“Se Boifê, Ké Nna ke Xo Phološaxo!”

JESU o lemošitše balatedi ba gagwe e sa le pele gore: “Diabolo o tla dula a lahlela ba bangwe ba lena kgolegong e le gore le lekwe ka mo go feletšego.” Lega go le bjalo, pele ga temošo yeo, Jesu o itše: “O se boife dilo tše o tla tlogago o tlaišwa ka tšona.” Ka ge Sathane a tšwela pele a tšhošetša batho ka kgolego e le gore a ba thibele go bolela ka Mmušo, go na le kgonagalo ya kgonthe ya gore mebušo e mengwe e tla tlaiša Bakriste ba therešo. (Kut. 2:10; 12:17) Ka gona, re tla thušwa ke’ng gore re itokišeletše maano a Sathane gomme re “se boife,” bjalo ka ge Jesu a kgothaleditše?

Ke therešo gore bontši bja rena re kile ra ikwa re boifa ka nako e nngwe. Lega go le bjalo, Lentšu la Modimo le re kgonthišetša gore Jehofa a ka re thuša go phema go ineela poifong. Bjang? Tsela e nngwe yeo Jehofa a re thušago ka yona go lebeletšana le kganetšo ke ka go lemoga maano ao Sathane le baemedi ba gagwe ba a dirišago. (2 Bakor. 2:11) Go bontšha gore seo se kgonega bjang, anke re hlahlobeng tiragalo yeo e diregilego mehleng ya Beibele. Re tla hlahloba le mehlala ya mehleng yeno ya badumedi-gotee le rena ba ba botegago bao ba ilego ba ‘kgona go emela maano a bohwirihwiri a Diabolo ba tiile.’—Baef. 6:11-13.

Kgoši e Boifago Modimo e Lebeletšana le Mmuši yo Mobe

Lekgolong la seswai la nywaga B.C.E., Kgoši e mpe ya Asiria e lego Sanheribe e ile ya fenya ditšhaba tše dintšinyana ntweng. Ka ge e be e tletše kholofelo, e ile ya itokišeletša go hlasela batho ba Jehofa le motse wa bona o mogolo, Jerusalema, moo go bego go buša Hiskia yo a boifago Modimo. (2 Dikx. 18:1-3, 13) Ga go pelaelo gore Sathane o be a kgahlišwa ke se, a diriša Sanheribe go atlegiša maano a gagwe a gore borapedi bja therešo bo fedišwe lefaseng.—Gen. 3:15.

Sanheribe o ile a romela batho Jerusalema gore ba gapeletše badudi ba motse woo go ineela. Yo mongwe wa bao ba bego ba romilwe e be e le Rabasake, yo e bego e le mmoleledi yo mogolo wa kgoši. * (2 Dikx. 18:17) Maikemišetšo a Rabasake e be e le go nyamiša Bajuda le go dira gore ba fo ineela. Ke mekgwa efe yeo Rabasake a ilego a e šomiša maitekong a go dira gore Bajuda ba boife?

Go Botega go sa Šetšwe go ba Lekatana

Rabasake o boditše baemedi ba Hiskia gore: “Kxoši e kxolo, kxoši ya Asiria e re: Ké kholofêlô mang ye O e bôtaxo? . . . O holofetše Egipita lehlakanoka leo le le tenexilexo, le e rexo xe motho a ikôkôtlêla ka lôna, le mo thule seatla!” (2 Dikx. 18:19, 21) Tatofatšo ya Rabasake e be e le maaka ka gobane Hiskia o be a sa ka a dira  kgwerano le Egipita. Lega go le bjalo, tatofatšo yeo e be e bontšha seo Rabasake a bego a nyaka gore Bajuda ba se gopole gabotse, gore: ‘Le ka se thušwe ke motho. Le nnoši—le lekatana.’

