Dira Gore Bana ba Gago ba Rate go Bala le go Ithuta

GO KATANELA go ruta bana ba gago go bala le go ithuta go ka bopa bokamoso bja bona. Ruri go bala le go ithuta go thabiša kudu! Tše dingwe tša dilo tšeo batho ba bangwe ba thabelago go di gopola tša nakong ya ge e sa le bana ke ge batswadi ba bona ba be ba ba balela. Go bala go a thabiša e bile go na le meputso e thabišago. Se ke sa therešo kudu-kudu go bahlanka ba Modimo, ka ge kgolo ya moya e tlišwa ke go ithuta Beibele. Motswadi yo mongwe wa Mokriste o lemogile gore: “Dilo tšeo re di tšeago e le tša bohlokwa di tswalana le go bala le go ithuta.”

Go ba le mekgwa e mebotse ya go ithuta go ka thuša bana ba gago gore ba be le tswalano ya kgaufsi le Modimo. (Ps. 1:1-3, 6) Le ge go tseba go bala e se gona go tla dirago gore re phologe, Beibele e re re ka holega kudu moyeng ge re bala. Ka mohlala, Kutollo 1:3 e re: “Go thaba yo a balago ka go hlaboša le bao ba kwago mantšu a boporofeta bjo.” Go feta moo, mohola wa go tsepamiša kgopolo, e lego mokgwa o bohlokwa wa go ithuta, o bolelwa ka mo go kwagalago ke moapostola Paulo keletšong ya gagwe e buduletšwego e yago go Timotheo, e rego: “Eleletša ka dilo tše; nwelela go tšona.” Ka baka la’ng? “Gore tšwelopele ya gago e bonagale go batho bohle.”—1 Tim. 4:15.

Ke therešo gore go fo tseba go bala le go ithuta ga se kgonthišetšo ya gore motho o tla holega. Ba bantši bao ba nago le bokgoni bjo ga ba bo diriše; go e na le moo, ba phegelela dilo tše di sa rego selo. Ka gona, batswadi ba ka thuša bana ba bona bjang go rata tsebo e nago le mohola?

Lerato la Gago le Mohlala wa Gago

Bana ba thabela dinako tša go ithuta ge e ba di dirwa ka lerato. Owen le Claudia e lego banyalani ba Bakriste, ba gopola ka bana ba bona ba babedi gore: “Ba be ba fagahlela nako ya go ithuta ka gobane e be e le e kgethegilego—ba be ba ikwa ba šireletšegile e bile ba iketlile. Ba ile ba thoma go lebelela nako ye e le yeo e tletšego borutho.” Gaešita le ge bana ba tsena nywageng ya mahlalagading yeo e nago le ditlhohlo, thuto ya lapa yeo e nago le lerato e tla tšwela pele e kgoma pono ya bona. Bana ba Owen le Claudia ga bjale ke babulamadibogo gomme ba sa dutše ba holwa ke tlwaetšo ya go rata go bala le go ithuta yeo ba e hweditšego go batswadi ba bona.

Go beela bana mohlala ke thušo e matla yeo e ba bontšhago gore ba a ratwa. Bana bao gantši ba bonago batswadi ba bona ba bala le go ithuta gantši ba lebelela mediro ye e le karolo ya maphelo a bona. Eupša wena bjalo ka motswadi o tla ba o bea mohlala wa mohuta mang ge e ba o sa itlwaetše go bala? Go ka nyakega gore o beakanye dilo tše di tlago pele bophelong bja gago goba pono ya gago mabapi le go bala. (Baroma 2:21) Ge e ba go bala e le mokgwa wa gago wa letšatši le letšatši, se se tla kgoma le bana ba gago. Go ba mafolofolo—kudu-kudu ge o bala Beibele, ge o lokišeletša diboka le thutong ya lapa—go tla ba thuša go bona bohlokwa bja mediro ye.

 Ka gona, lerato la gago le mohlala wa gago ke tša bohlokwa go direng gore bana ba gago ba kganyoge go bala. Eupša o ka gata megato efe e šomago gore o ba kgothatše?

Dira Gore ba Rate go Bala

O ka gata megato efe e mengwe e bohlokwa ge o dutše o thuša bana ba gago gore ba rate go bala? Dira gore ba be le dipuku go tloga e sa le ba banyenyane. Mogolo yo mongwe wa Mokriste yo batswadi ba gagwe ba dirilego gore a rate go bala o eletša ka gore: “Tlwaetša bana ba gago go swara dipuku. Ka tsela yeo, dipuku e ba bagwera ba bona le go ba karolo ya bophelo bja bona.” Dipuku tšeo di theilwego Beibeleng tša go swana le Ithute go Morutiši yo Mogolo le Puku Ya-ka ya Ditaba tša Beibele e ba bagwera ba kgaufsi ba bana ba bantši le pele ba ka kgona go bala. Ge o bala dikgatišo tša go swana le tše le bana ba gago, o dira gore ba tlwaelane le leleme gotee le “ditaba tša moya” le “mantšu a moya.”—1 Bakor. 2:13.

