Go Phakgama go Tliša Mafelelo a Mabotse

NA O dula o phakgametše dibaka tša go dira boboledi tšeo di ka tšwelelago go sa letelwa tšhemong ya phuthego ya gabo lena? Bana babo rena ba Bakriste boema-kepeng bja kgale bja motse wa Turku, kua Finland ba be ba phakgame gomme seo se ile sa tliša mafelelo a mabotse.

Nakong e fetilego, bana babo rena ba kua Turku ba ile ba lemoga sehlopha sa banna ba Asia se šetše se fihlile motseng woo go tlo aga sekepe lefelong leo dikepe di dirwago le go lokišwa gona. Ka morago, ngwanabo rena yo mongwe o ile a hwetša dihotele tšeo bašomi ba bao ba tšwago nageng e šele ba dulago go tšona. O ile a ba a kwa gore bašomi ba be ba sepela ka dipese go tšwa dihoteleng tša bona ka toropong go ya boema-kepeng e sa le mesong. Kapejana o ile a tsebiša bana babo rena ba phuthego ya Turku ba ba bolelago Seisemane ka taba ye.

Bagolo ba phuthego yeo ba ile ba lemoga gore go ba gona ga batho ba bantši ba ba tšwago nageng e šele go ba buletše sebaka se sebotse sa go boledišana le bona ka molaetša wa Mmušo gomme kapejana ba ile ba lokišetša lesolo le le kgethegilego. Ka Sontaga sa yona beke yeo, bagoeledi ba lesome ba ile ba kgobokana kgaufsi le boema-pese ka iri ya bošupa mesong. Mathomong, bašomi ba be ba sa tšwelele. Bana babo rena ba ile ba ipotšiša gore ‘Na re fihlile ka morago ga nako? Na ba šetše ba tlogile Turku?’ Eupša ka nako yeo, mošomi yo mongwe o ile a tšwelela a apere diaparo tša mošomo. Yo mongwe a latela gomme ba bangwe ba bantši ba ile ba tšwelela. Go se go ye kae, ke ge sehlopha sa bašomi se kgobokane kgaufsi le boema-pese. Bagoeledi ba ile ba thoma go dira boboledi go bašomi le go ba nea dikgatišo tša Seisemane. Ka mahlatse, go tšere mo e ka bago iri pele bašomi ka moka ba ka hwetša madulo ka dipeseng, e lego seo se ilego sa nea bana babo rena nako e lekanego ya go boledišana le bontši bja bona. Ge dipese di tloga, bašomi ba be ba sepedišeditšwe dipukwana tše 126 le dimakasine tše 329!

Go atlega mo go ile gwa kgothaletša bana babo rena gore ba boeletše lesolo le bekeng e latelago yeo e bego e le ketelo ya molebeledi wa tikologo. Ka seripa-gare go tšwa iring ya botshelela mesong ge pula e e-na, molebeledi wa tikologo o ile a swara seboka sa tirelo ya tšhemo gomme bagoeledi ba 24 ba ile ba leba boema-peseng. Mo nakong ye, ba be ba swere dikgatišo tša se-Tagalog ka ge ba ile ba hwetša gore bontši bja batho bašele ba be ba e-tšwa Philippines. Mesong yeo, ge dipese di tloga di leba boema-kepeng, bašomi ba be ba sepedišeditšwe dipuku tše 7, dipukuwana tše 69 le dimakasine tše 479. Nagana kamoo bana babo rena le dikgaetšedi bao ba tšerego karolo lesolong le ba ilego ba thaba ka gona!

Pele bašomi ba boela dinageng tša gabo bona, bana babo rena ba ile ba kgona go etela ba mmalwa ba bona dihoteleng moo ba bego ba dula gona le go ba hlalosetša ka mo go oketšegilego ka molaetša wa Mmušo. Bašomi ba bangwe ba ile ba bolela gore nakong e fetilego ba ile ba kopana le Dihlatse dikarolong tše dingwe tša lefase. Bašomi ba ile ba leboga bana babo rena ka ge ba ile ba dira maiteko a go ikopanya le bona nakong ya ge ba le kua Finland.

Na o phakgametše dibaka tša go dira boboledi tšeo di ka tšwelelago go sa letelwa tšhemong ya phuthego ya gabo lena? Na o leka go fihlelela batho ba ditšo tše di sa swanego? Ge o ka dira bjalo, le wena o ka ba le diphihlelo tše di swanago le tšeo di thabetšwego ke bana babo rena ba kua Turku.

[Mmapa/​Seswantšho go letlakala 32]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

FINLAND

HELSINKI

Turku

[Mothopo]

STX Europe