Dinakong tša morago bjale, baganetši ba borapedi bja therešo le bona ba dirišitše ditšhošetšo tša go ba lekatana e le ge ba leka go dira gore Bakriste ba therešo ba boife. Kgaetšedi yo mongwe wa Mokriste, yo a ilego a golegwa ka baka la tumelo ya gagwe gomme a aroganywa le badumedi-gotee le yena ka nywaga e mentši o ile a hlalosa ka morago seo se mo thušitšego go fenya poifo. O itše: “Thapelo e nthušitše go batamela kgaufsi le Jehofa . . . Ke ile ka gopola kgonthišetšo yeo e lego go Jesaya 66:2 ya gore Modimo o šetša ‘mohlaki le wa pelo e setlegilego.’ Se ka mehla se be se mmatlafatša le go nkhomotša kudu.” Ka mo go swanago, ngwanabo rena yo a feditšego nywaga e mentši a le kgolegong ya bodula-noši o itše: “Ke ile ka lemoga gore sele e nyenyane ya khutlo-nne-thwii e ka ba ya ba lefelo le nnoši moo motho a thabelago tswalano ya kgaufsi le Modimo.” Ee, go ba le tswalano ya kgaufsi le Jehofa go neile Bakriste ba ba babedi matla ao ba bego ba a nyaka gore ba lebeletšane le go ba lekatana. (Ps. 9:9, 10) Batlaiši ba bona ba be ba ka ba aroganya le ba malapa a bona, bagwera le badumedi-gotee le bona, eupša Dihlatse tše tšeo di golegilwego di be di tseba gore baganetši ba tšona ba ka sa tsoge ba di arogantše le Jehofa.—Baroma 8:35-39.

Ka gona, ke gabohlokwa gakaakang gore re diriše sebaka se sengwe le se sengwe seo re se hwetšago go matlafatša tswalano ya rena le Jehofa! (Jak. 4:8) Re swanetše go dula re ipotšiša gore: ‘Jehofa ke wa kgonthe gakaaka’ng go nna? Na mantšu a gagwe a ntutuetša ka mo go tseneletšego ge ke dutše ke dira diphetho, tše dinyenyane le tše dikgolo, bophelong bja letšatši le letšatši?’ (Luka 16:10) Ge e ba re katanela go dula re e-na le tswalano ya kgaufsi le Modimo, ga re na lebaka la go boifa. Ge moporofeta Jeremia a be a emelela Bajuda bao ba bego ba hlokofaditšwe, o itše: “Kè le tlase-tlase moleteng ka bitša leina la xaxo, Morêna. . . . Wa mpatamêla mohla woo kè Xo bitša, wa re: Se boifê!”—Dillo 3:55-57.

Go Bjala Dipelaelo go a Folotša

Rabasake o ile a diriša mabaka a bohwirihwiri ka maiteko a go bjala dipelaelo. O itše: “Naa xa se yena Hiskia e a feditšexo meboto ya [Jehofa], le dialetare tša Xaxwe . . . Hleng ké Yêna Morêna a nthomilexo a re: Rotoxa O senyê naxa yeo.” (2 Dikx. 18:22, 25) Ka gona, Rabasake o be a ganetša taba ya gore Jehofa a ka se ke a lwela batho ba Gagwe ka gobane ba be ba Mo nyamišitše. Eupša go be go se bjalo. Jehofa o be a kgahlwa ke Hiskia le Bajuda bao ba bego ba boetše borapeding bja therešo.—2 Dikx. 18:3-7.

Lehono, batlaiši ba ka bolela ditaba tšeo e lego therešo ka maano a go thea motheo wa tumelelano, eupša ba sekamiša therešo go se nene ka go e tswaka ka maaka, ka kholofelo ya gore ba tla bjala dipelaelo. Ka mohlala, bana babo rena le dikgaetšedi bao ba golegilwego ba kile ba botšwa gore ngwanabo rena yo a etelelago pele nageng ya gabo bona o latotše tumelo ya gagwe gomme e ka se be phošo ge le bona ba ka dira bjalo le go tlogela ditumelo tša bona. Lega go le bjalo, go nea mabaka ka tsela e bjalo ga go tsoše dipelaelo go Bakriste bao ba nago le temogo.

Ela hloko seo se diragaletšego kgaetšedi wa Mokriste nakong ya Ntwa ya II ya Lefase. Ge a be a golegilwe, o ile a bontšhwa pampiri yeo e bego e bontšha gore ngwanabo rena yo a nago le boikarabelo o latotše tumelo ya gagwe.  Mmotšološiši o ile a botšiša kgaetšedi yo ge e ba a bota Hlatse yeo. Kgaetšedi yo o ile a araba ka gore, “E fo ba e le motho yo a sa phethagalago.” O ile a oketša ka gore ge feela ngwanabo rena yoo a be a sa dutše a latela melao ya motheo ya Beibele, Modimo o be a mo diriša. “Eupša bjalo ka ge mantšu a gagwe a fapana le seo Beibele e se bolelago, ga e sa hlwa e le ngwanešo.” Kgaetšedi yoo yo a botegago ka bohlale o latetše keletšo ya Beibele e rego: “Se boteng maxoši e lexo bana ba batho, bao xo sexo phološô xo bôná.”—Ps. 146:3.

