e se na motho ka nako yeo gore Dihlatse di kgone go e diriša. Eupša ge nako yeo e fihla, holo e be e tletše ka ditho tša kereke ya bona gomme tirelo ya bona e šetše e thomile.

¹⁷ Ge maphodisa a be a itokišeletša go ba gapeletša go tšwa ka holong, moetapele wa kereke o ile a tla go yo mongwe wa bagolo ba rena gomme a botšiša gore: “Na go na le selo se se kgethegilego seo le bego le rulagantše go se dira bošegong bjo?” Ngwanabo rena o ile a mmotša ka Segopotšo gomme monna yoo a re: “Ruri ke be ke sa tsebe!” Ge lephodisa le lengwe le be le e-kwa seo, le ile la goeletša ka gore: “Eupša re le boditše mesong ye!” Monna yo wa kereke o ile a lebelela mogolo yo wa phuthego gomme a myemyela ka tsela ya bohwirihwitšana gomme a re: “Bjale le tlo dira’ng? Holo e tletše ka batho ba rena. Na le tla dira gore maphodisa a re rake?” O be a logile maanomabe a gore Dihlatse tše di bonagale e le batlaiši! Bana babo rena ba be ba tla arabela bjang?

18. Bana babo rena ba ile ba arabela bjang ge ba rumolwa gomme se se bile le mafelelo afe?

¹⁸ Dihlatse di ile tša dumelela batho bao ba kereke go swara tirelo ya bona yeo e bego e tla tšea seripa-gare sa iri, ka morago ga moo bana babo rena ba be ba ka tšwela pele ka Segopotšo. Tirelo ya kereke e ile ya tšea nako e telele, eupša ka morago ga gore batho bao ba kereke ba sepele, Segopotšo se ile sa swarwa. Letšatšing le le latelago, mmušo o ile wa dira gore go be le seboka sa mmušo sa go ipelaetša. Ka morago ga go boledišana ka taba ye, lekgotla le ile la gapeletša kereke go dira tsebišo ya gore modu wa bothata e be e se Dihlatse, eupša e be e le moetapele wa kereke. Lekgotla le ile la ba la leboga Dihlatse tša Jehofa mabapi le go se fele pelo ga tšona ge di swaragana le boemo bjo bjo thata. Maiteko a Dihlatse a go ba “le khutšo le batho bohle” a bile le mafelelo a mabotse.

19. Ke’ng se sengwe seo se ka dirago gore re be le ditirišano tša khutšo?

¹⁹ Selo se sengwe seo se dirago gore go be le khutšo ditirišanong tša rena le ba bangwe ke go diriša polelo e botho. Sehlogo se se latelago se tla ahla-ahla seo polelo e botho e lego sona le kamoo re ka e hlagolelago ka gona le go e diriša.

[Mongwalo wa tlase]

Na o ka Hlalosa?

• Ke ka baka la’ng batho ba galefile ka tsela ye lefaseng lehono?

• Ke mehlala efe ya ka Beibeleng yeo e bontšhago mafelelo a go laola kgalefo le go se e laole?

• Re swanetše go itshwara bjang ge Mokriste-gotee le rena a re kgopiša?

• Re swanetše go itshwara bjang ge re hlaselwa ke bao ba lego ka ntle ga phuthego?

[Dipotšišo tša Thuto]

[Seswantšho go letlakala 16]

Simeone le Lefi ba ile ba theoša maswafo—eupša ka morago ga ge ba ile ba laolwa ke kgalefo

[Diswantšho go letlakala 18]

Go bontšha botho go ka dira gore ba bangwe ba be bonolo