Balela godimo ka mehla. E-ba le lenaneo la go bala le bana ba gago letšatši le letšatši. Go dira bjalo go ba ruta mokgwa o nepagetšego wa go bitša mantšu le go godiša mokgwa wa go bala. Tsela yeo o balago ka yona le yona e bohlokwa. E-ba mafolofolo, le bona ba tla ba mafolofolo. Ge e le gabotse, bana ba gago ba ka go kgopela gore o ba balele kanegelo e tee gantši-ntši. Dira se ba se kgopelago! Ge nako e dutše e e-ya, ba tla nyaka go kwa dikanegelo tše difsa. Eupša hlokomela gore o se ke wa gapeletša bana go bala. Jesu o beile mohlala ka go ruta batheetši ba gagwe ge feela ba be “ba kgona go theetša.” (Mar. 4:33) Ge e ba o sa gapeletše bana ba gago go bala, ba tla fagahlela nako yeo gomme o tla ba o atlegile pakaneng ya gago ya go dira gore ba rate go bala.

Ba kgothaletše go tšea karolo le go boledišana ka seo le se balago. O tla thaba ge o bona bana ba gago ba banyenyane ba kgona go tseba mantšu a mantši, ba kgona go a bitša gabotse le go kwešiša tlhaloso ya ona. Go ahla-ahla seo le se balago go ka godiša kudu tšwelopele ya bona. Puku ya mabapi le kamoo bana ba ka thušwago ka gona gore e be babadi ba babotse e re, poledišano e thuša bana “go ithuta mantšu ao ka morago ba tla swanelwago ke go a tseba le go a kwešiša ge ba bala.” Puku yeo e tšwela pele ka gore “poledišano e bohlokwa baneng ba banyenyane bao menagano ya bona e sa dutšego e rata go tseba go bala—go ka ba kaone kudu ge poledišano yeo . . . e ka ba le morero.”

E re bana ba gago ba go balele gomme o ba kgothaletše go botšiša dipotšišo. O ka botšiša dipotšišo gomme wa šišinya dikarabo tše mmalwa tšeo e nngwe ya tšona e lego e nepagetšego. Ka tsela yeo, bana ba ithuta gore dipuku ke mothopo wa tsebišo le gore mantšu ao ba a balago a na le seo a se bolelago. Tsela ye e hola kudu ge e ba seo le se balago se theilwe Lentšung la Modimo, puku e holago kudu go feta tše dingwe.—Baheb. 4:12.

Lega go le bjalo, o se ke wa lebala gore go bala ke bokgoni bjo bo raraganego. Go nyakega nako le go itlwaetša gantši gore o go kgone. * Ka gona kgothaletša bana ba banyenyane gore ba rate go bala ka go ba reta ka lerato. Ka go reta bana ba gago, o tla ba o ba kgothaletša go rata go bala.

Go Bohlokwa e Bile go a Thabiša

Go ruta bana ba gago mokgwa wa go ithuta go dira gore ba bale ka tsela e nago le morero. Go ithuta go akaretša go hwetša dintlha le go kwešiša kamoo di tswalanago ka gona. Go akaretša bokgoni bja go rulaganya, go gopola le go diriša tsebišo yeo e hweditšwego. Ge ngwana a šetše a tseba mekgwa ya go ithuta e bile a bona mehola ya yona, o tla lemoga gore go bohlokwa e bile go a thabiša.—Mmo. 10:10.

Bontšha bohlokwa bja go ithuta. Mantšiboa a Borapedi bja Lapa, dipoledišano tša temana ya letšatši le dinako tše di swanago le tše di nea dibaka tše dibotse tša go ruta bana bohlokwa bja go ithuta. Go dula ba kgosetše bakeng sa thuto e itšego ka nakwana go tla ba ruta go tsepamiša  kgopolo, moo go lego bohlokwa ge motho a ithuta. Go feta moo, o ka kgothaletša morwa wa gago go go botša gore seo a sa tšwago go ithuta sona se tswalana bjang le seo a šetšego a se tseba. Se se mo ruta gore a bapiše. O re’ng o sa kgopele morwedi wa gago gore a akaretše ka mantšu a gagwe seo a sa tšwago go se bala? Se se tla mo thuša go kwešiša taba le go e gopola. Go bušeletša, e lego go boeletša dintlha tša bohlokwa ka morago ga go bala sehlogo se itšego ke mokgwa o mongwe woo o ka thušago bana ba gago go gopola seo o ba rutilego sona. Gaešita le bana ba banyenyane ba ka rutwa go ngwala dintlha tše dikopana nakong ya go ithuta goba dibokeng tša phuthego. Se e ka ba thušo e kgolo gakaakang ya go ba thuša go tsepamiša kgopolo! Mekgwa ye e bonolo e dira gore go ithuta e be mo go thabišago le mo go nago le morero go wena gotee le go bana ba gago.