Go ba le tsebo e nepagetšego ya Lentšu la Modimo le go diriša keletšo ya lona go tla re thuša go itšhireletša kgahlanong le go nea mabaka ka tsela e fošagetšego moo go ka fokodišago maikemišetšo a rena a go kgotlelela. (Baef. 4:13, 14; Baheb. 6:19) Ka baka leo, e le gore re itokišeletše go kgona go nagana gabotse ge re le ka tlase ga kgateletšego, re swanetše go etiša pele mmalo wa Beibele wa ka mehla le thuto ya motho ka noši. (Baheb. 4:12) Ee, ga bjale ke nako ya go oketša tsebo ya rena le go matlafatša tumelo ya rena. Ngwanabo rena yo a kgotleletšego nywaga e mentši kgolegong ya bodula-noši o itše: “Ke rata go kgothaletša bohle go bontšha tebogo e swanetšego ya dijo ka moka tša moya tšeo re newago tšona ka ge re sa tsebe kamoo di ka re holago ka gona ka nako e nngwe.” Ee, ge re ithuta Lentšu la Modimo ka kelohloko gotee le dikgatišo tše di newago ke sehlopha sa mohlanka lehono, gona moya o mokgethwa o tla re “gopotša” seo re ithutilego sona ge go tšwelela dinako tše thata bophelong.—Joh. 14:26.

Go Šireletšwa Kgahlanong le Botšhošetši

Rabasake o ile a leka go tšhošetša Bajuda. O itše: “O k’O lekê mamphexa le mong wa-ka kxoši ya Asiria, nna ke neê dipitsi tše dikete tše pedi, re bônê xe O ka kxôna xo nthša banamedi ba tšona. Le mokxôma o tee wa bahlanka ba banyane ba mong wa-ka O ka kxona bya’ng xo mo raka.” (2 Dikx. 18:23, 24) Go ya ka pono ya motho, Hiskia le batho ba gagwe ba paletšwe ke go lwa le madira a matla a Asiria.

Le batlaiši ba lehono ba ka bonagala ba le matla kudu, kudu-kudu ge ba thekgwa ke Mmušo wa naga. Ruri go bile bjalo ka batlaiši ba Nazi nakong ya Ntwa ya II ya Lefase. Ba ile ba leka go tšhošetša bontši bja bahlanka ba Modimo. Yo mongwe wa bana babo rena, yo a feditšego nywaga e mentši a le kgolegong, o hlalositše ka morago kamoo a ilego a tšhošetšwa ka gona. Lebakeng le lengwe, mohlankedi o ile a mmotšiša gore: “Na o bone kamoo morwarrago a thuntšhitšwego ka gona? O ithutile’ng go seo?” O arabile ka gore: “Ke nna hlatse ya Jehofa gomme ke tla dula ke le yona.” Mohlankedi a mo tšhošetša ka gore: “Gona go tla latela wena.” Lega go le bjalo, ngwanabo rena o ile a dula a tiile, lenaba la ba la fela matla. O thušitšwe ke’ng gore a lebeletšane le tšhošetšo yeo? O arabile ka gore: “Ke ile ka bota leina la Jehofa.”—Die. 18:10.

Ka go ba le tumelo e tiilego go Jehofa, re rwala sephemo se segolo seo se re šireletšago dilong ka moka tšeo Sathane a di dirišago bakeng sa go re gobatša moyeng. (Baef. 6:16) Ka baka leo, re swanetše go kgopela Jehofa ka thapelo gore a re thuše go matlafatša tumelo ya rena. (Luka 17:5) Le gona re swanetše go diriša gabotse dithulaganyo tše di matlafatšago tumelo tšeo di newago ke sehlopha sa mohlanka yo a botegago. Ge re tšhošetšwa, re matlafatšwa ke go gopola kgonthišetšo yeo Jehofa a e neilego moporofeta Hesekiele, yo a ilego a swanelwa ke go bolela le batho ba dihlogo tše thata. Jehofa o mmoditše gore: “Le sa xaxo sefahloxô ke se thatafatša byalo ka tša bôná, le ya xaxo phatla ke e thatafatša ya etša tša bôná. Le ya xaxo phatla ke e nea bothata bya talama le bya lexakabyê.” (Hesek. 3:8, 9) Ge e ba go nyakega, Jehofa a ka re thuša go tia bjalo ka talama bjalo ka ge Hesekiele a ile a swanelwa ke go ba bjalo.