Dira gore maemo a le dumelele go ithuta. Ge go tsena moya o lekanego le seetša se se swanetšego gomme go homotše, seo se dira gore go tsepamiša kgopolo go be bonolo. Ke therešo gore tsela yeo batswadi ba lebelelago go ithuta ka yona e bohlokwa. Mma yo mongwe o lemogile gore, “go bohlokwa kudu gore ka mehla o iphe nako ya go bala le ya go ithuta. Se se thuša bana ba gago gore ba be le thulaganyo. Ba ithuta gore selo se sengwe le se sengwe se nyaka gore se phethwe ka nako e itšego.” Batswadi ba bantši ba thibela mediro e mengwe ka dinako tša go ithuta. Go ya ka mongwadi yo mongwe, tsela ye ke tutuetšo e kgolo ya go ruta bana gore ba be le mekgwa e mebotse ya go ithuta.

Gatelela bohlokwa bja go ithuta. Mafelelong, thuša bana ba gago gore ba bone mehola ya go ithuta. Go diriša tsebišo yeo ba ithutilego yona go gatelela morero wa kgonthe wa thuto. Ngwanabo rena yo mongwe yo mofsa o dumela gore: “Ge e ba ke sa bone kamoo seo ke ithutago sona se nkholago ka gona, ruri ke thatafalelwa ke go nyaka go ithuta sona. Eupša ge e ba nka kgona go se diriša, ke gona moo ke nyakago go se kwešiša.” Ge e ba bafsa ba lebelela go ithuta e le selo sa bohlokwa, ba tla rata go ithuta. Ba tla thoma go fagahlela go ithuta go swana le ge ba ile ba fagahlela go bala.

Moputso o Mokaone-kaone

Go na le ditsela tše dintši tšeo go ka bolelwago ka tšona tša bohlokwa bja go dira gore bana ba gago ba rate go bala. Go atlega sekolong, mošomong, ditswalanong le batho ba bangwe, go kwešiša lefase leo re phelago go lona le go ba le tswalano ya kgaufsi magareng ga motswadi le ngwana ke e mengwe ya mehola yeo e tlišwago ke go bala le go ithuta, re sa bolele ka kgotsofalo ya kgonthe yeo e tlišwago ke seo.

Go feta tšohle, go rata go ithuta go ka thuša bana ba gago gore e be batho ba moya. Go rata go ithuta ke gona go tla bulago menagano le dipelo tša bona gore ba hwetše “bophara le botelele le bophagamo le go iša” ga ditherešo tša Mangwalo. (Baef. 3:18) Ke therešo gore batswadi ba Bakriste ba na le mo gontši mo ba ka go rutago bana ba bona. Ge batswadi ba dutše ba nea bana ba bona nako le tlhokomelo gomme ba dira sohle seo ba ka se kgonago e le go ba thomela bophelo bjo bobotse, ba holofela gore bana ba bona mafelelong ba tla kgetha go ba barapedi ba Jehofa. Go ruta bana ba lena mekgwa e mebotse ya go ithuta go ba thuša go šireletša bomoya bja bona le go aga tswalano e botse le Modimo. Ka gona, ka mešego-feela, tsoma ditšhegofatšo tša Jehofa ka thapelo ge o dutše o dira gore bana ba gago ba rate go bala le go ithuta.—Die. 22:6.

[Mongwalo wa tlase]

 [Box/​Pictures on page 26]

Go Bala . . .

• Dira gore dipuku di hwetšagale

• Balela godimo

• Kgothaletša bana go tšea karolo

• Ahla-ahlang seo le se balago

• E re bana ba gago ba go balele

• Kgothaletša bana go botšiša dipotšišo

Go ithuta . . .

• Bea mohlala o mobotse bjalo ka motswadi

• Tlwaetša bana ba gago go . . . 

○ tsepamiša kgopolo

○ bapiša

○ akaretša

○ bušeletša

○ ngwala dintlha

• Dira gore maemo a le dumelele go ithuta

• Gatelela bohlokwa bja go ithuta