Go Lwantšha Diteko

Baganetši ba hweditše gore ge maano ka moka a folotša, ka dinako tše dingwe go holofetšwa meputso go ka senya potego ya motho. Rabasake le yena o ile a diriša mokgwa wo. O boditše bao ba lego Jerusalema gore: “Kxoši ya  Asiria [e] re: Ntobeng, Le tšwê Le tle xo nna; . . . Ké mo ke tl’o xo boa ka le iša naxeng e swanaxo le yé ya xeno, naxa ya mabèlê’ le ya dienywa, naxa ya boxôbê le ya dirapá tša merara, ya makhura a mehlware le ya dinose. Ké mo Le tl’o xo phela, la se kê la hwa!” (2 Dikx. 18:31, 32) Tebelelo ya go ja senkgwa seo se sa tšwago ka ontong le go nwa beine e mpsha e swanetše go ba e ile ya thabiša bao ba bego ba tswaleletšwe merakong e dikaneditšwego ya motse!

Go kile gwa dirišwa maiteko a bjalo go leka go fokodiša maikemišetšo a moromiwa yo a golegilwego. O be a boditšwe gore o tla išwa moo go thwego ke legae le le kgahlišago tšhemong e botse ka dikgwedi tše tshela gore a kgone go nagana gabotse. Lega go le bjalo, ngwanabo rena o ile a dula a phafogile moyeng gomme a se ke a kwanantšha melao ya gagwe ya motheo ya Bokriste. O thušitšwe ke’ng? O hlalositše ka morago gore: “Ke be ke dutše ke nagana ka Mmušo e le kholofelo ya kgonthe. . . . Ka ge ke be ke matlafaditšwe ke go tseba Mmušo wa Modimo, ke kgodišegile ka wona e bile ke sa o belaele le gatee, ga go seo se bego se ka nkaroša.”

Mmušo wa Modimo ke wa kgonthe gakaaka’ng go rena? Mopatriareka Aborahama, moapostola Paulo le Jesu ka boyena ba be ba kgona go kgotlelela diteko tše boima ka ge Mmušo e be e le selo sa kgonthe go bona. (Bafil. 3:13, 14; Baheb. 11:8-10; 12:2) Ge e ba re dula re etiša Mmušo pele maphelong a rena gomme re dula re nagana ka ditšhegofatšo tša wona tša sa ruri, le rena re ka kgona go lwantšha teko ya go amogela dilo tšeo di tla re lokollago ditekong ka nakwana.—2 Bakor. 4:16-18.

Jehofa a ka se re Lahle

Go sa šetšwe maiteko ka moka ao Rabasake a a dirilego a go tšhošetša Bajuda, Hiskia le balata ba gagwe ba ile ba bota Jehofa ka go tia. (2 Dikx. 19:15, 19; Jes. 37:5-7) Ka baka leo, e le ge a araba dithapelo tša bona tša go kgopela thušo, Jehofa o ile a romela morongwa gore a fediše madira a 185 000 mešašeng ya Baasiria ka bošego botee. Letšatšing le le latetšego, kapejana Sanheribe o ile a boela motseng-mošate wa gabo, Ninife, a e-na le madira a sego kae ao a bego a šetše.—2 Dikx. 19:35, 36.

Go molaleng gore Jehofa ga se a ka a lahla bao ba mmotago. Mehlala ya mehleng yeno ya bana babo rena le dikgaetšedi bao ba emago ka go tia ge ba lekwa e bontšha gore le lehono Jehofa ga a lahle bao ba mmotago. Ka baka leo, go na le lebaka le lebotse leo le dirago gore Tatago rena wa legodimong a re kgonthišetše ka gore: “Nna Morêna ké Modimo w’axo; ke Xo swere ka seatla sa-ka sa le letona, ’me ke bolêla naxô ke re: Se boifê, ké Nna ke Xo phološaxo!”—Jes. 41:13.

[Mongwalo wa tlase]

[Ntlhakgolo go letlakala 13]

Ka makga a fetago a 30 ka Lentšung la gagwe, Jehofa ka boyena o kgonthišetša bahlanka ba gagwe gore: ‘O se ke wa boifa’

[Seswantšho go letlakala 12]

Maano a Rabasake a be a swana bjang le ao a dirišwago ke manaba a batho ba Modimo lehono?

[Diswantšho go letlakala 15]

Tswalano ya kgaufsi le Jehofa e re thuša go dula re botega ge re lekwa